https://www.facebook.com/1641271829500660/

غذاء د / إسراء عبد اللطيف, El `Agûza (2025)

09/04/2017

عشان الأنيميا مشكلة منتشرة عايزين نصلح شوية مفاهيم عنها ،،

السيدات من بعد 18 سنة لسن 50 محتاجين حوالي 18 mg من الحديد يوميا يزيدوا مع الحمل ل 27 mg

النسبة دي ممكن نحصلها من أكلنا لو ركزنا في المصادر الغنية وأكلناها بطريقة صح،

100 جرام كبدة فراخ او لحمة هتديكي 40 % تقريبا من احتياجك اليومي ،ممكن جدا اما تخلصيها تاكلي معلقتين كبار مشمش مجفف وبعديه كوباية عصير ليمون عشان نزود امتصاصه ،ونحاول يبقى فيه في يومنا اي نوع من البقوليات زي الفول اوالحمص ونعزز امتصاصه بثمرة برتقال بعده

لو اكلتي 100 جرام من محار البحر هيديكي نفس النسبة بتاعت الكبدة من احتياجك ونحب ناكل معاه خضروات داكنة زي البروكلي والجرجير ونحلي بفاكهة حمضية زي البرتقال

ناكل اللحمة مع السبانخ وناكل دايماً بين الوجبات مكسرات زي الكاجو ونراعي مع اي مصدر غير حيواني مصدر لفيتامين سي يعزز امتصاصه زي الجوافة والفلفل الأخضر والحمضيات

كمان هنلاقي في الماركت حبوب ومواد غذائية مدعمة بالحديد وبيبقى فيها نسبة كويسة جدا

ونبعد أي وجبة فيها مصادر كالسيوم زي منتجات الألبان وكذلك نبعد عن شرب الشاي وحاجة زي ردة العيش مع مصادر الحديد (ناكلهم عادي جدا بعيد عن مصادر الحديد بس)

بالنسبة للحوامل صعب شوية نعتمد على الأكل لوحده فبنلجأ لمكملات غذائية تساعدنا للوصول للنسبة دي مع التكملة بالأكل

#والحِميَة_رأس_كل_دواء

30/03/2017

- دكتورة انا عملت تحليل وطلع عندي أنيميا نقص الحديد مع إني باكل كتير!
= ومين قال ان الأكل الكتير بيعالج الانيميا؟ أنيميا نقص الحديد مش بيعالجها إلا الأكل الغني بالحديد ودا مش هيتظبط غير بالنوع مش بالكم

- يعني ايه؟
= يعني نهتم بأكل فيه حديد حيواني رقم واحد زي الكبدة سواء فراخ أو لحمة وبعديها اللحوم الحمرا وبعديها الفراخ وفواكه البحر ،
دول بنفضلهم عشان امتصاصهم في الجسم أعلى بكتير من المصادر النباتية

- والمصادر النباتية ؟
= أغنى المصادر النباتية الخضروات ذات الورق الأخضر الغامق زي السبانخ وغيرها والفواكه المجففة غنية بالحديد والبقوليات زي الفول والبنجر والعسل الأسود

- طب ازاي نزود امتصاصهم ويبقى ليهم تأثير أكبر؟
= ناكل معاهم مصدر حيواني عالي الحديد زي مثلا سبانخ باللحمة ولوبيا بقطع كبدة فراخ ،، ناخد معاهم مصدر لفيتامين سي زي عصير ليمون بعد الغدا او فلفل اخضر فريش او جوافة ،، والمهم نبعد دايماً عن الأكل اللي بيتعارض مع امتصاصه زي العيش بالردة وزي منتجات الألبان

#والحِميَة_رأس_كل_دواء

14/03/2017

" انا باكل الزبادي وبشرب الشاي بالعسل مش بحط سكر "
الحقيقة إن معلقة السكر ومعلقة العسل اد بعض في السعرات بالظبط ، لكن حلي أكلك بالعسل لأنه في فيتامينات ومعادن بعكس السكر اللي يعتبر empty calories
معلقة صغيرة عسل = معلقة صغيرة سكر = 20 سعر حراري

#والحِميَة_رأس_كل_دواء

26/02/2017

جسمنا محتاج يوميا 900 - 1000 mg من الكالسيوم اللي طبعا يعتبر من اكبر العوامل في بناء عضمنا واللي ماينفعش نقصر فيه لأنه آثاره هتظهر علينا من بعد ما ينتهي سن البناء ونبدأ نفقد منه تدريجيا ،،
طب ازاي نحقق النسبة دي من أكلنا اليومي ؟
▪كوباية لبن 240 جرام فيه نسبة 300 mg
▪كوباية زبادي 190 جرام فيها تقريبا 200 - 240 mg
▪ 30 - 45 جرام جبنة يعني تقريبا شريحتين جبنة او معلقتين كبار جبنة كريمي فيهم 300 mg

دول اغنى مصادر للكالسيوم، البيض مش مصدر غني زي ما هو شائع الحقيقة ان اكبر نسبة من الكالسيوم في قشرة البيضة 😃 ، السمك مش مصدر غني لكن أسماك زي السردين اللي بيتاكلو " بالعضم" يعتبروا مصدر غني بس المهم يتاكل بالعضم ، السمسم والطحينة من المصادر الكويسة لكن محتاجين يتاكلو بكميات كبيرة ودا مش صحي بسبب سعراتهم العالية

محتاجين يوميا نشرب كوباية لبن وكوباية زبادي كبيرة وننوع في الجبن "مش منهم القريش" عشان ناخد الكالسيوم كامل

#والحِميَة_رأس_كل_دواء

23/02/2017

السمنة النباتي ولا البلدي ولا الزبدة ولا الزيت العادي ولا زيت الزيتون ؟
من الحاجات اللي محتاجين نحطها في الحسبان واحنا بنستخدمهم في أكلنا،
السؤال له شقين ،، ايه بيتخن وايه صحي أكتر

من حيث السعرات كل أنواع الدهون دي متساوية (معلقة صغيرة = 45 سعر حراري) تقريبا بالتالي المقارنة هتكون افضل صحيا - بغض النظر عن مين أطعم 😃 -

في رأس القائمة ييجي الزيوت بأنواعها سواء درة او عباد الشمس او الزيتون " دهون غير مشبعة " - بعيدا عن قدحهم او القلي بيهم اللي بيزود فرصة كونهم اكثر ضررا - احنا دايماً بننصح بزيت الزيتون لان الدهون الأحادية اللي فيه موجودة في حاجات قليلة منها الزيتون برضه ومطلوب ناخدها بكمية كافية يوميا تقارب كمية الزيوت التانية

بعديها ومطلوبة بكمية أقل الزبدة والسمنة البلدي "دهون مشبعة"

بعديها وهي اﻷسوء السمنة النباتي " المهدرجة " اللي بسبب هدرجتها بتحتوي على trans fat والمادة دي هي الأسوء على صحتنا وللأسف هي الأكثر استخداما في الحلويات والمخبوزات وغيرها فالمطلوب مننا نقللها قدر الإمكان

#والحِميَة_رأس_كل_دواء

16/02/2017

هنتكلم عن الدهون .. اللي مشاكلنا وسعراتنا معظمها منها ،
الدهون او fat ليها تقسيمة كدة بس للتبسيط هقسمها لحاجتين دهون صحية ودهون غير صحية ،

الدهون الصحية او الغير مشبعة ليها نوعين ؛ PUFA و MUFA

ال PUFA تشمل معظم أنواع الزيوت النباتية بتاعتنا زي عباد الشمس والدرة والصويا ومن نفس الفصيلة دي من الدهون فيه الأوميجا Omega 3 اللي بنسمع عنها ودي هتكلم عنها في بوست منفصل لأهميتها

ال MUFA تشمل زيت الزيتون والزيتون بأنواعه ومعظم المكسرات ومنهم الفول السوداني وزبدة الفول السوداني
النوعين دول من الدهون مطلوب يبقو موجودين في أكلنا بنسبة 20 ل 30 % من السعرات اليومية مع العلم ان معلقة صغيرة زيت بتدي 45 سعر حراري وزيهم حفنة مكسرات وزيهم 8 زيتونات

وجود المجموعتين دول في أكلنا بالنسبة بتاعتهم المطلوبة بتزود نوع معين موجود في جسمنا من الدهون اسمه HDL وبتقلل LDL والموازنة دي بتمنع ارتفاع الكولسترول في الجسم وبتوازنه وبالتالي تحافظ على الشرايين وتمنع مرض تصلب الشرايين والجلطات

اما الدهون الغير صحية فدول منهم حاجتين ؛ الدهون المشبعة SFA ودي الدهون حيوانية المصدر زي الموجودة في منتجات الألبان واللحوم الحمرا والبيضا وزي السمنة البلدي والقشطة والزبدة والانواع دي مطلوب تكون أقل الدهون استخداما لانها بتزود LDL اللي اتكلمنا عنه
وأسوء أنواع الدهون على الإطلاق trans fat ودي زي السمنة النباتي المهدرجة وموجودة كتير في الحاجات المصنعة زي البسكوتات والمخبوزات والمقليات والفاست فود ودي عيبها انها بتزود LDL وبتقلل HDL اللي هو عكس المطلوب تماما كمان في دراسات بتقول ان في علاقة بينها وبين زيادة الشوارد الحرة اللي تعتبر سبب من أسباب الأورام

يعني في الآخر عايزين نزود من الزيوت النباتية وزيت الزيتون والمكسرات والزيتون ، عايزين منتجات الألبان تكون نص او خالي الدسم وكذلك اللحوم بأقل كمية دهون ، عايزين نقلل اكل من برا قدر المستطاع وفي البيت نقلي في الزيت مرة واحدة عشان ماسخنش زيادة ونقلل من السمنة النباتي او نمنعها لو في بديل

#والحِميَة_رأس_كل_دواء

27/01/2017

الخضروات والفاكهة ،،
المجموعتين دول يعتبروا من أهم وأغنى الأطعمة بالعناصر الغذائية لأنها مليانة بنسبة عالية من الفيتامينات والمعادن ،

الخبراء بينصحونا ان تكون نسبة الخضروات والفواكه في أكلنا يوميا من 7 ل 10 حصص ودا بيتمثل في :
طبق خضار كبير مطبوخ + طبق سلطة + حصة خضروات طازجة زي الخيار والطماطم والخس في الفطار او العشا + 3 ثمرات فاكهة

كمان من التوصيات اننا ننوع في ألوان الخضروات والفاكهة لإن كل لون فيه عنصر غذائي مش موجود في التاني فناكل في الاسبوع كل يوم لون مختلف ما بين الأخضر الداكن زي السبانخ والملوخية للأخضر الفاتح زي الخس والكوسة للأحمر زي الطماطم والأصفر زي الجزر والبطاطا وغيرهم مع تنويع الفواكه

بالنسبة للسعرات تعتبر الخضروات اﻷقل فتقريبا طبق السلطة الصغير فيه 25 سعر وطبق الخضار المطبوخ ني في ني تقريبا 50 سعر بالتالي ناكلهم واحنا مطمنين ماعدا البطاطس والبسلة والدرة والقلقاس والبطاطا اللي يعتبروا خضروات نشوية ناكلها بحرص

أما الفاكهة فطبعا فيها سعرات والناس اللي بتعمل دايت وبتاكل فاكهة ليل نهار باعتبار انه اكل دايت مالوش سعرات فدا مش مظبوط ، ثمرة الفاكهة ال 100 جرام فيها تقريبا 60 سعر حتى الفاكهة المشهور عنها سعراتها العالية فبتتمنع في الدايت زي المانجا والتين والعنب ماتختلفش في سعراتها كتير لكن في محتواها اللي بيعتبره الجسم محتوى سكر عالي فمش بنفضل الإكثار منها لكن مش دايماً هتكون ممنوعة

خلوا ليكم يوميا حصة ثابتة من الخضروات والفاكهة واهتموا بيها لأطفالكم وعودوهم عليها لأنها عناصر غذائية لا تعوض

#والحِميَة_رأس_كل_دواء

غذاء د / إسراء عبد اللطيف

09/04/2017

30/03/2017

14/03/2017

26/02/2017

23/02/2017

16/02/2017

27/01/2017

Address

Opening Hours

Telephone

Website

Alerts

Shortcuts

Share

Category