Ahmed Emara Kids clinic - عيادة د. أحمد رمضان عمارة لطب الأطفال

08/04/2025

🕒 مواعيد العيادة
كل عام وانتم بخير
- دكتور أحمد رمضان عمارة
- أخصائي طب الأطفال وحديثي الولادة
--------------------
🕒 مواعيد العمل بالعيادة: يوميًا ماعدا الجمعه من الساعه 4 عصراً حتى الساعه 8 مساءاً
---------------------
📍العنوان:
- منشأة رضوان - مركز أبوكبير- الشرقية
- بجوار صيدلية د. محمد حسين
---------------------
📲 للحجز والاستفسار:
💬 واتس آب: 01551256770
📞 للطوارئ: 01062904217

30/03/2025

✨ عيد فطر سعيد وكل عام وأنتم وأطفالكم بألف خير! ✨

من عيادة د/ أحمد رمضان عمارة، نرسل لكم أسمى آيات التهنئة بمناسبة حلول عيد الفطر المبارك.
أعاده الله علينا وعليكم بالخير واليمن والبركات، ونسأله تعالى أن يحفظ أطفالنا وأن يجعل أيامهم كلها أعياداً وفرحاً.

نتمنى لجميع الأطفال عيداً مليئاً باللعب والمرح والصحة والعافية 😊.

نود إعلامكم بأن العيادة ستكون في إجازة خلال أيام العيد الفطر المبارك من يوم الاثنين حتى الأربعاء.
للحالات الطارئة، يرجى التوجه إلى أقرب مستشفى 🏥.
"يمكنكم التواصل معنا على الرقم 01062904217 📞 عند الضرورة."

دمتم وأطفالكم سالمين وبصحة وسعادة. عيدكم مبارك! 🎉

28/02/2025

"عياده أطفال متخصصة للعلاج مشكلات الاطفال وحديثي الولادة"
مواعيد العمل في العيادة خلال شهر رمضان المبارك

📅 مواعيد العيادة في رمضان:
- السبت إلى الخميس:
- قبل الفطار: من الساعة 2:00 ظهرًا حتى 5:00 عصرًا.
- بعد الفطار من الساعة 7:00 مساءً حتى 9:00 مساءً ما عدا السبت والخميس.
- الجمعة: إجازة أسبوعية.

للحجز والاستفسار:
💬 واتس آب: 01551256770
📞 للطوارئ: 01062904217
📌 العنون: الطريق الرئيسي - منشأة رضوان - ابوكبير - بجوار صيدلية د/ محمد حسين.

كل عام وأنتم بخير! نسأل الله أن يجعل هذا الشهر المبارك مليئاً بالصحة والسعادة لكم ولأطفالكم.
رمضان كريم 🌙💙

توعية وتثقيف صحي لكل أب وكل أم حتى يكونوا طبيب أبنائهم الأول

28/02/2025

بمناسبة حلول شهر رمضان المبارك،
د/ أحمد رمضان عمارة أخصائي طب الأطفال وحديثي الولادة
يتقدم بأسمى آيات التهاني لجميع الأطفال وأسرهم الكريمة.
متمنيًا لكم شهراً مليئاً بالصحة والسعادة والبركات!
نسأل الله أن يعيده عليكم وأنتم في أتم الصحة والعافية،

وفي هذا الشهر الفضيل، نود أن نذكركم ببعض النصائح الصحية الهامة لأطفالكم:
- تناول وجبات صحية ومتوازنة تحتوي على جميع العناصر الغذائية الضرورية.
- شرب كمية كافية من الماء للحفاظ على ترطيب الجسم.
- الحصول على قسط كافٍ من النوم لضمان نمو وتطور سليم.

رمضان كريم، وكل عام وأنتم بألف خير!

26/01/2025

اتكلمنا في البوست الي فات عن الأدوية خوافض الحرارة الأساسية (السيتال والبروفين) الي بتستخدم بأمان في الأطفال
وفي البوست ده هانتكلم عن أدوية تانية زي الديكلوفين والديكسا الي منتشر استخدامها بشكل كبير لخفض الحرارة
رغم خطورتها 💀 على الأطفال وآثارها الجانبية الكتيرة الي ممكن تحصل لأي طفل

1️⃣ ديكلوفيناك (Diclofenac):
💠مش الخيار المناسب للأطفال، ومش بنستخدمه كحل لخفض السخونية.
💠زي دولفين لبوس، بيبي ريليف لبوس، كاتافلام نقط، كاتافلاي شراب، فولتارين وديكولفين وديكلاك حقن.
💠 دواعي الاستعمال: من الشائع استعمال مادة الديكلوفين في شكل اللبوس أو الحقن كخافض للحرارة في حالات السخونية أو الحمى وده غلط بسبب آثارة الجانبية
استعمال مادة الديكلوفين مقصور على حاجات معينة زي:
🔹حالات جراحات العظام والأسنان كمسكن قوي للآلام ومضاد للورم والالتهابات.
🔹علاج التهاب المفاصل الروماتويدي والتهاب المفاصل العادي.
🔹مضاد قوي للالتهابات في حالات الكدمات والكسور والإصابات الشديدة.
🔹حالات خشونة المفاصل.
🔹علاج نوبات النقرس الحادة.
💠 يمكن إعطاؤه من بعد السنة وممنوع إعطاؤه قبلها.
💠الجرعة بتعتمد على وزن الطفل: ٠.٥-٢ مجم لكل كيلو في اليوم مقسمة مرتين أو تلاتة ووممكن توصل ٣ مجم لكل كيلو في بعض الحالات.
🔹دولفين لبوس (١٢.٥ مجم) ← لبوسة لكل ١٢.٥ كيلو بحد أقصى مرتين في اليوم.
🔹دولفين لبوس (٢٥ مجم) ← لبوسة لكل ٢٥ كيلو بحد أقصى مرتين في اليوم أو لبوسة واحدة لكل ١٢.٥ كيلو.
🔹دولفين لبوس (٥٠ مجم) ← لبوسة لكل ٥٠ كيلو بحد أقصى مرتين في اليوم أو لبوسة مرة واحدة لكل ٢٥ كيلو.
🔹كتافلاي شراب (٢ مجم/ مل) ← الوزن مقسم على مرتين أو ٣ مرات في اليوم.
🔹فولتارين أو ديكلوفين حقن (٧٥ مجم/٣ مل) ← ١ سم عضل لكل ٢٥ كيلو بحد أقصى ٢ سم في اليوم.
💠 معدل تكرار الجرعة في اليوم:
🔹يعطى كل ١٢ ساعة وممكن كل ٨ ساعات بحيث لا يتخطى ٣ مرات في اليوم.
🔹الحد الأقصى لاستعماله يومين ل ٣ أيام.
🚫 موانع استخدام الديكلوفيناك:
🔸أمراض القلب والكبد والكلى.
🔸مرضى حساسية الصدر أو الربو الشعبي.
🔸بعض مرضى حساسية الجلد أو الإكزيما.
🔸وجود قرحة في الأمعاء أو نزيف.
🔸ارتفاع ضغط الدم.
🚫 تحذيرات من استخدام الديكلوفيناك:
🔴 عند استعماله يجب الالتزام بالجرعة المكتوبة للطفل لإن الزيادة عنها أو إعطاء جرعات غير محسوبة ممكن يضر كلية الطفل.
🔴 ممنوع استعماله مع الأدوية مضادات الالتهاب اللاستيرويدية زي البروفين والأسبرين.
🔴 ممنوع استعمال مادة الديكلوفيناك في حالات النزلات المعوية والجفاف بسبب خطورته على الكلى في الحالات دي.
🔴 ممنوع استخدامه مع الكحة عشان ممكن يزود الكحة لو سببها نزلة شعبية أو التهاب رئوي وبيخلي حالة الطفل تتدهور.
🔴 ممنوع استخدانه للأم المرضعة أو الحامل.
🚫 الآثار الجانبية للديكلوفيناك:
🔴 ممكن يسبب مشاكل في المعدة: ممكن يسبب التهابات أو قرح، خاصةً لو استخدم لفترة طويلة أو بجرعات عالية.
🔴الديكلوفيناك ممكن يؤثر على وظائف الكلى لو استعمل بجرعات أعلى من المكتوبة للطفل.

باختصار ممنوع استخدام مادة الديكلوفيناك لخفض الحرارة بسب خطورتها وآثارها الجانبية الكتيرة على الأطفال
وده طبقا لتوصيات الأكاديمية الأمريكية لطب الأطفال ومنظمة الصحة العالمية ووزارة الصحة المصرية وغيرهم
والصح استخدام مادة البارسيتامول زي السيتال أو الإيبوبروفين زي البروفين لأمانهم وقلة أعراضهم الجانبية مقارنة بالديكلوفيناك
ياريت تعمل مشاركة للبوست عشان نعرف غيرنا الناس الصح ونحمي أطفالنا

#ديكلوفيناك #دولفين #ديكلوفين #فولتارين
🏥 عيادة دكتور أحمد رمضان عمارة
الزمالة المصرية لطب الأطفال وحديثي الولادة
📌 العنون: الطريق الرئيسي - منشأة رضوان - بجوار صيدلية د/ محمد حسين.
🕒 مواعيد العيادة: يوميًا من الساعة 3 عصرا حتى الساعة 7 مساءً، عدا يوم الجمعة.
للحجز والاستفسار: 👇
💬 واتس آب: 01551256770
📞 للطوارئ: 01062904217

19/01/2025

في البوست ده هانتكلم عن الأدوية 💊 خوافض الحرارة الي ممكن نستخدمها في السخونية في الأطفال والجرعة الخاصة لكل دوا

🤔 إمتى ندي خافض حرارة؟
🔹 الحرارة عالية ومضايقة الطفل ومش مخليه يرتاح أو ينام كويس.
🔹الطفل عنده أعراض تانية مصاحبة للسخونية زي صداع شديد أو تعب.
🔹حسب تعليمات الطبيب.

الأدوية الأساسية والآمنة اللي بنستخدمها لخفض الحرارة للأطفال هي نوعين رئيسيين:

1️⃣ باراسيتامول (Paracetamol):
💠زي سيتال شراب ونقط، بارامول شراب ولبوس، أبيمول شراب لبوس، وبرفلجان محلول وريدي.
💠 آمن من عمر يوم لكن طبعا ممنوع استعماله قبل 3 شهور بدون استشارة الطبيب.
💠الجرعة بتعتمد على وزن الطفل: ١٠-١٥ مجم لكل كيلو
🔹سيتال نقط (١٠٠ مجم/مل) ← ٢ نقطة لكل كيلو
🔹بارامول شراب (١٢٠ مجم/٥ مل) ← نصف وزن الطفل
🔹أبيمول شراب (١٥٠ مجم/٥ مل) ← نصف وزن الطفل
🔹سيتال شراب (٢٥٠ مجم/٥ مل) ← ربع وزن الطفل
🔹سيتال لبوس (١٢٠ مجم/لبوسة) ← لبوسة لكل ٨ كيلو
🔹بارامول لبوس (١٢٥ مجم/لبوسة) ← لبوسة لكل ٩ كيلو
🔹أبيمول لبوس (٣٠٠ مجم/لبوسة) ← لبوسة لكل ٢٠ كيلو
💠 معدل تكرار الجرعة في اليوم:
🔹يعطى كل ٦ ساعات وممكن كل ٤ ساعات بحيث لا يتخطى ٥ مرات في اليوم بما يعادل ٧٥ مجم لكل كيلو في اليوم.
🔹الحد الأقصى لاستعماله ٣ أيام.
🚫 موانع استخدام الباراسيتامول:
🔸أمراض أو التهابات الكبد الشديدة: لازم استشارة الطبيب لتعديل الجرعة، لأن الكبد هو اللي بيكسر الدوا.
🔸بعض مرضى التمثيل الغذائي.

2️⃣ إيبوبروفين (Ibuprofen):
💠زي فلابو نقط، بروفين شراب، ميجافين إن شراب، مافو شراب، كونتافيفر إن شراب
💠فعال برضه في خفض الحرارة، ومفعوله بيدوم فترة أطول شوية من الباراسيتامول وكمان بيستخدم كمضاد التهابات.
💠 آمن من عمر ٣ شهور.
💠الجرعة بتعتمد على وزن الطفل: ٥-١٠ مجم لكل كيلو
🔹فلابو نقط (٤٠ مجم/مل) ← قطارة كاملة لكل ٤ كيلو
🔹بروفين ومجيافين إن ومافو شراب (١٠٠ مجم/٥ مل) ← نصف وزن الطفل
🔹كونتافيفر إن شراب (٢٠٠ مجم/٥ مل) ← ربع وزن الطفل
⌛ معدل تكرار الجرعة في اليوم:
🔹يعطى كل ٦ ساعات بمعدل ٤ مرات في اليوم بما يعادل ٤٠ مجم لكل كيلو في اليوم.
🔹الحد الأقصى لاستعماله ٣ أيام.
🚫 موانع استخدام الإيبوبروفين:
🔸ممنوع في الأطفال أقل من ٣ شهور أو وزن أقل من ٥ كيلوجرام.
🔸بعض مرضى حساسية الصدر أو الربوالشعبي.
🔸وجود قرحة في المعدة أو الأمعاء أو نزيف.
🔸الجدري المائي: عشان ممكن يعمل مضاعفات وحساسية شديدة.
🔸الجفاف الشديد نتيجة قيء أو إسهال، لازم نعالج الجفاف الأول قبل ما نديه.
🔸أمراض أو التهابات الكبد الشديدة.
🔸أمراض ومشاكل الكلى الشديدة.

#سيتال #بروفين #أبيمول

🏥 عيادة دكتور أحمد رمضان عمارة
الزمالة المصرية لطب الأطفال وحديثي الولادة
📌 العنون: الطريق الرئيسي - منشأة رضوان - بجوار صيدلية د/ محمد حسين.
🕒 مواعيد العيادة: يوميًا من الساعة 3 عصرا حتى الساعة 7 مساءً، عدا يوم الجمعة.
للحجز والاستفسار: 👇
💬 واتس آب: 01551256770
📞 للطوارئ: 01062904217

12/01/2025

في البوست ده، هنعرف إيه الحاجات اللي ممكن نعملها في البيت عشان نخفف السخونية أو الحمى🤒🌡️؟
طبعا ده بعد استبعاد علامات الخطر الي ذكرناها في البوست الي فات أو لحين الكشف على الطفل عن الدكتور 👨‍⚕️

تعالوا نشوف 👀 ممكن نعمل إيه في البيت: 👇
👕 تخفيف الهدوم:
🟢الطفل يلبس هدوم قطنية خفيفة ومريحة عشان نسمح لجسمه يبرد.
✋ بلاش الهدوم التقيلة أو تغطية الطفل زيادة عن اللزوم ببطانية أو غيره بدون داعي لإن ده بيحبس حرارة الجسم.
-------------------- ✽ --------------------
🥛 الإكثار من شرب السوائل:
🟢السخونية بتخلي جسم الطفل يفقد سوائل بسرعة، عشان كده مهم ندّي الطفل سوائل كتير عشان نعوض السوائل دي ونحميه من حدوث جفاف ونساعد الجسم على التبريد.
🟢ممكن نعرض على الطفل مشروبات زي المية والعصير المخفف🥤(عصاير طبيعية).
🟢 ممكن كمان نديه سوايل دافية زي الينسون أو الكركديه أو والشوربة،
🟢لو الطفل بيرضع 🤱، نزوّد عدد مرات الرضاعة.
✋ناخد بالنا من علامات الجفاف زي:
🔸العياط من غير دموع 😢
🔸جفاف الفم اللسان
🔸قلة حمام البول أو عدد مرات تغيير الحفاض
-------------------- ✽ --------------------
💨 تهوية المكان:
🟢 تهوية الغرفة الي موجود فيها الطفل مهمة جدا عشان نجدد الهوا ونخفف من حرارة فيها.
🟢 نحاول نفتح شباك أو باب و نشغل مروحة أو تكييف لو في الصيف.
-------------------- ✽ --------------------
🛌الراحة:
🟢 نخلي الطفل يرتاح وميبذلش مجهود كبير عشان الحركة بتزود حرارة الجسم.
🟢الراحة بتساعد الجسم يقاوم السخونية.
-------------------- ✽ --------------------
💊 خوافض الحرارة:
🔵 استعمال خوافض الحرارة مش مرتبط بدرجة الحرارة بس ولكن بحالة الطفل العامة، يعني لو الطفل مرتاح بيلعب أو نايم 😴 مفيش داعي نصحيه عشان نديه الدوا.
🔵 خوافض الحرارة بتنزل درجة الحرارة بمعدل 1-2 درجة ومش شرط تنزلها للمعدل الطبيعي للجسم.
🟢ممكن نستخدم خوافض الحرارة زي السيتال أو البروفين كل 6 ساعات بالجرعة المناسبة لوزن الطفل.
⚠️ مهم جداً نلتزم بالجرعة المحددة ومنديّش الطفل أي دوا من غير معرفة الجرعة المناسبة للطفل حسب وزنه وسنه.
⛔ ممنوع استعمال الأسبرين في الأطفال عشان ممكن يعمل متلازمة بتأدي لفشل الكبد.
هانتكلم في البوست الجاي عن استعمال خوافض الحرارة بالتفصيل، استنونا
-------------------- ✽ --------------------
💦 كمادات المية الفاترة:
🔵 بنلجأ للكمادات في حالات معينة:
🔹لو درجة حرارة الجسم فوق 40.
🔹لو ادينا الطفل خافض حرارة والسخونية ما نزلتش بالشكل الكافي بعد نص ساعة.
🔹حالات ضربة الشمس والإجهاد الحراري.
🔹حدوث تشنجات نتيجة السخونية زي التشنجات الحرارية.
🟢 بنستخدم فوطة نضيفة ونبلها بمية فاترة درجة حرارتها من 32.5 ل 35 درجة مئوية (لا باردة ولا سخنة) و نعصرها كويس.
🟢 المية الفاترة بتساعد الجسم يفقد الحرارة بالتبخر بشكل طبيعي.
🟢نحط الكمادات على جبين الطفل والرقبة وتحت الإبط وبين الفخذين ونغيرها كل 10-15 دقيقة.
✋ نبطل الكمادات الو الطفل بدأ يرعش.
⛔ ممنوع نستعمل المية الساقعة أو التلج لعمل الكمادات، لأنها ممكن تسبب قشعريرة وتخلي الطفل يرتعش، وده بيرفع حرارة الجسم أكتر.
⛔ ممنوع استخدام الكحول للكمادات لإنه بينزل حرارة الجسم بسرعة شديدة وكمان ممكن يمتص عن طريق الجلد ويضر الطفل لدرجة إنه ممكن يدخله في غيبوبة 😱.
-------------------- ✽ --------------------



🏥 عيادة دكتور أحمد رمضان عمارة
الزمالة المصرية لطب الأطفال وحديثي الولادة

📌 العنون: لطريق الرئيسي - منشأة رضوان - بجوار صيدلية د/ محمد حسين.
🕒 مواعيد العيادة: يوميًا من الساعة 3 عصرا حتى الساعة 7 مساءً، عدا يوم الجمعة.

للحجز والاستفسار: 👇
💬 واتس آب: 01551256770
📞 للطوارئ: 01062904217

08/01/2025

في البوست ده هانعرف إه هي علامات الخطر في الحمى وإمتى نقلق ونروح للدكتور؟

في معظم الأوقات بتكون السخونية بسيطة. بس فيه علامات خطر لو ظهرت مع السخونية، لازم نروح للدكتور 👨‍⚕️ أو الطوارئ 🏥 فورا!
ضروري ناخد بالنا منها كويس عشان سلامة أطفالنا.

تعالوا نعرف إيه هي العلامات دي: 👇
🌡️ حرارة عالية جدًا: لو حرارة الطفل وصلت لـ 40 درجة مئوية🔥أو أعلى، خاصةً في الأطفال الصغيرين.
👼 الطفل أصغر من 3 شهور: في العمر ده، أي سخونية محتاجة تقييم فوري من الدكتور.
👶 عمر الطفل من 3 لـ 6 شهور ودرجة حرارته فوق الـ 39 درجة.
😞 خمول وتعب شديد أو صعوبة في الاستيقاظ: لو الطفل نايم طول الوقت وصعب نصحيه أو مش بيتفاعل معانا زي عادته.
🚶 الطفل مش قادر يمشي أو يقف على رجله.
😮‍💨 صعوبة في التنفس أو سرعة التنفس بشكل ملحوظ: لو بنلاحظ إن الطفل بينهج أو صدره بيطلع وينزل بسرعة غير طبيعية.
😨 تشنجات أو رعشة: لو الطفل جاله تشنجات أو بدأ يرتعش بشكل لا إرادي.
🤕 تصلب في الرقبة: لو حسينا إن رقبة الطفل متصلبة ومش قادر يحركها بسهولة.
🔴 ظهور طفح جلدي لونه أحمر أو بنفسجي ومابيختفيش لما نضغط عليه بالصباع.
🤢 قيء مستمر: لو الطفل بيرجع كتير ومش قادر يحتفظ بأي حاجة في بطنه وملهوف على شرب المياه.
😭 بكاء مستمر: لو الطفل بيعيط بشكل مستمر ومش راضي يسكت ومفيش حاجة بتهديه.
🍼 رفض الرضاعة أو الشرب والأكل: لو الطفل مش عايز يرضع أو يشرب أي سوائل خالص خالص.
🤕 صداع شديد: خاصةً لو مصاحب لأعراض تانية زي القيء أو تصلب الرقبة.
🥶 إيدين الطفل ورجليه باردين بشكل ملحوظ.
😵‍💫 دوخة أو فقدان للوعي.
🌡️ استمرار السخونية أكتر من 5 أيام.

يا ريت تشاركوا البوست ده عشان الكل يكون عنده وعي بعلامات الخطر دي! 😊 وربنا يحفظ أولادنا جميعًا. 🙏



🏥 عيادة دكتور أحمد رمضان عمارة
الزمالة المصرية لطب الأطفال وحديثي الولادة
📌 العنون: الطريق الرئيسي - منشأة رضوان - بجوار صيدلية د/ محمد حسين.
🕒 مواعيد العيادة: يوميًا من الساعة 3 عصرا حتى الساعة 7 مساءً، عدا يوم الجمعة.
للحجز والاستفسار: 👇
💬 واتس آب: 01551256770
📞 للطوارئ: 01062904217

جروب العيادة على الواتس آب للاستشارات
https://chat.whatsapp.com/JF58V0b6uPu8O7MDtoSUvu

05/01/2025

في البوست ده، هنعرف طرق قياس درجة حرارة الطفل والمعدل الطبيعي لكل طريقة؟
وعشان القياس يكون صح، لازم نعرف بالتفصيل الطريقة الصح لقياس حرارة الجسم، عشان نتأكد من القراءة ونعرف إيه الصح! 👇

❓ أول حاجة، إيه نوع الترمومتر 🌡️ الي ممكن نستخدمه؟ 🤔
🔸في نوعين من الترمومتر الزئبقي والديجيتال.
🔸الترمومتر الديجيتال هو الأفضل وأمان للاستخدام المنزلي! 👍عشان الأسباب دي
🔹لإنه بيدي قراءة دقيقة للحرارة وسهل الاستخدام مجرد ضغطة زر وبيظهر الرقم بسرعة.
🔹أمان عشان مش موجود فيه الزئبق السام زي الترمومتر الزئبقي.
🔸بلاش الترمومتر الزئبقي في البيت، عشان الزئبق الي فيه مادة سامة لو اتكسر الترمومتر واتبلع.
🔸لو اضطرينا لاستخدام الترمومتر الزئبقي، ناخد بالنا كويس جداً وحنا بنستخدمه.
🔸ومهم جداً "نرجّه" كويس قبل ما نقيس الحرارة عشان نتأكدي إن الزئبق نزل للآخر وبيدينا قراءة مظبوطة.

❓إيه هي طرق قياس 🤒 درجة حرارة الجسم؟
فيه كذا طريقة لقياس حرارة الطفل، وكل طريقة ليها معدل طبيعي مختلف. تعالوا نشوف 👇

1️⃣ قياس الحرارة عن طريق فتحة الشرج
2️⃣ قياس الحرارة عن طريق الفم👄
3️⃣ قياس الحرارة تحت الإبط💪
4️⃣ قياس الحرارة عن طريق الأذن 👂
5️⃣ قياس درجة حرارة الجبهة

تفاصيل القياس ودرجة ا لحرارة الطبيعية لكل طريقة هتلاقوها على جروب الواتس آب وتحت في التعليقات

https://chat.whatsapp.com/JF58V0b6uPu8O7MDtoSUvu


🏥 عيادة دكتور أحمد رمضان عمارة
الزمالة المصرية لطب الأطفال وحديثي الولادة

📌 العنون: الطريق الرئيسي - منشأة رضوان - بجوار صيدلية د/ محمد حسين.
🕒 مواعيد العيادة: يوميًا من الساعة 3 عصرا حتى الساعة 7 مساءً، عدا يوم الجمعة.

للحجز والاستفسار: 👇
💬 واتس آب: 01551256770
📞 للطوارئ: 01062904217

01/01/2025

في البوست ده، هنشوف إزاي هنعرف هل الطفل فعلاً سخن ولا لأ؟
وإيه الأعراض اللي ممكن تظهر عليه وتطمنا أو تقلقنا؟ تعالوا نعرف مع بعض! 👇

❓إزاي نعرف 🤔 إن الطفل سخن 🤒 فعلاً؟
🔹مش شرط خالص إن إحساسنا بسخونة الطفل يكون كافي. الأهم إننا نقيس درجة حرارته صح.
🔹قياس درجة حرارة الطفل بالترمومتر سواء زئبقي أو ديجيتال وفيه كذا طريقة لقياس الحرارة هانتكلم عنها بعدين، لو الحرارة وصلت 38 درجة مئوية أو أعلى، يبقى الطفل سخن🌡️.

❓إيه الأعراض اللي ممكن تظهر على الطفل لما يسخن؟
السخونية مش بتيجي لوحدها، غالبًا بتكون مصاحبة لأعراض تانية، زي:
🔹وش الطفل وخدوده بتكون محمره وسخنة😊
🔹 همدان الطفل وبيكون مش قادر يلعب أو يتحرك زي عادته😔
🔹ممكن يكون بيعيط كتير أو متضايق ومش عارف ينام كويس😭
🔹ممكن الطفل يفقد الشهية ويرفض الأكل أو الرضاعة أو الشرب😟
🔹ممكن تظهر عليه رعشة أو قشعريرة 🥶
🔹ممكن نلاحظ إن نفسه أسرع من الطبيعي😮‍💨
أو وجود نتة وخصوصا في الأطفال الصغيرين 👶
🔹بنلاقي ضربات قلبه أسرع من المعدل الطبيعي للطفل 💓

🏥 عيادة دكتور أحمد رمضان عمارة
الزمالة المصرية لطب الأطفال وحديثي الولادة

📌 العنون: الطريق الرئيسي - منشأة رضوان - بجوار صيدلية د/ محمد حسين.
🕒 مواعيد العيادة: يوميًا من الساعة 3 عصرا حتى الساعة 7 مساءً، عدا يوم الجمعة.

للحجز والاستفسار: 👇
💬 واتس آب: 01551256770
📞 للطوارئ: 01062904217

29/12/2024

في البوست ده، هنعرف مع بعض إيه هي السخونية؟ وليه الجسم بيسخن؟

🤔 يعني إيه سخونية أو حمى؟ 🤔
✽ السخونية أو الحمى هي ارتفاع في درجة حرارة الجسم عن المعدل الطبيعي. يعني، لما تقول إن الطفل عنده حمى، ده معناه إن درجة حرارة جسمه أعلى من الطبيعي.
✽ درجة حرارة الجسم الطبيعية بتختلف من طفل للتاني وبتختلف حسب وضع الجسم يعني الطفل نايم أو بيلعب وهكذا وكمان بتختلف على حسب مكان قياسها، وبرضه ممكن تتأثر بحاجات زي الهدوم الثقيلة ودرجة حرارة الجو وغيرها.
✽ لكن الطبيعي إنها في المتوسط بتكون حوالي 37 درجة مئوية (ممكن تزيد أو تقل حوالي 0.6 درجة) وما تزيدش عن 38 درجة أو تقل عن 35.5 درجة، ولو زادت عن 38 درجة كده يبقى الطفل عنده حمى.

🤔 ليه الجسم بيسخن؟ 🤔
✽ مخنا بيحتوي على مركز متخصص (Hypothalamus) بيتحكم في درجة حرارة الجسم شبه الثرموستات الي موجود في التلاجات.
✽ جهاز المناعة في الجسم لما بيكتشف إن فيه حاجة غريبة دخلت الجسم ببيبعت إشارات تحذير للثرموستات ده عشان يرفع درجة حرارة الجسم.
✽ يعني السخونية، أو الحمى، بتحصل في الجسم كرد فعل طبيعي لجهاز المناعة بيحارب بيه حاجة مش طبيعية دخلت الجسم أو بتحصل فيه.
✽ والهدف من ده إن الجسم يخلق بيئة صعبة على الحاجة الغربية دي إنها تعيش وتتكاثر فيه زي البكتيريا والفيروسات وغيرها من الحاجات الغريبة الي بتسبب التهابات للجسم.

🤔 هل السخونية مفيدة للجسم؟ 🤔
✽ الحمي أو السخونية في حد ذاتها مش مرض، بل عرض على إن جهاز المناعة 🛡️ شغال 💪 وبيحارب العدوى أو المرض.
✽ السخونية مفيدة للجسم عشان البكتيريا والفيروسات 🦠 ما بتقدرش تعيش وتنمو كويس في درجات الحرارة العالية 🥵.
✽ الحمى بتحفز خلايا جهاز المناعة إنها تشتغل بكفاءة أكبر 💪 وتهاجم الأجسام الغريبة بشكل أفضل.
يعني باختصار، السخونية هي سلاح الجسم ⚔️ اللي بيستخدمه عشان يحارب العدوى.
هي علامة كويسة ✅ إن جهاز المناعة شغال 💪 وبيحاول يحمي الجسم🛡️.

🤔 إيه أسباب السخونية؟ 🤔
✽ العدوى🦠: وده السبب الأكثر شيوعًا للسخونية أو الحمى في ألأطفال. زي نزلات البرد والانفلونزا 🤧 والتهاب الحلق واللوزتين أو التهابات الأذن الوسطى👂.
✽ الأمراض المناعية🛡️: وفي الأمراض دي جهاز المناعة بيهاجم خلايا وأنسجة الجسم بالخطأ، وده ممكن يسبب التهابات وسخونية مزمنة.
✽ بعض الأدوية 💊: في أدوية معينة ممكن تسبب ارتفاع درجة الحرارة كأثر جانبي.
✽ ضربة الشمس ☀️ أو الإجهاد الحراري 🥵: في الحالات دي، الجسم بيسخن نتيجة التعرض لدرجات حرارة عالية وعدم قدرته على تبريد نفسه بشكل فعال.

أخيرا مهم برضه نعرف: مش كل سخونية مفيدة، ممكن تكون ضارة ومحتاجة تدخل طبي زي ما هانعرف مع في البوستات الجاية.
عشان كده مهم نتابع حالة الطفل واستشارة الطبيب لو لزم الأمر.




🏥 عيادة دكتور أحمد رمضان عمارة
الزمالة المصرية لطب الأطفال وحديثي الولادة

📌 العنون: الطريق الرئيسي - منشأة رضوان - بجوار صيدلية د/ محمد حسين.
🕒 مواعيد العيادة: يوميًا من الساعة 3 عصرا حتى الساعة 7 مساءً، عدا يوم الجمعة.

للحجز والاستفسار: 👇
💬 واتس آب: 01551256770
📞 للطوارئ: 01062904217

26/12/2024

ارتفاع درجة حرارة الجسم 🤒 أو الحمى من أكتر المشاكل الي بيتعرض لها الأطفال والي بتقلق 😱 أي أم وأب
لكن مش كل ارتفاع في الحرارة يستدعي القلق والخوف.
تابعونا في البوستات الجاية، هنتكلم عن:
* إيه هي السخونية؟ وليه الجسم بيسخن؟
* وهل الطفل فعلا سخن ولا لأ؟ وإزاي نقيس درجة الحرارة صح؟
* إيه اللي ممكن نعمله في البيت عشان نخفف السخونية؟
* إمتى نقلق ونروح للدكتور؟
* إيه الأدوية 💊 اللي ممكن نستخدمها، وإمتى نديها؟
* وأهم حاجة إيه الغلطات 🚫 الي بيقع فيها كتير مننا في علاج السخونية؟ زي حقن البرد والسخونية واللبوس وغيرهم
* وأخيرا الشائعات والأساطير الشعبية المنتشرة بين الناس عن السخونية.

استنونا عشان نفهم كل حاجة عن السخونية عند الأطفال، وإزاي نتعامل صح ✅ مع أطفالنا
من غير ما نعمل حاجة غلط تضرهم 😱 أو تأثر عليهم
ماتنسوش تعملوا لايك وشير للبوست عشان يوصل لأكبر عدد من الأمهات والآباء. 📢


🏥 عيادة دكتور أحمد رمضان عمارة
الزمالة المصرية لطب الأطفال وحديثي الولادة

📌 العنون: الطريق الرئيسي - منشأة رضوان - بجوار صيدلية د/ محمد حسين.
🕒 مواعيد العيادة: يوميًا من الساعة 3 عصرا حتى الساعة 7 مساءً، عدا يوم الجمعة.

للحجز والاستفسار: 👇
💬 واتس آب: 01551256770
📞 للطوارئ: 01062904217