Dr Mohamed Abdel Mohsen Kids Clinic

25/08/2024

متوفر الان تطعيم الانفلونزا الموسمية ٢٠٢٤
للحجز والاستعلام
01006636932

25/08/2024

07/11/2023

🔸 سؤال يومي في العيادة .. دكتور انا بحب أجي لحضرتك عشان مابتحبش المضادات الحيوية ولاالكورتيزون والدكتور اللي كنت بروحله بيحب يكتب مضادات حيوية وكورتيزون .

↙️مفيش حاجه ياجماعة اسمها دكتور كويس عشان مابيكتبش مضاد حيوي ولاكورتيزون للابد ولادكتور مش كويس عشان بيحب يكتب مضاد حيوي وكورتيزون للأبد.

↙️كل مرض في الطب له تشخيص والعلاج بيتم بناء علي التشخيص والبروتوكول المتبع والمتفق عليه لعلاج كل مرض وليس علي رغبة الطبيب او حفظه لروشته متكررة .

مثلا ..
↙️ التهاب بكتيري صديدي في الحلق واللوز في طفل اكتر من سنتين مع حراره عاليه وغدد ليمفاويه متضخمه.. هيحتاج مضاد غالبا.

↙️ طفل ٥ سنوات وعنده رشح بس مع حراره خفيفه دا برد مايحتاجش مضاد حيوي .. لكن لو الافرازات تزداد سوءا وانسداد انف لايستجيب للعلاج ومضادات الالتهاب اكتر من ١٠ ايام في طفل ماعندوش حساسية انف .. دا التهاب جيوب انفيه حاد وممكن يحتاج مضاد حيوي معين .

↙️ طفل ٦ سنوات ماعندوش حساسية انف او صدر قبل كدا وجاله كحه مصاحبه ببلغم ومابيسخنش اكتر من ١٤ يوم .. ممكن يدخل تحت تشخيص التهاب رئوي atypical ويحتاج مضاد معين مدة معينه.

يبقي الموضوع ليست قاعدة ثابتة.

🔹 🔹 بالنسبة للكورتيزون نفس الكلام..

↙️ طفل جاي بالتهاب حاد في الحنجره ..الخناق.. لازم ياخد دكساميثازون بجرعة معينه ويعمل جلسه معينه بحاجه اسمها ادرينالين..

↙️ طفل تاني جاي بحساسية فورية .. او نوبة حساسية صدر حادة وضيق في التنفس .. هيحتاج كورتيزون وطبعا حالات كتير كذلك طبقا لبروتوكول علاجها.

↙️ كمان داخل المستشفيات هناك امراض كتير هتحتاج في علاجها مضادات حيوية وكورتيزون طبقا لبروتوكل علاجها.

🔹🔸🔹 يبقي بلاش ياجماعة الدكتور بيحب وبيكره .. افهم من دكتورك تشخيص حالة الطفل .. وافهم الادوية اللي مكتوبه ليه وعشان ايه ودورها ايه . وتابع مع الدكاترة اللي بتزورهم عدد مرات تعرض طفلك للمضادات والكورتيزون هل الموضوع عشوائي ولا ليه داعي . ولما تقتنع مش هتبقي خايف ولاقلقان حتي لو العلاج يتطلب احيانا مضاد حيوي او كورتيزون.

🌹 دامت اطفالكم بخير.🌹
🌹د. محمد عبد المحسن🌹

19/08/2023

متوفر لقاح الانفلونزا بالعيادة
للحجز والاستعلام
01006636932

03/06/2023

🔹من الحالات الشائعة لما طفل حديثي الولاده بيجيني في اول يوم او يومين بعد الولادة وتلاقي الاهل بيشربوه ينسون او اعشاب او لبن صناعي او مية بسكر لحد ماللبن ينزل لسه علي اليوم الثالث لليوم الخامس.

🥢{المعلومة:}...

١🌹🔸لبن الام بيتكون عند الام من الاسبوع ٢٨ وهيا لسه حامل .

٢🌹🔸نظرة الاهل لللبن انه قليل خاطئه.. لان الطفل وحجم معدته مش محتاجه في الوقت دا اكتر من حوالي مقدار ٥ معالق صغيرة في الرضعة. ودا كافي للطفل من لبن السرسوب .

٣🌹🔸انك تبعد الطفل عن الام هيبقي سبب في حرمانه من فوائد لبن السرسوب اللي بيحتوي علي اجسام مضادة للاكسدة واجسام مقوية للمناعة تحمي الطفل من العدوي في الفترات القادمة من عمره .

٤🌹🔸لابد من ملامسة الطفل للام في اول يوم وتدريبه علي الرضاعة الطبيعية لتعزيز العلاقة بين الام والطفل وهذا يساعد علي نزول السرسوب ونزول اللبن ولابد من عدم تعود الطفل علي طعم غير طعم اللبن او تعوده علي ملمس غير ح**ة الام لان هذا ضد تأسيس الرضاعة الطبيعية.

٥🌹🔸تأخر الطفل في بدء الرضاعه الطبيعية هيسبب زياده نسبه الصفرا في اول ٥ ايام ودا بقي ملحوظ اوي الفتره دي اكتر من زمان.

٦🌹🔸اطفال بيجوني برعشه في الاطراف وممكن توصل لتشنجات نتيجة نقص السكر بسبب قلة الرضاعه.

٧🌹🔸ارتفاع درجة الحرارة جسم الطفل بسبب ارتفاع حراره الجو ومعها قلة الماء في جسم الرضيع نتيجة تأخر بدء الرضاعة الطبيعية.

٨🌹🔸ابدأي رضاعة من اول ساعه بعد الولادة مباشرة وبلاش كلام ان اللبن قليل او اللبن لسه هينزل بعد ٣ ايام وبلاش لبن صناعي خاااالص. فقط هيا رضاعة طبيعية مطلقة من اول ساعة حتي سن ٦ شهور .

🌹دامت اطفالكم في افضل حال🌹
🌹دكتور محمد عبد المحسن🌹

22/05/2023

🤔 الناس بتسألني
الطفل يشرب مية من سن اد ايه .؟!
وابني عنده اقل من ٦ شهور والجو حر وقلت اكيد محتاج يشرب مية .

🥢المعلومة ...

🥤الطفل يشرب مية من ٦ شهور مع دخول الاكل والحقيقة ان مافيش بروتوكول للاكل عندنا في مصر قبل ٦ شهور الا في بعض الحالات الخاصة . والصح فقط ان الرضاعة الطبيعية مطلقة حتي ٦ شهور يعني ممنوع اي شئ بالفم غير لبن الام فقط حتي ٦ شهور.

🥤لبن الام (الرضاعة الطبيعية) يحتوي علي ٨٩ ٪ ماء وال ١١٪ مكونات اخري

🥤اللي بيحفز الطفل للرضاعه قبل ٦ شهور هوا العطش في الاول قبل الجوع.ولو اشبعنا الطفل من الماء هيبعد عن الرضاعة وهيفقد وزنه لانه طول الوقت مش عطشان .

🥤الماء الموجود بلبن الام مظبوط علي درجة حراره مناسبة لجسم الطفل الرضيع لكن مش هتعرف تعمل دا مع الماء الخارجي

🥤الماء في لبن الام معقم طول الوقت لكن الماء الخارجي مهما غليته او عقمته فمش مضمون انك قضيت علي الميكروبات اللي فيه .

🥤مع الرضاعة المطلقة حتي ٦ شهور لو لاحظتي هتلاقي طفلك لون البول طبيعي وكمية البول طبيعية ومافيش اعراض الجفاف علي جسمه ودا دليل انه مش محتاج ماء خارج لبن الام في هذه المرحلة.

❤️دامت اطفالكم في افضل حال❤️
🌹دكتور محمد عبد المحسن🌹

20/05/2023

🔸الكالسيوم هوا المتهم البرئ في اي شكوي تخص نمو الطفل او عظام الطفل وبيبقي رد الفعل ان تقريبا كل الاطفال بتاخد كالسيوم بشكل عنيف او مده طويله بدون تحاليل او اعراض تثبت نقص الكالسيوم او ماحوله.

🔸الشكوي .دكتور انا ابني متأخر في التسنين او عنده شهرين ولما بوقفه مش بيقف علي رجليه او عنده ١٠ شهور ولسه مش بيمشي زي اخوه اللي قبله او زي ابن فلان او عنده ٣ شهور ولما احرك ركبته بتقعد تطقطق.

🔘المعلومة:🔻

🔹اولا ..
علامات نقص فيتامين د او نقص الكالسيوم او الفوسفات بالعظام .(مايعرف بلين العظام) هتظهر علي كل نمو العظام بمعني ان الطفل هيتأخر في كل حاجه زي انه يقعد او يزحف او يقف او يمشي مش بس الاسنان اللي هتتأخر لوحدها .

🔹ثانيا .
التسنين.الطفل ممكن يطلع اول اسنانه علي سن سنة وشهر ويبقي الطفل طبيعي عادي وياما شفت اطفال اسنانها متاخره نتيجة مشاكل في الفك واللثه ومحتاجة دكتور الاسنان .مش نقص كالسيوم.

🔹ثالثا .
اني اوقف الطفل علي رجله علي سن شهرين واربع شهور هذه ليست علامة علي نقص الكالسيوم ومش مطلوب من الطفل يقف علي رجله او يدوس عليها في السن ده . الاهم يبقي بيحركها طبيعي وان حجم وشكل وحركة عضلات رجله طبيعيه وهوا نايم علي ظهره.

🔹رابعا .
مش كل طفل راسه حجمها كبير يبقي لين عظام .لاني ياما قست محيط راس شكلها كبير وتطلع طبيعية علي الخريطه بالنسبه للسن او كبيرة لاسباب اخري غير لين العظام . فممكن عادي الراس تبقي طبيعتها وشكلها كدا شبه عيلته.

🔹خامسا.
ماتستعجلش علي مشي الطفل لان اسوأ طفل اللي هيمشي قبل سن سنه وهوا اكثر عرضة لتقوس الساقين .

🔹سادسا.
الكالسيوم اللي عمال تديه للطفل او جرعات فيتامين د العنيفه اللي الطفل بياخدها هترفع نسب الكالسيوم بالدم لارقام عالية وساعتها العضم هيتشبع بالكالسيوم وهيوزع الكالسيوم لاماكن تانية غير العضم فيحصل تكلسات ف الكلي وحصوات الكلي او تكلس الشرايين او تكلس صمامات القلب .

🔻 اخيرا..
لازم يبقي في تاريخ لنمو الطفل من سن ٦ شهور تتابعا عشان اعرف العضم بينمو طبيعي ولا لا
وعليه افحص الطفل وتشوف عليه علامات لين العظام ولا لا
ولو لقيت يبقي هتعمل تحاليل واشعة عشان تشخص صح وتحدد المشكلة والعلاج ومدة العلاج ونوع العلاج اللي هتستخدمه..

🌹دامت اطفالكم بخير🌹
دكتور محمد عبد المحسن

23/04/2023

نفسي الناس تفهم بقي ان طب الاطفال مش مضاد حيوي وخافض حراره . وان تشخيص الحالات مش لازم يبقي من اول لحظه وان العيان عادي لما ياخد وقته وفحوصاته للتشخيص والعلاج السليم. وان طب الاطفال متشابهات تستلزم استبعاد امراض وتشخيص امراض . فلما العيان يلاقي طبيب اطفال بيتناقش ويطلب فحوصات ويبعته لمتخصص اخر لمساعدة التشخيص ياريت بلاش يفكر ان دا عدم معرفه او ضعف طبي ويصبر ويتابع صح . نفسي يبقي بلاش طب الصيدليات وطب القرايب والجيران وطب تقليد الروشتات ....الخ .
يارب المرضي يستفيدو صح من البوستات دي
وشكرا د. الخطيب ربنا يجازي حضرتك خير وييسرلك سبل الخير والتوفيق دائما

20/04/2023

كل عام وانتم بخير جميعا وعيد فطر مبارك .تقبل الله منا ومنكم صالح الأعمال

18/12/2022

مواعيد العيادة
الاحد الاثنين الاربعاء من ٦ ل ١٠ مساء
الثلاثاء من ٤ ل ٧ مساء
الحجز مسبق بالتليفون
01006636932

11/12/2022

🍁تحليل جرثومة المعدة في البراز ليس له قيمة في التشخيص.. والجرثومة مالهاش علاقة بالمغص اللي بيجي لطفلك..

🍁السؤال الشائع
🖍️.يادكتور انا عندي جرثومة المعدة وعملت لاولادي التحليل ليكون عندهم الجرثومة وجيالك عشان تديني علاج ..

🖍️يادكتور ابني عنده مغص طول الوقت وعملتله تحليل الجرثومة وطلعت عنده وجيالك عشان تديني العلاج.

🤔ياتري مين لسه ماعملش لابنه تحليل جرثومة المعدة ؟ وطبعا للاسف كم طفل اخد مضادات حيوية عنيفة بالشهور عشان يعالج الجرثومة؟؟

🌹المعلومة..
🔸 تحليل الميكروب الحلزوني..الجرثومة.. يثبت وجود الجرثومة ولا يثبت نشاطها او ضررها.

🔸..انت عارف ان الجرثومة دي جزء من البكتيريا النافعه اللي ربنا خالقها في الجهاز الهضمي بتاعنا . فمتستغربش لما تلاقي التحليل بيقول انها موجوده .

🔸احنا لانعالج وجود الجرثومة ولكن نعالج المرض الذي سببته الجرثومة او نتج من نشاط الجرثومة .

🔸الجرثومة تسبب مرض قرحة المعدة والاثني عشر او التهاب المعدة المزمن اللي اعراضه حموضة متكررة اوحرقان في منطقه الصدر واحساس القئ او القئ المتكرر . ويزداد التعب احيانا في وقت خلو المعده وتقل الاعراض بعد الوجبات وتقل باستخدام ادوية مضادات الحموضة وادوية الارتجاع . وقد تصل الاعراض الي ألم حارق في منطقه المعده وقد يصل في الحالات الشديدة الي قئ دموي او فقدان للوزن .

🌺اذا وجدت هذه الاعراض بهذا الشكل فهذا سبب للعرض علي طبيب متخصص جهاز هضمي الاطفال لعمل منظار الجهاز الهضمي العلوي للتشخيص اذا كان الميكروب الحلزوني هو السبب او هناك سبب اخر وتحديد السبب و العلاج المناسب .

🌺لو بتعمل تحليل الجرثومة او بتدي علاج الجرثومة عشان تعالج مغص مزمن عند طفلك .. دور علي سبب اخر لان الجرثومة هتضللك عن التشخيص الصحيح للسبب الحقيقي للمغص .

كفاية تحاليل لاننا بعالج بني ادم مش بنعالج تحليل.

🌹دامت اطفالكم بخير🌹
دكتور .محمد عبد المحسن.

11/12/2022

🙄لو الام حامل وطفلها الاولاني لسه رضيع رضاعة طبيعية تفطمه ولا لا؟؟

🍁 اغلب الامهات اللي بتحمل في طفل تاني وهيا طفلها الاول صغير ولسه مثلا عنده ٣ شهور او ٦ شهور ومحتاجة تكمل رضاعة طبيعية للطفل فبتبقي مش عارفه تفطمه ولا لا .

🔸الشائع .. بعض الناس بينصحوها تفطمه عشان اللبن بتاعها هيضره.. وبعد اطباء النسا والتوليد بينصحو يفطمو من سن معرفش ١٠ شهور مثلا من غير سبب فعلي.. والام بتفطم الطفل للاسف

🌻المعلومة ..
🌷اولا .. الفكره هيا انك لازم تعمل الصح لان ربنا ماعملش حاجه كدا من غير فايدة او بشكل عشوائي فبلاش تختار السهل ويبقي بالنسبالك اللبن الطبيعي زي الصناعي ودي كارثه وهنتكلم عليها في بوستات لوحدها.

🌷ثانيا .. مش صح انك تفطم الطفل.
طيب ايه اللي بيحصل🔸. طعم اللبن بس هوا اللي بيتغير فلو الطفل تقبل طعمه الجديد ومافطمش نفسه كملي رضاعه عادي.

🔸ممكن الطفل يكمل رضاعه عادي لحد مايتم سنتين. فممكن ترضعي لحد ماتولدي الطفل التاني وساعتها ربنا هيرجع اللبن وقت الولاده للسرسوب. والطفل التاني هيحل كل المشاكل اللي بتقابل الطفل المولود زي الح**ة المسطحه او المقلوبه او اللبن القليل ف الاول او تحجير الصدر باللبن لانه قدرته علي الرضاعه قوية فبتسهل الرضاعه للطفل الجديد

🔸كل اللي الام بتحتاجه ان لازم حد يساعدها لان مجهودها مايستحملش الحمل والرضاعه وشغل البيت لوحدها.

🔸وكمان بتحتاج تاكل كويس وزياده في السعرات الحراريه حوالي ٦٠٠ كيلو كالوري ف اليوم يعني ساندوتش حلاوه طحينية زياده.

🔸اللي يخص دكتور النسا ان الام هتفطم فعلا بقي لو هيا حملها غير مستقر او بتجهض كذا مره قبل كدا او عندها مشاكل في الرحم تخلي الحمل غير مستقر . لان الرضاعه بتساعد علي انقباض الرحم ودا هيبقي خطر علي الحمل الغير مستقر.

🌹غير كدا بلاش استعجال وقرارات غلط . وياريت الامهات تفهم انها حملت وخلفت لازم هتتعب شويتين تلاته.

🌷دامت اطفالكم بخير🌷
د محمد عبد المحسن

23/10/2022

تسليك الأنف = حياة

12/09/2022

20/08/2022

متوفر الآن.......
للحجز والاستعلام
01006636932

17/06/2022

توفير التطعيمات الاضافية
للحجز والاستعلام
01006636932