22/07/2025
يا دكتور، أنا شايفة ناس كتير بتتكلم عن التهاب السحايا على السوشيال ميديا، وقلقانة جدًا…
يعني لو ابني سخن أو جاله صداع أروح بيه المستشفى فورًا؟ ولا إيه الصح؟
👨⚕️ :
قلقك طبيعي يا ماما، لكن مهم نفرّق بين الحالات العادية والحالات اللي فعلاً تستدعي تدخل سريع.
ان شاء الله في البوست دا هنجاوب بهدوء علي كل الاسئله اللي شاغله بال الاهالي وهنطمنهم وهنوعييهم بطريقه عمليه من غير رعب وفزع
⸻
⸻
🧠 ايه الالتهاب السحائي هو (Meningitis)؟
هو التهاب في الأغشية المحيطة بالمخ والنخاع الشوكي، وبيكون غالبًا بسبب:
• عدوى فيروسية (أشهر سبب)
• أو عدوى بكتيرية (أخطر نوع)
• وأحيانًا فطرية أو غير معدية (نادرة جدًا في الأطفال)
👩🦰: طب إمتى أشك إن ده التهاب سحائي؟
👨⚕️:
بصي، لو الطفل عنده حرارة عالية ومعاها واحد أو أكتر من الأعراض دي:
• صداع شديد مش بيتحسن
• ترجيع متكرر من غير إسهال أو سبب واضح
• تصلب في الرقبة (مش قادر يلمس صدره بذقنه)
• خمول أو نوم زيادة عن الطبيعي
• حساسية من النور
• تشنجات (خاصة لو لأول مرة)
• تغير مفاجئ في السلوك أو الوعي
👈 هنا لازم تتوجهي لأقرب طوارئ فورًا، ما نضيعش وقت في التفسير أو نعالجه في البيت.
⸻
👩🦰: طيب هو الالتهاب السحائي خطير قوي كده؟
👨⚕️:
النوع البكتيري منه آه، ممكن يبقى خطر جدًا، لكن الحمد لله مش هو النوع المنتشر في أغلب الحالات.
💉 الوقاية:
التطعيمات المتاحة في مصر:
1 تطعيم الهيموفيلس إنفلونزا B (Hib) – موجود في التطعيمات الأساسية (الـ 6 شهور)
2 تطعيم المكورات الرئوية (Pneumococcal) – (Prevenar) ودا اختياري
3 تطعيم السحائي الرباعي (MenACWY) – موجود في المصل والقاح (اختياري)
4 تطعيم السحائي B (MenB) – اختياري ))
اسألي دكتورك عن التطعيم المناسب خصوصًا لو:
• فيه تاريخ لحالات سحائي في المنطقة
• الطفل داخل مدرسة أو حضانة مزدحمة
• أو هيسافر بره
✅ الأطفال اللي بيدخلوا مدارس خاصة أو دولية أحيانًا بيتطلب منهم تطعيم السحائي الرباعي.
🤔 ليه الناس الآن مهتمة؟
• فيه رعب بسبب تداخل الأعراض مع نزلات البرد أو الإنفلونزا الصيفية.
• تداول بوستات عن وفيات أو إصابات مفاجئة بدون تأكيد رسمي.
• تشابه الأعراض مع حالات فيروسية منتشرة هذه الأيام.
⸻
👩🦰: يعني لو ابني سخن بس، من غير أي أعراض تانية، أستنى؟
👨⚕️:
لو الحرارة بس من غير علامات خطورة، نتابعه في البيت، نرطّبه، ندي خافض حرارة، ونشوف هل فيه تحسن ولا لأ.
لكن لو ظهرت الأعراض اللي قلنا عليها، لازم كشف فوري.
⸻
✅ القاعدة الذهبية:
“كل سخونية مش معناها التهاب سحائي…
بس كل شك في التهاب سحائي لازم تقييم طبي عاجل.”
⸻
📌
📌
