06/08/2022
ثانية واحدة ..
انت متضايق إن ابنك جاب مجموع مش عالي في #الثانوية العامة ، عشان مش هيدخل طب ولا هندسة ؟!!
انت عاوزه يخش هندسة ليه ؟!! ..
عشان يبقى مهندس كمبيوتر ؟!! ..
انت فاكر إن ده لسه الطريق الوحيد عشان يشتغل في شركة كـ مهندس كمبيوتر ؟!!
ماتعلمش إن بمشاهدة فيديوهات ع اليوتيوب و تطبيقها ، الأطفال دلوقتي بتتعلم برمجة و روبوتيكس ، و يشتغلوا من البيت في أكبر الشركات العالمية ؟!! ..
انت لسه مش مدرك حجم التغير في سوق العمل اللي حصل آخر سنتين تلاتة بس ؟!! ..
لسه متضايق إن ابنك أو بنتك ما جابوش مجموع يخليهم يدخلوا كلية ، و يخرجوا منها بعد 5 سنين ، و يطلقوا هاشتاجات عشان يتكلفوا و ياخدوا مرتبات هزيلة ؟!!
لسه متضايق من كده ، في الوقت اللي بتشوف فيه فريلانسرز بيقبضوا بالدولار و هما بيشتغلوا في الكافيه ، برغم إن دراستهم الجامعية غير معروفة ؟!! ..
حتصدقني لو قلت لك إني مشفق ع اللي جاب مجموع عالي ، لأنه ممكن يفضل مغيب شوية حلوين ، و عايم في بحر من الاستحقاق المزيف ، و فاكر أنه كده قفّل الجيم ، و المستقبل بالنسبة له لازم يكون وردي ؟!! .. بجد صعبان عليا اللي بيفكر كده دلوقتي ..
ده لازم يفوق و يعرف أنه داخل كلية (قمة) حصل تشبع من خريجيها !! .. و اللي بيتميز بس ، هو اللي بيبان و بياخد حقه صح ..
ولا هو تور ، و إحنا مصممين نحلبه ؟!!
