26/04/2023
الله يسامحه صاحب كذبة إن الضغط العالي بيجيب صداع .. من كام شهر جالي عيان ضغطه 240 علي 120, بينهج مع أقل مجهود وحركته تقيلة جدا وصدره بيطبق عليه وبيصحي من النوم مخنوق كل ليلة تقريبا ... كشفت عليه وعملتله آشعة الإيكو علي القلب وكتبت العلاج المناسب لظروفه ... في الإعادة الرجل رجع مبسوط ومتحسن جدا وضغطه الحمد لله بقي 130 علي 80 .. ضحكنا وهزرنا وطلبت منه يتابع معي مرة كل 3 شهور
الرجل اختفي فترة طويلة لغاية ما في ليله لقيت التليفون بيرن في نص الليل وواحدة ست بتعيط إن جوزها أغمي عليه فجأة .. طلبت منها يطلعوا علي المستشفي وثواني كنت معهم لقينا الضغط حوالي 200 علي 100 وعمله انفجار شرياني ونزيف في المخ ... الرجل اتحجز في العناية وبعدها بكام يوم حالته اتحسنت وبعد ما طلع عنينا فاق من الغيبوبة الحمد لله .. فسألته حصل إيه بقي؟
الباشا فضل كذا شهر بياخد العلاج اللي كتبتهوله للضغط وبعد كدا واحد معرفة نصحه يبطل علاج الضغط ويبقي ياخده فقط لما يصدع بس لأن طالما مفيش صداع يبقي الضغط كويس .. صاحبنا ما صدق ورمي العلاج من غير ما ياخد رأيي فحصلت المصيبة وكانت النتيجة ارتفاع الضغط ونزيف في المخ
أنا بقول الكلام علشان نقضي علي أسطورة الصداع ... والله الضغط ملوش دعوة بالصداع, وممكن الواحد يصدع وويكون ضغطه طبيعي جدا , لكن كمان ممكن الواحد ضغطه يعلي في السما من غير صداع, علشان كدا أبوس راسك طالما عندك الضغط خد علاجك ضرووووري وإوعي توقفه أو تغيره إلا لما تاخد رأي دكتور القلب ومتنساش إن الضغط إسمه "مرض مزمن" يعني هيطول ومش سهل إنه يختفي .. فخد علاجك من فضلك وبلاش تبهدل أهلك وتبهدلنا معهم في انصاص الليالي
دكتور / محمد عبدالسلام موسي
لتشخيص وعلاج أمراض القلب وقسطرة الشرايين التاجية
