Healthy life habits

30/11/2022

Finally..!!

بقا لينا موقع خاص بالبيدچ والمحتوى بتاعنا💙💙🎉🎉

تقدروا تتابعونا من هناك كمان💙

خدولكم لفة هنتك وقولولى رأيكم🫣🎊

اضغط علي الصورة

21/11/2022

نظراً لأنى بقالى فترة كل يوم بقرر أظبط نومى وأصحى بدرى ومبصحاش
ولو صحيت مرة بفتكر إنى خلاص كده نومى اتصلح🙂

فحابة أدبس نفسي و نتشارك سوا فى العادة دى ونظبط نومنا🙊

عادات كتير اوى فى دماغى عايزه اغيرها وتبقي الحياة صحية أكتر ولكن نخليها فى وقتها😉

مشوار الألف ميل يبدأ بخطوة🎯
والخطوة الأولى اننا هنظبط نومنا ..

هننام بدرى عشان نصحى بدرى ونحس بالمنبه لما يصحينا للفجر كمان♥️🎯

أول حاجه لازم نعرف السبب اللى بيخلينا نسهر ونومنا يبوظ
بالنسبالى هو الفون.. كنت بعمل حركة لذيذة ممكن تساعدكم ونعملها سوا
https://play.google.com/store/apps/details?id=kr.co.rinasoft.howuse

ده لينك ابلكيشن Ubhind بظبطه انه يقفلى الفون الساعه 12 او اى وقت انا عايزاه واحدد عايزاه يتقفل كام ساعة .. مقفول مش هعرف افتح فيه حاجه بس لو حد اتصل بيا هعرف افتح عليه عادى وبيسمحلى انى افتح الفون لمرة واحده بس لربع ساعه لو فيه حاجه ضرورى✔️

فحملوه وظبطوه على معاد نومكم🎯

يلا يدوب ننام
سلام🥱


💙

20/11/2022

الحليب هو أكثر من مجرد مصدر للكالسيوم✨
هو كمان مصدر للبروتين وڤيتامين د و ب12 ✔️
ومصدر لعناصر غذائية تانية زى الفوسفور البوتاسيوم✔️

من أحسن العادات اللى ممكن تتبعها فى حياتك هى إنك تحافظ على شرب اللبن يومياً🎯
قبل النوم بشكل خاص✔️
لأنه هيساعدك على النوم العميق ومتعانيش من أرق
هيساعد جسمك وعضلاتك على الاسترخاء تماماً ويقلل التوتر✔️

20/11/2022

اتكلمنا عن الأنيميا وعرفنا إن أشهر أسبابها هو نقص الحديد🚫

فخلينا نتفق ان عنصر الحديد من العناصر الضرورية جدا للجسم..
📌ليه؟
لان بيدخل فى تكوين الهيموجلوبين اللى بينقل الاكسجين لكل خلايا الجسم✔️
يعالج فقر الدم/ الانيميا✔️
يقلل الشعور بالتعب✔️
تحسين الاداء الرياضي ✔️
يحافظ على تطور أدمغة الأطفال بشكل طبيعى✔️
مهم جداً للحامل خصوصاً لأن نقصه بيؤدى لولادة مبكرة🚫

📌 هل ممكن آخد الحديد من الأغذية بدون الاستعانة بمكملات غذائية؟
= أه
ودى بعض الأطعمة الغنية بالحديد👇
🔸الكبد البقرى واللحوم والأسماك.
🔸 الفاصوليا
🔸 السبانخ
🔸الخضراوات الورقية خضراء اللون.
🔸 العدس
🔸الطماطم والبقدونس
🔸 البيض
🔸 اللحوم الحمراء
🔸الفاكهة المجففة

📌 فى حالة إنك حللت نسبة الحديد فى دمك ولقيتها ناقصة بنسبة كبيرة الجأ لتناول مكمل غذائي تحت إشراف طبيب🚫

واللى بيساعد على امتصاص الجسم للحديد من الأكل أو المكملات الغذائية هو ڤيتامين C 🎯

هنتكلم عنه مرة تانية😉

20/11/2022

متنساش وانت بتظبط لايف ستايل صحى لحياتك إنك تظبط نومك🎯
📌ليه مهم تظبط نومك؟
لأنه النوم بشكل كافي
هيجدد نشاطك ويمدك بالطاقة والحيوية✔️
هيزود مناعة جسمك✔️
هيقوى التركيز والانتباه عندك✔️
هيحافظ على بشرتك✔️
لو انت شخص رياضي هيحسن أداءك الرياضي✔️
+ مش هتبقي مقريف من الكوكب و مشاعرك هتبقي إيجابية أكتر🫣
📌 عدد الساعات الموصي بها للنوم :
بتختلف باختلاف الفئة العمرية ولكن لو اللى بيتابعنا هما الشباب من سن 18 سنة فما فوق
فعدد الساعات من 7 ل8 ساعات🎯

📌 أنسب وقت للنوم: ليلاً

📌 لو بتعانى من الأرق ومش بتعرف تنام نوم عميق تعمل ايه؟
🔸متشربش منبهات زى الشاى والقهوة وقت الليل.
🔸بلاش وجبات دسمة قبل النوم
🔸مارس الرياضة
🔸 اشرب لبن قبل ماتنام🐣

أحلام سعيدة🥱

18/11/2022

مش ناسيين إن هدف وجودنا هنا هو إننا نبنى سوا عادات صحية🎯
من العادات المهم وجودها فى يومنا هو شرب ماية بكمية كافية لجسمنا ✅
منستناش نحس بالعطش عشان نشرب
خلى جنبك إزازة ماية دايماً هتفكرك😉
الماية هتعملك إيه غير إنها تروى عطشك؟
🔸هتزود تركيزك
🔸هتحسن مزاجك وتقلل التوتر
🔸بتساعد على صحة الجلد وتحفز إنتاج الكولاجين
🔸بتساعد على عملية الهضم (وبالتالى الشرب وسط الأكل مبيعمل كرش🙊)
🔸 هتساعد فى حرق الدهون
🔸تليين المفاصل
🔸تقلل من تكوين حصوات الكلى.

دى نبذة بسيطة جداً عن فوائد الماية
متنساش تقوم تشرب بقا😉

18/11/2022

صديقنا الروحى اللى عند أغلبنا ومش بيفارقنا🙂
•••••••الأنيميا Anemia•••••••
أو فقر الدم✔️
📌يعنى ايه فقر الدم؟
= يعنى عدد كرات الدم الحمراء فى الدم أقل من الطبيعي.

كرات الدم الحمراء من المكونات الأساسية للدم المسئولة عن حمل الأكسجين الكافي لأنشطة الجسم، فبالتالى لما كرات الدم الحمراء تقل = الجسم مش هياخد الأكسجين اللى محتاجه فبالتالى يحصل خلل وتحسي بكل أعراض الأنيميا ⭕

📌اللى هى إيه الأعراض دى؟
🔸إرهاق وضعف عام للجسم
🔸الدوخة
🔸شحوب البشرة وهالات تحت العين.
🔸عدم انتظام ضربات القلب وضيق التنفس
🔸ضعف الشهية خصوصاً فى الأطفال
🔸الصداع
🔸برودة فى اليدين والقدمين
🔸 تساقط الشعر.

📌 طب إيه أسباب فقر الدم؟
أشهر سبب لفقر الدم أوالأنيميا وأكثرهم شيوعاً هو
= نقص الحديد🎯

إيه علاقة نقص الحديد بكرات الدم الحمراء؟🫡
هقولك، خلايا الدم الحمراء تحمل الهيموجلوبين وهو بروتين غنى بالحديد وهو بالمناسبة المسئول عن اللون الأحمر، فبالتالى الجسم محتاج لعنصر الحديد عشان ينتج كرات دم حمراء جديدة وهيموجلوبين أكتر، فلما يقل فى الجسم= كرات الدم الحمراء هتقل= فقر دم/ أنيميا.

أو جسمك بياخد كمية الحديد اللى محتاجها ولكن فيه ضعف امتصاص الجسم للحديد ده.. طب إيه بيزود امتصاص الجسم للحديد ؟
= ڤيتامين C

كفاية كده النهاردة، نكمل فى بوست تانى مصادر الحديد وڤيتامين سي وإزاى نقدر نعالج الأنيميا بدون أدوية😉🎯

15/11/2022

زود سيروتونين= زود مزاج ريق🧘

15/11/2022

اتكلمنا قبل كده عن الصحة النفسية وعلاقتها بالتغذية✔️
وإن فيه هرمونات ليها دور فى تنظيم الصحة النفسية بيحفز إنتاجها فى الجسم نوعية تغذية معينة..

منهم هرمون السيروتونين✨
اتفقنا إنه ناقل عصبي ليه دور كبير فى تنظيم الحالة المزاجية وكمان العمليات الفسيولوجية زى النوم وتنظيم الشهية.
وإن إنتاجه من التغذية يعتمد على بروتين التريبتوفان..جميل؟

يعنى لو مستوى السيروتونين عندك تمام كل ده هيبقي تمام✅

📌إيه الأعراض اللى تشير لوجود نقص سيروتونين؟
🔸 قلق وتوتر مستمر
🔸 صعوبة الانتباه
🔸اضطرابات الأكل سواء فقدان شهية أو شراهة للأكل.
🔸 إضطرابات عاطفية موسمية
زى ما يسمى ب " اكتئاب الشتاء"
دى دراسة عن اكتئاب الشتاء تحديدا للى حابب يتعمق https://www.scientificamerican.com/arabic/articles/news/daylight-resists-winter-depression/

📌طب ايه أسباب انخفاضه اللى تخلينى فى حالة مزاجية سيئة كده؟
ليه أسباب كتير، ولكن فى الغالب بيكون السبب إن جسمم مش بيحصل على القدر الكافي من التريبتوفان المسئول عن إنتاج الهرمون ده.

أغلب اللى بيلزموا نفسهم بنظام غذائي معين لإنقاص الوزن مثلا هيكونوا بيعانوا من حالة نفسية سيئة لإن نظامهم الغذائي لا يحتوى على التريبتوفان بكمية كافية
فى حين إنهم لو اتبعوا نظام غذائي غنى بالحمض الأمينى ده هيوصلوا لهدفهم بردو ولكن بصحة نفسية أفضل✨
العلم سمّى الطريقة دى "حمية السيروتونين" يعنى أكلك يكون غنى بالحمض الامينى المنتج للسيروتونين✅

📌زى ايه؟
🔸البيض
🔸الجبن
🔸المكسرات
🔸الاناناس
🔸السلمون

📌عوامل جانبية هتساعدك
🔸ممارسة الرياضة بانتظام
🔸التعرض للضوء
فيه دراسة أجراها باحثون فى جامعة كوبنجهاجن الدنماركية أشارت لإن فيه علاقة مباشرة بين الاصابة باضطرابات عاطفية موسمية وبين عدم التعرض للضوء فى النهار.

📌 لينك البوست الأول لو عايز تفهم أكتر إحنا بنتكلم عن إيه : https://m.facebook.com/story.php?story_fbid=106189515639861&id=100087464375907

نكتفي بهذا القدر🐣💙

12/11/2022

يا ترى للأكل بالليل أضرار؟🤔
هو عادى آكل بالليل لو انا عايز أخس أو لو بحافظ على صحتى وشكل جسمى عموما؟🤔

موضوع جديد نتكلم فيه بكره 😌💙
Iyı geceler💙

10/11/2022

ڤيتامين د -ڤيتامين الشمس- ☀️

ڤيتامين د من أهم العناصر الغذائية اللى محتاجها جسمك عشان يعرف يبني عظام صحية ويحافظ عليها.
إيه ده هو مش الكالسيوم هو اللى بيبنى العظام؟🤔
خد الكبيرة.. الجسم مش بيعرف يمتص الكالسيوم من غذائك إلا فى وجود فيتامين د 🎯
📌 طب ڤيتامين د بيعمل ايه تانى؟
-بيحمى من الأصابة بمرض السكر✔️
- يقوى المناعة✔️
- يقوى بصيلات الشعر ويحفز نموه✔️
-يحافظ على وظائف العضلات ونشاط خلايا الدماغ✔️
- يحمى العظام والأعصاب✔️

📌 يا ترى إيه الأعراض اللى تخلينى أشك إن عندى نقص ڤيتامين د ؟
-إرهاق مزمن
-آلام فى العظام وأسفل الظهر
-التهاب المفاصل
-تساقط الشعر
-ألم مزمن ومتواصل فى أعضاء مختلفة من الجسم.

📌 طب تمام انا عندى نقص ڤيتامين د ، إيه مصادره بقا عشان يزيد عندى؟
ليه 3 مصادر
🔸الأول والأهم هو الشمس✔️
لما بتتعرض لأشعة الشمس جلدك بيبدأ يكون ڤيتامين د.

🔸 الثانى هو المأكولات اللى بتحتوى على ڤيتامين د زى:
-الأسماك الدهنية: السلمون، التونة، الماكريل.
-الحليب المدعم بڤيتامين د
- صفار البيض
- كبد البقر

🔸الثالت هو المكملات الغذائية🎯
🚫ودى متاخدهاش غير لما تعمل تحليل ڤيتامين د وتلاقي ان نسبته قليلة تستاهل مكمل غذائي🚫

وبكده يكون خلص كلامنا عن ڤيتامين د، استنونا فى كبسولات عن ڤيتامينات تانية💙🎯

06/11/2022

هو فيه علاقة بين الحالة النفسية والتغذية؟🫣
اه فيه✅
يعنى ممكن الغذاء اللى بدخله لجسمى يكون هو السبب فى تدهور الحالة النفسية؟!!
= خلينا متفقين انه مش هيكون السبب الرئيسي لكده، ولكن ليه دور فى تطور الحالة النفسية وزيادة الأعراض.

ناخد لمحة علمية بسيطة🤏

الدراسات والأبحاث أثبتت إن ما تتناوله بيأثر بشكل مباشر على بنية الدماغ وبالتالى على المزاج والصحة النفسية، فالجهاز الهضمى مش بس بيهضم الطعام لأ كمان بيُنتج فيه الهرمونات والنواقل العصبية المسئولة عن تنظيم الحالة النفسية زى السيروتونين والدوبامين واللى بتتنقل للدماغ عن طريق إشارات حيوية.
طب ازاى؟

هرمونات السعادة لجسم الانسان واللى مسئولة عن تنظيم الحالة المزاجية ليه هى السيروتونين والدوبامين..
الدوبامين ده هرمون المكافأة والسعادة لما بتنجز شيء ما أو تحقق هدف يفرحك أوى بيتفرز الهرمون ده✅
بس مين بيكون الهرمون ده؟
أحماض أمينية اسمها التيروزين🫣

طب و هرمون السيروتونين ده إيه؟
الهرمون ده هو المسئول عن تنظيم الحالة المزاجية ليك✅
وبيكونه حمض أمينى اسمه التريبتوفان 🫣

فيه مفاجأة🤏
الاحماض دى مش بتتكون فى الجسم لازم نحصل عليها من الغذاء!
يبقي كده الفكرة وصلت؟
لما يبقي فى نظامنا الغذائي أطعمة تحتوى على التريبتوفان اللى هيكون السيروتونين وأطعمة تحتوى على التيروزين اللى هتكون الدوبامين فبالتالى الحالة المزاجية والنفسية للانسان تتظبط🎯

📌عشان ميبقاش المحتوى دسم بزيادة هنكمل فى الأيام الجاية إيه المصادر الغذائية اللى بتحتوى على الاحماض الامينية دى وإيه العادات الغذائية اللى نتبعها عشان نحسن من حالتنا النفسية💪💙