22/08/2025
أشهر خرافات الدايت..
بلاش مياة وسط الأكل..
مع ان المياة وسط الأكل بنت حلال وصديقة مش عدوة، بتساعد ع الهضم والامتصاص وبتعزز الحرق والشبع كمان.
بلاش المياة أثناء التمرين؟
مع انها مفيدة جدا
بالعكس بتعزز الاداء العضلي والحرق والطاقة والنشاط، وتساعد جدا في الاستشفاء العضلي وتقليل الاحساس بالآلام بعد التمرين.
ركزي مع المشروب السحري…
مفيش مشروب حارق ولا ناسف للدهون، ولا وصفة بتخسس منطقة بعينها، في عوامل مساعدة بس الأساس هو النظام الغذائي وأسلوب الحياة الصحي.
الشاي الأخضر مش ساحر ولا القهوة الخضراء كمان، لكنهم بيفرقوا جدا في النتايج لو انت ملتزم بالنظام.
ماينفعش تستبدل الفاكهة بالعصير بتاعها حتى لو من غير سكر، ده حمادة وده حمادة تاني خالص.
مفيش حاجة اسمها ألخبط عادي طالما بالنهار، المهم قبل الشمس ماتروح التزام، فيه حاجة اسمها إجمالي السعرات الحرارية اليومية وتنظيم مواعيد الوجبات، والمؤشر السكري للأكلات عشان كل دي حاجات بتتحكم في معدل حرقك.
واخيرا، مفيش نظام ناجح مع غيرك.. يبقى لازم ينجح معاك، كل شخص كيان قائم بذاته، صحة مختلفة، معدل حرق مختلف، توزيع دهون مختلف، نشاط يومي مختلف، روتين حياة مختلف، زيد مش زي عبيد وعمره ماهيكون زي نطاط الحيط.🤣
نظامك لازم يتعمل ليكي ع اساس كل الحاجات اللي فاتت، شبهك وشبه يومك وقريب للأكلات اللي بتحبيها.
