عيادة الدكتور خالد حامد لأمراض القلب والقسطرة القلبية

19/07/2025

عارف اكتر شكوى بتجيلى فى العيادة الفترة الأخيرة إية ؟!!!

" دكتور أنا تعبان بحس إنى مجهد وعضمى مكسر حتى وأنا لسة صاحى من النوم ، ماعنديش طاقة للكلام وتقل على صدرى طول الوقت، خمول وبنام كتير ، ولو عملت جهد أنهج بسرعة !!! "

أنا لو قولتلك مع الكلمتين دول بيجى فى بالى كام تشخيص مش هتصدق ؟!!!
مش أقل من ٢٠ مرض مابين خطير لبسيط وأبدأ أدور عليهم كلهم من كلامك والتاريخ المرضى والفحص الطبى ورسم القلب والايكو والتحاليل وغيرهم من الفحوصات مما تتطلبه الحالة ...

أدور فى القلب والرئة والانيميا والغدة الدرقية والغدة الكظرية والضغط والسكر والكلى والكبد والقولون والمعدة والأمراض المناعية ونقص الفيتامينات وسوء التغذية >>>
النتيجة بنسبة ٦ من كل ١٠ أشخاص تقريبا ولا حاجة ولا أى حاجة !!!

تعالى بقى للأسباب النفسية لوحدها اللى ممكن تعمل نفس الأعراض >>>

١. التوتر والضغط العصبى المستمر
٢.قلة النوم
٣.الإكتئاب
٤.فرط الأكل وزيادة الوزن
٥.قلة ممارسة الرياضة والأنتخة
٦.ألم العضلات والمفاصل الغير عضوى "فايبروميلجيا"
٧. ضغوطات العمل والحياة " burnout syndrome "

احنا الحتة النفسية دى فى السنين الأخيرة أتزنقنا فيها جامد ومش عارفين نفلفص منها، الناس بتصرخ جواها وماحدش سامع لها صوت، عنينا تعبت من كتر الخرسانة ، صدرنا قفل من التراب وقلة الأشجار، ودانا وجعتنا من الأغاني الهابطة وألفاظ التكاتك، قلوبنا تعبت من مناظر الهم والأخبار الغم ،مفاصلنا خشبت من قلة المنتزهات، مافيش طاقة، مافيش رغبة فى الكلام، الضحك مش حقيقى ، الناس مش حبة حياتها وعاملين نفسهم راضيين ومستنين الفرج من عند الله واهو كله عايش وصابر ...

فى حاجة مش طبيعية بس عادى عادى هنكمل فى الساقية وإن شاءالله خير وأهم حاجة ندخل الجنة ...

الصورة من الحديقه الدولية بتاعة بلاد برة 🙄

17/07/2025

أخر كشف قبل ماسافر مريضة بقولها لازم نخس وننزل الوزن شوية علشان النهجان دة بسبب الوزن الزائد.

قالتلى والله يادكتور انا بقيت أتغدى مرة واحدة بس فى اليوم ! 🥲

أاااه قلبى، هو احنا هنبدأ من مرحلة الإنسان بيتغدى كام مرة فى اليوم؟!!!

ساعتها حسيت إن السفر دة علامة ولازم نراجع فيها علاقتنا كويس 🫡

أنا عارف ان احنا مالناش غير بعض، انتم قدرى وأنا قدركم ،بس لازم نوضع حد لعلاقتنا وناخد أجازة من بعض، يمكن نرجع أحسن من الأول 🥰😅

اه علشان مانساش، فى ناس بتقولى أنت مش بتهزر فى العيادة زى مابتهزر ع الفيس بوك ؟!!!

وانا بحب من موقعى هذا أأكد على كلامهم علشان العيادة دة مكان أكل عيش وناس عيانة ماشين بعلاج .
عايز تشوف الدكتور الفرفوش اللى بيضحك وبيهزر ؟!!
فسحني، خرجني، سفرني، تعالى العيادة إدينى ١٠٠٠ دولار وامشى من غير ماتقعد تقولى بتشتكى من إية ، مش كل لما اشوفك تشتكيلى ولما تخف ماتقوليش!!!
ساعتها ياسيدى هاعملك يوم مخصوص ونسميه "ساعة لقلبك" مش هناخد فيه عيانين الناس السليمة بس اللى هتكشف، ونقدم فيه فقرات طبية متنوعة ونروح كلنا مبسوطين، مايبقاش العيان اللى قبلك قلب مفتوح واللى بعدك جلطة بالقلب والناس بتتخانق برة على الدور علشان تعبانين وانت جاى تشوف الدكتور الفرفوش وتقولى انت مش بتضحك ليه زى الفيديوهات؟!!

انجز وقوووول بتشتكى من إييييية ؟!!!😂😂😂

29/06/2025

أستاذ محمد بيجى العيادة من السعودية مخصوص لعلاج الكوليسترول لأنه تعب من القصة دى وبيدور عن حد فاهم القصة مش رصة علاج وخلاص ...

علاجات الكوليسترول كتير أشكال وألوان، شطارتك فى إنك توصف العلاج المناسب بالجرعة المناسبة للمريض المناسب ...

خدها قاعدة كدة وماترجعش ورايا >>> أى مريض سكر فوق سن الأربعين لازم ياخد ستاتين "علاج الكوليسترول ".

ولكن من مشاكل علاج الكوليسترول "ستاتين " انه قد وحط تحت "قد" مليون خط ، قد يسبب ألم بالعضلات وخصوصا للمرضى اللى عندهم مشاكل بالعضلات والأعصاب أو العظام من قبل بدأ العلاج أساسا، وفى الحالة دى بيكون ضروري قياس انزيم CK قبل وبعد العلاج وخصوصا لو زادت أعراض ألم العضلات!

📣علشان ماتخافش من علاجات الكوليسترول دة مش بيحصل غير لأقل من ١٠% من الحالات وبتكون آلام العضلات بسيطة ومحتملة ولا تستمر طويلا مع المواظبة فى العلاج ولا يسبب العلاج أى ضرر على الكبد أو الكلى مع الإستخدام سنين طويلة، واذا استمرت ألم العضلات بنقلل الجرعة أو نغير النوع أو نضيف علاجات أخرى زى إيزيتمايب أو بيمبدواك اسد( Ezitamibe and Bempdoic acid) سهلة يعنى مش نهاية الدنيا ...

ولكن اذا كان المريض من الأول زى أ/محمد عنده ألم بالعضلات والفقرات وعلاج الكوليسترول يسبب له ألم غير محتمل ، ينفع مايخدش العلاج وخلاص ؟!!!

لا ماينفعش ، لان إرتفاع الكوليسترول والدهون خصوصا عند مرضى السكر بيمثل خطر كبير على كل شرايين الجسم ( المخ والقلب والكلى والعين والقدم ) ، وتناول العلاج يحمى من حدوث جلطات بالقلب والمخ ويقلل التهابات الشرايين من السكر أو التدخين أو الضغط ، ويقلل إحتمالية الوفاة الناتجة عن أمراض القلب والمخ.

فعلاج الكوليسترول أساسى أساسى ...

طيب نعمل إية فى الحالة دى ؟!!

بيكون البديل وحط تحت "البديل" مليون خط ، البديل هو حقن خفض الكوليسترول زى اللى كتبتها ل أ/محمد فى الروشتة >>> ( LEQVIO) دى حقنة بتتاخد تحت الجلد كل ٦ شهور ( تانى جرعة بعد ٣ شهور ثم كل ٦ شهور )
تسبب خفض للكوليسترول الضار بنسبة ٨٥% لما تتاخد "مع" ستاتين .
ولكن فى الحالات اللى مش قادر أحط فيها ستاتين ، بناخدها مع أصغر جرعة من ستاتين أو من غيره خالص لتحقيق أكبر فائدة اللى بتصل لخفض الكوليسترول الضار ٦٥%

💉فوائد حقنة لكفيو >>>

_ لا تسبب ألم بالعضلات.
_تحقق خفض للكولسترول الضار يعادل ستاتين بدون أى أعراض جانبية تذكر
_ تنفع مع مرضى الكلى
_ حقنتين فقط فى السنة ، فبالتالى نتائج أفضل للعلاج وأكثر فاعلية
_ لا تؤثر على انزيمات الكبد
_ بتشتغل بعد ٦ ساعات من أول حقنة ولمدة سنة كاملة !
_ تقلل حجم الكوليسترول الضار اللى تراكم بالفعل داخل الشرايين مش بس بتمنع تراكم كوليسترول جديد !

🎤عيوب حقنة لكفيو
_ بأربعين ألف جنية "بس" وحط تحت بس مليون خط 😄

وشكرا جدا للناس اللى دفعتلي حق القهوة فى الكافية اللى كنت قاعد بكتب فيه البوست دة ومشيوا من غير ماقولهم شكرا ، والله ناس جميلة .

28/06/2025

أسوأ شئ ممكن تعمله فى حياتك بعد التدخين هو إنك>>>
تاكل وتنام !!!

_ سمنة وكرش
_ ارتجاع مرئ وانتفاخات بالقولون
_ارتفاع السكر بالدم وخطر الإصابة بالسكر
_خمول بالصباح
_ارتفاع الكوليسترول والدهون بالدم
_ضيق تنفس اثناء النوم
_كوابيس مزعجة

27/06/2025

من الحاجات الجميلة اللى حصلت فى أخر عشر سنين هى تطوير قسم القلب بمستشفى المبرة بمصر القديمة.

تجربة تستحق التعميم بمستشفيات وزارة الصحة تمت تحت قيادة مجموعة من أفضل وأمهر أستشارين القلب د.محمد صبري و د.أحمد السواح و د.احمد عبد الحليم.

قدروا يحولوا قسم القلب بمستشفى المبرة لنموذج يحتذى به ويقدم خدمه مجانية تماماً لحالات القسطرة المعقدة والانسداد المزمن للشرايين التاجية وتوسيع صمامات القلب بالقسطرة الداخلية.

تطور رهيب شعر به الزملاء من أطباء القلب قبل المرضى.

لما تروح المهام الثقيلة للى يستحقها بتكون خير ونفع لكل الناس، تخيل لو كل مستشفى يديرها أهل الخبرة والكفائة _مش المعارف والأقارب _ هيبقى عندنا منظومة طبية متكاملة وفى كل التخصصات مش القلب بس ...

إذا كان لك تجربة طبية كويسة بقسم القلب بمستشفى المبرة ياريت تذكرها علشان الناس تعرفها والقائمين على المكان نشجعهم يكملوا بقوة ونقولهم شكرا ...

22/06/2025

أرجع وأقولك الأيام دى أثبتت إن الاستثمار فى العلم والعلماء هو المنقذ ، هو النجاه لك ولأهلك ولبلدك

أما الكورة والرقص والغناء وأكبر برج وأعلى خازوق فهو للمغيبين اللى مالهمش حساب بين الأمم ...

03/06/2025

أوعى تكون مش بتاخد بتاعك زى الفنان ؟!!!

محمد حصله ضيق بالشرايين التاجية وركب دعامتين فعلا من ٣ سنين ، وأتشخص إنه مريض كوليسترول ودهون وراثي مرتفع

Familial Combined Hypercholesterolemia

القصة دى بتكون منتشرة فى الأسرة رغم صغر سنهم وممارسة الرياضة ويحافظوا على الأكل الصحى ولكن يحدث لهم ضيق بالشرايين وأزمات قلبية تضطرهم للذهاب للطوارئ وعمل دعامات بالقلب، وفعلا أخوه كمان ركب دعامات بالقلب !!!

ولأن محمد بيسمع زيكم عن أهوال ومخاطر علاج الكوليسترول "الوهمية" خاف ووقف العلاج، ما أنا بقيت حلو وزى الفل أهو !!!

بعد سنة أتنين تلاتة >>> بقى لما يمشى مسافة قصيرة يحس بألم فى الصدر وضيق نفس يسمع فى كتفه الشمال فيضطر يوقف يرتاح، ولما يمشى ويزود الجهد يحصل ألم بالصدر تانى!!!
دى نفس " أعراض الذبحة الصدرية " اللى جاتله أول مرة قبل الدعامات !!!

مرض الكوليسترول والدهون المرتفع "الوراثي" زى الحالة دى لو أنت بطل العالم فى كمال الأجسام ومحافظ على نفسك بردو ممكن تصاب به، لأن جيناتك تأمر الكبد بتصنيع الكوليسترول والدهون بمعدلات أضعاف الشخص الطبيعى، فيتراكم داخل جدران الشرايين التاجية ويسدها ...فلازم "علاج دوائي للكولسترول " مع نمط حياة صحى.

طيب نشخصها إزاى ؟؟؟

تشخيصها سهل بشرطين >>>

١. تحليل دهون كاملة
هتلاقى أرقام الكوليسترول الضار LDL عالية وقد تصل فوق ال ١٩٠ ، وأحيانا يكون مصحوب بأرتفاع الدهون الثلاثية TG فوق ال 200 .

٢. تاريخ وراثي بالأسرة بأمراض القلب فى سن صغير (سن أقل من ٤٥ للرجال ، وأقل من ٥٥ للسيدات )

أفهم مش كل الأمراض أكل وشرب زى مابيصورولك، فى أمراض خارج إردتك وقدراتك مالكش يد فيها ولا تقدر تمنعها إلا بالتشخيص المبكر والعلاج السليم.

علاج الكوليسترول والدهون والامتناع عن التدخين _ والاهتمام بعلاج الضغط والسكر لو عندك _ هو الأساس لحماية الشرايين من ترسبات الدهون والكولسترول وتكرر الأزمات.

روحنا المستشفى وعملت له القسطرة الإستكشافية وأتضح إن حصل ضيق مرة تانية بالشرايين التاجية وضيق فى الدعامة القديمة لانه موقف علاج الكوليسترول وفعلا أرقام التحليل عالية جدا !!!
عملت له دعامتين دوائيتين وتوسيع بالبالون الدوائي للدعامة السابقة ، والحمد لله رجعت شرايين القلب سليمة وفرصة تانية للحياة بشكل صحى مع علاج مكثف للكوليسترول والدهون الثلاثية.

أبحث عن مرض أسمه
Familial Combined Hypercholesterolemia

وهتفهم إن فى بعض الناس مش هينفع تعيش بشرايين قلب طبيعية إعتماداً على النظام الغذائي والرياضة فقط ولكن لازم علاج الكوليسترول يكون جزء من حياتهم لصحة جيدة وشرايين سليمة...

إنكار المرض مش هيفيدك !

31/05/2025

الناس اللى مش قادرة تفرق بين الفيديو السابق عن "الأعراض الجسدية النفسية" و" أعراض سرعة ضربات القلب الحقيقية نتيجة بؤرة كهربائي نشطة بالقلب " يشوف الفيديو دة ؟؟؟

28/05/2025

تعديل >>> تم تأجيل الحلقة لبعد العيد ان شاءالله
ماتنتظروناش علشان انا مش جاى 😄
حلقة عن أمراض القلب والشرايين التاجية وكيفية الوقاية منها ، هتفيدكم كتير إن شاءالله، استعدوا ... خلاص ماتستعدوش ، إنما اعملوا حسابكم المرة الجاية لايمكن ابدا ... بعد العيد

(الحلقة اتلغت)

26/05/2025

كمية التعليقات اللى بتأكد ان ناس كتير بقت تسيب علاجات السكر والكولسترول مخيفة ، ودة اللى بنشوفه يوميا وبنحذر منه ويأتى لنا المرضى بعد تفاقم حالتهم الصحية وحدوث مضاعفات خطيرة !!!

أوعى تكون مريض سكر ومش بتاخد علاجك وسايب السكر عالى فى الدم زى أحمد ؟!!

إرتفاع السكر بالدم فترة طويلة يسبب :
- التهابات بجدار الأوعية الدموية
_ تراكم الكوليسترول الضار والدهون داخل جدار الشرايين وتضيقتها
_ زيادة لزوجة الدم وتكون جلطات تسد الشرايين

فسهل جدا يحصلك جلطه بالقلب مع إرتفاع السكر والكولسترول حتى وإن كان سنك صغير !!!

أحمد شاب جميل فى التلاتينات قرر يوقف علاج السكر فترة طويلة وأرتفع سكره العشوائي و السكر التراكمى لأكتر من ١٠ ، وبدأ يشعر بألم كل لما يعمل جهد ولو بسيط زى إنه يروح يصلى فى المسجد مثلا ، ألم فى منتصف الصدر كأن حرقان أو تقل وبيسمع فى الكتف الشمال والرقبة يحصل مع المشى يضطره يوقف ويرتاح ...

جالى العيادة والحقيقة إن رسم القلب والايكو كانوا كويسين ، ولكن وصف الأعراض بالشكل دة مع مريض سكر مش بياخد علاجه كويس ، تقلق جدا وماتعديهاش بالساهل ، الأعراض فقط مع السكر أو التدخين ( لو كنت مدخن ) كافية جدا إنى أطلب قسطرة استكشافية عاجلة

الدكتور الشاطر حسه الإكلينيكى لازم يتفوق على كل الفحوصات والتحاليل، سماعته الطبية يسمع ويشوف بها أفضل من أحدث جهاز إيكو ، وأنا هنا مش ببالغ، لأن بداية الشك فى التشخيص السليم والبحث عن المسبب تنشئ من فحصك وسماعتك الطبية وسماع شكوى المريض بدقة ...

وفعلا لما عملنا القسطرة الإستكشافية تبين إنسداد كامل بالشريان التاجى الأيسر الأمامى ودة شريان كبير ومغذى لعضلة القلب ، وتم توسيع الضيق بالبالون وتركيب دعامتين دوائيتين عن طريق قسطرة اليد وتحسنت حالة أحمد الحمد الله وروح نفس اليوم زى ما وعدته ...

ماتنساش تاخد علاج السكر والكولسترول وتابع كويس بقى ياعم أحمد ، العائلة كلها محتاجاك 😉

عيادة الدكتور خالد حامد لأمراض القلب والقسطرة القلبية

22/05/2025

أوعى تكون ومش بتاخد علاجك وسايب السكر عالى فى الدم زى أحمد ؟!!

إرتفاع السكر بالدم فترة طويلة يسبب
- التهابات بجدار الأوعية الدموية
_ تراكم الكوليسترول الضار والدهون داخل جدار الشرايين وتضيقتها
_ زيادة لزوجة الدم وتكون جلطات تسد الشرايين

فسهل جدا يحصلك مع إرتفاع السكر والكولسترول حتى وإن كان سنك صغير !!!

أحمد شاب جميل فى التلاتينات قرر يوقف علاج السكر فترة طويلة وأرتفع سكره العشوائي و لأكتر من ١٠ ، وبدأ يشعر بألم كل لما يعمل جهد ولو بسيط زى إنه يروح يصلى فى المسجد مثلا ، ألم فى منتصف الصدر كأن حرقان أو تقل وبيسمع فى الكتف الشمال والرقبة يحصل مع المشى يضطره يوقف ويرتاح ...

جالى العيادة والحقيقة إن رسم القلب والايكو كانوا كويسين ، ولكن وصف الأعراض بالشكل دة مع مريض سكر مش بياخد علاجه كويس ، تقلق جدا وماتعديهاش بالساهل ، الأعراض فقط مع السكر أو التدخين ( لو كنت مدخن ) كافية جدا إنى أطلب قسطرة استكشافية عاجلة

الدكتور الشاطر حسه الإكلينيكى لازم يتفوق على كل الفحوصات والتحاليل، سماعته الطبية يسمع ويشوف بها أفضل من أحدث جهاز إيكو ، وأنا هنا مش ببالغ، لأن بداية الشك فى التشخيص السليم والبحث عن المسبب تنشئ من فحصك وسماعتك الطبية وسماع شكوى المريض بدقة ...

وفعلا لما عملنا القسطرة الإستكشافية تبين إنسداد كامل بالشريان التاجى الأيسر الأمامى ودة شريان كبير ومغذى لعضلة القلب ، وتم توسيع الضيق بالبالون وتركيب دعامتين دوائيتين عن طريق قسطرة اليد وتحسنت حالة أحمد الحمد الله وروح نفس اليوم زى ما وعدته ...
(فيديو الحالة كاملاً فى أول تعليق )

ماتنساش تاخد علاج السكر والكولسترول وتابع كويس بقى ياعم أحمد ، العائلة كلها محتاجاك 😉

13/05/2025

أول لما دخلت عليا العيادة عرفتها ، معقول هى ؟؟؟
ناظرة مدرستى فى إبتدائي "ميس سهير " !

سكت ...

نبدأ الكشف ، الأسم ؟ سهير

_ هى صح 😄

والله فرحت جدا بس ماقولتش، إيه الإحساس دة ؟!!!
صغرت ٣٠ سنة فى ثوانى وأفتكرت مدرسة الشرق والطابور والأذعة المدرسية ...

فى يوم كنت بقرأ قرأن فى طابور الصباح ، من سورة إبراهيم >>>
﴿ أَلَمْ تَرَ كَيْفَ ضَرَبَ اللَّهُ مَثَلًا كَلِمَةً طَيِّبَةً كَشَجَرَةٍ طَيِّبَةٍ أَصْلُهَا ثَابِتٌ وَفَرْعُهَا فِي السَّمَاءِ (24) تُؤْتِي أُكُلَهَا كُلَّ حِينٍ بِإِذْنِ رَبِّهَا وَيَضْرِبُ اللَّهُ الْأَمْثَالَ لِلنَّاسِ لَعَلَّهُمْ يَتَذَكَّرُونَ (25) وَمَثَلُ كَلِمَةٍ خَبِيثَةٍ كَشَجَرَةٍ خَبِيثَةٍ اجْتُثَّتْ مِنْ فَوْقِ الْأَرْضِ مَا لَهَا مِنْ قَرَارٍ (26)}

وغلطت فى التشكيل كذا مرة وهى تصلح لى النطق كل مرة، وبعد الطابور ندهتلي >>> خاااااالد ...
أنا قولت هتزعقلي علشان ماكنتش محضر الآيات كويس ،روحت وانا خايف دى ناظرة المدرسة بردو ياجدعان ،دة أنت ليلتك طين، أقلها هتتذنب عند غرفة المديرة "ميس راوية" دة إن ماكنوش هيودوني غرفة الفيران اللى عمرى ماشوفتها !!!

قالتلى > أربط رباط الشوز بتاعك ياخالد ...

اللهم لك الحمد روحت ربطته وجريت على الفصل 😄

لما كبرت فهمت إنها عملت معايا كدة علشان شافتنى زعلان ، فقللت زعلي وخوفي بالكلمتين دول وكأنها بتقولى ماتزعلش ماحصلش حاجة 😉

=============

وانا بقيس الضغط، قالتلى هو أنت كنت فى مدرسة إية فى إبتدائي يادكتور ؟؟؟

_ بدون تردد قولتلها وانا بضحك " مدرسة الشرق الخاصة " 🫣

عارف اللى لقت أبنها اللى كانت بتدور عليه من ٣٠ سنة 😅😅😅، والله بقت فى قمة السعادة وتقولى أيوة أنا فاكراك كنت من أشطر الطلبة عندنا ما شاء الله أنا فخورة بيك أوى 😄
قولتلها أنا أسعد والله بس قولت أكيد مش هتفتكريني 😄

قالتلي لا فاكرك وبشبة عليك من أول لما دخلت ( خالد محمد حامد ) كنت طالب متميز ...

قولتلها أهو بقيت دكتور ، يارب أبقى دكتور متميز كمان 😄

قالتلى ناس كتير من عائلتنا بتابع معاك وعملت قسطرة لقريبتى وأخوها وكلهم بيشكروا فيك.

قولتلها إن شاءالله أنتى كمان تتحسني وتشكري فيا 😄
والحمد لله جتلى الاستشارة وقد ذهبت شكوتها 😎

( تورم القدم له أسباب أهمها فحص القلب و وظائف الكلى والكبد ، ومراجعة أى علاج بياخده المريض بدقة لان فى علاجات كثيرة قد تسبب تورم القدم ولما توقفه يحدث تحسن سريع ودراماتيكى )

وبمجرد ما وقفت القرص المسبب للتورم وغيرنا لقرص أخر تحسنت الحمدلله.

وكسبنا العائلة الكريمة والمدرسة كلها ، بالعلم والأدب تكسب القلوب الجميلة الطيبة ...أما الخبيثة فلا نفع لنا بها.

حصنوا أولادكم بالعلم والدين فى زمن كثرة فيه الفتن والأمراض النفسية، ساعدوا أطفالكم يكبروا فى جو بعيد عن الخلافات الأسرية، حبوهم وخلوهم أقوياء مش مدلعين لأن الحياة مش سهلة، دربوهم على الصدمات وتجاوز الأزمات، علموهم يحبوا الناس ومايخافوش من النقد والسخرية ، خليكم مرايتهم اللى بيشوفوا فيها نفسهم حلوين ومميزين ...

كم كان فى حياتى ناس جميلة تعلمت منهم إحترام الذات والوقار والهيبة والثقة بالنفس وحب الناس ...

شكرا مس سهير ناظرة مدرسة الشرق الخاصة فقد تعلمت منكم الكثير ✋️

طبعا مستحيل حد يعرفنى فى الصورة المرة دى ، بس ميس سهير عرفتنى 😎