صيدلية د:صٌهيب محمود ب نكلا

25/01/2024

قريباً إن شاء الله 💫
خدمة دوائية متميزة علي مدار ٢٤ساعة علي أيدي نخبة مميزة من الصيادلة المتميزين✨️💖

#كِليك_للإعلان

من آخر أعمالنا 😍

تصميم بانرات ويُفط لصيدلية د/ أحمد سعد المنوفي 💊

سعداء جدًا بإنضمام صيدليات د/ أحمد سعد كعميل جديد لينا
مُتمنيين مزيد من النجاح والإزدهار إن شاء الله ❤

فـ لو أنت صاحب شركة أو بيزنس أو دكتور وبتدور على مستوى إحترافي في تصميم وتنفيذ مطبوعاتك بشكل إحترافي وحابب تعرف أكتر عن خدماتنا ممكن تكلمنا أو تبعتلنا

للتواصل تليفونيًا على رقم

📞 01032206565

أو واتساب من خلال الرابط التالي:
https://wa.me/+0201032206565


#كِليك_للإعلان

04/10/2023

مين اللى الناس هتيجى تقولها لا مش ده اللى انا متعوده عليه يا دكتوره ده مغشوش☺️

شركات الادويه حالفه تدوخنا مع المرضى بسبب تغير شكل علب الادويه كل شويه وياسلام لو تغير شكل العلبه اتزامن مع زياده السعر لو اتشقلبت على شعر راسك مش هتقنع المريض انه هو هو نفس العلاج إللى كان بياخد قبل كده

الرحمه يا جماعه مش كده ليه تدخلونا فى جدال ملهوش لازمه مع الناس وتنحرو قلوبنا يعنى 😏

السبازمودايجستين فى ثوبه الجديد ☺️☺️☺️☺️

23/04/2022

أشهر حاجة لعلاج الأنيميا هو الحديد😇

موجود فى شكل أقراص او كبسولات💊 او حقن💉

نخلى بالنا واحنا بناخد الحديد سواء اقراص او كبسول اننا نشرب

معاه كمية كافية من الماء💧💧💧 لأن الحديد من أشهر اسباب الإمساك😭

مش بس نشرب كميه كافية من الماء كمان ندخل فى اكلنا أطعمة

غنية بالألياف اللى بتساعد وتسهل حركة الامعاء زى الخضار من أشهرها الخس 🥬🥬🥬

من أشهر انواع الحديد الموجودة فى الصيدلية وبتعمل امساك هو

ال (هيما-كابس)

نوع الحديد هنا mineral iron

بيكون تركيزه عالى 🥳🥳

بس امتصاصه قليل 😭😭

كمان ممكن يسبب إمساك 😱😱

لو ما التزمناش بالنصايح المهمة اللى قولتها فوق 👆👆👆

يبقى هناخد أقراص حديد او كبسولات ايا كان المكتوب فى الروشته او اللى الدكتور الصيدلى نصحنى بيه ولكن نلتزم بالنصائح اللى قولتها فوق عشان نوصل لافضل نتيجة وكمان ناخد بالنا كويس من معاد الجرعه

العلاج فى الطبيعى بيكون قرص واحد أو كبسولة واحدة مرة فى اليوم بس بعد الأكل علطول

لان الحديد مينفعش ناخده على معده فاضيه ممكن يتعب المعدة ويسببلها التهاب وممكن يسبب قئ 🤮

بنستمر على العلاج من شهر ل تلت شهور مع متابعة نسبة الحديد فى الدم من خلال التحليل

دمتم بالف خير وصحة وسلامة وعافية



د/أميرة فوزي

01/12/2021

موضوعنا النهارده بيقابلنا كتير وكلنا بنتعرضله

(الإمساك)

الاول اى هو الامساك
الإمساك هو توقف فى حركة الجهاز الهضمى (المعده والامعاء)

أعراضه :

إحساس بالانتفاخ وعدم القدرة على الإخراج

صعوبه في دخول الحمام وإحساس بكتمه او كبسه فى البطن

الإمساك ليه كذا سبب

١_ بعض الادويه زى الحديد والبسكوبان
٢_ادوية مضاد الحساسية وبعض الفيتامينات

بس مجرد ما نوقف الأدوية دى الإمساك هيروح

٣_ضعف الغده الدرقية
٤_ نقص شرب المياه ونقص الألياف فى الأكل ونقص الخضار والفاكهة
٥_اكل نواشف كتير والإكثار من الوجبات السريعة

العلاج بسيط جدا

_اول حاجه لو بناخد علاج من المذكور فوق نوقفه

_نزود فى اكلنا ألياف وخضار وفاكهة ونشرب مياه كتير

_ناخد علاج (ملينات)

*اقراص

أو
*لبوس شرجى

أو

*نقط

ملحوظه 👇👇

افضل حاجه للاطفال الرضع اللبوس او النقط

ناخد بالنا عشان اقول ان الشخص ده عنده امساك وأبدأ فى العلاج ضرورى يكون عدى يومين بدون اخراج

سؤال طب ليه يومين؟

هنسيب السؤال مفتوح وردو علينا فى التعليقات 👇🙂




دمتم بصحة وعافية

د/أميرة فوزي

13/11/2021

_صباح الخير يا دكتوره

=صباح النور يا فندم

_ والله يا دكتوره لسانى تاعبنى كده وبيوجعنى وعليه حاجات بيضه وتقيله كده وريحه الفم وحشه بسببها

=حضرتك بتاخد أدويه معينه ؟

_لا انا بس كل ما احس بشويه برد ولا صداع ولا اى حاجه ابعت حد يجبلى قرصين مضاد حيوى اخدهم ابقا كويس وانسى على كده بس فجاه لاقيت لسانى كده وبيوجعنى

= دى فطريات بنقول عليه طفح والسبب هو كتر استخدام المضاد الحيوي بدون سبب قوى وبطريقه غلط

******
دردشه النهارده مهمه اوى

(فطريات الفم واللسان)

فى تلت حالات مشهوره بتعانى من فطريات اللسان

1_الاستاذ اللى بياخد مضاد حيوي زى البنبونى وبطريقه غلط وجرعات غلط وفى غير موضعه

2_طفل رضيع نتيجه تراكم اللبن من الرضاعه والام مش عارفه تنضف اللسان بعده

3_ شخص مريض ازمه وماشى على بخاخ كورتيزون ومع الاسف مش بيغسل الفم كويس بالمياه بعد استخدام البخاخ

طيب نيجى للحاله الاولى. استخدام المضادات الحيويه بشكل عشوائى ومتكرر

المشكله انه بيقتل البكتيريا الضاره وكمان البكتريا النافعه الموجوده فى الفم
وبالتالى الفطريات مش بتلاقى حد يقفلها وبتاخد راحتها وتكتر جدا وتعمل المشكله اللى بندردش فيها النهارده

#شويه نصائح #

اننا طبعا نوقف استخدام المضادات بدون سبب

والطفل الرضيع الام تحاول تنضف اللسان بقطنه ناعمه بعد الرضاعه 👼

وطبعا مريض الازمه لازم يغسل الفم كويس جدا بالمياه بعد استخدام الخاخ

****
العلاج

١_مضاد فطريات اما جل او اسبراى (بخاخ)
الجل افضل للكبار. والبخاخ او النقوط افضل للاطفال طبعا

2_مسكن طبعا عشان نخفف الالم بتاعها 🤕

ملحوظه

الفطريات ممكن تكون نتيجه نقص المناعه فلازم نقوى مناعتنا بالاكل الصحى الكويس والاقراص او الاكياس المخصصه لرفع المناعه ❤️

خلصنا دردشتنا النهارده واستنو موضوع جديد بدردشه جديده

#دردشات


دمتم سالمين

د/أميرة فوزي

09/11/2021

هنتكلم انهاردة عن(الاوميجا 3) وبعض فوائده
الاوميجا 3 موجود في زيت كبد الحوت و زيت اللوز و بعض انواع السمك زي التونة و السلمون
وموجود في كتير من الادوية علي هيئة كبسولات او شراب
زي الادوية اللي معانا في الصور
الاوميجا 3 من المركبات المهمة جدا و ده يرجع لفوائده الكتيرة
منها و احد اهم فوائده
انه بيقلل فرص الاصابة بامراض القلب و الاوعية الدمويه
زي السكتات الدماغية و تصلب الشرايين
وده لانه بيساهم في تقليل نسبة الكوليسترول و الدهون الثلاثية في الدم
و بيقلل ترسيب الدهون علي جدار الاوعية الدمويه
وبالتالي بقلل فرص حدوث جلطات
و بيساهم في خفض ضغط الدم
و كتير من العلماء و الباحثين بيأكدوا ان نسبة الاصابة بامراض القلب و الاوعية الدمويه نسبة ضعيفة جدا بالنسبة للاشخاص اللي بيتناولوا اوميجا 3

د/أحمد أسامة

01/11/2021

السلام عليكم

معادنا النهارده مع دردشه جديده بس مهمه جدا

#دردشة

=صباح الخير يا دكتوره

_صباح النور

= يا دكتوره ابنى عمال يصرخ ويعيط من الالم وجع حوالين السره ومسمع لتحت فى جنبه اليمين من بطنه وحاسس انه عاوز يرجع وحرارته عاليه وماسك جنبه جامد ومش طايق حد يلمسه

_يعنى طول ما هو حاطط ايده مرتاح ولما يشيل ايده الالم يزيد؟؟؟

=بالظبط

_طيب بيعرف يقفل رجله ناحية باطنه او يقفل رجله على بعضها

=لا مش بيقدر بيقول الوجع بيزيد وعنده انتفاخ
**************************

نركززز هنا اوى فى الشكوى والاعراض دى ممكن تكون شبه اى شويه؟؟

😊بالظبط المغص الكلوى

بس هنا الحاله دى مختلفه خالص فى طريقه التعامل فى المغص الكلوى افكر حضراتكم

كنا بندى حقنه مسكنه ضرورى ونعمل تحليل بول عشان نعرف نوع الأملاح المسببه للمشكله

هنا دى اعراض مشكله تانيه خالص لو ادينا فيها مسكن ببساطه ممكن نكون بنموت المريض

طيب ليه؟؟ 😵😵😵

المريض هنا مشكله هى التهاااااااب حااااد فى الزائدة الدوديه اللى هى بلغتنا العاميه ((المصران الاعور))

**سببه :
انسداد مدخل الزائده الدودية ببقايا الاكل الموجوده فى. الامعاء بسبب بعض الديدان الطفيليه وده اكتر فى الاطفال
او انسداد بسبب اجسام غريبه وينتج عنها تكاثر للبكتريا والبكتيريا هى اللى بتسبب الالتهاب المؤلم ده

طب الحل اى؟
فين العلاج؟ 🤔

العلاج هنا مينفعش مسكنات زى ما قولت فوق 👆👆
لان المسكن هيقلل الالم مش الالتهاب وممكن الزايده تنفجر وتعمل تسمم والشخص ميتلحقش 😔😔

بردو العلاج اى؟ 😒😒

العلاج استئصال للزايده وطبعا ده فى مستشفى🚑 🏥او عن طريق دكتور جراح شاطر

شويه نصايح كده سريعا

١_لازم تروح المستشفى او للدكتور بسرعه

٢_ممكن تشرب ينسون او كمون يهديك شويه لحين معاد الدكتور

٣_ممنوع المسكنات نهائيا

٤_هناخد حاجه بس عشان الترجيع حقنه عشان النتيجه تكون افضل

لو واحده حامل و بتشتكى من نفس الأعراض طبعا بنتاكد من الحاله بالاشعه والتحاليل ودى بتتعمل اكيد فى المستشفى بردو ووقتها بنعملها الزايده بالمنظار مش جراحه

دمتم سالمين معافين

د/أميرة فوزي

#دردشات

27/10/2021

النهاردة معانا فقرة جديدة هنتكلم فيها عن امراض مفيش بيت بيخلوا منها وهنعرف عنها اكتر بشئ من التفاصيل
فقرة
ونخش في اول موضوع علي طول وهو قُرح المعدة والاثني عشر
لازم تكون عارف ان المعدة عشان تهضم الطعام بتفرز انزيمات وعصارة حمضية بتركيزات عالية جدا عشان تهضم الاكل اللي بناكله.
طيب والاكل اللي بناكله ده ما هو الا بروتينات وكاربوهيدرات و دهون
طب خلاص كده ده المعدة هتهضم نفسها بنفسها والبقاء لله كده 😕
بس سبحان الله ربنا جعل ليها طبقة تحميها من تأثير الحمض ده بدليل انك لسه عايش اهو ومش حارم معدتك من حاجة.🧐
طب ما الدنيا حلوة اهو وفي طبقة حماية عشان اخد راحتي امال ايه اللي هيخلي في قرحة ب الامها اللي لا تحتمل دي هقولك ورقة وقلم وعد الاسباب اللي ممكن تخل بتركيب طبقة الحماية دي وتعمل قرحة
1-التدخين
2-الضغوطات النفسية
3-اسباب وراثية
4-الاكل وعاداته وانواعه *اتعشي واتمشي*
5-جرثومة المعدة اكتر واشهر واهم سبب في قرح المعدة
6-المسكنات اللي بتاخدها زي البونبوني دي ايوة.🤨
وفي اسباب تانية كتييييرة جدا ميكفيش بوست واحد نتكلم عنها
و دي اسباب فعلا اثبتت بدراسات وابحاث علمية انها من مسببات قرح المعدة مش مجرد اسباب بنرصها وخلاص-شايفك يا اللي بتقول سجاير ايه اللي هتعمل قرحة وهجيبك😎- والمصادر والمقالات موجودة.

طب انا دخلت بسرعه كده ومعرفتكش اعراض القرحة دي ايه!
اللي منها تبدأ تفكر تروح للطبيب عشان مندخلش في مضاعفات اللي هنقولها كمان شوية برده.

اعراض قرحة المعدة كتير ومنها ممكن نحدد نوع القرحة-ما شاء الله هو في انواع كمان😳- بس ده كلام نظري وحرفيا مفيش حاجة تقدر تحدد نوع القرحة غير المنظار فقططط👌
اعراض القرحة او اللي هتشتكي منه ايه هو. عد معايا كده
1-الم في جزء البطن العلوي بالبلدي كده فم المعده-🚫ونركز في فم المعدة لانه لو في منطقة الصدر مع احساس بنغزة مع كل دقة في القلب ويسلام لو الم في الكتف الشمال يبقي احنا كده في اعراض جلطة يمعلم وتشوف اقرب طوارئ وتطلع عليها لان كتير الموضوع بيتشخص بس انه مجرد حموضة او قرحة بس بيكون جلطة ومش بيتلحق وبيموت عدد مهول جدا بسبب جلطة اتشخصت غلط انها قرحة🚫- الم رهيب بيتوصف حرفيا كإن حد ماسك موس وبيجرح في المنطقة دي
2-ارتباط الالم بالاكل ممكن يدينا فكرة نظرية عن نوع القرحة اذا كانت قرحة معدية هتلاقيها بتزيد مع الاكل علي طول اما لو قرحة في الاثني عشر ف دي بتكون بعد الاكل من ساعتين ل تلاته و زي ما قولنا ده كلام نظري والمنظار هو اللي يحدد بس
3-ممكن كمان يكون مفيش نفس للاكل والشرب, حموضه وانتفاخ في البطن, احساس بالقئ حتي من غير ما تاكل.
4-ممكن لو اهملت الموضوع يقلب معاك بنزيف ويؤدي الي عدوي خطيرة و مشاكل احنا في غني عنها

طب قولتلي في انواع ياعم الدكتور ايه هي!
هما تلاتة بيختلفوا حسب المكان بس ليس الا
1-قرحة معدية ودي مكانها المعدة #بديهيات🤷‍♂️
2-قرحة الاثني عشر ومش هقول مكانها قولوا لينا انتوا في التعليقات 😂😂
3-قرحة المرئ ودي غالبا سببها ارتجاع المرئ بسبب ان حضرتك بتاكل وانت ع السرير ونسيت اهم مثل حفظناه زمان وعرفنا قيمته دلوقتي *اتعشي واتمشي*

هختم معاكوا الرغي بتاعي الكتير ده بشوية نصائح تخص حياتك لو حضرتك متشخص بقرحة مع العلاج اللي وصفهولك طبيبك
1)تعديل النظام الغذائي الخاص لو الاعراض مرتبطة ب اكل او شراب معين المفروض تقللها شوية زي اي؟
-الكافيين في القهوة والشاي، الشيكولاته، الثوم والبصل والنعناع دي كلها اطعمة بتقلل كفاءة المحبس اللي بيقفل ع المعدة ويمنع خروج الحمض للمرئ
-الاكل الحار وعصير البرتقان والطماطم والقهوة ودول بيهيجوا جدار المعدة لافراز حمض اكتر
-حاول تاكل اخر وجبة قبل النوم مش اقل من 3 ساعات *اتعشي واتمشي*
2)تقليل الوزن لو وزنك زيادة
3)ارفع مستوي السرير من عند الرأس
4)تجنب الملابس الضيقة

انا كدة خلصت موضوعنا النهاردة واتمني تكون عرفت اكتر عن قرحة المعدة والاثني عشر واحنا منتظرين اي استفسار لو عاوز تعرف اكتر فيما يخص الموضوع واستنوني في مواضيع تانية من

د/محمود صبحي

25/10/2021

بسم الله الرحمن الرحيم
النهاردة معادنا مع فقرة كلمتين_يهموك
🎤
طبعا احنا داخلين علي موسم الشتاء وتغير الجو و أدوار البرد والانفلزنزا ويومين برد ويومين دفئ ف طبيعي يحصل برد او بمعني اصح يحصل ضعف في جهازك المناعي فتكون عرضة لاي عدوى سواء فيروسية او بكتيرية
فيروسية تسبب دور البرد او الإنفلونزا 😷
محتاجة زي ماقولنا البوست اللي فات راحة حاجات دافية سوايل غنية بفيتامين سي 🍋
بكتيريا سخونية مع احتقان في الزور مع بعض🤒
محتاجة مضاد حيوي بجرعته الكاملة شايفك ياللي بتقول ٣×١ اوعى 🙄
هاتلنا من الاخر يادكتور ازاي نرفع مناعتنا 💪
بس ياسيدي في عجالة
طالما تقلت الملابس فخليك زي ما انت مترجعش في كلمتك 😂👌
وهديك الثلاثي المحترم يخلي جهازك المناعة كويس جدا💪💪
١_أكل مظبوط
٢_نوم مظبوط ممنوع السهر والضغط النفسي😱
٣_سوايل دايما ومتنساش👈🍋👌
ولو حصل دور البرد يبقا حضرتك قصرت في حق الثلاثي👆
طيب الحل لو حصل كدا هطلب من حضرتك ترجع للبوست القديم كلمتين_يهموك
وحبينا ننوه عن حاجة الكمامة لابد منها 😷😷
بوست مختصر لكنه مفيد جدااا
ودايما بنقول الوقاية خيراا الف مرة من العلاج ❤💪
دمتم سالمين غانمين❤
نفع الله بنا وبكم 🙏
سعديات✨
د/أحمدسعد

21/10/2021

_الحقينى يا دكتوره 😭

=خير يا فندم في اى؟

_ألم رهيب ومش بيفصل ونغز فى ضهرى ووجع فى رجلى مش قادرااااه 😭😭

=طيب الوجع دى بيسمع فى منطقه اسفل البطن؟ وفى حرقان فى البول؟

_ايوا يا دكتوره فيه

= طيب الالم ده بيزيد مع الحركه؟

_لا مش بيزيد ولا حاجه

***نركزززز. جدا لان الاعراض دى ممكن تصيب ناس
كتير شباب وكبار فى السن ممكن تحصلك او تحصل لحد تعرفه فواجب عليك انك تكون عندك معلومه مفيده تقدر تساعده بيها وتساعد نفسك

***اولا الحاله هنا ده مغص كلوى 🙁

وهى دى اعراضه الم شديد ومغص جامد على شكل نغزات متكرره وبيسمع فى منطقه اسفل الضهر والم فى الرجل

**السبب :
تراكم الاملاح والحصوات على الكلى

النوم بعد الاكل مباشرة والاكثار من الاكلات السريعه

طيب الحل اى؟
١_كاسعافات اوليه هندى حقنه مسكن تهدى الالم لان مش معقول نسيبه يتوجع كده
زى اى الحقن دى؟
(سبازموفين _سبازموفري_كتافلام _فولتارين _دكلوفين_كيتولاك)

2_نطلب من الشخص تحليل بول عشان نعرف نوع الاملاح الموجوده وندى العلاج المناسب

واللى هيكون في الاغلب فوار على حسب نوع الاملاح

لو أملاح يوريك اسيد بندى فوار زى 👇
(اليوريفين _اليوروسولفين _الكلاجون) ودول الاكثر شهرة وطبعا بيتاخدو قبل الاكل بنص ساعه

طيب يا دكتوره لو املاح اوكسالات؟؟

الاوكسالات بتكون نتيجه ترسب الكالسيوم على الكلى
وطبعا فيه فوار زى 👇
(ستروسيد ماغنسيوم بلس _ والابيماج) ودول الاكثر شهرة بردو

بنحدد نوع الفوار اللى هنمشى عليه بناءاً على نتيجه التحاليل اللى قدمنا

🌸🌸شويه نصايح على الماشي

١_نبعد عن الاملاح الزيادة واكل اللحوم الحمره الكتير
٢_نشرب سوائل كتير زى المياه وعصير القصب ومغلى البقدونس
٣_ نقلل من اكل مصادر الاوكسالات زى الطماطم والسبانخ

***نخلى بالنا فى حاله تانيه شبيهه بحاله المغص الكلوى ودى مينفش ابدااااا ندى فيها مسكنات اصلا
وهنتكلم عنها بالتفصيل فى دردشه جديدة 🙂🙂




دمتم معافين

د/أميرة فوزي

16/10/2021

بسم الله الرحمن الرحيم
النهاردة معادنا مع فقرة كلمتين _يهموك
#كلمتين يهموك🎤

بما اننا داخلين علي جو الشتاء وموسم الإنفلونزا ونزلات البرد الكتيرة وتغير الجو🤧
فحبينا نوعي الناس بكيفية التعامل في الظروف دي 🧐
طبعا اي حد بيحصله زكام عطس رشح تكسير في الجسم بيجري علي الصيدلية😱 دكتور دكتور لوسمحت محتاج حقنة البرد الواحد بيوقف مستغرب هما نزلوا حقنة للبرد ولا ايه اقوله اي هي يقولي حقنة ٣×١ #🛑
اقوم اقوله ممكن تشرحلي اي حقنة البرد دي يقوم يقول دا واحد صاحبي كان عنده رشح وزكام 😷وراح صيدلية ما عطاله حقنة ٣×١ اخدها من هنا بقا زي الحصان تاني يوم اقوله طيب حضرتك كملت جرعتها يقولي لا هي واحدة بس استغرب اكتر 😳
بص ياسيدي ما يقال عنها حقنة البرد دي ماهي إلا مضاد حيوي ومسكن وكورتيزون 😱وما ادراك ما الكورتيزون📌 ماينفعش يتاخد غير في أضيق الحدود لكان تعاملك مع حد مش عارف ولافاهم هيضرك وجداا اللي بيفيدك في الحقنة دي كلها المسكن بيريح جسمك بس
طيب يادكتور وجعت دماغنا ومش عارفين ناخد اي لما نحس ب رشح وزكام واحتقان في الزور بدون سخونية
هقولك ياسيدي
بص🙄
بتاكل كويس
بتنام كويس
بتشرب سوايل كويس
وتاخد مسكن زي الباراسيتامول تحت أي مسمى يهدي الدنيا لغاية جهاز المناعة ماياخد وقته ويقضي علي عدوى الفيروسات دي
يبقا انت خلال ٣ او ٥ ايام هتكون زي الفل مع شوية راحة وهنضيف بقا شوية عصاير زي الليمون🍋 اوالجوافة 🍐او البرتقال🍈 اشمعنا يادكتور لاني دي فواكه مليانة بفيتامين سي اوي اي حاجة من الصيدلية فيتامين سي بيساعد علي رفح المناعة فبالتالي الجسم يعالج نفسه بنفسه يبقا في حالة دور البرد العادي مطلوب منك اي عصاير حاجات دافية سوايل كتير حتى لو مياه عادية وراحة ثم راحة خلال ٣ ايام هتكون زي الحديد ومتنساش السوايل الدافية وتمنع الحاجات الساقعة 🛑
طيب يا دكتور امتا ناخد حقن المضاد الحيوي دي لما يكون اعراض البرد كلها موجودة ومعاها سخونية و أكد علي نقطة السخونية دي ساعتها ناخدها وبجرعته واقل حاجة ٥ ايام مضاد حيوي وحسب إرشادات الطبيب المعالج طبعاا
دمتم بخير نفع الله بنا وبكم❤

باذن الله جاهزين لأي استفسارات طبية في أي وقت💝

سعديات✨
د/أحمدسعد

14/10/2021

_صباح الخير يا دكتوره

=صباح النور يا حاج اتفضل

_ينفع كده يا دكتوره اجى اصرف روشته الدكتور يطلعلى دوا غلط 😡

=ورينى كده يا حاج ونشوف فين الغلط

_ اتفضلي دى الرشته 🎫 وده الدوا الغلط 😡

= يا حاج العلاج صح ومفيش فيه اى غلط

_ازاى يا دكتورة مهو الاسم ده غير اللى الدكتور كاتبه فى الروشتة 🤔

=هو فعلا الاسم مختلف لكن الدوا نفسه صح 🙂🙂

** موقف حصل فى الصيدلية ومن هنا هنبدا ندخل فى موضوع النهارده فنركززززز لو سمحتو 👇👇👇



ده موضوع النهارده اى الفرق بين البديل والمثيل وازاى اعرف اذا كان الدوا ده فعلا صح ولا ممكن يكون غلط

هنرجع للحاج اللى فوق الدكتور كاتبله فى الروشته

(اوجمنتين1جم) والصيدلى صرفله (كيورام 1جم)

=الاتنين نفس الدوا ونفس كل حاجه ومفيش فيهم اى فرق او اختلاف يا حاج 😊

=ببساطه احنا بنتعامل مع حاجه اسمها (المادة الفعاله)

_يعنى اى يا بنتى؟؟

=يعنى المادة اللى جوه ازازة الدوا او القرص او الكبسولة اللى حضرتك بتاخدها وهى دى المادة المسؤوله عن التأثير العلاجى يعنى المادة اللى جوه القرص ده هى اللى ليها نتيجة على صحتك وهى اللى تهمنا فى الموضوع 🙂🙂

نفس المادة دى فى اكتر من شركة أدوية بتصنعها
وكل شركة بتعمل لنفسها اسم عشان يبقى معروف وسهل على الناس تفتكره وتعرف تنطقه وتقرأه

يعنى من الاخر الأوجمنتين والكيورام هما الاتنين مش الدوا نفسه هما مجرد اسامي مشهورة للتسهيل على الناس انما الاتنين نفس المادة الفعالة ونفس التركيز اللى مكتوب لحضرتك فى الروشتة بس ده من شركة وده من شركة تانية 😊🙂

عرفت بئا يا حاج انه الدكتور الصيدلي صرفلك الحاجه الصح وانه مش غلطان ولا حاجة 😌

_انا اسف يا دكتورتنا مكنتش اعرف كل ده وانه نفس الدوا ممكن يكون ليه أكتر من اسم فى السوق

= ولا يهمك يا حاج احنا هنا عشان مساعدتك نورتنا ❤

**** المثيل هو نفس الماده الفعاله ونفس التركيز ولكن من شركة مختلفه زى مثال (الأوجمنتين والكيورام)

****البديل هى ماده فعاله مختلفه ولكن ليها نفس النتيجه والتأثير وبتكون بنفس التركيز بردو
زى
مثال **حقن الزوراكسون مادتها (السفترياكسون)

**وحقن الراميتاكس مادتها (السيفوتاكسيم)

والاتنين بدايل لبعض والدكتور بيكتب دى او دى عادي
لان الاتنين هيوصلونا لنفس النتيجه ونفس التأثير



د/أميرة فوزي