عيادة د. عصام للطب النفسي

02/04/2026

سؤال وجواب
‼️⁉️❓❗

01/04/2026

*لما "السكوت" يبقى هو اللي مسموع.. هو إحنا بطلنا نتكلم ليه؟*
🗣️🗣️🗣️🗣️🗣️

بص يا سيدي، إحنا في زمن غريب جداً.. تفتح الموبايل تلاقي "رغي" للركب، كومنتات، وشات، وفويسات، وستوريهات.. العالم كله بيتكلم، بس تيجي تقعد مع حد "علاقتك بيه حقيقية" (زوجتك، أبوك، مديرك في الشغل) تلاقي فجأة "صمت الحملان" حلّ على المكان. كأننا في حصة قراءة صامتة، أو كأن الكلام عليه ضريبة قيمة مضافة وإحنا بنوفر.
السؤال اللي بيطرح نفسه-: هو ليه الحوار بقى عملة نادرة؟ وليه رغم إن الكلام هو "الكتالوج" الأصلي لحل أي مشكلة، بقينا بنفضل نبلع لساننا ونبص في السقف؟
بصفتي دكتور شغلتي اتعامل مع "النفوس اللي شايلة ومعبيّة"، خليني أقولك إن السكوت ده مش "وقار" ولا "هدوء"، ده غالباً بيبقى "انسحاب تكتيكي" وراه بلاوي زرقا. والسبب مش إننا مابقاش عندنا كلام، لا.. السبب إن "الوضع" مبقاش مناسب للكلام أصلا.
بعد خبرة سنين وتعامل مع ناس بالهبل محتاجة تتكلم لكن مش قادرة تعمل كده، اسمح لي اقدم لك الأسباب التلاتة اللي وِصلت ليها ومخلية الناس "صايمة عن الكلام" في علاقاتها:
1. "ما هو مفيش فايدة".. لما الكلام يبقى زي "النفخ في قربة مقطوعة"
أول سبب وأشهرهم هو "فقدان الأمل". الشخص بيوصل لمرحلة إنه جرب يتكلم مرة واتنين وعشرة، وفي كل مرة كان بيخبط دماغه في حيطة سد. يا إما اللي قدامه مش بيسمع أصلاً، يا إما بيسمع عشان "يرد" مش عشان "يفهم".
هنا العقل البشري بياخد قرار اقتصادي بحت: "أنا هوفّر مجهودي النفسي ده لشيء مفيد". فبيتحول الصمت لوسيلة لتوفير الطاقة، كأنك بتقول لنفسك: "أنا لو اتكلمت هنهج وأتعب وفي الآخر النتيجة صفر.. فخليني ساكت وأتفرج من بعيد". ده إحباط متغلف في صورة صمت. عشان كده لو عايش مع حد كان بيتكلم معاك وفجأة لقيته سكت اسأل نفسك السؤال ده: يا ترى أنا السبب؟! كام مرة طلب مني الطلب ده، أو وجهني للشيء ده وأنا معملتش؟! كام مرة نتناقش وأصمم على اللي في دماغي مهما قال لي؟! صحيح... هيتكلم معايا تاني يقول إيه ؟!
2. "اسكت تسلم".. الهروب الكبير من خناقة "بيتفتح فيها القديم والجديد"
فيه ناس بتبطل تتكلم خوفاً من "الحريقة" اللي ممكن تقوم لو اتكلموا. هو عارف إن الكلمة هتجيب كلمة، والكلمة التانية هتفكر الطرف التاني بغلطة من سنة ألف تسعمية وخشبة والموضوع هيقلب بـ "نكد" ملوش آخر.
هنا الشخص بيختار السكوت كنوع من "إدارة الأزمات" أو "تسكين الألم". بيبقى ماشي بمبدأ "الباب اللي يجيلك منه الريح، سده واستريح".. بس الحقيقة إنه مش بيستريح، هو بيبني "سد" بينه وبين الطرف التاني، ومع الوقت السد ده بيتحول لـ "سور الصين العظيم" اللي بيفصل بين قلوبهم. في ناس حوالينا كانت بتفرح بكلامنا معاهم لكن للأسف اتعلمت تسكت لأنهم مش عاوزين يخسرونا. ما هو مش معقول كل حوار صوتنا يعلى والناس تسمعنا ، وممكن نجرح بعض ونغلط في بعض. وعلى إيه ؟! الطيب أحسن.
3. "هتمسكها عليا ذلة؟".. لما الكلام يتحول لـ "حِرز" في قضية
وده بقى أخطر نوع، وده اللي بنشوفه في العلاقات اللي فيها "اختلال قُوى".
الموظف والمدير: الموظف يخاف يقول "أنا تعبان" أو "مش عارف أعمل دي"، عشان المدير مايمسكهاش عليه "نقطة ضعف" أو يقوله "أنت مش كفء" وقت الزيادات.
الابن والأب: الابن يخاف يحكي مشكلة، عشان مايسمعش الأسطوانة الشهيرة "أنا مش قولتلك؟" أو "ما أنت فاشل طول عمرك".
الأزواج: طرف يحكي سر أو ضعف، فيقوم الطرف التاني مستخدمه كـ "سلاح" في أول خناقة ويقوله: "ما أنت اللي كنت بتعيط عشان كذا!".
هنا الصمت بيبقى "درع حماية". الشخص بيحس إن "الأمان النفسي" مفقود، فبيقفل على نفسه بميت قفل عشان ماحدش يمسك عليه "ذلة".
كلمة سر لـ "أصحاب الكلمة العليا في العلاقات": الأمان قبل الكلام
يا جماعة، يا اللي في إيدكم "مفتاح" العلاقة (الأب، الأم، المدير، الزوج أو الزوجة.. ) الكلام مش هيطلع لوحده. الحوار ده زي "الزرعة"، محتاج "تربة آمنة".
لو أنت شخص "قناص" بتصطاد الغلطات، أو شخص "محاضر" طول الوقت بتدي مواعظ، أو شخص "عقابي" بتستخدم الكلام ضد صاحبه.. فماتجيش تشتكي إن الناس مابتتكلمش معاك.
عشان حد يفتحلك قلبه، لازم يحس إنه مش هيتضرب فيه.
الخاتمة: السكوت مش دايماً "رضا"
في النهاية، لازم نفهم إن الصمت في العلاقات غالباً مش علامة راحة.. ده "جرس إنذار" بيقول إن الأمان النفسي "شد شنطته وماشي".
الناس مابطلتش تتكلم عشان مابقاش عندها قصص تحكيها، الناس بطلت تتكلم عشان مابقتش تلاقي "حضن" يستقبل الكلام ده من غير أحكام أو تريقة أو معايرة.
لو لقيت السكوت زاد في بيتك أو شغلك، ماتدورش على "مواضيع" تفتحها.. دور على "المعنى" و"الأسلوب" و"الأمان" اللي ضاعوا، ورجّعهم الأول.. وبعدها الكلام هيسيل زي المية.

31/03/2026

سؤال وجواب
‼️⁉️❓❗
س: ينفع أوقف الدوا مرة واحدة؟

ج: طب وليه؟! ما تفهم من الدكتور الدوا بيتوقف إزاي وتمشي زي ما يقولك، مش كل الأدوية زي بعضها.

30/03/2026

29/03/2026

متلازمة أسبرجر… ببساطة ومن غير تعقيد
🤔🤔🤔🤔🤔🤔🤔
كتير بنسمع كلمة “أسبرجر”، وناس تقول:
“دول مش توحد خالص!”
أو “ده طبيعي جدًا بس مختلف شوية!”

بس الحقيقة مش أبيض وأسود كده…
زمان كان مصطلح “أسبرجر” بيتقال على أطفال عندهم ذكاء كويس جدًا، وكلامهم طبيعي أو حتى مميز، لكن بيواجهوا صعوبة في الحاجات الاجتماعية… زي:
يفهموا تعبيرات الوش
يقروا مشاعر اللي قدامهم
يدخلوا في صداقات بسهولة
ممكن تلاقي الطفل بيتكلم بطلاقة، عنده معلومات قوية جدًا في موضوع معين، وذاكرته ممتازة…
لكن لما يدخل وسط ناس، تحسي إنه “مش مرتاح” أو “مش عارف يتصرف”.
ومع تطور العلم، المصطلح ده ما بقاش بيتستخدم لوحده، وبقى كله تحت اسم واحد:
🧠 اضطراب طيف التوحد
وده طيف… يعني درجات وأشكال مختلفة، مش نوع واحد.
المشكلة بقى فين؟
إننا أحيانًا بنشوف طفل شاطر وبيتكلم كويس، فنقول: “إزاي ده توحد؟!”
فنقلل من تعبه… رغم إنه ممكن يكون:
حاسس إنه مختلف طول الوقت
مش عارف يكون علاقات
بيعاني من قلق داخلي
حاسس إنه مش فاهم الدنيا زي غيره
وفي نفس الوقت…
نقارن بيه أطفال تانيين على الطيف عندهم تحديات أكبر، وده بيكون ظلم ليهم برضه.
الخلاصة البسيطة:
كل طفل على الطيف:
ليه طريقته الخاصة
ليه تحدياته
وليه نقاط قوته
مفيش شكل واحد للتوحد…
ومفيش طفل “أسهل” أو “أصعب” بشكل مطلق… كل واحد ليه حكايته 🤍

29/03/2026

سؤال وجواب
‼️⁉️❓❗

28/03/2026

الطفل والتكنولوجيا
🧠📱🧠📱🧠📱🧠📱
هنبدأ مع بعض سلسله جديده بعنوان
📱 تأثير التكنولوجيا والموبايل على دماغ الطفل
في عصرنا الحالي، بقى الموبايل جزء أساسي من حياة الأطفال.
ورغم إن التكنولوجيا لها فوائد، إلا إن استخدامها بشكل زائد ممكن يؤثر على نمو المخ والسلوك والتعلم عند الطفل.

️ أولًا: تأثير الموبايل على تركيز الطفل
الاستخدام المستمر للموبايل، خاصة الألعاب والفيديوهات السريعة، بيخلي مخ الطفل يتعود على التحفيز السريع.
النتيجة:
صعوبة في التركيز في المذاكرة
ملل سريع من الأنشطة العادية
تشتت الانتباه
وده ممكن يشبه أعراض اضطراب فرط الحركة وتشتت الانتباه في بعض الحالات.

ثانيًا: تأثيره على نمو المخ
مخ الطفل في مرحلة نمو مستمر، وبيحتاج تجارب متنوعة (لعب – حركة – تفاعل).
لكن الموبايل:
يقلل من التفاعل الواقعي
يقلل استخدام الخيال
يقلل مهارات حل المشكلات
ومع الوقت، ده ممكن يؤثر على تطور المهارات العقلية.

️ ثالثًا: تأخر اللغة والتواصل
الأطفال بيتعلموا الكلام من التفاعل مع الناس، مش من الشاشة.
الاستخدام الزائد يؤدي إلى:
تأخر في الكلام
ضعف في التواصل البصري
قلة التفاعل الاجتماعي.

رابعًا: زيادة العصبية والسلوك العدواني
الأطفال المرتبطين بالموبايل:
يغضبوا بسرعة عند منعه
يظهر عليهم توتر وانفعال
يقل تحملهم للإحباط
وده لأن الموبايل بيخليهم متعودين على الإشباع الفوري.

خامسًا: تأثيره على النوم
استخدام الموبايل قبل النوم يؤثر على:
جودة النوم
عدد ساعات النوم
بسبب الضوء الأزرق وتأثيره على هرمون النوم.

سادسًا: التأثير الاجتماعي
قلة التفاعل مع الأسرة
ضعف المهارات الاجتماعية
الميل للعزلة
️ هل التكنولوجيا كلها مضرة؟
لا
المشكلة ليست في التكنولوجيا…
لكن في طريقة الاستخدام ومدته
الاستخدام الصحي للموبايل
✔ تحديد وقت يومي (حسب العمر)
✔ عدم استخدامه قبل النوم
✔ اختيار محتوى مناسب
✔ مشاركة الأهل للطفل أثناء المشاهدة
✔ تعويضه بأنشطة حركية واجتماعية
البدائل المهمة
اللعب الحر
الرسم
القراءة
الرياضة
اللعب مع أطفال آخرين

خلاصة
الموبايل أداة…
إما تساعد في التعلم، أو تؤثر سلبًا على نمو الطفل.
التوازن هو الحل
وكل ما قللنا الاعتماد على الشاشات، زادت فرص نمو طفل صحي نفسيًا وعقليًا.









الموقع الرسمي:
https://essamclinic-emhcp4u6.manus.space

26/03/2026

وسواس "أنا"… الحفرة اللي بيقع فيها مريض الاكتئاب
🤦🏻‍♂️🤦🏻‍♂️🤦🏻‍♂️🤦🏻‍♂️🤦🏻‍♂️🤦🏻‍♂️🤦🏻‍♂️

خلينا نتكلم بصراحة شوية…

واحدة من الحاجات اللي ما حدش بيتكلم عنها كتير في الاكتئاب هي حاجة ممكن نسميها ببساطة: وسواس "أنا".

لو قعدت مع مريض اكتئاب شوية، هتلاحظ إن الجملة الأشهر في كلامه بتبدأ بكلمة واحدة: أنا.

أنا حزين.

أنا تعبان.

أنا مخنوق.

أنا ماليش نفس.

أنا مش طايق نفسي.

أنا فاشل.

والمشكلة إن الكلمة دي بتبقى شغالة زي عدسة مكبرة مركزة على وجعه طول الوقت.

الإنسان الطبيعي لما يوجعه ضرسه مثلًا، بيحس بالألم… لكن بعد شوية ينسى نفسه وهو بيتكلم مع حد، أو بيتفرج على فيلم، أو بيشتغل.

إنما في الاكتئاب، العقل بيعمل حركة غريبة:

يقعد يبص على نفسه طول الوقت.

كأن المريض قاعد قدام مراية نفسية طول اليوم، يراجع إحساسه بالدقيقة:

أنا حاسس بإيه دلوقتي؟

طب أنا ليه حزين؟

طب أنا لسه تعبان؟

طب أنا هافضل كده؟

الموضوع يتحول من حزن إلى مراقبة للحزن.

ومن هنا يبدأ الاكتئاب يكبر.

ليه؟

لأن الانتباه زي الكشاف.

أي حاجة تسلط عليها الضوء… تكبر.

كل ما الإنسان يفضل مركز على نفسه وعلى إحساسه، كل ما الإحساس ده ينفش جواه زي العجين.

وده يفسر حاجة ناس كتير تستغربها:

ليه بعض مرضى الاكتئاب يتحسنوا لما ينشغلوا؟

لأن الانشغال مش هروب…

الانشغال أحيانًا علاج.

العلاج هنا ببساطة إنك تطلع برا نفسك شوية.

بدل ما اليوم كله يبقى حوالين:

أنا حاسس بإيه…

يبقى فيه أسئلة تانية:

مين محتاجني؟

إيه الحاجة المفيدة اللي ممكن أعملها النهاردة؟

مين ممكن أساعده؟

إيه المهمة اللي لازم أخلصها؟

الغريب إن النفس البشرية لما تخرج من نفسها… بتتنفس.

الأم اللي مكتئبة ممكن تتحسن وهي مهتمة بابنها.

الراجل اللي مضغوط ممكن ينسى نص همه وهو بيساعد صديق.

حتى التطوع أو الشغل البسيط ممكن يعمل فرق كبير.

وده مش معناه إن الألم مش حقيقي.

الاكتئاب مرض حقيقي… ومحتاج علاج حقيقي.

لكن كمان خلينا نكون صرحا شوية:

التركيز المرضي على الذات بيبقى وقود إضافي للاكتئاب.

فلو أنت مريض اكتئاب، حاول تعمل تجربة بسيطة:

بدل ما تقعد طول اليوم تسأل

"أنا حاسس بإيه؟"

اسأل سؤال تاني:

"أنا ممكن أعمل إيه؟"

السؤال الأول بيغرقك جواك.

السؤال التاني… بيطلعك للحياة.

والاكتئاب، في أوقات كتير، بيكره حاجة واحدة جدًا:

الإنسان اللي بيقوم ويتحرك رغم تعبه.








الموقع الرسمي:
https://essamclinic-emhcp4u6.manus.space

25/03/2026

Big thanks to Om Omar, Heba Fooda, Faraht Mohamed Aly

for all your support! Congrats for being top fans on a streak 🔥!

25/03/2026