11/04/2026
✨️ حساسية الصدر ⁉️
صعوبة متكررة في التنفس، أو نهجان متكرر، أو صوت تزييق مصاحب للنفس.
⚡️ أنا ابني عنده حساسية وبياخد مضادات هيستامين واوقات أدوية فيها كورتيزون ولما الموضوع بيزيد بنعمل جلسات بخار، الكلام ده صح؟
الأدوية دي مناسبة كعلاج مؤقت (لمدة أسبوع مثلا) للحالات الشديدة، وبنتجنب الكورتيزون الشراب أو الحقن قدر المستطاع، لكن مش مناسبة نكمل عليها طول الموسم
⚡️ أمال نعمل ايه؟
علاج حساسية الصدر بيتدرج حسب شدة الأعراض وتكرارها، يعني مفيش روشتة ثابتة لكل الأطفال،
المرحلة الأولى والتانية والتالتة، العلاج الأأمن فيها هو بخاخات
البخاخات انواع كتيرة، وكل نوع ليه استخدام، حسب السن وحسب الأعراض
مفيش آثار جانبية تقريبا غير ممكن فطريات في الفم علشان كده بننصح الأطفال يتمضمضوا او يغسلوا اسنانهم بعد الاستخدام
⚡️ ممكن يتعود على البخاخة !!!
خلينا نتفق ان الحساسية مرض مزمن، وعلشان نعالجه، بنحتاج وقت وصبر،
البخاخات هي أأمن علاج ، واكتر حاجة فعالة، وهتجنبنا دخول المستشفيات المتكرر، وممكن كمان ما نحتاجش جلسات بخار الا مرات قليلة جدا،
هو مش تعود، ده علاج..
⚡️ طيب احنا على البخاخات بس الولد مش بيتحسن، نعمل ايه؟
✅ المحفزات الخارجية:
زي التدخين، التعرض للعطور بأنواعها، الكلور، الديتول، الكحول، البخور، الأكلات اللي فيها مواد حافظة، اي حاجة ليها رائحة نفاذة زي ريحة الشواء أو المحروقات
كل دي حاجات لازم نتجنبها، أساسي وجزء من العلاج
