Quality School DrAhmed Adel

02/06/2025

سؤال جالي من زميله بتسألني ايه الفرق بين الملائمة الدوائية و التوافق الدوائي؟
و هو سؤال حلو حبيت اجاوب عليه على العام علشان الكل توصله المعلومه
لازم تعرف ان معايير ادارة الدواء فى مرحلتي الوصف من الطبيب و الصرف من الصيدلي طلبت انه يتم نوعين من المراجعة:
الاول مرحلة الوصف:
اثناء قيام الطبيب باتخاذ قرار الوصفة الدوائية المعايير الزمته انه لازم يجمع افضل تاريخ دوائي ممكن BPMH من المريض او ذويه ( ليه بنقول افضل و ممكن لانه ببساطه احنا هنعتمد هنا على وصف المريض وذاكرته او اي علبه فاضيه معاه او صورة لادويته وده مش دايما افضل حاجه كجمع معلومات و لكنه افضل المتاح ). المهم انه لازم يتم عمل توافق بين ما يتناولة المريض حاليا او كان تناولة حديثا جدا و بين ما سيتم وصفه جديدا من الطبيب و العملية دي بنسميها Medication reconciliation ممكن يساعده فى الخطوة دي الصيدلي الاكلينيكي لو متاح في المؤسسة (و لو مش متاح فهي قانونا مسئولية الطبيب) و لكن ناخد بالنا اننا هنا لسه فى مرحلة اتخاذ القرار الدوائي يعني لسه الوصفه متكتبتش ( اي تدخل من الصيدلي الاكلينيكي بعد الوصف والصرف هو طبعا تطبيق غير صحيح للتوافق الدوائي)
المرحلة التانية هي مرحلة الصرف:
و هنا الصيدلي في الصيدلية سواء داخلي او خارجي و من مهام وظيفته و كطبقة ثانية من منع الاخطاء الدوائية هيعمل عملية مراجعة قبل الصرف لملائمة عامة للادوية الموصوفه مع البيانات المتوفره عنده عن المريض يعني هو بيشوف ملائمة الوصفة(لسن المريض / حالته المرضيه / حالة الحمل و الرضاعه / تداخل الادوية مع بعض / الجرعات و ملائمتها) و لو احس بأي شيئ مقلق يرجع يتواصل مع الطبيب و يأكد منه انه فعلا يقصد كده و انه مفيش اي خطأ بشري و بنسمي العملية ديappropriateness review بالمناسبة لو الصرف هيحصل من دولاب طوارئ مثلا بواسطة الممرضة لاعطائة للمريض هتبقى من مسئوليتها القيام بعملية المراجعة دي برضو حسب معرفتها.

و هو ده الفرق بين عمليتي المراجعة دول و اتمنى ان الامور تكون اتضحت
و لا تنسوني من الدعاء.

د.احمد عادل السيد
استشاري جودة الرعاية الصحية ومكافحة العدوى

16/05/2025

الخطة الامنية في المستشفى

واحدة من اهم الخطط الخاصة بالسلامة لانها تضمن سلامة الموظفين و كذلك المرضى و الزوار ضد المخاطر الامنية و بتبدأ الخطة بتحليل المخاطر الامنية ثم تتطور لوضع حلول امنية لكل خطر محتمل منهم و مكوناتها كالتالي:

تقييم المخاطر الأمنية (Security Risk Assessment)
• تحديد المخاطر المحتملة: سرقة، اقتحام، عنف، تخريب، تسلل، اختطاف أطفال، تسرب معلومات.
• تقييم المناطق عالية الخطورة (مثل غرف الأدوية، الطوارئ، حضانات الأطفال، وحدة العناية المركزة، الخزينة، غرفة الكهرباء).
• تحليل الحوادث السابقة والتكرار المحتمل.
السياسات والإجراءات الأمنية العامة
• سياسة دخول الزوار
• سياسة دخول وخروج الموظفين.
• سياسة الأمن في الأوقات الليلية والعطلات.
• التعامل مع الأشخاص غير المصرح لهم.
• إجراءات الطوارئ الأمنية (اقتحام، اختفاء طفل، إخلاء...).
مراقبة الدخول والخروج (Access Control)
• بطاقات تعريف إلكترونية للعاملين.
• نظام توقيع إلكتروني أو يدوي للزوار.
• نقاط تفتيش على البوابات.
• كاميرات مراقبة (CCTV) عند المداخل، المخازن،الممرات و توزيعها لتغطية النقاط العمياء.
• أجهزة إنذار للبوابات وغرف الأدوية.
الحراسة والأمن البشري (Security Personnel)
• توزيع الحراس في جميع أنحاء المستشفى.
• تعريف مهام الحارس: تفتيش، مراقبة الكاميرات، الاستجابة للحوادث.
• الزي الرسمي، أجهزة اللاسلكي و التواصل الداخلي.
• تدريبهم على التعامل مع المرضى العقليين، الحوادث، السيطرة على الحشود.
إدارة مفاتيح المناطق الحساسة
• سجل رسمي لتسليم المفاتيح.
• حظر نسخ المفاتيح دون تصريح.
• استخدام أقفال إلكترونية كلما أمكن.
خطة الاستجابة للطوارئ الأمنية (Security Incident Response Plan)
• آلية التعامل مع:
-العنف الجسدي أو اللفظي
-المشتبه بهم أو المتسللين
-الكوارث الأمنية (مثل تهديدات القنابل)
-فقدان طفل أو سرقة مولود
-سرقة أجهزة أو أدوية
أرقام التواصل مع الشرطة والجهات الأمنية فورًا.
إدارة الزوار
• تحديد ساعات الزيارة.
• تسليم بطاقات هوية مؤقتة.
• منع دخول الأسلحة أو المواد المحظورة.
تأمين المعدات والمواد الحساسة
• غرف الأدوية والمخازن مؤمنة بأبواب حديدية.
• حصر يومي أو أسبوعي للمعدات عالية القيمة.
التدريب والتثقيف الأمني للعاملين
• تدريب دوري على التبليغ عن السلوكيات المشبوهة.
• توعية بطريقة التصرف في حال حدوث مشكلة أمنية.
• محاكاة سيناريوهات طارئة.
الرصد والتحليل والتطوير
• سجل يومي للحوادث الأمنية.
• مراجعة دورية للخطة الأمنية.
• اجتماعات دورية بين إدارة الأمن وإدارة المستشفى.
مرفقات ضرورية للخطة:
• خريطة توضح توزيع الحراسة والكاميرات.
• نماذج تقارير الحوادث.
• جداول الورديات الأمنية.
• قائمة بالمناطق المصنفة خطرة و الحلول الامنية.
• خطة إخلاء أمني.

مين شاطر يقول في انهي معيار من معايير السلامة في جهار طلب تلك الخطة ؟

12/05/2025

الست اللى في الصورة دي هي فلورنس ناتينجيل و المعروفة باسم سيدة المصباح و العلم الحديث عارفها بأنها مؤسسة علم التمريض الحديث.
فلورنس اتولدت فى 12 مايو 1820 فى ايطاليا و رغم انها كانت من عيلة بريطانية غنية الا انها عاشت حياتها بتحلم تكون ممرضه رغم رفض اسرتها.
زارت مصر اثناء رحلة تعلمها للتمريض و زارت الاسكندرية و شافت التمريض المصري من راهبات الكنيسة بطوائفها و كذلك المسلمين فى مستشفياتهم و كتبت رساله عن ازاي ان تمريضهم شاطرين جدا لدرجة انه 19 ممرضه قايمين بشغل 90 ممرضة ( الظاهر مكنش التكليف الجديد لسه اتوزع 🙂 ) و بعدها زارت مدينة قنا و انبهرت بمستوى التمريض فيها.
لما رجعت بلدها اسست فى لندن اول مدرسة تمريض رسمية و كانت هي مديرتها و خريجين مدرستها قاموا بدور اثناء الحروب فى علاج الجنود خصوصا حرب القرم و عشان كده اعتبرت فلورنس مؤسسة علم التمريض الحديث لانها اول من كتبت لائحة آداب لمهنة التمريض و نظمت البيئة الادارية ليهم فى المستشفيات و حددت قواعد النظافة و مكافحة العدوى بصورة مبسطة ليهم.
فضلت فلورانس تطوف مدارس التمريض حتى بلغت التسعين من العمر و توفيت فى عام 1910.
تم اعتبار عيد ميلاد فلورنس اللي هو 12 مايو يوم التمريض العالمي و اللي فيه بنفتكر جميعا تضحيات و دور التمريض شباب و بنات فى علاج المرضى و متابعة حالتهم و انهم الوتد اللي من غيره تسقط خدمات الرعاية الصحية.
ألف تحية لتمريضنا المصري و العربي و دمتم بخير و سعادة.

30/04/2025

صدر اول امس 28 ابريل 2025 قانون المسئولية الطبية و طلب حتما ان يقوم الطبيب بالتوقيع بالاسم الثلاثي و التاريخ على الوصفة الدوائية و كذلك توثيق كل تدخل او اجراء فى الملف الطبي بتوقيته وتاريخه.
التوقيع بالاسم الثلاثي ليس رفاهية و التهاون فيه قد يسبب مشكله قانونية للطبيب.
انشرها على كل جروبات العمل و حذر زملائك مقدمي الخدمة الطبية

15/04/2025

هل معايير جهار اشترطت استخدام SCORE رقمي لتفعيل منظومة الاستجابة السريعه؟
الاجابة الصحيحة انه لا
المعايير لم تطلب مطلقا SCORE هي فقط اشترطت وجود ضوابط او معايير CRITERIA لتفعيل منظومة الاستجابة السريعة.
المعايير هنا لم تحدد نموذج معين يتم استخدامه لتحديد تلك الضوابط و تركتها لكل مستشفى تحددها طبقا لسياستها الداخلية.
الاغلبية العامة من الممارسة في دول كثير مثل استراليا و اوروبا و كثير من مستشفيات امريكية فضلت استخدام توصيات الIHI و الAgency for Healthcare Research and Quality (AHRQ) اللي بيسمى
"track-and-trigger" و هو واحد من اكثر النماذج انتشارا و بيعتمد على حدود معينة فى العلامات الفسيولوجية للمريض او حالتة الاكلينيكية اذا وصلها المريض سواء واحده منها او اكثر يتم طلب التدخل السريع فورا.
و بدون الحاجة لا لحساب SCORE و لا غيره.
تقدر تراجعه من اللينك ده
https://psnet.ahrq.gov/primer/rapid-response-systems

و في طبعا مؤسسات زي الNHS في بريطانيا قرروا انهم يطوروا SCORE محلي ليهم يستخدموه زي الNEWS
في كمان محاولات عديدة لتطوير معايير و سكورز تانيه زي
Rothman score/eCART score / Epic DI score
لكن كان و سيظل الاكثر استخداما هو ال "track-and-trigger"
خصوصا و انه كل محاولات الscores اما مفتقده لحساسية الاكتشاف او انها معقدة زيادة عن اللزوم و كلهم بيحطوا في اخر الامر كارت مفتوح اسمه
(concern call) بمعنى انك يا مقدم الخدمة لو شوفت علامة من العلامات تثير قلقك فاضرب بالاسكور عرض الحائط و استدعي الفريق بمعنى ارجع تاني استخدم النموذج الاصلي بتاع "track-and-trigger" و اللي بيحفظوه للتمريض في المستشفيات بالكرت اللى فى الصورة المرفقة.

زملائي الاعزاء ارجوك متقلدش حد تاني عمياني و متنسخش سياسات بدون ما تفهم هو ليه اللي كتبها عمل كده.
و تاني متفترضش ان اللى اخد اعتماد انه سياساته مسلم بيها او انها كلها مقبوله من جهار لانه ببساطه بينجح على 80% فجايز جدا السياسة اللى انت بتنسخها دي تكون من ال20% الغير مقبوله من جهار و طلبوا منه تعديلها.

دمتم موفقين يا ابطال الجودة و ربنا يصلح على ايديكم.
د.احمد عادل السيد
استشاري جودة الرعاية الصحية
رئيس برامج اعتماد المنشئات الصحية بشركة A1

06/03/2025

احد الزملاء بيسألني عن القواعد اللي على اساسها بنوزع عربات الطوارئ (الكراش كارت) و وجودها فى الاقسام.
الكراش كارت اداة تحسين طبية مهمة لتسريع الاستجابة لحالات توقف القلب تم ترتيبها لاول مره سنة 1962 على يد طبيب التخدير الامريكي جويل نوبل و هو بالمناسبه من رواد سلامة المرضى.
و تطورت طبعا بعدها من حيث التكوين و الادوية طبقا لقواعد الجمعيات الدولية للقلب وصولا للحقن المعباة مسبقا.
التوصيات انه يكون زمن الوصول للكراش كارت في غضون من 60 الي 120 ثانية من وقت اكتشاف حالة توقف القلب للعيان و لغاية ما الاستاف يقدروا يفتحوا درج الكراش كارت الاول و يشغلوا الdefibrillator (طبقا للAHA) و عندنا قاعده عالمية اسمها الدقيقة الذهبية كلنا بنحاول نوصلها لزمن الاستجابة لحالات الطوارئ.
اذن توزيع الكراش كارت لازم نراعي فيه زمن الارتحال المذكور ده و امكانية الوصول السريع بدون حواجز.
قواعد التوزيع هتكون كتالي:
1- الاماكن عالية الخطورة الاكلينيكية (الرعايات بانواعها/الحضانات/العمليات والافاقة/الطوارئ/الغسيل الكلوي/عنبر الولادة)هنخصص لها كراش كارت خاص بيها خصوصا انه الاماكن دي بيكون الدخول ليها مقيد.
2-مساحة و تصميم المبنى هيجبرك انك توزع اكثر من كراش لو مسافة الارتحال بقت اطول من دقيقتين او في حواجز كثير و طبعا مينفعش كراش فى دور تخدم دور تاني لان انت هنا بتورط نفسك في استدعاء الاسانسير.
3-لازم تتمركز الكراشات فى العنابر العامة او الممرات العامة لسرعة الوصول و عدم وجود حواجر و التحريك و التموضع بتاعها بيتم اختياره بحيث يعمل اقل زمن ارتحال من ابواب كل الغرف اللي بتخدمها الكراش دي و بعدها بنعلم فى الارض مكانها زي ما اتعلمنا من ال5S بحيث يتم اعادتها لنفس المكان بعد كل مرة استخدام.
للاسف الشديد كنت و لا زلت بنادي انه يتم اصدار دليل قومي مصري لمنظومة الاستجابة للكود الازرق يجاوب على كل الاسئلة دي لكن لعله خير.
ارجو ان المعلومة تكون اتضحت للجميع و لا تنسوني من الدعاء على الافطار معاكم يا شباب و رمضان كريم.
د.احمد عادل السيد
استشاري جودة الرعاية الصحية ومكافحة العدوى

07/08/2024

الجودة لا تعني الكمال.
حرصت دوما فى محاضراتي عند ذكر تعريف الجودة اني اقول للمتدربين لازم تعرف الاول ايه اللي مش جودة؟ قبل ما تعرف ايه هي الجودة.
اللي مش جودة هو الكمال .. ده مفهوم خاطئ عند كثير من الناس يظن او يفترض انه عشان احقق الجودة فده معناه ان المستشفى يكون فيها امكانيات بحيث لو طلبت لبن العصفور الاقيه و انه مفيش اى اخطاء و كأننا عايشين في العالم المثالي.
و المفاجئة يا صديقي انه الجودة مش كده خالص لان الحلم الافلاطوني ده مش بيتحقق ولا فى احسن مستشفيات امريكا و اوروبا و هما كمان عندهم نفس مشاكلك تقريبا من نقص الموارد و قلة القوة البشرية و زيادة ضغط العمل و لازم تعرف انه القضاء التام على الاخطاء او العيوب مش هيحصل لان احنا بشر و كنا ولا زلنا و سنظل بنغلط.
لكن الجودة تعني التحسين المستمر فى الاداء و انه بمجرد ما تلاقي فرصة للتطوير للافضل اشتغل عليها.
استغلال ما في يديك من موارد الان لتحقيق افضل نتائج هو الجودة.
و السعي لزيادة مواردك لتحسين خدماتك هو الجودة.
الجودة يا صديقي رحلة و ليست محطة.

23/04/2024

اصابه المريض بالجلطات الوريدية في المستشفى .. عيب!!

الVTE) Venous thromboembolism) هي حالة تتشكل فيها الجلطة في الاوردة وغالبا ما تتكون في الأوردة العميقة في الأطراف السفلية في القدمين، مما يسبب تجلط الأوردة العميقة (DVT) deep vein thrombosis.
قد تنتقل الجلطة من موقعها الأصلي، وتتحرك مع الدم، وهو ما يسمى بالانسدادembolism.
لا تظهر أعراض تجلط الدم الوريدي غالبا، ونادرًا ما تسبب الألم أو تورم الساق. أحيانا تنتقل أجزاء من الجلطة مع مجرى الدم، وتصل إلى الرئتين وتسبب الانسداد الرئوي (PE) pulmonary embolism.

السبب الرئيسي لحدوث ذلك النوع من الجلطات هو انعدام الحركة فى الاطراف السفلية ما يقلل حركة الدورة الدموية فيها و يشجع تكون الجلطات.
و تزداد عوامل الخطر مع قابلية المريض لتكوين الجلطات بشكل مرضي وراثي او مرضي بالاساس.

المعايير طلبت ان تنتبه المستشفى لهذه الحاله و ان يتم عمل تقييم لمخاطر الاصابه بها لكل مريض و ان يتم اتخاذ احتياطات وقائية تبعا لدرجة المخاطر.
لانه من العيب ان يصاب المريض بمثل تلك الحالة تحت سمع وبصر و رعاية فريق طبي خصوصا لو كان منع المريض من الحركة سببه طبي بأمر الطبيب اصلا.

مين شاطر هيقول انهي معيار من معايير gahar طلب كده؟

19/04/2024

زملاء سألوا عن الفرق بين الانذارات الاكلينيكية الحرجة و النتائج الاكلينيكية الحرجة.
الحقيقة انه المعيارين دول هدفهم الاساسي سرعة الانتباه و سرعة الاستجابة لحالة المريض الحرجة.
1- الانذارات الاكلينيكية الحرجة هي انذارات صوتيه او ضوئية تصدرها اجهزة متابعة المتغيرات الفسيولوجية للمريض بغرض تنبيه مقدم الخدمه انه المريض في حالة تدهور اكلينيكي محتمل ويجب فورا التدخل.
2- النتائج الاكلينيكية الحرجة هي نتائج الفحوصات التشخيصية للمريض حين تتجاوز النتيجة حد معين تصبح معه تمثل تهديدا لحياة المريض و يجب فورا التدخل لانقاذه من التدهور الاكلينيكي المحتمل.
مطلوب فى الحالة الاولى انه مقدم الخدمة يضمن ان الانذارات تعمل بكفاءة (انذارات حقيقية دون عطل او تعطيل ) و انه يستجيب لها بسرعة و كفاءة.
مطلوب فى الحالة الثانية انه القائم بالفحص التشخيصي فورا يبلغ صاحب القرار فى خدمة المريض ليتخذ التدخل المناسب دون الانتظار لدورة الابلاغ الروتينية.
هو ده الفكره الاساسية للمعيارين دول خليهم في بالك و طبق على اساسهم بغض النظر عن اى نوع اعتماد هتاخده.
لا تنسوني من الدعاء
د.احمد عادل السيد
استشاري جودة الرعاية الصحية
رئيس برنامج اعداد المستشفيات للاعتماد بشركة A1
رئيس لجنة صياغة معايير الرعاية الصحية الافريقية

08/02/2024

11/10/2023

09/10/2023

سيقف العالم طويلا أمام الانجاز الصحي المعجز لرجال الصحة فى مصر الذين استطاعوا فى عام واحد القضاء على وباء فيروس كبدي كان يفتك بأخوانهم و استطاعوا بمجهود لا تصفه الالفاظ ان يخفضوا نسبة الاصابة من 10% سنة 2010 إلي أقل من 0.38 % فى عام 2022 و اليوم تحصل مصر على الشهادة الذهبية كأول دولة فى العالم تحقق انجاز القضاء على وباء كبدي.
يا كل من شارك فى تلك الحملة سواء بالمسح او الفحص أو العلاج سلمت يمينك و جزاك الله خيرا.