15/11/2023
عزيزي المتفاجئ ..
من زيادة الاسعار ..
يكفي ان تعلم فقط ان حاجة من اتفه الحاجات المستخدمة في حشو العصب ..
اللي هيا البيبر بوينت او ورق التنشيف
اللي بينشف قنوات العصب لتحضيرها لاستقبال الحشو
و اللي ببساطة شديدة لو الضرس فيه ٤ قنوات عصب مثلا ممكن تستهلك منها حوالي ١٠ ل ١٢ في الضرس الواحد .
سعرها قفز في اقل من سنة للعلبة ذات ال ٦٠ قطعة
من ٧٠ جنيه .. ل ٢٥٠ .. للانواع المعروفة او اقل قليلا للانواع الجديدة الغير مجربة .
و دا حاجة مستهلكة بتستخدم و تترمي .. الزيادات فمواد الحشو نفسه ..اكتر للاسف ...
ف رجاءا ..
حافظوا علي سنانكوا ..و سنان عيالكوا
غسيل مرة عالاقل يوميا قبل النوم
استخدام الخيط الطبي للتنضيف بين الاسنان دائما
بلاش حلويات و مياه غازية و خاصة للاطفال
متعودش الطفل عالحلويات خاصة انه اصلا بيتولد ميعرفش عنها حاجة
استخدام اي نوع مضمضة حتي لو تانتم ام ١٠ جنيه
زور عيادة الاسنان مرة فالسنة حتي .. عشان تلحق لو في حاجة تعملها قبل متتفاقم .
و اخيرا .. احسن اختيار طبيبك ..
لان الشغل دلوقتي بقا مكلف و مبقاش عندك رفاهية انك تعمل الحاجة و تبوظ
و احمد ربنا ان طبيب الاسنان واحد من الدكاترة اللي شغلهم محسوس النتيجة نوعا ما
يعني مش حيغلبك في ٥٠٠ روشتة و لا ١٠٠ نوع دوا لحد م حاجة تلفق معاك .
كفانا الله و اياكم شر الدكاترة و الامراض كلها
