06/05/2026
الحاجه إللي في الصوره دي عباره عن الرحم وفيه شويه أورام ليفيه متعددة الاحجام..
الصورة تخض شويه بس أحب اطمنكم إن معظم الحالات دي بتبقى أورام حميده والموضوع بينتهي تماما باستئصال الورم..🙂
في الاول خلينا نعرف ايه المقصود بسن اليأس.. ⁉️
المصطلح ده بيطلق على الفتره بعد انقطاع الدوره الشهرية لمدة 12 شهر وفي الغالب بيبقى في سن الاربعينيات او الخمسينيات.. وللعلم برده بيطلق عليه سن الأمل
ونزول الدم زي دم الدوره او اغزر او اقل بعد انقطاع الدوره ب 12 شهر يسمى نزيف بعد انقطاع الطمث..
طيب خلينا نعرف اشهر اسباب الموضوع ده:
1- ألاورام الحميده في الرحم أو عنق الرحم زي الاورام الليفيه
2- بطانة الرحم السميكه ودي بتحدث نتيجة خلل هرموني أو نتيجة تعاطي هرمونات تعويضيه في السن ده (HRT)
3- 10% تقريبا من الحالات بيبقى السبب كانسر في الرحم او عنق الرحم.
4- ضمور بطانة المهبل بسبب نقص هرمون الاستروجين في السن ده
طيب يا دكتور انا حصلي كده.. أعمل أيه؟
حضرتك هتروحي للدكتور فورا وهيعمل الاتي:
هيسأل حضرتك عن التاريخ المرضي بتاع حضرتك وهل في اي امراض مزمنه زي ارتفاع ضغط الدم او السكر أو امراض الكبد و الكلى...وبرده مهم لو حضرتك بتاخدي اي ادوية مضاده للتجلط
وهيفحص حضرتك بالسونار على الرحم والمبيضين.. ونبص بمنظار على المهبل وعنق الرحم ..
طيب والعلاج؟
اكيد بعد تشخيص السبب وعلى سبيل المثال:
- لو السبب التهاب جدار المهبل بسبب نقص الاستروجين بنستخدم كريم مهبلي فيه استروجين
- بيتم ازالة زوائد عنق الرحم واخذ عينة من بطانة الرحم وتحليل الانسجة دي في حالة بطانة الرحم السميكه
- بعض الحالات بنديها هرمون البروجستيرون او بنركبلها لولب هرموني بعد تشخيص السبب طبعا
- استئصال الرحم الجزئي أو الكلي بيبقى الحل الجذري في بعض الحالات
- لاقدر الله في حالة السرطان بيبقى الحل استئصال الرحم واستكمال العلاج الكيماوي أو الاشعاعي
طيب اهم حاجه نطلع بيها من البوست ده ان حضرتك لو حصلك نزيف بعد انقطاع الطمث لازم تروحي لطبيبك فورا.. وبرده خليكي مطمنه ان معظم الاسباب بتبقى حميده..
عيادة المهندسين:
١٢٨ شارع السودان بجوار قصر الاليزيه
📱01091925791
📍 https://shorturl.at/SWO1e
عيادة الشيخ زايد:
الخمايل كلينيك.. مول gates الطبي.. كومباوند الخمايل البوابه الرابعه.
📱01029146666
📍https://g.co/kgs/CGRSbh
#نساءوتوليد
