02/05/2026
فوائد نظام الطيبات...
١. نصيحة لكل الاطباء المحترمين لا توجة المريض لمعمل أو مركز أشعة بعينة يعمل فيه فحوصاته _ حتى وإن كان نتائجه مضمونة وسعره أقل ! _ لان بمجرد ذكرك لأسم معمل أو مركز سيظن المريض المصرى إنك عامل نسبة مع المعمل مش علشان هو محتاج الفحوصات دى فعلا !!!
٢. لما تكتب دواء لمريض ويسئلك من أى صيدلية؟ قوله أاااى صيدلية، ولما يسئلك عن بديل للعلاج ؟؟ خد بالك وانت بتقوله " لأ خليك فى اللى انا كاتبه لك" ، لانه هيظن إن دة مش لمصلحته ومش هيفهم إنك أعلم بفاعلية الدواء وكفاءة العلاج من الشركات المختلفة وإن كان نفس المادة الفعالة، بل سيظن إن شركة الدواء مظبطة معاك وانت بتديله علاج مالوش فائدة خااااالص !
٣. فى الحالات الحرجة اللى جيالك مش قادر ياخد نفسه وبيموت حرفيا " زى مريض مثلا هبوط حاد بالدورة الدموية وارتشاح رئوى حاد نتيجة ضعف شديد بعضلة القلب Cardiogenic shock with pulmonary edema "_ اللى معروف ان نسبة الوفيات فيها تتعدى ال 80 % _ ويستنجد بك تحوله على مكان رعاية خاصة وتشرف على حالته ، أرفض وحوله على مكان حكومى فيه رعاية، لانه لما هيدخل رعاية خاصة تحت إشرافك ويخرج بعد ان تحسنت حالته دافع ٢٠٠ الف جنية مثلا هيفتكر ان المستشفى بتاعتك وانت اللى واخد الفلوس !!! ، مش إنك واخد ملاليم اتعاب إشراف طبى فقط !!!
ولو تعب تانى بعدها لسوء حالته الصحية واحتاج يدخل رعاية تانى هيقولك الأهل أومال هو كان بيعمل إية أولانى ؟!! وكأن حالته مش مزمنة ومتأخره كثيرا وانت الساحر اللى دخلته الرعاية فهيخرج منها فلة شمعة منورة ومش هيموت يوما ما خلاص !!!
٤. عرّف المريض صاحب المرض المزمن زى الضغط والسكر والكولسترول وضعف عضلة القلب والفشل الكلوى وقصور الشرايين التاجية والجلطات انه هيفضل ياخد الدواء بأنتظام مع المتابعة وان لازم يصاحب المرض ويتعايش معه بالعلاج ، لكن جو الورقة اللى بتدخل للدكتور من الأهل قبل الكشف مكتوب فيها " لو سمحت ماتقولش لبابا حالته وطمنه وقوله انه زى الفل علشان بيخاف ويتوتر ويطلع عين اللى جابونا فى البيت " ، مرفوضة ، المريض لازم يعرف حالته بوضوح تام ...
٥. لازم تبقوا عارفين اننا كأطباء لا نملك حياة أو موت ، وكمان لا نملك مرض أو شفاء، الموت والحياة بأمر الله ، والشفاء بإذن الله.
أومال احنا كأطباء بنعمل إيه ؟؟؟
نأخذ بأسباب الشفاء بالعلم المتاح لنا وندرس كل يوم ونطور معلوماتنا بالسفر لمؤتمرات بالخارج لتحصيل العلم والإطلاع على نتائج البحث العلمى وأحدث أساليب العلاج مع الحيطة والحذر من العلاج والدواء ومضاعفاته ومضاعفات المرض نفسه.
عندنا خطة علاج نأمل بها لتحسين حياتك وتقليل مضاعفات المرض والدواء وتعيش لبيتك وأولادك وشغلك بصحة جيدة تسمح لك بممارسة مهامك اليومية بشكل طبيعى.
والخطة دى من ضمنها، انه قد يفشل العلاج ونحتاج حجز فى المستشفى أو الرعاية عادى !
٦. فى أمراض كثيرة غير معروفة السبب أو لا يوجد لها علاج شافى تماما ودة مش عيب فينا لان ربنا قال "وما أوتيتم من العلم إلا قليلًا " ، فلو دكتور فهمك إنه عارف اسباب وعلاج كل الأمراض ويضمن لك الشفاء والحياة ويعملك من البحر طحينة يبقى دكتور نصاب وحلانجى ماتتعاملش معه ...الثقة دى مش عندنا فى الطب خااالص .
عارف لينا زمايلنا دكاترة كتير والله كانوا بيعملوا عمليات ويخرج المريض سليم الحمد لله، وبعدين يلاقوا الدكتور مات فى غرفة الاستراحة بعد العملية !
تعديل : وفى شباب تمريض كمان كتير ماتوا أثناء خدمة المرضى فى المستشفيات والعمليات، هم دول الشهداء بحق .
ربنا يرحمنا ...
