29/01/2026
الكسل الوظيفي للعين... هو ضعف في حدة الإبصار في إحدى العينين أو في كلتا العينين في بعض الحالات..
ده مصطلح تقريبا كده شبه الإيد الشمال في الناس اللي بيستخدمو الإيد اليمين في الأعمال الدقيقه بمعنى انك ما تعرفش تستخدم إيدك الشمال زي اليمين رغم انها وظيفيا سليمه تماما..
أسباب الكسل الوظيفي كتيره وأشهرها عيوب الإبصار بدرجه غير متقاربه بين العينين أو الدرجات العاليه من عيوب الإبصار واللي ممكن تعمل كسل وظيفي بالعينين في حالة عدم ارتداء النظاره الطبيه في سن مبكر حتى يتطور النظر بشكل سليم في مرحلة الطفوله...
فيه اسباب تانيه ممكن تعمل كسل وظيفي كوجود عتامه في العين تمنع دخول الضوء للعين بشكل سليم... العتامه دي ممكن تكون مياه بيضاء خلقيه (الطفل مولود بها)...
ممكن كمان الحول الخلقي أو الحول اللي بيحصل في أول سنين العمر يعمل كسل وظيفي..
الكسل الوظيفي ممكن يكون سهل العلاج لو اتشخص بدري أثناء فترة تطور النظر اللي هي تقريبا أول ست سنوات من عمر الطفل..
الرساله اللي عاوزها توصل اننا لازم نطمن على عيون أطفالنا بعد الولاده في الشهور الأولى من العمر وفي سن سنتين علشان لو لا قدر الله فيه مشكله يقدر الطبيب المختص يتعامل معها بشكل سليم ويوصل عين طفلك بإذن الله لبر الأمان..
انا كتبت البوست ده لأني للأسف بأقابل حالات كسل وظيفي في سن متقدم بعد ما يكون الوقت الأمثل للعلاج عدي خلاص.
دكتور محمد اسماعيل
دكتوراه طب وجراحة العين جامعة القاهره
عضو كلية الجراحين الملكيه - إدنبره
زميل كلية الجراحين الملكيه - جلاسجو
مركز سمايا للعيون- مدينة خليفة - أبوظبي
