د/رانيا لطيف Dr. Rania Lotayef

28/04/2026

المفروض تبقى عارفه ان الفلاجيل
مش مُطهر معوى ولا السبترين او السيبتازول مطهر للحلق
الفلاجيل والسبترين مضاد حيوى
بلاش تستخدميهم عمال علي بطال .

27/04/2026

القئ منتشر جدا وسببه التهاب فيروسي بجدار المعده و النزلات المعويه الفيروسيه
لكن الترجيع بدون اسهال اوأي اعراض تانيه ده يقلق

27/04/2026

بجد حرااام....
مش معقولة كل يومين يجيلي طفل جاله فشل كلوي بسبب جهلنا...
ركزوا معاية فى المعلومة الخطيرة جدا دى 💣
لو طفلك سخن والطبيب كتبله بروفين..🔔حذارى حذارى حذارى 🔔 تديله مع البروفين لبوس دولفين ..ليه؟
⏪لإن الاتنين بيطلعوا من الجسم عن طريق الكلية..والاتنين أصلا من الحاجات التقيلة على الكلية..ومن المحتمل يحصل فشل كلوى زي حالات كتير بنشوفها اليومين دول

🔴طيب يادكتور لو بدى ابنى البروفين كل ست ساعات عادى وسخن ما بينهم أعمل إيه؟
⏪هتديله لبوس سيتال.. أو ابيمول أو اي دوا المادة الفعاة باراستامول بين جرعات البروفين ..عند اللزوم..
⏪وعلى فكرة ..الكمادات مهمة جدا جدا جدا ..لا تهملوها..
اخيرا والمهم جدا
🥵🥵الدولفين او بيبى ريليف او فولتارين ممنوعين تماااااااما قبل السنه
شير للي تعرفيه... الموضوع بقى بشع جدااا....
🌹ودمتم وأطفالكم بخير 😊🌹

27/04/2026

ربنا يهديهم ويقر أعيننا بصلاحهم

27/04/2026

27/04/2026

ركزى معايا كلام مهممممممم جدااااااااا....

⚠️🚦أوعى من الميكروب السبحى.. بيبدأ باحتقان اللوز وينتهى بروماتيزم القلب .. ولو فضلتى تستهترى باللوز وصديدها .. وابنك مياخدش الجرعه كامله من المضاد الحيوى اللى هى لمده 7 ايام💊....
والميكروب أتمكن من مناعته ...
هيبهدله صمام القلب💔 والمفاصل وهيدخله ف حمى روماتيزمية .. ولو عدى للمخ🧠 هيضيعه...
متستهتريش بحياه ابنك ولا توقفى المضاد وتقولى الحراره نزلت يبقى خف وبقى كويس ... اللهم بلغت اللهم فأشهد ...

🚘🚘🚘🚘🚘

⚠️🚦 لما العيل الصغير .. يجيله دور نزله معويه شديده او التهاب رئوى شديد او سخونية عالية🤒 وواضحة ... معرض جدا يغمى عليه😵 او يبقى تايه😔 ومش مركز ... ومعرض جدا يجيله تشنجات فجأه ..
مش هنقعد جنبه نصوت بقى ونلطم ونسيب الواد❌
✅لازم فورا خوافض للحراره ولازم كمدات🚿ونحط النص التحتانى للطفل في مية فاترة🛁

✅وحقنة دانست💉 نوقف الترجيع ولو الاسهال شديد يبقى لازم ياخد محلول لمعالجه الجفاف بسرعه...

✅ولازم يطلع على دكتور .. مش الصيدليه اللى جنب البيت !!! - دكتور هاااا....سمعانى؟ دكتورررر .....

🚘🚘🚘🚘🚘

⚠️🚦 أكتر سبب لإرتفاع درجه الحراره🤒 فجأه عند الأطفال هى العدوى.... واكتر أماكن بتيجى فيها العدوى هى:

⛔الاذن الخارجيه👂 او الوسطى او الداخليه ودى اول حاجة لازم نفحصها كويس جداااا...

⛔إلتهاب اللوز ودى مهمة لأبعد الحدود زى ما شرحنا فوق...

⛔آلام الصدر ولو فيه بلغم لونه متغير او كحه شديده...

⛔حرقان في البول ( مهم جداا جدااا جدااا ) وهو احد اهم اساب السخونيه الغير معروفه .. لانه الطفل مش هيقولى عندى حرقان فى البول ولا مش قادر اعمل حمام الا فى سن معين ...

⛔اى دمل أو خراج او تجمع صديدى فى الجسم...

🚧نقول ونكرر إن الأذن ومجرى البول ... مهمين جدا جدا جدا
🚘🚘🚘🚘🚘

⚠️🚦الترجيع الحاد والمفرط اول 3 شهور من الحمل لما يبقى كتير وزيادة بشكل مبالغ فيه دى حالة مرضية
يبقى عليكى وعلى دكتور النساء فورا وضرورى جدا جدا ..
ومتسمعيش لأى حد بيفتى ويقولك طبيعى .. ده علشان اول مره تحملى ..

⛔ابنك هيتولد وزنه ناقص😨 وانتى وزنك هيخس ومش هتعرفى تأكلى وتشربى كويس وهيجيلك جفاف... نكمل ولا كفاية ؟

🚧يبقى متسمعيش للفتايين وتطلعى على الدكتور بكرر تانى .. ترجيع كتيييير ومبالغ فيه .. مش دلع وهزار على جوزها😡

🚘🚘🚘🚘🚘

⚠️🚦الامساك عند الرضيع مسموح لحد 4 أيام عادى ..
الأطفال والكبار يبقى المسموح بيه 3 ايام فقط مع استخدام العلاج (الرضع لبوس جلسرين) والاطفال الاكبر نمشى على النظام ده👇👇..

✅ اول يوم الخضروات والمايه الكتير ودواء اسمه مينالاكس..

لو متحسنش...
✅ اليوم التانى نأخد بيكولاكس نقط بمعدل 14 نقطه على نصف كوبايه ميه..

لو متحسنش...
✅ من نهايه اليوم الثالث نأخد لاكتيلوز 3 مرات ف اليوم

✅ لكن مع نهايه اليوم الرابع بنأخد حقنه شرجيه (انيماكس)

✅ ولو الموضوع متحسنش خالص لمده اسبوووع ..
تطلع على الدكتور فورا وتعمل سونار على البطن وتطمن..

✅ طيب لو الوضع اتحسن مع الأدوية ورجع واتكرر تانى وقعدت على الحال ده لمدة شهرين ...
تطلع على الدكتور فورا وممكن يحتاج منظار ..ولازم طبيب جراحه عامه يشوف الحاله ... لاااازم..

🚘🚘🚘🚘🚘

⚠️🚦 أى حد كبير أو صغير سواء (راجل وست وأطفال) يجيله صداع مزمن ومعاه سخونية بتروح وتيجى ومعاه ألم فى البطن... يبقى لازم يحلل تيفويد وبروسيلا اجبارى ....

ولو طفل يبقى لازم نعرف إذا كان فيه اسهال ولا لأ .. ولو عينه صفرا هنزود تحليل فيروس A الكبدى الوبائى ..
خلص الكلام ..

🚘🚘🚘🚘🚘

⚠️🚦 اللبن كامل الدسم ومعاه معلقة عسل أبيض ومعاه معلقة زيت ذرة بيزود الوزن جدا فى الاطفال

🚘🚘🚘🚘🚘

⚠️🚦 فيه بقع لونها ابيض بتظهر في وش الاطفال بلاش نستهتر بيها ودى ممكن تكون تينيا أو نقص فيتامينات أو ممكن تكون ديدان .. بلاش نطنشها ...وركزوا فى النقط البيضا فى الاظافر واللون لو اتغير فيها ... او لون وحجم اللسان او لون العين..

26/04/2026

كمية الزن في فترات التسنين
أو طفرات النمو
أو أي تغيير في حياة الأطفال
مع وجود باقي المهام العادية للأم
حقيقي كفيل انه يجيب انهيار عصبي
هل مريتي بالفتره دي ولا لسه

26/04/2026

ممنوع منعا باتا إي حد يتخطي حدوده مع ولادكم سواء بهزار او جد وقولا أو فعلا ، ده غير مقبول ..

ممنوع منعا باتا تسمح لحد يناديهم بلقب أو صفه وحشة ( أسمر ، أكرت ، تخين ، مسلوع ، بضب ، قزعه) أو حاجة في صفاتهم ( عيوطه ، زنان ، عصبي ، شقي ، معفرت).

ممنوع منعا باتا الهزار التقيل السمج بتاع طالع وحش لمين، وليه مش حلو زي اختك و لا اخوكي و لا خالتك و لا عمتك و لا عم محمد البواب

ممنوع منعا باتا التعليق او السخرية علي المستوي البدني ( ماله مش قادر يجري كده ليه ، ازاي في السن ده و مبيعرفش يعوم ، ليه بينهج كتير ) ،
او التعليمي (ماله مش عارفه يقرا ، هو مش شاطر ليه ، مبيعرفش ينطق ).
لان كل الكلام السلبي ده بياثر علي الطفل و بيفضل في المخ و العقل بيصدقه .
و اثر علاج كلمه وحشه بياخد وقت و لازم قدامها ١٠٠ كلمه كويسه عشان تزيلي اثر الكلمه الوحشه.

واخيرا ممنوع المقارانات باي طفل اخر و حتى لو اخوه ، لان كل طفل ليه السمات الشخصيه بتاعته و اللي بتختلف ومن طفل للتاني ، والمقارنات دي اول شيء مدمر لشخصيه الطفل و ثقته بنفسه.

- ياريت كل واحد يخليه في حاله .
بمنتهي البساطه امنعوا التنمر عن أولادكم هيحسوا انكم السند و الضهر و هتزيد ثقتهم في نفسهم و الكل هيعملك الف حساب و يفكر الف مره قبل ميقول اي كلمه علي ولادك .

25/04/2026

اتعلمتي إيه من خلفة البنات؟!
ـ العياط على اللي فات والعياط على اللي جاي والعياط على اللي بيحصل واللي مبيحصلش والعياط عمومًا ، أنا بكفّر عن ذنوب معملتهاش😁

25/04/2026

مشاهدة الاطفال لمقاطع الفيديو القصيرة مصيبة😕.. تسبب ادمان وتشتت فى الانتباه وذاكرة ضعيفة وعصبية وعنف ارجوكم امنعوها
ولو عاوزين اقولكم علي ٣٠ طريقة علشان تمنعي التليفزيون فقط عرفيني عمر ابنك

25/04/2026

💕💕 Dr Oxygen d3 drops
نقطتين قبل السنه
3 نقط بعد السنه
هو افضل ڤيتامين دال نديه لأولادنا اللى امتصاصه oily_based محمل على زيت أفضل لامتصاص أفضل وده الوسط المناسب لامتصاصه فى الجسم

وعندنا في مصر أنواع كثير مش محمله على زيت .. للاسف أكتر نوع منتشرwatery_based.اللى هو الفيدروب

دراسات كثير اتعملت على الفرق بين النوعين .. وجدو ان النتيجة كانت ان الاتنين نتيجتهم واحدة في حمايه الطفل و منع لين العظام وثبات نسبة فيتامين دال في الدم ... لكن لقوا فرق كبير في وظائف فيتامين دال المسؤوله عن رفع المناعة بمعنى المحمل على زيوت أفضل من المحمل على مياه.

♥️فيتامين د يعطى دائما
مش لحد عامين
ولو نستيه يوم ممكن تاخدى تانى يوم

💕💕ليه فيتامين د مبيوقفش اثناء التعب ؟! ليه مش الفيتامنات بنوقفها ؟! ﻵ الفيدروب بيكمل معانا مبيوقفش ﻻنه مقاوم للعدوى وبيقوى من المناعه ،طب بنوقف أيه ؟! جرت العاده اننا بنوقف الحديد !وأيه كمان ؟! نخلى بالنا اننا منديش الكالسيوم مع الحديد ﻻزم يبقى فرق بينهم ساعتين !وايه كمان ؟!متدوش كالسيوم من أصله ! طب ليه؟! ﻻن الطفل بياخد كفايته من الكالسيوم وانما المشكله بتكون فى نقص فيتامين د !طب لو عاوز آدى الكالسيوم ! اﻻول نعمل تحليل كالسيوم طلع قليل ندىء !طلع طبيعى منديش ؟! طب لو طبيعى وعاوز آدى واهو زياده تؤكيد والخير خيرين ؟! مينفعش ياناصح ﻻن الكالسيوم دى الجسم مش محتاجه هيترسب فى الكلى ويعمل تحجر وتكلسات على الكلى !

💕💕ضرورى تعرفى فيتامين د. انه بلاش يتاخد قبل النوم بيصحصح الطفل الافضل صباحا
ربنا يسعدك ويرزقك العافيه انتى واطفالك
هتستفيدى جدا لو تابعتينى على الانستجرام
https://www.instagram.com/dr_rania_lotayef?igsh=MXJrNnhjOXY5MjRpOQ==
وهكون ممتنه لو عملتى تقييم ايجابي للصفحه