13/09/2025
❤️❤️❤️
أنا كجراح عظام، حابب أشارككم نقطة مهمة جدًا بنشوفها كل يوم في العيادة، وهي العلاج الطبيعي.
ناس كتير فاكرة إن دورنا كأطباء عظام بيقف عند الدوا أو العملية أو الجبس، لكن الحقيقة إن العلاج الطبيعي مكمل أساسي وبيفرق جامد جدًا في رحلة العلاج.
💡 مثلًا:
بعد الكسور، مش كفاية إن العضم يلحم، لازم كمان نرجّع العضلة لحالتها ونرجّع المفصل لحركته الطبيعية. هنا بييجي دور العلاج الطبيعي.
بعد العمليات الكبيرة زي تغيير المفاصل أو تثبيت الكسور، او عمليات المناظير زي الرباط الصليبي
العلاج الطبيعي هو اللي بيخلي المريض يرجع يمشي كويس ويتحرك من غير قيود.
كمان في مشاكل زي آلام الرقبة أو أسفل الظهر، ساعات العلاج الطبيعي بالتمارين والعادات الصح بيبقى أهم من الدوا نفسه.
والمهم جدًا نفهم إن العلاج الطبيعي علم، وأخصائي العلاج الطبيعي بيتعلمه في كلية متخصصة سنين طويلة، بيدرسوا فيها التشريح، علم الأعصاب، الميكانيكا الحيوية، وطرق التأهيل.
يعني مش أي حد ينفع يعمل علاج طبيعي! لازم يكون أخصائي مؤهل، عشان يمشي بخطة صح وما يضرش المريض.
أنا دايمًا بقول للمرضى إن العلاج الطبيعي مش رفاهية، ده جزء من العلاج، وبدونه ممكن نلاقي العضم سليم في الأشعة لكن المريض لسه مش قادر يعيش حياته طبيعي.
📌 نصيحتي ليك: لو دكتورك كتبلك جلسات علاج طبيعي، ماتكسلش وتقول "أنا كويس خلاص"، واسأل دايمًا على أخصائي موثوق، لأن الفرق فعلاً بيتشاف على المدى البعيد.
