20/09/2021
هو الحشيش دا برضه إدمان؟
طيب ما الناس كلها بتشرب حشيش يعني مافيش حاجة
أصلهم هم سيجارتين اللي باشربهم يعني مافيش حاجة
بلا بلا بلا
كتير بنسمع الكلام دا، وغيره من اللي بيكشف تشوش مفهوم الإدمان عند ناس كتير..
خلونا نعرف إن الإدمان بشكل عام هو ارتباط (نفسي، وبدني) بسبب (شيء) خارجي عن الجسم..
يعني أي شيء (بره حدود جسمك) له تأثير نفسي وبدني عليك، ويسبب التعلق بيه، وتعتمد عليه لتحقيق التأثير دا، أو تكراره، أو إشباعه، هو شيء عندك القابلية على إدمانه.. كوباية الشاي، القهوة، السيجارة، الحشيش، الشيكولاتة، الهيروين، الجنس، فيسبوك، الكحول، الكولا، الترامادول، العمل...
فيه ناس مدمنة جنس، وفيه ناس مدمنة بيبسي، وفيه مدمن البودرة اللي كلنا بنوصمه بالكلمة سيئة السمعة (مدمن، بودرجي)!!
للأسف مفهوم الإدمان مشوش.. ومغلوط..
الإدمان سلوك اعتمادي.. بيخليك تعتمد على مادة (أو شيء) خارجي، لتحقيق تأثير مرغوب داخلي (السعادة مثلا).. وباختفاء المادة (أو الشيء) دا، حالك يتلخبط بسبب زوال تأثيره المرغوب.. فتحاول تعوض غياب التأثير دا بتعاطي المادة (أو الشيء) دا تاني..
بعد الاعتماد، تبقى معرض لمرحلة إساءة الاستعمال.. إنك تستهلك من المادة (أو الشيء) دا أكتر، عشان تحصل على تأثير أعلى.. وتفضل تزود الاستهلاك، ويزيد التأثير، لحد ما يحصل التعود.. وتبقى الجرعة غير قابلة للسيطرة.. تبقى بتستهلك أكتر والتأثير معتاد، وغير مشبع.. وتبدأ حياتك كلها تتوقف على المادة (أو الشيء) دا.. وتفكيرك ينحصر ف الحصول عليه بكميات كبيرة، وبشكل دائم.. تعيش عشانه، بتفكر فيه بس.. وتبدأ حياتك تتدهور سواء ف وجوده أو غيابه.. ودي هي مرحلة الإدمان.. اللي بتفقد فيها السيطرة.. وتصاب حياتك بالشلل التام ف غياب الشيء اللي بتدمنه..
ما تستهونش بسيجارة حشيش وتقول إنها سيجارة وهاتعدي.. ولا تستهون بإنك لو ما شربتش فنجان القهوة الصبح تلاقي نفسك حالك متلخبط.. دي مؤشرات على بداية سلوك اعتمادي..
وطبعا مش كل الناس عندها حساسية الإدمان، لو استهلكت المواد دي.. بس أول ما تلاقي سلوكك بدأ يكون اعتمادي على المادة (أو الشيء) دا، اعرف إنك ف خطر.. وإنك عندك القابلية على الإدمان.. حتى لو كان الشيء دا مجرد إزازة كولا.
01067144577
