29/11/2025
في البوست ده هانتكلم عن كارثة بنشوفها كتير وهي استخدام حقن الديكساميثازون لعلاج نزلات البرد والسخونية، واللي بيتعرف شعبيًا باسم "حقنة البرد" أو "حقنة السخونية" وبيكون معاها ديكلوفين أو فولتارين.
💠 أولا إيه هو الديكساميثازون (Dexamethasone):
- ده مش خافض حرارة، ومش مضاد حيوي، ومش بنستخدمه في نزلات البرد العادية. ده دواء "كورتيزون" وكمان من أقوى أنواع الكورتيزون ولا يستخدم نهائيا لخفض السخونية العادية في الأطفال.
- أشهر أسمائه التجارية: ديكسازون، إبيدرون، ديكادرون، فينادون وأبيدون (شراب).
💠 ليه بيستخدموه في "حقنة البرد" وليه ده غلط؟
- هو بيقلل الالتهاب فوراً فالحرارة بتنزل والطفل بيفوق "ظاهرياً"، لكن ده بيحصل لأنه **بيوقف جهاز المناعة** عن العمل، فبيكون كأنه "بنج" للجسم، بينما الميكروب بيفضل موجود وبينتشر أكتر.
🚫 مخاطر استخدام الديكساميثازون في السخونية والعدوى:
طيب ليه استخدام الديكساميثازون خطر؟ عشان الأسباب دي 👇
🔴 تثبيط المناعة: الكورتيزون بيوقع مناعة الطفل في الوقت اللي جسمه محتاج المناعة، فبيخلي جسم الطفل غير قادر على مقاومة البكتيريا أو الفيروسات، وبالتالي بيخلي البكتيريا أو الفيروس ينتشر في الجسم براحته لأن جهاز المناعة "نام"، وده ممكن يحول دور برد بسيط لالتهاب رئوي أو تسمم دموي لا قدر الله.
🔴 قرحة المعدة: خصوصاً لو أتاخد مع الديكلوفيناك (حقنة البرد)، ده بيدمر جدار المعدة وممكن يسبب نزيف معوي.
🔴 إخفاء الأعراض: بيغطي على علامات المرض الحقيقية، عشان كده كتير بنسمع شكوى كتير في العيادة إن الطفل كان خف أول ماخدها ورجع تعب تاني وهو في الحقيقة حالته بتتدهور لإنها بتعمل للطفل تحسن لما ياخدها لكن ييجي بعدها تاني يوم السخونية رجعت تاني والتعب زاد عليه أكتر.
🚫 الآثار الجانبية للاستخدام العشوائي للكورتيزون زي الديكساميثازون:
بالإضافة إلى أضراره على جهاز المناعة في حالة العدوي فله برضه أضرار تانية على الجسم زي
🔸 ارتفاع ضغط الدم وارتفاع مستوى السكر في الدم.
🔸 هشاشة العظام وتأثر النمو عند الأطفال لو تكرر استخدامه.
🔸 زيادة الوزن وتغيير توزيع الدهون في الجسم.
🔸 مشاكل في العين زي المياه البيضاء وارتفاع ضغط العين.
زي ما قلنا إنه ممنوع وقلنا أضراره، برضه فهو ليه استخداماته
💠 دواعي الاستعمال الحقيقية:
استعمال مادة الديكساميثازون في الأطفال مقصور على حالات طارئة ومحددة جداً لازم يشخصها الطبيب، زي:
🔹حالات الخانوق (Croup) أو التهاب الحنجرة الشديد اللي بيسبب "نبح" وضيق تنفس.
🔹نوبات الربو الشعبي (حساسية الصدر) المتوسطة والشديدة لفك الأزمة.
🔹حالات الحساسية الشديدة وتورم الوجه أو الجسم (Angioedema).
🔹بعض حالات الالتهاب السحائي.
🔹الترجيع والغثيان الناتجين عن العلاج الكيميائي.
🔹 ارتشاح المخ (Cerebral edema) ومشاكل الغدد الكظرية.
🔹 بعض الأمراض المناعية والذئبة الحمراء والروماتيزم النشط.
💠 الجرعة:
🔹 الديكساميثازون لا يؤخذ إلا بجرعات دقيقة جداً ومش بتتحسب عشوائي، الطبيب فقط هو اللي بيحددها حسب نوع المرض ووزن الطفل وشدة الحالة.
🔹ممنوع تماماً تدي الطفل "سم" من الحقنة أو "معلقة" من الشراب من نفسك، لأن الجرعة الزيادة ممكن تعمل مشاكل للطفل.
💠 معدل تكرار الجرعة:
🔹غالباً بتكون جرعة واحدة أو لمدة قصيرة جداً (يوم لـ 3 أيام) في الحالات الحادة وبأمر الطبيب فقط.
🚫 موانع استخدام الديكساميثازون (الكورتيزون):
🔸وجود عدوى فيروسية نشطة زي الجديري المائي (Chickenpox) أو الهربس، لأنه ممكن يخلي الفيروس ينتشر في الجسم كله وممكن يوصل للمخ ويسبب الوفاة.
🔸الأطفال اللي مناعتهم ضعيفة.
🔸وجود قرحة في المعدة أو نزيف.
🔸ارتفاع ضغط الدم.
🔸مرضى السكر (لأنه بيرفع السكر في الدم).
🔸بعد التطعيمات الحية مباشرة (زي تطعيم السنة ونصف).
🚫 باختصار:
🔴 كارثة "حقنة البرد" (مضاد حيوي + فولتارين + ديكساميثازن): الخليط ده بيدمر الكلى والمناعة وممكن يسبب صدمة حساسية تؤدي للوفاة لا قدر الله.
🔴 الكورتيزون بيخفي أعراض المرض (زي الحرارة والألم) فالطفل يبان إنه خف وبيلعب، لكن الميكروب لسه شغال وبيدمر في الجسم وبيعطل المناعة.
🔴 الاستخدام المتكرر عمال على بطال بيأثر على نمو الطفل وبيضغط على الغدة الكظرية وممكن يسبب هشاشة عظام.
⭐ السخونية عرض مش مرض، وهي وسيلة دفاع من الجسم. علاجها الراحة والسوائل وخوافض الحرارة الآمنة زي السيتال وممكن البروفين مع الكمادات، والكشف لمعرفة السبب وعلاجه. وبلاش 🫸 نجري ورا الحل السحري اللي بيدمر صحة ولادنا ويبوظ مناعتهم.
ياريت نعمل مشاركة للبوست عشان نوعي غيرنا ونحمي أطفالنا.
#ديكساميثازون #كورتيزون
🏥 عيادة دكتور أحمد رمضان عمارة
الزمالة المصرية لطب الأطفال وحديثي الولادة
📌 العنوان: الطريق الرئيسي - منشأة رضوان - بجوار صيدلية د/ محمد حسين.
🕒 مواعيد العيادة: يوميًا من الساعة 3 عصرا حتى الساعة 7 مساءً، عدا يوم الجمعة.
للحجز والاستفسار: 👇
💬 واتس آب: 01551256770
📞 للطوارئ: 01062904217
