02/02/2022
عمليات السمنة المفرطة ٢٢ نقطة
بعد اللي الواحد بيسمعه و يشوفه عن عمليات السمنة في مصر من الميديا و الناس و الزملاء و خلافه.. و مقارنة بأي بلد اخر مستحيل ان يحدث بها ما نراه هنا لان فيها هيئات تحمي المواطنين من النصب و لا ترحم أشباه الأطباءاللي يهمهم الفلوس بس.. مش حياة مرضاهم.. و علي المدي الطويل تسوء سمعة أطباء البلد في عيون الناس جوه و بره ..
فيه شوية نقط مفيدة عاوز اقولها للناس اللي بتفكر تعمل العمليات دي.او جنبها حد بيفكر يعملها..
1. العملية مش تجميل و مش بسيطة .. ممكن تكون بسيطة للجراح الشاطر .. لكن المريض السمين بعكس شكله.. هو مريض ضعيف أصلا و مخزونه للطوارئ قليل.
2. الجرّاح المتمكّن ما بيعملش اوفرز. زي ما بنشوف المهازل علي النت .. اوفر الشلّة ..و اوفر عيد الام.. و الهبل دا.. احنا مش كارفور يافندم.
3. لا تنخدعوا بالأحاديث المتلفزة مالم تروها علي الهواء..طالما سعادتك شفت ارقام الطبيب و عنوان عيادته تحت الصورة.. يبقي دافع فلوس.. و كتير كمان. و الأخ غالبا مشاكله كتير لان سمعته في اللي اشتغلهم مش كويسة فبطلوا يمدحوه لغيرهم..و لما بيقل العدد عنده بينشّط الأمور بالإعلانات.
4. لو سمعته بيقول ان النتائج ١٠٠٪ و المضاعفات صفر ٪ .. دوّر علي غيره فورا .. احنا بنعمل عمليات .. مش بنغسل شعر بالشامبو.
5. بالنسبة لإعلانات النت..فيها ناس بتتأجّر.. تعمل نفسها عملت العملية.. و تدخل الجروبات وتشكر في واحد معين و انه مافيش غيره..و تاخد نسبه لو العملية اتعملت.. خلوا بالكم.
6. مفيش حاجة اسمها أحسن جراح سمنة في مصر.. فيه مجموعة بدأت القصة من زمان و تعبت و سافرت علشان تتعلم الجراحات دي علي اصولها.. و دول في الغالب ما بيدفعوش فلوس لقنوات التليفزيون علشان تطلّعهم. و دول عندهم اقل نسب للمضاعفات بعد العملية نتيجة للخبرات التي اكتسبوها.
7. اللي يقولك انا اخترعت العملية دي.. أو اول واحد يشتغل بالجهاز دا.. دا نصّاب.. احنا ما بنخترعش.. احنا بنقلد و نتابع ما يأتي من امريكا و اوروبا..أبحاثهم علي عشرات ألوف المرضي. و نتائجهم غالبا مش مزورة. و الشركات لما بتنزل اجهزة جديدة.. بتجيلنا علشان نستعملها و نقول رأينا. مفيش حاجة اسمها انا لوحدي في الجراحة دلوقت.
8. العملية دي مش رخيصة و عمرها ما هاتكون رخيصة. لان الاَلات لوحدها بتكلف حوالي ٣٠ الف جنيه الان.. بدون تكاليف الإقامة في المستشفي و اجور الجراح و المساعدين و التخدير. فاللي يقولك ٢٥ أو ٢٨ شامل يبقي بيستعمل الات مقلدة صيني أو غيرها و بيعيد تعقيم الالات اللي بيستعملها في العيانين اللي قبلك و دا بيعرضك لمضاعفات مالهاش داعي .. و بعدين غالبا ها يعملك العملية في حمام بيتقال عليه مركز أو مستشفي..ما تغامرش بحياتك.
9. لو ممعاكش.. روح مستشفيات جامعية فقط.. بتتعمل هناك بأسعار الاَلات فقط..لكن عيوبهم قائمة الانتظار . و اللي بيعملها جراح متدرب لكن تحت إشراف استاذ. مش ها تتأذي أبدا هناك.
10. عمليات السمنة هي: تكميم (استئصال 4/5 المعدة). و تحويل مسار بانواعه. غير كدة يبقي نصب.
11. التدبيس (VBG) انتهي من العالم من ٢٠ سنة و لو أتعمل دلوقت يبقي نصب.
12. حزام المعدة بيحتضر و العالم كله ها يبطله بعد فترة قريبة.
13. التدكيك أو الكشكشه غير مفيدة علي المدي الطويل. لانها مش consistent. بمعني ان الحجم الجديد للمعدة مختلف من جراح لآخر و بالتالي ممكن تنزل وزن بسيط أو كتير أو تفشل.
14. عملية الفراشة.. نصب جدا.
15. تضييق المعدة بمنظار الفم.. تحت التجارب. و غالي جدا و جايز تنزل ٣ كيلو بس ..زائد انه مش معمول لاوزان عالية علي الإطلاق.
16. حقن البوتوكس في المعدة نصب.
17. العملية بالمنظار فقط. ممكن المريض يتحول لفتح تحت ظروف معينة. بس المنظار اولا.
18. بنج العمليات دي بنج كلي فقط. و ممكن معاه قسطرة رفيعة في الظهر اسمها ابيديورال (epidural). علشان تطيل فترة عدم الإحساس بالالم في ناس معينين.
19. البنج النصفي خطر و الموضعي اخطر في هذا النوع من الجراحات. الجراح بيقامر بحياة مريضه لو اشتغل بهذا النوع من البنج.
20. أرجوك لا تُجرِي الجراحة في مستشفيات تحت السلم مع جراحين مبتدئين. غالبا هاتموت.. المستشفي لازم يكون فيها غرفة عمليات مجهزة بترابيزة تشيل أوزان عالية و رعاية مركزة و بنك دم و معمل تظهر نتائجه في دقائق..و قسم اشعة به اشعة مقطعية و كل دا جاهز للعمل ٢٤ ساعة. لو مفيش دا ..يبقي بتقامر بحياتك.
21.أرجوك لا تجري عملية سمنة و معاها عملية تانية. .زي شد البطن او شفط الدهون. اترك جسمك يركز الالتئام في حاجة واحدة. شفنا مصايب كتير من ورا العبط دا.
22. العملية تحتاج متابعة مستمرة مع الجراح قد تمتد لسنتين و التزام من جهة المريض بالتعليمات و النصائح و الفيتامينات. لا تتصور ابدا انك ها تعمل العملية و تخس لوحدك مع نفسك بدون ما تتابع.
23. كلمة اخيرة للنقابة.. و وزارة الصحة:
لازم شهادةاستشاري جراحة السمنة تتعلق في العيادات. و يكون لها مصوغات واضحة و دقيقة. غير كده أنتم تتسببون في موت الناس كل يوم بوضع روؤوسكم في الرمل و تهربون من اساسيات مسئولياتكم. و لازم تعملوا إعلانات للجميع عن الشهادة و شكلها و إنكم ستقاضون و تعاقبون من يجري هذه الجراحات بلا شهادات أو تدريب.
ا. د. ايمن عيسوي.
# جراحة التكميم
#تكميم المعدة/ تحويل المسار
#عمليات انقاص الوزن بالمنظار.
# جراحات/ عمليات السمنه المفرطة
#تحويل المسار
# المتكممين
