مركز بسمة للصحه النفسيه

19/09/2025

✨ مبادرة لدعم الصحة النفسية ✨

علشان محدش يفضل محتاج علاج نفسي وتمن الجلسة يمنعه 👏
عملت مبادرة خاصة بجلسات فردية بخصم 50%، بأجر رمزي جدًا،
والهدف منها تسهيل البداية لأي حد محتاج يسمع، يتفهم، ويبدأ يشتغل على نفسه.

💭 الجلسة مدتها ساعة كاملة – بنفس الجودة والاهتمام زي أي جلسة تانية.
💭 المبلغ الرمزي هدفه فقط الحفاظ على قيمة المهنة والاستمرارية في تقديم الخدمة بشكل محترم.

📌 المبادرة لفترة محدودة – والأماكن قليلة.
📍 المكان: كوم حماده – البرج الزجاجي عند المزلقان البحري (فوق قطونيل).
📞 للحجز والاستفسار: 01120308196 / 01019743874

❤️ دي خطوة لوجه الله ودعم لأي حد نفسه يتغير ويتحسن ومش عايزه يفضل الميزان المادي عائق قدامه.

19/09/2025

🧠 العقول التلاتة في العلاج الجدلي السلوكي (DBT)

يا جماعة، كتير مننا بيلاقي نفسه ساعات بياخد قرارات بناءً على مشاعره بس، وساعات تانية بياخد قرارات بعقله ومنطقه من غير ما يحس بنفسه ولا يسمع قلبه. العلاج الجدلي السلوكي (DBT) علّمنا إن فيه ٣ أنواع من العقول جوّانا، ولو عرفناهم كويس واشتغلنا على توازنهم حياتنا هتبقى أهدى وقراراتنا أذكى.

خليني أحكيلكم عليهم واحد واحد:

1️⃣ العقل العاطفي

ده العقل اللي بيشتغل لما مشاعرك هي اللي ماسكة الدفة. بتحس بحاجة؟ يبقى لازم تتصرف على طول.

ممكن تكون فرحان، متحمّس، خايف، متضايق، ومش قادر تفكر غير في إحساسك الحالي.

قراراتك بتطلع اندفاعية، وممكن تندم بعدها لما تهدى.

بتركّز على إحساسك أكتر من الحقايق.
مثال: لو صاحبك اتأخر في الرد عليك، عقلك العاطفي ممكن يقولك: "أكيد مش مهتم بيا"، وتروح زعلان أو تقطع العلاقة، من غير ما تعرف ظروفه إيه.

2️⃣ العقل المنطقي

ده بقى زي الكمبيوتر. بيدوّر على الحقايق والمنطق، وبيحاول يتجنّب أي ألم أو دراما.

بياخد قرارات عقلانية جدًا.

بيعتمد على التجارب السابقة والمعطيات اللي قدامه.

بس ساعات بيبقى بارد، ومش بيسمع مشاعرك ولا بيهتم هي عايزة تقول إيه.
مثال: لو حد قريبك تعب وعايز دعمك، عقلك المنطقي ممكن يقولك: "أنا عندي شغل ومشغول دلوقتي"، وتتجاهل احتياجه العاطفي، رغم إن حضورك كان هيفرق معاه جدًا

3️⃣ العقل الحكيم

وده بقى العقل المثالي اللي DBT بيدربنا نوصل له.

بيجمع بين العاطفة والمنطق.

بيسمع قلبك، وياخد مشاعرك على محمل الجد، وفي نفس الوقت بيشوف الحقايق ويحسبها بعقلك.

متوازن وواعي، بيبص من زوايا مختلفة قبل ما ياخد قرار.
مثال: لو صاحبك اتأخر في الرد عليك، العقل الحكيم هيقول: "أنا حاسس بالزعل دلوقتي، بس ممكن يكون مشغول، خليني أستنى وأتكلم معاه بهدوء".

خلاصه كل كلامي ده
ولا العقل العاطفي لوحده صح، ولا المنطقي لوحده صح. إحنا محتاجين ندرّب نفسنا نستخدم العقل الحكيم، اللي بيوازن بين الإحساس والحقايق. ده بيخلينا ناخد قرارات صحية، نحافظ على علاقاتنا، ونحمي نفسنا من الاندفاع أو القسوة الزايدة.

جرب من النهاردة، لما تواجه موقف صعب، توقف لحظة واسأل نفسك:

أنا حاسس بإيه؟

الحقايق بتقول إيه؟

إيه القرار اللي يرضي قلبي وعقلي في نفس الوقت؟

ده تدريب، ومع الوقت هتلاقي نفسك بقت أهدى، ردود أفعالك أقل اندفاع، وعلاقاتك بقت أعمق وأنضج.

العنوان : كوم حماده البرج الزجاجي عند المزلقان البحري فوق قطونيل
📞 للتواصل والحجز: 01120308196 /01019743874

16/09/2025

يشرفني ويملأ قلبي فخراً أن أستقبل هذا التكريم من فريق أطباء نحو الحياة لمركز بسمة للصحة النفسية
المكان الذي أصبح جزءاً مني ومن رحلتي
المكان أكثر من مجرد عمل
يعني الأمل، القوة، والإيمان
بأن كل تحدٍ يمكن تحويله إلى إنجاز. 💚
إلى كل من يواجه صعوبات
تذكروا: لا شيء يقف أمام الإرادة والع

#إلهام

العنوان: كوم حماده البرج الزجاجي عند المزلقان البحري فوق قطونيل
للاستفسار: 01120308196 /01019743874

14/09/2025

الوسواس.. دوامة التفكير اللي ما بتقفش معاك

الوسواس مش بس فكرة بتعدي، هو حاجة كده زي حلقة مقفولة، فكرة تزن في دماغك من الصبح لحد ما تنام. تحاول تطردها ترجع تاني، تحاول تتجاهلها تكبر وتلحّ أكتر.

في ناس الوسواس عندهم بيكون أفكار سخيفة زي:

"قفلت الباب ولا لأ؟"

"غسلت إيدي كويس ولا لأ؟"
وتلاقي نفسك تقوم تتأكد عشر مرات.

وفي ناس الأفكار عندهم بتكون أعمق وأرعب:

"طب لو أنا أذيت حد؟"

"طب لو حصل مصيبة بسببي؟"

"طب لو أنا إنسان وحش أصلاً؟"

والأصعب إن دماغك ما بتسيبكش غير لما تعمل حاجة تهديها، زي إنك تروح تغسل إيدك تاني، أو تتأكد، أو تدعي، أو تعيد نفس الحركة. تحس إنك لازم تطمّن دماغك، ولو ما عملتش كده القلق بيزيد ويخنقك.

الوسواس مرهق لأنه بيستهلك طاقتك كلها. تلاقي نفسك طول اليوم بتفكر، طول الوقت بتتأكد، وطول الوقت حاسس إن فيه خطر أو حاجة غلط هتحصل. والمشكلة إن كل ما تستسلم وتعمل اللي دماغك عايزاه، الوسواس يقوى ويطلب أكتر.

الحاجة الكويسة إن الوسواس بيتعالج، وده بيحصل لما تتعلم إزاي توقف الحلقة دي:

تتعلم تتجاهل الفكرة بدل ما تحاربها.

تتعلم تقعد مع القلق لحد ما يهدى لوحده.

تتعلم تقول لدماغك "أنا سامعك بس مش هعمل اللي إنت عايزه".

الموضوع محتاج تدريب وصبر، بس مع الوقت الدماغ بتهدى وتبطل تعذبك بنفس الأفكار.


العنوان / البرج الزجاجي عند المزلقان البحري فوق قطونيل
للتواصل : 01019743874 /01120308196

11/09/2025

اضطراب الشخصية النرجسية – Narcissistic Personality Disorder

👥 بعد ما خلصنا الشخص المعادي للمجتمع، دلوقتي هنتكلم عن شخصية تانية في Cluster B – الشخصيات الدرامية والانفعالية: النرجسي.
الناس كتير لما تسمع كلمة "نرجسي" بتفكر في حد مغرور أو شايف نفسه أهم من الكل، لكن في علم النفس الموضوع أكبر وأعمق من كده.

🔹 يعني إيه نرجسي؟
النرجسي مش بس بيحب نفسه، لكنه محتاج الاعتراف الدائم من الناس عشان يحس بالأمان الداخلي. حياته وعلاقاته دايمًا حوالين نفسه، ومش قادر يحس بعمق بمشاعر الناس حواليه.

👤 صفات الشخص النرجسي اليومية

ممكن تلاقيه في حياتك اليومية كده:

بيتكلم عن نفسه وإنجازاته طول الوقت، حتى لو الموضوع مش مهم للناس.

حساس جدًا لأي نقد أو ملاحظة، وبيزعل أو يغضب بسرعة.

علاقاته غالبًا سطحية، بيستغل الناس عشان يحقق مصالحه.

ممكن يكون ظاهر charming ولطيف، لكن ده مجرد واجهة عشان يجيب إعجاب أو يسيطر.

🔍 السمات الأساسية للشخصية النرجسية

1️⃣ الإحساس بالعظمة:
شايف نفسه فوق الكل، وممكن يحلم دايمًا بالنجاح الكبير، القوة، أو الشهرة.

2️⃣ الحاجة المستمرة للإعجاب:
محتاج الناس حواليه يقولوا له "أنت جامد" أو "أنت مميز"، وده بيخليه يحس بالقيمة.

3️⃣ قلة التعاطف مع الآخرين:
مش قادر يفهم أو يحس بمشاعر الناس حواليه بصدق، ومش بيهتم بيها إلا لو بتخدمه.

4️⃣ استغلال الناس:
الناس بالنسباله أدوات عشان يوصل لأهدافه، مش أشخاص لهم حياة ومشاعر.

5️⃣ حساسية للنقد:
أي ملاحظة أو نقد ممكن تخليه يغضب أو يحس بالإهانة، أحيانًا بيحاول يقلل من الشخص اللي انتقده.

6️⃣ خيالات مبالغ فيها:
غالبًا عنده أفكار عن نفسه مش واقعية، زي النجاح الكبير أو السلطة الكاملة أو الجمال الفائق.

⚠️ الفرق بينه وبين الشخص المعادي للمجتمع

المعادي للمجتمع بيستغل الناس من غير إحساس بالذنب أو ضمير.

النرجسي بيستغل عشان يحس بالعظمة ويغذي إحساسه بالقيمة، وممكن يظهر ودود وجذاب عشان يحقق ده.

🧠 الأسباب المحتملة

1. الوراثة:
في قابلية جينية بتخلي بعض الناس عندهم ميل للنرجسية.

2. الطفولة:
مدح مبالغ فيه أو إهمال عاطفي ممكن يخلق إحساس داخلي بالنقص، والنرجسي بيعوضه بإحساس العظمة الخارجي.

3. البيئة:
نشأة مش متوازنة، سواء في أسرة صارمة جدًا أو مفرطة في الدلال، ممكن تشجع سلوكيات نرجسية.

العلاج

العلاج النفسي (Psychotherapy):
الهدف منه إنه يفهم مشاعره ومشاعر الناس حواليه، يقلل الاعتماد على الإعجاب الخارجي، ويحسن علاقاته. العملية صعبة ومحتاجة صبر، لأن الشخص النرجسي غالبًا مش شايف نفسه عنده مشكلة.

الأدوية:
ممكن تستخدم إذا فيه اكتئاب أو قلق مصاحب، زي مضادات الاكتئاب أو أدوية القلق.

📌 أمثلة من حياتنا اليومية

في الشغل: بياخد الفضل على مجهود غيره، ممكن يغش أو يستغل زملاءه عشان يترقى.

في العلاقات: مركز على نفسه، ممكن يخون أو يستغل الطرف التاني عاطفيًا أو ماديًا.

في المجتمع: ممكن يظهر ودود وجذاب عشان الناس تحبه أو تساعده، لكن كل ده مجرد واجهة.

النرجسي مش مجرد شخص مغرور، ده اضطراب نفسي كامل بيأثر على حياته وعلاقاته بشكل كبير. التعامل معاه محتاج وعي وحدود واضحة، وفهم إن أي محاولة تغييره هتكون صعبة جدًا إلا إذا هو نفسه عايز يتغير.


العنوان: كوم حماده البرج الزجاجي عند المزلقان البحري فوق قطونيل
الحجز: 010 19743874
01120308196

05/09/2025

صوره تعبيريه عن ألم " الفايبروماليجيا "
ألم متنقل ... أحيانا بييجى على هيئه " هجمات " شرسه جدا
مضادات الأكتئاب ... أحيانا بتساعد فى علاجه
والعلاج بالحركه ... بيخفف من وطأه هجماته
أصعب أوقاتك ... بتكون الكام ساعه بعد الصحيان من النوم
شكلك سليم ... مفيش حاجه ظاهره عليك ... مبتسم ... وبتضحك عادى وبتقوم بكل مهامك ... بس حرفيا ألم داخلى ملوش حدود ... غير قدره ربنا سبحانه وتعالى
ربنا يشفى ويعافى مرضى الفايبرو ... وكل المرضى ... ويعينهم على كل ما يتحملوه من ألم ...
مركز بسمة للصحه النفسيه
للاستفسار والحجز:01019743874 /01120308196

03/09/2025

🧠✨ الأمراض السيكوسوماتية: لما النفسية تمرض الجسد

هل تعلم إن الصداع المزمن أو القولون العصبي ممكن يكون سببهم مش مرض عضوي… لكن ضغط نفسي أو قلق مكبوت؟
الأمراض السيكوسوماتية بتقولنا إن الجسم بيعبر عن مشاعرنا وأوجاعنا النفسية في شكل ألم ومرض جسدي.

🎥 في الفيديو شرحت إزاي التوتر والقلق يترجموا لأعراض جسدية، وليه الاهتمام بالصحة النفسية أهم خطوة علشان نحافظ على صحتنا الجسدية.

💬 لو مهتم تعرف العلاقة القوية بين العقل والجسم، اتفرج دلوقتي وشاركنا رأيك 👇

📍 مركز بسمة للصحة النفسية
العنوان: كوم حمادة – البرج الزجاجي عند المزلقان البحري – فوق قطونيل
📞 01120308196
📱 01019743874 (واتساب متاح)



#التوتر #القلق

22/08/2025

أنا مؤمنة إن القوة الحقيقية مش في الكلام… لكن في الأثر اللي بنسيبه في حياة غيرنا.
شكرًا لكل من شاف فيا مثال للقوة والإصرار، ووعدي ليكم إن جاي أكتر وأقوى بإذن الله

الاستاذه / بسمة أشرف السيد عوض
السن / 30
العنوان / محافظة البحيرة
باحثة ماجستير في الصحة النفسية وأخصائية في الاستشارات الزوجية والأسرية وتعديل سلوك الأطفال والمراهقين.

رغم إنها من متحدي الإعاقة (الضمور العضلي الشوكي)، قدرت تثبت إن التحدي مش عائق، بالعكس هو باب للإبداع والعزيمة. قصتها مليانة صعوبات، لكن كمان مليانة نجاحات وأمل، وده اللي خلى اسمها يتكتب على منصات كتير كمثال للقوة والإصرار
بسمة بتؤمن إن القوة الحقيقية في العقل والقلب مش بس في الجسد.
ومن خلال شغلها بتسعى تساعد الأسر والأفراد يعيشوا بتوازن نفسي، وتدعم الأطفال والمراهقين علشان يكبروا بثقة وحب للحياة.
كل الشكر والتقدير والاحترام من صفحه الشخصيات المشرفه

15/08/2025

🪜 سلالم الجلسات

فيه جلسات بتبدأ بابتسامة… وفيه جلسات بتبدأ بصمت
دخلت عليّا بنوتة ملامحها بتحكي قبل ما لسانها ينطق
قعدت وسكتت شوية وبصتلي كأنها بتقول: ابدئي إنتي
قولتلها بهدوء: تحبي نبدأ بإيه ؟
قالت بصوت واطي: مش عارفة… أنا تايهة

هنا أول درجة في السلم كانت إني أوفر لها الأمان إنها تحكي حتى لو مش عارفة تبدأ منين
بدأنا بأسئلة صغيرة عن يومها عن آخر موقف تعبها… وكل سؤال كان زي درجة بتقربها أكتر من إنها تطلع اللي جواها

ومع الوقت وصلنا لوجع قديم… إحساس بالرفض من أيام المدرسة وكلام محبوس جواها من سنين
قعدنا نفكه ونرتبه ونفهمه سوا
بعدها طلعنا تاني للسطح… لخصنا ولمّينا المشاعر. قولتلها: إحنا النهاردة لمسنا حاجات مهمة بس مش لازم نحل كل حاجة مرة واحدة هنمشيها درجة درجة

قبل ما تمشي إدتها تمرين بسيط: تكتب كل مرة الإحساس ده ييجي وإيه اللي بيحصل وقتها
دي كانت الدرجة اللي هتطلعها لحد الجلسة الجاية.

💡 في الحياة وفي العلاج النفسي فيه اللي ييجي على أول درجة وفيه اللي بيكون في النص وفيه اللي محتاج ينزل درجتين عشان يطلع تاني.
والأخصائي هو اللي يعرف يمشي معاك في السلم ده… من غير ما يزقّك ومن غير ما يسيبك واقف.

📌 القصة دي مش سر من حالة بعينها لكنها رسالة من واقع شغلي … رسالة لكل حد حاسس إنه تايه: دايمًا فيه سلم والمهم نبدأ بأول درجة.

11/08/2025

الوجه المُخادع

زي ما العُملات ليها وجهين مُختلفين عن بعض مشاعرنا كمان ليها وجهات مُختلفه لكن للأسف فيه بعض المشاعر كتير مننا مبيقدرش يفرق بينهم ومن أهمها التعلق المرضي اللي البعض بيصنفه علي إنه حُب.

وعشان نقدر نميز بين التعلق المرضي والحُب لازم نفهم يعني ايه تعلُق مرضي واللي هو :
ربط حياتك اليوميه بشخص أو مجموعه من الأشخاص بشكل يتسبب في أزمات نفسيه لصاحب التعلق والأشخاص المتعلق بهم. 🚶

أما عن الأسباب فبتتمثل في :
✔️ عدم التعبير عن المشاعر ودفنها
✔️ التجاهل والأهمال من قبل الأهل والأصحاب
✔️ بعض الأمراض النفسيه الأخري مثل النرجسيه
✔️ حُب التملك
✔️ المشاكل والخلافات الأسرية
✔️ تعويض الشعور بالنقص

طيب تفتكر إزاي هتتأكد ان اللي بتعاني منه تعلق مرضي ؟ عن طريق الأعراض واللي من أهمها :

✔️صعوبات في إتخاذ القرارات.
✔️صعوبه في تعريف المشاعر.
✔️مشكلات في التواصل مع الآخرين.
✔️الخوف من الهجر.
✔️السيطرة الشديدة على الآخرين.
✔️إهمال الأحتياجات الشخصية.
✔️التفكير في الشريك باستمرار.
✔️ إنعدام الثقة بالنفس.

وأخيرًا التعلق المرضي من أصعب الاضطرابات اللي ممكن تواجهك متستسلمش ليه لأن في وجوده هتكون دايمًا رابط حياتك وسعادتك بوجود أشخاص مُحدده طبيعي جدًا يختفوا في أي وقت لأي سبب من الأسباب.

💡 في
بنساعدك تبدأ رحلة التعافي بخطوات علمية وعملية، عشان ترجع تبني علاقة صحية مع نفسك ومع الآخرين.

📩 للتواصل وحجز الجلسات، تواصل معنا الآن علي
010 19743874 01120308196

09/08/2025

التعافي النفسي "أنا مين بعد التعب ده كله؟"

في لحظة ما بنقف قدام نفسنا ونسأل السؤال اللي بيوجع:
هل ممكن أرجع أكون أنا بعد كل اللي حصل؟

كأخصائية نفسية، شفت السؤال ده في عيون ناس كتير مرّوا بصدمات خيبات أو أوقات فقدوا فيها إحساسهم بنفسهم.
الحقيقة إن التجارب المؤلمة مش بترجعنا لنفس الشخص اللي كنا عليه… لكنها ممكن تبنينا من جديد بطريقة أعمق.

💔 البداية مش سهلة
التعافي مش لحظة سحرية ولا جملة ملهمة تغيّر كل حاجة.
هو غالبًا بيبدأ من لحظة انهيار من إدراك إننا مش قادرين نكمل بالشكل ده.
والعلم بيأكد إن الاعتراف بالمشاعر المؤلمة هو أول وأهم خطوة في عملية التعافي النفسي.

👣 أول خطوة: الوعي والاعتراف
قول لنفسك بوضوح: أنا محتاج أتعافى.
ده بيكسر دائرة الإنكار ويفتح باب للتعامل مع الألم بدل ما نهرب منه.
في العلاج النفسي بنسمي دي مرحلة الوعي… وهي حجر الأساس لأي تغيير.

🧠 التعب النفسي مش ضعف
الإنسان مخلوق يتأثر ويتعافى، وكلنا بنتعرض للجروح النفسية.
الدراسات بتوضح إن الأشخاص اللي بيسعوا للعلاج بعد الأزمات بيمتلكوا قدرة أعلى على التكيّف والنمو.
فلو إنت بتدور على نفسك وسط الركام، إعرف إن ده شجاعة مش ضعف.

🕊️ التعافي رحلة شخصية
مفيش "طريقة واحدة" للشفا.
في العلاج، بنشوف ناس بتتعافى من خلال الكتابة ناس من خلال الدعم الاجتماعي وناس من خلال مواجهة علاقات مؤذية.
إسمح لنفسك تجرب وتغلط وتعيد المحاولة… المهم إنك تتحرك للأمام حتى لو خطوة صغيرة.

🌱 ومين أنت بعد كل ده؟
أنت نسخة أكثر وعيًا أهدى وأكثر تقديرًا لقيمتك.
نسخة بتعرف معنى السلام النفسي حتى لو لسه ما وصلتش له كامل.
وأنا هنا أأكد لك… إنك قادر وإن الرحلة دي تستحق.










العنوان : كوم حماده البرج الزجاجي عند المزلقان البحري فوق قطونيل
للحجز والاستفسار: 01019743874 / 01120308196

05/08/2025

💙 بنكبر… ونتطور… ونحتفل ✨🎉

إنهاردة أحب أشارككم لحظة فخر في رحلتي المهنية
حصلت على شهادة العلاج الجدلي السلوكي DBT – المستوى الأول
من مؤسسة الدكتورة هدى العماوي، بعد 72 ساعة تدريبية من أقوى البرامج العلاجية المعتمدة.

مش بس علشان أضيف شهادة جديدة
لكن علشان أكون دايمًا مستعدة أقدّم الأفضل لكل شخص بيطلب المساعدة النفسية في مركز بسمة للصحة النفسية 🌿

⭐ لأننا في المركز بنآمن إن العلم والتطوير المستمر هما أساس الثقة…
⭐وبنآمن إن كل شخص يستحق يكون في مكان آمن يسمعه ويفهمه صح.

الاحتفال ده مش بس بنجاح شخصي…
ده احتفال بخطوة جديدة نحو مركز أقوى وأكثر حترافية ورسالة أعمق 🙏