Dr.Mohamed samir kids clinicعيادة الاطفال وحديثي الولادة

08/03/2026

25/02/2026

👌👌👌👌👌ازاي اتعامل مع عضة الكلب او القطه

نفذ الخطوات دي :
١-غسل مكان العضه بماء وصابون لان الفيروس ضعيف وبيموت بالمطهرات فده يقلل الحمل الفيروسي
2- احبس الكلب و حطله اكله و شربة في مكان لوحدة و راقبة لمدة شهر لو عندة سعار حيموت لوحدة لو مامتش يبقي مش مريض.
3-روح اتطعم في خلال 24 ساعة والتطعيم موجود في المستشفي العام والوحدات الصحية وبالمجان ومش موجود في اي مستشفي تانية ولا حتي خاصة و لو اللعاب لمس العصب بينقل المرض
4-لو حد جاله سعار و متطعمش خلال الفترة 24 ساعة ملهوش علاج و بيموت ممكن قبل حتي ما يبان علية الاعراض اللي مفيش دكتور حيعرف يشخصها

---👌👌👌👌اعراض السعار :-

1-وجع في الظهر قوي
2-خوف شديد من الماية و عدم القدرة علي الشرب
3-هلوسة شديدة و حالة هياج اعتقد انها ناتجة علي الوجع القوي
4- شلل و عدم القدره علي حركة اليد لان المرض بيدخل في النخاع الشوكي يدمرة
5- عدم القدرة علي النوم و التنفس
6- في حالات بتسخن بس مش شرط

👌👌👌👌👌، عرفوا كل الناس حتي للتوعية و دة ينطبق علي اي حيوان مش كلب بس
حصان حمار فار قطة جمل نسناس شامبنزى

👍👍لو عايز تفيد غيرك اكتب تم

👌👌👌واعمل شير في الخير

24/02/2026

النزلات المعويه منتشره جدا في الأطفال الأيام دي

لكن مع شوية نصايح بسيطة، نقدر نحميهم ونعدي الفترة دي بسلام:

1. *النظافة أهم حاجة:* علمي طفلك يغسل إيديه كويس بالميه والصابون دايماً، خصوصاً قبل الأكل وبعد الحمام. ودي حاجة مهمة جدًا ليكي كمان.
2. *الأكل النظيف:* اتأكدي إن الأكل اللي بياكله طفلك طازج ونظيف ومطبوخ كويس. حاولي تقللي من الأكل الجاهز والمكشوف بره البيت.
3. *المياه مش أي مياه:* شربي طفلك مياه كتير تكون نضيفة ومفلترة أو مغلية. السوائل مهمة جدًا عشان جسمه ما يجفش.
4. *لو حصلت نزلة:* لا قدر الله لو طفلك جات له نزلة معوية، أهم حاجة إنك ترضعيه سوائل كتير (مياه، عصاير طبيعية، محلول معالجة الجفاف). لو بترضعيه طبيعي، استمري في الرضاعة.
5. *راقبي الأعراض:* لو لاحظتي إن الإسهال شديد أو فيه دم، أو لو طفلك عنده قيء مستمر، أو رفض ياكل ويشرب، أو شكله تعبان جدًا وخامل، يبقى لازم فوراً تروحي للدكتور. الجفاف ممكن يكون خطير جدًا على الأطفال الصغيرين.

ربنا يحفظ أولادنا جميعًا ويحميهم من كل شر! دمتم بخير.

دكتور : محمد سمير
اخصائي الأطفال وحديثي الولاده
العياده : الطالبيه فيصل بالقرب من ميدان الساعه
010 08121489

02/01/2024

عشان بس الناس متترعبش عالفاضى ..!

تسليك الأنف مش موضه ولا هرى ولا كلام مصاطب !!

ومفيش أى مصدر محترم قال انه بيعمل التهابات جيوب أنفيه مطلقاً إلا لو بنستخدم مية مجارى ..
وفيه أصلاً غسيل مخصوص للجيوب الأنفيه sinus rinse

التسليك ينفع لأي سن ،، وينصح باستخدام ماء نظيف ، سواء كان مغلي وتم تبريده ، أو فلتر ، أو مقطر أو محلول ملح أو ماء بحر ..
التكنيك بالطريقة دي هوا اللي موصوف من FDA هيئة الغذاء والدواء الأمريكية ،، ومش بيعمل أي التهاب أذن ،، والتحذير فقط من استخدام ماء غير نظيف لخطر العدوى .
مهم كمان العودة لطبيبك لو لم يتحسن الطفل مع التسليك أو حدث ارتفاع في الحرارة ، أو نزول دم بسيط .
مهم كمان م"نتغاشمش" مع الأطفال فنعورهم، وننزل دم وتبقى مدبحة، نحاول بهدوء ولطف، لو هنكتف يبقى لازم حد يساعد فى تثبيت رأس الطفل كويس جدًا،
" الألم البسيط في الأذن أحياناً سببه زيادة ضغط الأنف ،، وانغلاق قناة استيكيوس وزيادة ضغط الأذن الوسطى مؤقتاً مش التهاب الأذن ولا حاجة "..
منقووورل

‏

31/12/2023

لو ابنك انفه مسدوده نضفيها كويس كويس اوي بالبخاخه والشفاط

لو طفلك اقل من ٤ شهور بيكح كحه بسيطه اكشفي واطمني عليه النهارده انما لو بينهج او ما نامش كويس بالليل من صدره او بيكح كحه متواصله أو مش عارف يرضع كويس لازم تروحي لدكتور دلوقتي

بلاش خروج بالليل

لو حد عنده برد اعزليه عن الاطفال

لو انت عندك برد البسي ماسك وانت ببتعاملي مع طفلك الرضيع

بلاش خروج بالليل

خمس قطع وبنطلونين وشراب

سوايل دافيه كتير

بلاش خروج بالليل

ليمون وبرتقال وجوافه عصاير بميه مش ساقعه

هوي الشقه وافرشي الملايات والبطاطين

وبلاش خروج بالليل

منقول من
د.حسن رجب

16/12/2022

Nasal irrigation devices can be safe if used and cleaned properly.

20/07/2022

مشهد بيحصل في كل بيت

الام تلاقي الطفل بيعمل حاجة غلط

بسرعة تقوله " لأ لأ "

و هو يبصلها و يضحك و يكمل عادي جدا ولا كأنها بتتكلم 😁

ف الام تصوت اكتر 😡
تزعق 🤬
ممكن بسرعة تروح ضرباه ضربة خفيفة علي ايده ☠

ف حبيبي الطفل يتلخبط و يزعل و مش فاهم فعلا مامته عملت كدا ليه ! 😢😪

⚠️⚠️ تعالوا اقولكم حاجتين لازم ناخد بالنا منها كويس اوي في الاطفال خاصا في السنين الاولي من عمرهم ⚠️⚠️

• اولا •

الطفل معندوش مرونة زينا احنا الكبار
بمعني ايه ؟! 🤔🤔
مثلا انتي رايحة سوبر ماركت لاقيتيه قافل عادي حتدوري علي واحد تاني و الموضوع يخلص

هما لا ، مش بالساهل ابدا يغيروا تفكيرهم و يفكروا بسرعة في حل بديل لو الحاجة الي عايزنها مالوقهاش او منفعتش او باظت او اتكسرت

ف لو بتقولي لطفلك لأ علي حاجة
هو سمعك و ممكن يبقي فهمك بس هو مخه اصدر له امر انه يستكشف الحاجة دي او يلعب بيها او يحط ايده فيها

ف هو مش بيعند معاكي ولا حاجة هو بس معندوش " مرونة "

طب اعمل اية ساعتها ؟!!!! 🙄🙄

حتواصل معاه بزيادة حروح لعنده انزل لمستواه و احضنه و ابص في عينه و اقوله جملة بسيطة و قصيرة بحيث انه يستوعبها علي طول ان دا مينفعش مثلا

او ممكن اشتت انتباهه زي بالظبط " حبيبي بص العصفورة " 😀😀

• ثانيا •

حاجة مهمة اوي اننا نعرفها

ان الطفل مش بيعرف يربط ما بين رد فعلنا و فعله هو

يعني مش حيقول اااه ماما بتزعق عشان انا عملت غلط ! 🤦‍♀️

لا للاسف هو ممكن ميفتكرش اصلا انه غلط و يترجم الزعيقة دي ان ماما مش بتحبني ، ماما مستقصداني ، ماما بتضايقني و هكذا ..

ف التواصل مهم جدا جدا
و اني اخد بالي من ردة فعلي خاصا لو مش حاجة خطر ..

منقول...،

07/07/2022

إنتو مستهونين بموضوع ملاحظتك لبول طفلك ؟؟
طيب خدو التقيلة دي ... طفل كويس وحلو وبيلعب وبيكبر وبيزيد في الوزن وبيتمرن سباحة وزي الفلّ ، مشكلته الوحيده ان الأم اكتشفت بعد ما قلع البامبرز انه بيعمل حمام على نفسه بالنهار وبالليل ، الأم كشفت وعملت سونار ، طلع الولد عنده ارتجاع داخلي واحتباس للبول "منذ الولاده وتضخم في الحالب والكلى وفقدان في وظيفة الكلى اليسرى بنسبة ٨٠٪‏" !!!!!!!!
شئ صعب جداً .. صح ؟؟
طب خدوا الأتقل بأه ،، الأم رجعت flash-back بالذاكرة لورا وافتكرت ان طفلها عمره في حياته ما عمل بول بشكل مستمرّ !! وكان البول دايماً "متقطع " أو " منقط" وهيا فاكره ان دا عادي !! وعمرها ما سألت دكتور عليه لأنها متعرفش الNormal بتاع الأطفال إيه !!
كمان دكتور النسا كان نبهها ان في احتباس بول عند الجنين ومحتاجه دكتور اطفال يفسره بعد الولاده و البيبي كان بيعمل في البامبرز فمبدأتش تاخد بالها غير بعد ما قلعه ( عمر ٣ سنين تقريباً).. وبدأ يعمل على نفسه .. كان خلاص حصل اللي حصل الفترة دي كلها ..
نتعلم إيه بأه ؟؟؟

1. البول لازم يكون خط واحد one stream مش مقطع ولا منقط ولا معاه وجع او حزق او احمرار وجه وطفلك بيعمله أبداً أبداً.

2. مش مقبول طفلك ميتحكمش في البول بالنهار لاي سبب فوق ٣ سنين ولو لسه بيعمل على نفسه بالنهار لازم لازم سونار فوراً وتحليل ومزرعة بول .

3. السونار على "الكلى" إجبارى في الحالات الاتية طبقاً للأكاديمية الأمريكية لطب الأطفال (AAP) :

* حرارة مع ألم تبول(التهاب مجرى بول) مبتخفش عالمضاد الحيوى المناسب للمزرعة بسهولة .
* تكرار التهاب مجرى البول مرتين (المرة التانية لازم سونار).
* أى التهاب مجرى بول لطفل عمره من شهرين لسنتين.
* أى التهاب مجرى بول معاه "تنقيط" -حتى ولو أول مرة .
* أي طفل عنده التهاب مجرى بول ومش هتقدر تتابعه او تشوفه تاني في الاستشارة لأي سبب.

4. للأمهات اللي بتسأل ، الكلام ده على تقطيع وتنقيط البول المتكرر ، مش عشان مرة واحدة وطول عمره كويس تتوهمي ،، الأمهات اللي بتسألني عن أعراض زي حزق وجع تنقيط تقطيع تغير لون ( مستمر او متكرر) ،، لا تنتظري واكشفي فورا والافضل مسالك بولية او أطفال شاطر .
5. للأمهات اللي بتقول ابني لابس بامبرز هعرف ازاي؟؟

قلعيه البامبرز وحطيه في مياه دافية ورضعيه او شربيه مياه هيعمل ولاحظيه👌

بالله عليكم ، ولأول مرة أبقى محروق جداً على أطفال ممكن تتبهدل بسبب عدم علم أو جهل بالطبيعي في الأطفال ،، بالله عليكم انشروا الكلام ده في كل الجروبات ، وعلموا الأمهات ، ونبهوا أولياء الأمور وذكروا الدكاترة ،، يمكن ننقذ طفل من فشل كلوى ،، بحاجة بسيطة جداً ...

"الوعى"...
منقول من
د.أحمد الخطيب