11/06/2025
انا حابة اقول تجربتين حصلوا مع عيلتي بقالي فترة حاسة اني لازم اكتبهم لعل حد ربنا ينجده بسببهم والــ خلاني انزل الكلام دا اني اكتشفت ان معظمنا عايش ع كده.
ماما الله يرحمها كانت بتستخدم الأوتروڤين 14 سنة بدون علاج لحساسية الجيوب الأنفية، في السنة ال 14 لها سقف البؤ اتفتح ع الأنف فبقت تاكل المكرونة مثلا تطلع من انفها وتحط الأوتروڤين ينزل ع لسانها، بعدها اكتشفنا ان عندها كـا نسر فالمكان دا وكان طالع ع المُخ و7 شهور بعد الكيماوي وقدر ربنا واتوفت.
اخويا الكبير مع الأسف كرر الخطأ و فضل يستخدم الأوتروڤين 12 سنة لحد ما مجرىٰ التنفس اتقفل تمامًا وعمل عملية والدكتور قال ازاي هو فضل عايش لحد دلوقتي؟
الأوتروڤين كوّن لحم فوق لحم لحد ما قفل مجرىٰ التنفس فخُرم الإبرة الــ كان بيتنفس منه كمان اتسد وربنا نجده بأعجوبة، كان ع وَشَك يمُر بنفس تجربة أمي ولكن ربنا نجده وعمل العمليه مع تعديل لغضاريف الأنف وتركيب فتيل موصول لحد الحاجب ودعامات لفترة وشالهم ودلوقتي بيتنفس طبيعي.
اتمنىٰ الناس الــ بتستسهل الأوتروڤين عن العلاج لحساسية الجيوب الأنفية سنين تنتبه عشان كده دايماً يقولولك الدكاتره آخرك في الأوتروڤين 3 أيام للبرد وبس، وربنا يشفي الجميع.
- ندىٰ خآلد آلعطآر
