22/08/2023
مساء الخير يا اصدقائي ❤️🫶 بعد ما حددنا نوع بشرتنا تعالوا نتكلم عن البشرة الدهنية شوية😅
⭐ مميزاتها: مبتعجزش بدري ومبيظهرش عليها أعراض الشيخوخة بدري زي باقى انواع البشرات التانية وأقل عرضة للإصابة بالعدوى مقارنة بالبشرة الجافة
⭐ عيوبها: كتر إفراز الدهون الكتيرة ممكن تتراكم تحت الجلد وتطلع حبوب وتعمل رؤوس سوداء والمسام واسعة وكل الحاجات اللي بنشتكي منها دي 😑
نتكلم بقى عن الروتين باختصار :
1️⃣ الغسول
نوع الغسول يكون چل أول فوم ويكون خفيف ع البشرة عشان يشيل دهون البشرة الزيادة ميزودهاش
هنغسل البشرة من مرة ل مرتين في اليوم مرة الصبح ومرة بالليل بمايه فاترة
2️⃣ المرطب
يستحسن أن المرطب يكون چل أو كريم لايت خفيف ع البشرة عشان ميزودش
ويكون فيه أي مادة من دول ⬇️
جليسرين او هيالويرونيك أسيد او يوريا أو ألو ڤيرا ( الصبار) او السوربيتول (يعني نقرا المكونات ونعرف احنا بنشتري ايه ) دي مكونات خفيفة ع البشرة مفيهاش دهون عشان منتعرضش لمشاكل البشرة الدهنية زي ظهور الرؤوس السوداء وحبوب الشباب 🤦🏻
ايه ده ثانية واحدة طب أنا بشرتي دهنية هحط مرطب ليه ؟؟🤨
هقولك ياستي .. هو في العادي ممكن متستخدميش مرطب بس فيه كذا حاجة ممكن تجبرنا نتعامل مع البشرة الدهنية على أنها بشرة جافة وفي الحالات دي بنستخدم مرطب
خدي عندك مثلا :
واحد بشرته دهنية بس عايش ف صحراء والمناخ هناك جاف أو في فصل الشتاء ف الحالة دي هيتعامل مع بشرته أنها بشرة جافة ويستخدم مرطبات وروتين البشرة الجافة
لو بتتعرضي للشمس كتير والأتربة وارد يحصل لبشرتك جفاف
ولو سنك بعد ال ٣٥ هتحتاجي مرطب حتى لو بشرتك طبيعتها دهنية بس بعد السن ده بيقل إفراز الدهون فا البشرة مش هنعتبرها دهنية وهتحتاج مرطبات
(مع العلم ان المرطبات مبتعالجش التجاعيد أو آثار الشيخوخة)
3️⃣ المقشر
اعملي تقشير أسبوعي مهم جدا عشان يشيل اثار الحبوب ويشيل طبقات الدهون الزيادة فا يمنع أنها تكون رؤوس سوداء أو حب الشباب
التقشير ممكن بمادة الجلايكوليك أسيد او الساليسيليك أسيد او الأزاليك أسيد أو بڤيتامين C✨
4️⃣ تونر
ممكن تستخدمي تونر يوميا يضيق المسامات الواسعة لو مضايقاكي 🥺
شوية نصايح ع الماشي 🚶
لو بشرتك كل شوية تطلع دهون متغسليهاش كل شوية لأن المايه دي بتسحب الرطوبة والمايه اللي ف الجلد وتبخرها فا بتخلي بشرتك جافة واكتر عرضة للعدوى طبعا🫠
شرب المايه بكميات كبيرة هيقلل دهون البشرة شوية ويقلل البثور🌸
عشان نحافظ على بشرتنا
ناكل مكسرات - منتعرضش للشمس وقت طويل نقلل - الكافيين شوية والمنبهات✅
ماسكات زي ماسك الطين والفحم بيشيلوا طبقات الدهون الزيادة الموجودة ع البشرة✨
الصن بلوك اوقات بيزود إفراز الدهون برضو من البشرة فا نستخدمه خفيف لطيف ع البشرة كريم چل مثلا او يكون فيه نسبة كحول❤️
وأخيرا روتين البشرة كله ممكن يتغير حسب المناخ اللي احنا عايشين فيه سواء كان رطب أو جاف وبناءا عليه بنتعامل مع البشرة❤️ دمتم بخير يا اصدقائي ❤️🥰
