Dr Hanaa , Nutrition care clinic

02/03/2025

سؤال متكرر 🥰

ايه الاحتياطات اللي آخدها عشان أقلل تأثير الحلويات على الجسم ؟

،، خلينا نتفق إن التقليل من نوعية الأطعمة دي هو الأفضل
،، لكن أنا بحبها ومش هقدر امتنع 😭

يبقى خد بالك من الآتى 😊
. الكمية ،، يعني ما اكلش نص صينية كنافة 😅 قطعة صغيرة تكفي
. ابعد عن الميكسات قدر الامكان اللي هي نوتيلا مع كنافة مع كريم شانتيه مع أنواع واشكال من الصوصات المرعبة
،، كل ما تكون الحلويات بسيطة وتقليدية هيكون أفضل
. الافضل تناولها بعد وجبة كاملة
ولو بين الوجبات يبقى قبلها او بعدها اي نوع خضار فريش عشان أقلل المؤشر الجليسيمي بتاعها
.. ابعد عن الحلويات على السحور عشان ما تحسش بالهبوط خلال اليوم

وما تنساش تشرب مياه كتير من الافطار للسحور

أتمنى تكونوا استفدتوا 🌹

دمتم بصحة ❤️

28/02/2025

السلام عليكم 🌹

رمضان كريم 🥰

بكرة إن شاء الله أول سحور
هقولكم على شوية نصائح كده وانتم بتتسحروا هتفرق معاكم جدا خلال فترة الصيام 😊

1.. وجبة السحور وجبة أساسية مش رفاهية لأنها بتحضر جسمك لتحمل الصيام وتحميك من الأعراض الجانبية للصيام زي الدوخة والصداع والهبوط خاصة في آخر اليوم

2.. لازم وجبة السحور يكون فيها بروتين كويس وخضار وفواكه مش كلها نشويات
يعني الاكلات التقليدية بتاعتنا الفول والجبنة والبيض والزبادي اختيار أمثل وفيه كميات بروتين كويسة جدا بتشبع أطول فترة ممكنة

3.. نبعد عن الحلويات والعصائر لأنها بترفع سكر الدم بسرعة وبيقل تاني بسرعة فتحس بالجوع بسرعة اول ما تصحى من النوم 😀

4.. نقلل الشاي والقهوة والنسكافيه قدر الإمكان لأنهم مدرات بول وتحس بالعطش بسرعة ويدخل الجسم في جفاف وده سبب أساسي للدوخة والصداع

5.. اوعوا تنسوا شرب المياه بكميات مناسبة 2 كوب على السحور وابتعدوا عن المخللات والأكل الحامي

دمتم بصحة 🌹

رمضان مبارك 🌹

20/02/2025

نبدأ بسم الله 🌹

09/02/2025

السلام عليكم 🌹

كل سنة وانتم طيبين وبخير

رمضان على الأبواب

انتظروا بوستات عن التغذية السليمة في رمضان

تابعوني 🌹

15/11/2024

30/06/2024

السلام عليكم 🌹

كلنا عارفين إن معدلات السمنة في الأطفال والمراهقين زادت بشكل كبير في الفترة الأخيرة

بسبب زيادة الأكل غير الصحي والوجبات السريعة

الخمول وعدم الحركة لفترات طويلة قدام الشاشات

وطبعا محاولة تقليد ترندات الأكل والبلوجرز

السهر لوقت متأخر خاصة مع الإجازة

لازم ناخد بالنا كويس اوي
إن حل مشكلة زيادة الوزن لازم تكون بمنع أسبابها اللي قلتها فوق ☝️☝️

وان حضرتك كأب أو كأم لازم نحل الموضوع بشكل صحيح

لازم نزول الوزن في السن ده يكون بحكمة وتحت إشراف طبي لأنهم في مرحلة نمو

وعشان نتجنب حدوث آثار جانبية ممكن يمتد تأثيرها لباقي العمر

أتمنى تكونوا استفدتوا 🌹
دمتم بصحة 🌹

د هناء محمد
طبيب بشري وأخصائي التغذية العلاجية

19/05/2024

صباح الخير 🥰

لو انت ناوي تغير من نفسك _ زي مثلا تمارس رياضة وتاكل بشكل صحي _

،، الافضل ما تستناش تجمع كل خيوطك👍

،، ما تستناش تشترك في الجيم. امشي 🏃

،،ما تستناش تشتري نوع أكل معين. كل من المتاح عندك🌽🥒🥬🍇

،،ما تستناش تخلص مناسبة أو خروجة. ابدأ ولو لخبطت ارجع ظبط تاني 💪

❎التسويف مشكلة كبيرة جدا
✅والخطوات البسيطة المنتظمة هي سر النجاح

قال رسول الله صلى الله عليه وسلم ( أحب الأعمال إلى الله أدومها وإن قل ) ❤️

بداية موفقة لكل شئ جميل إن شاء الله 🌹

06/05/2024

مساء الخير 🌹

هكلمكم عن وجبة رئيسية في معظم البيوت المصرية النهاردة
وهي

🐟 الرنجة

طيب يا دكتورة مسموح آكل رنجة وانا بعمل دايت ؟

مفيش مشكلة طبعا ناكل رنجة لأنها كنوع سمك غنية بالبروتين والفيتامينات ووجبة مشبعة لو اتعملت سلطة مثلا

هقولكم شوية نصائح كده عشان تستفيدوا وانتم بتستمتعوا بالرنجة 💪

،، اولا لو مريض ضغط أو كلى أو عندك مشاكل بالقلب خد بالك كويس جدا والافضل تاكل سمك طازج وبلاش اسماك مملحة لان فيها نسبة أملاح عالية جدا

،، خد بالك كويس من كمية العيش اللي بتاكلها لان ده المشكلة الأساسية اللي بتقابلك لو بتعمل دايت

،، الخضار جنب الرنجة زي البقدونس والخس والبصل والليمون والخيار لهم فوائد كتير جدا بسبب احتوائهم عن المياه والمعادن المفيدة

،، لو هتحلى بعد الرنجة البطيخ والكنتالوب من الفواكه الغنية بالبوتاسيوم وفيها نسبة مياه عالية هتقلل احساسك بالعطش

،، لو هتحبس بكوب من الشاي الأخضر يبقى كويس جدا 🥰

اوعوا تنسوا المياه بكميات كويسة 💦

أتمنى تكونوا استفدتوا 🌹

دمتم بصحة 🌹

د هناء محمد
طبيب بشري وأخصائي التغذية العلاجية

24/04/2024

الجو حار جدا
اهتموا بشرب المياه خاصة الأطفال وكبار السن وأصحاب الأمراض المزمنة
وتقليل المجهود البدني والتعرض المباشر لأشعة الشمس
لان الفئات دي سهل جدا تدخل في جفاف

دمتم بصحة 🌹

23/04/2024

صباح الخير 🌹

كتير نسمع عن نظام الصيام المتقطع

هل هو نظام كويس ولا وحش ؟
ايه فوائده وايه أضراره ؟
يا ترى كل الناس ممكن تعمله ؟
وايه افضل طريقة للصيام المتقطع ؟

أسئلة كتير جدا بتدور في بال كل واحد بيعمل دايت 🥰

في البوست ده هعطيكم فكرة مختصرة عن الصيام المتقطع
واللي له أي سؤال يبعت لي في الكومنتات 🥰

اولا الصيام المتقطع هو منع الأكل لفترات معينة خلال اليوم ممكن تناول سوائل بدون سعرات زي المياه أو الاعشاب بدون سكر
وله تقسيمات كتير ومختلفة حسب طبيعة الشخص✅

من الأنظمة اللي بتجيب نتائج كويسة جدا لو معمول صح بيراعي فيها الدكتور الحالة الصحية للشخص وروتين حياته بشكل عام 💪

أضراره
إن لو عدد الساعات طويل جدا او الدايت معاه غير متوازن ده بيقلل من معدلات الحرق ويؤثر بشكل كبير على الكتلة العضلية في الجسم ❎

لو قررت تعمله لازم الاهتمام بتمارين خاصة المقاومة والاهتمام بتناول البروتين وشرب المياه بشكل كافي 👍

فيه دراسات بتقول إن صيام عدد أيام معينة خلال الشهر _ الافضل صيام إسلامي _ ده. بيحسن الصحة بشكل عام
وبيقلل من دهون الكبد ويحسن جدا في تعامل الجسم مع السكر ومقاومة الأنسولين

أتمنى تكونوا استفدتوا 🌹
في انتظار أسئلتكم 🥰

دمتم بصحة
د هناء محمد
طبيب بشري وأخصائي التغذية العلاجية

21/04/2024

الكنتالوب

فاكهة الموسم

له فوائد كتير جدا
،، من الفواكه الغنية بالمياه 90 % تقريبا
،، غني بالالياف المهمة جدا لصحة الجهاز الهضمي عشان كده مشبع وكويس جدا الدايت 🥰
،، غني بمجموعة من الفيتامينات والمعادن زي البوتاسيوم وفيتامين أ وفيتامين c
،، غني بالسكر الطبيعي

هقولك على أفكار حلوة تاكلي بيها الكنتالوب

،، يقطع مكعبات وتاخد نصف كوب قبل الوجبة الرئيسية بنصف ساعة
،، ممكن كوب عصير بالحليب وبدون سكر
،، ممكن وجبة عشاء مع الزبادي
،، حلو جدا سناك للأطفال بين الوجبات

ابعتولي بقى بتحبوا تأكلوا الكنتالوب ازاي ؟🥰

أتمنى تكونوا استفدتوا 🌹