عياده د.هدير سامى الهنداوي لطب الاطفال وحديثى الولاده وحساسية الصدر

14/12/2025

14/12/2025

اللهم استخدمنا ولا تستبدلنا واجعله علم ينتفع به

24/09/2025

ليان بنوتة قمر عندها ٣سنين وزنها ثابت من اكتر من سنة مش بيزيد خالص،زارتنى بالعياده عملنا الفحوصات اللازمة وظبطنا فيتامينات ومعادن وفواتح للشهيه مع النظام الغذائي المناسب لسنها.
الحمدلله فى أقل من شهر (٢٤يوم)ليان زادت كيلو الا ربع فى الوزن وزادت ١سم ونص فى الطول.
زادت فى الكام يوم دول مايوازى اللى زادته فى سنه كاملة تقريبا.
اللهم لك الحمد والشكر..

04/08/2025

شكلى كده هسمى ٢٠٢٥ب سنة الإنجازات..
لمار إنجاز جديد وكرم وفضل من الله بنوته عندها تسعةشهور.
لمار بترضع صناعى زارتنى بالتهاب شعبى حاد.
وزنها كان ٦٨٠٠جم .
قليل طبعا بالنسبه لعمرها ووالدتها بتشتكى من عدم زياده الوزن وثباته عندعمرخمس شهور.
عملنا نظام غذائي مناسب للسن مع تعليمات للأم فى تغذيه البنوته والرضاعه.
كتبنا فيتامينات ومعادن مناسبه للسن وجاء وقت المتابعه للاطمئنان على صدرها بعد اسبوع بالظبط ،
زادت فيه لمار ٣٠٠جم .
الطبيعى اصلا أنها تزيد ٢٥٠جم فى الشهر كله مش فى الأسبوع ،يعنى لمار لو استمرت على معدل الزياده ده هتوصل كيلو وربع فى الشهر .ممتنه لك يارب فى كل حالة مش ضيعت تعبى معاها

21/07/2025

فضل الله يؤتيه من يشاء ...فلك الحمد يا الله

03/07/2025

عن فرحتى وأنا شايفة فرحة مازن وهو بيضحك وبيقولى انا طولت وبقيت زى اصحابى.
مازن طفل عنده ٧سنين عنده حساسية صدر وأنف زارنى فى العيادة علشان عنده كحه وتعبان .
بعد الفحص وجدت أن الوزن والطول مش احسن حاجه بالنسبه للسن بتاعه.
وطلبت من الأم تحاليل بعد الكحه والحساسيه تتحسن.
ظبطنا الحساسيه وبعدنا فى رحلتنا فى الفيتامينات والنظام الغذائي المناسب لمازن.
بعد شهر فى المتابعة مازن زاد اكتر من كيلو فى الوزن و٥سم فى الطول .
والدة مازن مبهورة بفرق الطول فى الفترة القصيره دى وهنبدأ رحلتنا مع اخوه بقا .
دعواتكم بصلاح الحال والسداد .

22/06/2025

(ولقد مننا عليك مرة أخرى).إنجاز جديد مع حالة جديدة يستحق شكر ربنا على فضله وكرمه ليا ول مرمر..
مرمر بنوته عندها اربع سنوات مولوده بظروف خاصه وزنها عند الولاده كان كيلو و ٧٠٠جرام .طبعا بتزيد ببطء شديد والطول أقل من الطبيعى بالنسبه لسنها.
زارتنى فى العياده وهى ٣سنوات وكان وزنها ١٠كيلو ولظروف معينه سافرت ولم تستطع المتابعه.
عادت بعد سنه زادت فى السنه كلها كيلو و ٨٠٠جرام فى الوزن و٣سم فى الطول فقط.
عملنا تحاليل وظبطنا نظام غذائي مناسب للسن مع الفيتامينات اللازمه للنمو ،
زادت مرمر فى ٤٠يوم ٦٠٠جرام وزن و ٦سم طول.
والدتها جت لى المتابعه وهى مبهورة بفرق الطول بعد معاناه اربع سنين .
ولسا مكملين أن شاء الله علشان يكون وزن مرمر وطولها يكون مناسب لمتوسط سنها وتعيش بصحه افضل .
ممتنه لك يا ربى فى كل مرة اسمع دعوات والدة مرمر.
اللهم استخدمنا ولا تستبدلنا

18/05/2025

بعد ما خلصت حالات العيادة ومشيت لقيت المساعدة بتاعتى بتتصل وتقولى فيه حالة متحولة لنا من برج البرلس فى حالة جفاف شديد ...
دخلت العياده ،خير يا جماعه؟؟
نور عمرها اد ايه؟؟
عمرها ٦شهور يا دكتورة!!!!
انا صعقت !!ازاى معقولة !!!هاتيها على الميزان .
نور وزنها ٤كيلو ،وهو ده نفس وزنها عند ولادتها..
نور يا دكتورة عندها الغده ومش بتزيد من وقت ما اتولدت واحنا متابعين مع دكتورة. غدد بس هى عندها نزلة معويه .
بعد الكشف لقيت كل علامات الجفاف.
فضلا عن أن الوزن والطول أقل من الطبيعى بكتير.
ظبطنا الجفاف والنزلة المعويه وبدأنا رحلتنا فى النظام الغذائي المناسب للسن والفيتامينات وتظبيط الوزن والطول.
وبفضل الله وحده نور جت اول متابعه وزادت كيلو الا ١٥٠جرام فى اقل من شهرين مع زياده فى الطول.
وزادت بنفس المعدل فى تانى متابعه.
يعنى تقريبا ٢كيلو الا ربع وده المعدل الطبيعى فى زياده وزن البيبى فى العمر ده.
بجد شابوه لوالدة نور على المجهود الفظيع اللى بتقوم بيه معاها علشان توصل للوزن ده وتبقى طبيعيه زيها زى الاطفال اللى فى سنها.
الحمد لله تطورها الذهنى والحركى ممتاز وطلعت أول سنتين أخر متابعه.

04/05/2025

مش حاجة سهلة أبدا انك تقنع طفل صغير أنه وزنه الزائد خطر عليه وتقنعه أنه يمنع الحلويات والاكلات اللى بيحبها ومتعلق بيها جدا علشان يخس وينزل فى الوزن،لا وكمان ده هيمشي على نظام غذائي صحى .
يعنى لازم يتحكم فى ش**ة الأكل عنده ويتخلى عن عاداته اللى كان متعود عليها قبل الدايت.
حاجة صعبة اوى بصراحة!!!!
لكن بفضل الله وحده بكون قادرة انى انزل لمستوى تفكيرهم
وأناقشهم وكمان أسالهم عن أكلاتهم المفضله وايه اللى حابين ياكلوه كل اسبوع.
وأحط لكل طفل نظامه الخاص بيه مش ورقه مطبوعه بتتوزع على الكل وخلاص،لا خالص.لأن كل طفل غير التانى فى حالته وتحاليله واهتماماته فى الاكل .
وطول الاسبوع نتابع مع بعض لغايه يوم الميزان بكون متشوقة علشان اشوف ثمرة تعبى وتعب البطل الصغنن طول الاسبوع وكمان تعب مامته معاه فى أنها تتابعه وتركز معاه وتشجعه طول الوقت.