18/11/2025
الراجل لما يكون خايف عليكي… مش بيحبسِك، بيحميكي.
أنا واحد من الناس مش بعرف أخبي الزعل.
ولو قلبي واجعني بسبب فِعل معين مع شخص بقدّره
تلقائياً هيبان علي وشي…
ومع الوقت هيظهر في طريقة كلامي.
ولو خايف على حد فعلاً… كل حاجه هتبان ليه مع الوقت.
ساعات الخوف بيتترجم عصبية، تحكم، أو شدّة زيادة.
وده مش لأنّك إنسان شرير…
لأنّك مش متوقع تشوف اللي قدّامك غير بالمعايير اللي فـ دماغك.
لكن الحقيقة؟ مش كل حاجة لازم تكّمل زي ما أنت متوقع.
ومش كل الناس جاهزه تستقبل خوفك عليها بنفس الطريقة،
ولا كل قلب هيعرف يفرق بين “السيطرة” و“الستر”.
ودي حقيقة مهمة لازم كل البنات تفهمها:
إن الراجل السوّي… هو اللي هيخاف عليكي بجد،
وده مش من باب التملك… من باب الرجولة.
الراجل السوي لما يقولك:
“غطي شعرك… داري نفسك.”
ده مش معناه إنه بيقلل منك، ده بيخليكي تشترَي آخرتِك،
وعايزك تمشي قدّامه في الدنيا والآخرة على نور.
“وسّعي هدومِك شوية.” مش معناها إنه بيعقّدك.
ده إنسان فاهم نظرات الرجالة كويس…
عارف بصاتهم ونيّاتهم،
ومش عايز عين غيره تتعلق بيكي لحظة.
“وطي صوت ضحكتك.” مش بيطفّيكي،
ده بيحب فرحتك… بس مش علي الملأ في وسط الناس.
وبيفكرك إن الحياء زينة، وإن الصوت العالي مش من طبيعة البنات.
“خلي حدود مع صحاب الكلية والشغل.”
ده مش معناه إنه بيشكّ فيكي، ولا بيصغّرِك وسطهم.
ببساطة:
اللي يعرف تفكير الشباب… شاب زيهم.
واللي يعرف تفكير البنات… بنت زيهم.
وهو شايف اللي إنتِ مش شايفاه.
“ما تعانديش عشان أنا بغير.” مش بيخنقك،
ده قلبه بيتحرك عليكي.
واللي مبيغيرش علي اللي بيحبهم… مبيخافش على عرضهم.
واللي مبيخافش على عرضه… مفيهوش رجولة.
وده دين ربنا عزّ وجل حفظ بيه البنت، عشان إنتي إنسانة غالية.
طب وبعدين؟ تقدري تسمعي كلامه وتنفذيه فورًا قدام الناس…
واتخانقوا مع بعض ويفهمك براحتكوا بينكم.
الإصلاح، النقاش، الغضب… كله هيتحل بين أربع حيطان.
لكن برّه؟ أنتم سوا إيد واحدة… حتى في الخلاف.
والحقيقة الحياة مش محتاجة حرب.
العلاقات مش محتاجة كبرياء.
البيوت مش بتتبني بالشد والزعيق علي بديهيات…
بتتبني بالليّن وحُسن العشرة وسماع الكلام اللي يرضي ربنا.
ربنا عزّ وجل قال: "وجعلنا بينكم مودة ورحمة"
الموّدة مش هتيجي بالجدال والعناد والتكسير في بعض.
فـ يا بنت الناس…
لما تلاقي الراجل اللي قدامك بيخاف عليك بصدق،
وبيشد عليكي من خوف مش من ضعف،
وبيغير عليك عن حب مش من نقص… قدريه، إحترميه.
لأنه هو الراجل الوحيد اللي شايل همّك،
وهو الإنسان اللي مش عايز يفقدِك.
لأن في زمن العلاقات السطحية… وجود راجل “سوّي”…
مش مجرد "ذكر" عمرها ما كانت نعمة بسيطة.
والسنة دي علمتني درس كبير:
أصعب حاجة هتعدي عليك في الجدال بينك وبين شخص بتحبه… هو إنه يكون حزين، وأنت أكتر واحد بيكره الحزن.
فأفتكر دايمًا يكون جواك الكلام ده :
“طول ما إحنا سوا… الزعل بيعدّي.”
“الحياة مهما شدّت وطول ما بنعمل الصح… ربنا هيصلّح بينّا.”
