Dr.Mohamed Fakhry Kids Clinic

21/04/2020

*سؤال هل ينفع اصوم وانا برضع طبيعي ؟
-اجابه السؤال بتعتمد على عوامل كثيره جدا اهمها عمر البيبي و اذا كان بيرضع طبيعي بس ولا بياكل او بيرضع صناعي مع الطبيعي

*مش فاهمه برضه يعني اعمل ايه اصوم ولا لأ ؟
-بصي حضرتك لو البيبي عمره اقل من ست شهور وده معناه انه معتمد على الرضاعه الطبيعيه كمصدر اساسي للغذاء بتاعه يبقى حضرتك مش هينفع تصومي خالص انما لو البيبي عمره سنه او اكثر وبيعتمد على الاكل كمصدر اساسي للغذاء بتاعه فممكن حضرتك تصومي

*طيب لو عمره من ست شهور لسنه اعمل ايه ؟
-الموضوع بيختلف من أم للثانيه و بتحكمه عوامل كثيره... في الحالة دي لازم تستشيري الدكتور لأن الرضاعة الطبيعية بفوايدها بتحصل للطفل مرة واحدة في عمره و حرام يتحرم منها.

😊


د. محمد فخري
استشاري طب الأطفال و حديثي الولادة

30/03/2020

العيادة تعمل بصورة طبيعية طبقا لمواعيد الحظر ، للحجز برجاء الاتصال على رقم العيادة من الساعة ١٠ صباحا.
دمتم و أطفالكم بأمان 🌹🌹

06/12/2019

تطعيم لشتاء ٢٠١٩ - ٢٠٢٠ متوفر بالمصل و اللقاح
دمتم و أطفالكم بأمان 😊
د. محمد فخري
استشاري طب الأطفال و حديثي الولادة

16/10/2019

💉 😷..............................................
اشهر مسببات الالتهاب السحائي البكتيري 3 انواع
👾 Meningococci
👾 HiB
👾 Pneumococci
وبنطعم ولادنا ضد التلاته
وهناخدهم بترتيب جدول التطعيم

👈 اولهم و أهم واحد وهوا التطعيم بتاع ال Meningococci أو المكور السحائي
ودا عباره عن لقاح رباعي فيه اربع سلالات من البكتريا A C Y W 135 و ده في منه نوع قديم كان هو النوع الوحيد المتوفر في مصر و كان بيتاخد من اول سن سنتين وبيدي حمايه ضد الالتهاب السحائي لمدة 2-3 سنوات ..**الانواع الحديثه ممكن تتاخد من عمر 6 اسابيع كالاتي:
1_لو الطفل اخد اول جرعه قبل عمر 6شهور----بيكون التطعيم 3 جرعات فقط مدى الحياه
---------اول جرعتين: بينهم شهرين
---------الجرعه الثالثه:عند 12شهر
2_لو عمر الطفل من 6شهور ل12شهر-------بيكون التطعيم جرعتين فقط مدى الحياه
---------الجرعه الاولي: تبدا من عمر 6شهور
----------الجرعه الثانيه: 12شهر
3_لو عمر الطفل سنه أو اكتر ------- بيكون جرعه واحده فقط مدى الحياه

👈 تاني تطعيم وهوا التطعيم ضد HiB او الانفلونزا البكتيريه
ودا زمان مكانش من التطعيمات الاجباريه ودلوقتي بقى ينزل من ضمن التطعيمات الاجباريه للاطفال ف الوحدات الصحيه وبيتاخد مع تطعيم اسمه اللقاح الخماسي واللي احنا بنقول عليه حقنة الشهرين والاربع شهور والست شهور والسنه ونص برضو

👈 واخر واحد ال Pneumococci او المكورات الرئويه

ودا بيتاخدله تطعيم اسمه ال Prevenar
والتطعيم دا جدوله بيتاخد للطفل عند سن 2 و 4 و 6 اشهر من عمر الطفل وجرعه منشطه عند سن سنه ونص
ودا بيحمي ضد المكورات الرئويه او ال Pneumococci واللي هيا بتبقى من الاسباب الرئيسيه للالتهاب السحائي وبتعمل امراض تانيه كتيره واشهرها الالتهابات الرئويه والتهابات الاذن الوسطى الشديده.

ودي كانت اهم التطعيمات ضد اشهر مسببات الالتهاب السحائي البكتيري 💉💉💉
⛔⛔⛔⛔ واحب انوه ان التطعيمات جميعها متوفره ف العياده وبالجدول المحدد ليها
لانه زي ما قولنا هدفنا ومبدأنا ف الحياه دايما " الوقايه خير من العلاج " 👍👍
دمتم واطفالكم في امان :)

16/10/2019

😷 😷 😷......................
من اسمه : هوا التهاب السحايا 😰

طب ايه هيا السحايا ❓❓❓❓
هيا الاغشيه المغلفه للمخ ... ودول بيبقوا 3 وهما " الام الجافيه والام الحنون والعنكبوتيه "
والالتهاب السحائي بيبقى ياما " بكتيري" ودا المنتشر " او فيروسي " او " فطري"

تعالوا نتكلم عن الاهم وهوا الالتهاب السحائي البكتيري.........................................................
واهم مسبب ليه هيا بكتريا اسمها "meningococcus " 👾
والبكتريا دي بتبقى موجوده عند 10 ف الميه من الناس ف الحلق ولكن ملهاش اي اعراض
وطريق العدوى بيبقى عن طريق الرذاذ الملوث من الشخص المصاب او الشخص الحامل للبكتريا ....وبعد كدا بتدخل دم الشخص السليم وتبتدي تنتشر للحبل الشوكي والمخ وتبتدي
اصابة السحايا " او الاغشيه " المحيطه بيهم
طب ايه اعراض الاصابه بيه ❗❗❗
بتبدا اعراض الاصابه الاوليه للالتهاب السحائي باعراض تشبه دور البرد او الانلفونزا
وبسرعه في خلال ساعات بتتطور الاعراض لاعراض الالتهاب السحائي وهيا
⭕ سخونيه شديده مفاجئه
⭕ صداع شديد غير طبيعي
⭕ تصلب وتخشب ف الرقبه
⭕ ترجيع مع الصداع
⭕ هذيان وبداية فقدان ف الوعي
⭕ تشنجات
⭕ ارق
⭕ فقدان كامل ف الشهيه
⭕ طفح جلدي ف بعض الحالات..................
واعراضه بالنسبه للبيبيهات:
⭕ حراره مرتفعه مفاجئه
⭕ عياط مستمر متصل بلا انقطاع على غير العاده او الطبيعه
⭕ مفيش اي قابليه للرضاعه نهائيا
⭕ انتفاخ اليافوخ الامامي
⭕ تشنج وتخشب ف عضلات الرقبه..................
طب يا دكتور اعراض كتير من دي بنشوفها ف اولادنا .... امتى نروح للدكتور ❗❗❗
طبعا فيه اعراض كتير متشابهه من امراض كتير بسيطه زي البرد وخلافه ولكن الاعراض اللي لازم نجري اول ما نشوفها ف ولادنا
هيا السخونيه المفاجه مع الصداع الشديد والزغلله والترجيع المفاجي المستمر مع تصلب وتخشب ف الرقبه
والاعراض دي بيبقى سببها ارتفاع ضغط المخ المفاجي بسبب الالتهاب السحائي 😰.................
طب ليه علاج ؟؟ 💉💉💊💉
ما انزل الله داءا الا وله دواء
مبدئيا عند الشك ف الحاله لازم نروح نزور الدكتور بتاعنا عشان يحدد المشكله واذا كان فيه شك لازم الطفل بيتحجز ف المستشفى ويتعزل وبيبتدي العلاج مباشرة بالمضادات الحيويه 💉💉💊💉
طب ازاي نقلل من فرص الاصابه بيه وايه هيا طرق الوقايه ❔❔❔❔
بما انه بيتنقل عن طريق الرذاذ من الشخص المصاب او تلوث اي حاجه بالرذاذ يبقى اولا اهم حاجه النظافه الشخصيه وغسل الايدي المستمر 👏👏👏👏
وتعليم الاطفال طريقة غسل الايدي وبالذات بعد الاكل واستعمال التواليت 🚽🚽 او بعد التواجد ف اماكن زحمه
- كل واحد ويبقى ليه متعلقاته الشخصيه الخاصه بيه لوحده ⚠
الحفاظ على الصحه العامه والاكثار من تناول الفواكه والخضار لانه بيبقى فيها كمية فيتامينات كتيره بتحسن المناعه والمقاومه العامه للجسم 🍅🍆🍓🍉🍊🍎
والابتعاد عن مصدر الاصابه بقدر الامكان و لو ممكن نلبس ماسك على وشنا أثناء الاختلاط يبقى ممتاز
وحاليا دلوقتي بقى متوفر احد اهم طريقه للوقايه وهي التطعيم ضد اسباب الالتهاب السحائي البكتيري
وهوا مصل الاتهاب السحائي 💉💉💉💉💉💉
ودا بيتكون من 3 انواع وهنتكلم عنه بشكل مفصل جدا ف البوست الجاي
استنونا
دمتم واطفالكم ف امان :)

29/08/2019

إللي حابه تعرف كل حاجة عن فيروس الروتا (أعراضه - السن المعرض للإصابة - الوقاية و العلاج)
كل الكلام ده مذكور بالتفصيل في الحلقة دي.

دكتور محمد فخري
استشاري طب الأطفال و حديثي الولادة

😊 😊

الدكتور محمد فخري استشاري طب الاطفال وحديث الولادة والحديث عن ڨيروس الروتا في برنامج دكتور العيلة علي ميجا اف ام يوم الاتين والاربعاء من الساعة 1...

21/08/2019

معاكم دلوقتي إن شاء الله على ٩٢.٧ نتكلم على فيروس الروتا
دمتم و أطفالكم بأمان 😊

14/05/2019

للماميز اللي بتدرب علي البوتي 😅👇

١_اصبري كثيرا🤷‍♀☺💪🏻

٢_طولي بالك😯

٣_مالكيش دعوة بتجارب حد خالص 🤐🙏

٤_انتي تقدري 💪🏻💪🏻🤩

٥_بالهداوة مش بالقساوة🙋🏻😊

٦_العنف بيجيب نتيجة عكسية و الجريمة لا تفيد🤷‍♀

٧_ابدأي في الصيف _زي الأيام دي🙋🏻🤩

٨_شيلي السجاجيد و اقفلي المكاتب و الدواليب.

٩_اصبري.. كتير

١٠_ما تبدأيش قبل سنة و نصف

١١_ارجعي لقاعدة رقم ٣ _مالكيش دعوة بحد

١٢_فرغي نفسك أسبوعين و اوهبي وقتك للمهمة العظيمة دي
١٣_اخلعي الحفاض طوال اليوم يلبسه وقت الخروج أو النوم
١٤_كل ساعة لساعتين قعديه في الحمام من خمس لعشر دقائق

١٥_كلميه كتير في الموضوع ده حتى لو كلامه قليل أو مش بيتكلم ..هيفهم.. يعني القطط هتتعود و هو لأ ؟🤔

١٦_شجعيه كل ما يقعد في الحمام حتى لو ما حققش أهدافك النبيلة..صقفي له و غني له💃💃👏🏻👏🏻💃💃👏🏻👏🏻

١٧_هو لسة بيتعلم ،، طبيعي يبقى فيه خساير و هدوم بتتوسخ و ارض بتتملي بي بي
عااااااااادي😂😂

١٨_افتكري ؛ العنف هيأخرك و الجريمة لا تفيد

١٩_استخدمي طريقة المحاكاة أو التمثيل ؛ خلي لعبته المفضلة تقعد في الحمام و شجعيها هيتأثر

٢٠_هيفضل كام مرة يغلط في التقدير و يعمل عملته بعد ما يقوم من الحمام يدقايق

٢١_لما يحقق التارجت و يعمل المراد قي الحمام احتفلي معاه و حسسيه بالإنجاز

٢٢_طولي بالك كتييييير

٢٣_كتري عدد المشجعين: باباه و إخواته و المجتمع و الناس

٢٤_لو بيخاف من الحمام حببيه فيه، هاتيله سلم أو قاعدة صغيرة و ستيكرات ملونة تكسر رهبته🤩

٢٥_مالكيش دعوة بحد🤐

٢٦_ مش شرط كل التجارب تكون زي بعض ونرجع نقول فروق فردية 🤔

٢٧_أكتر من ٣.٥ سنوات هيتعبك و يعاندك جداااااا🙆🙈

٢٨_لو نجحتي في خلع الحفاض بالنهار حليتي ٩٠٪ من المشكلة👏🏻👏🏻

٢٩_ لازم تستحملي ابنك

٣٠_لو بيعمل و هو نايم ده مش بإيده حتى اسمه تبول لا إرادي.. إياكي تعاقبيه

٣١_العنف هيأخر و الجريمة لا تفيد🤷‍♀

٣٢_لحد ٤ سنين مقبول يبل سريره بالليل بعد كده اكشفي

٣٣_قللي سوايل و فواكه بالليل و ما تنيميهوش زعلان🙏😍

٣٤_عوديه يدخل الحمام مباشرة قبل ما ينام🏃🏻

٣٥_اصبري_كتير😍☺

٣٦_مع الوقت علميه الخصوصية في خلع ملابسه و دخول الحمام و علميه النضافة يعد الحمام🙏

٣٧_اتعبي شويه في الاول هترتاحي كتير🤩👏🏻😍

٣٨_همسة في أذن الأب؛ لو سمحت اوعى تزعلها في المرحلة دي و تقبل كل شيء منها و إلا قوم انت بالمهمة دي يا بطل😴💪🏻

٣٩_اصبري و طولي بالك و احتسبي الأجر و الثواب عند الله🤷‍♀☺

٤٠_احتفلي مع طفلك بكل إنجاز يعمله حتى لو كان مجرد إنه بقى يعمل زي الناس في الحمام 💃🙏👏🏻💃

ثقته في نفسه و إحساسه بأهمية أي حاجة بيعملها بتتنقل له منك انتي☺

و في الاخر الاب له دور كبيييييير جداااااا في تعويد الاطفال الذكور علي الحمام ، لأنه هو مثل الطفل الاعلي و هياخد كلامه ثقة لازم يشارك معاكي ..🙋🏻🤩
"آية القاضي"