29/01/2026
معضلة القنفذ: ليه القرب بيوجع؟ 🦔💔
مقال بسيكولوجي توداي اتكلم عن معضلة إنسانية شهيرة جداً اسمها "معضلة القنفذ"، وهي استعارة للفيلسوف "شوبنهاور" استخدمها بعده "سيجموند فرويد" عشان يشرحوا تعقيدات العلاقات البشرية
تخيل مجموعة من القنافذ في ليلة شتا قاسية البرودة.. عشان يتدفوا، كان لازم يقربوا من بعض جداً، بس أول ما قربوا، أشواكهم بدأت تشكشكهم وتوجعهم، فبعدوا عن بعض تاني. البرد قسا عليهم فرجعوا يقربوا، فاتوجعوا فبعدوا.. وفضلوا في الدوامة دي لحد ما وصلوا لـ "المسافة المثالية"؛ المسافة اللي تديهم "شوية" دفا، بس من غير ما يوجعوا بعض.
إيه علاقة ده بينا كبشر؟
شوبنهاور بيقول إننا زي القنافذ دي بالظبط:
• الاحتياج للدفا: إحنا كبشر عندنا جوع عاطفي واحتياج رهيب للونس، والقرب، والحب.
• وجع الأشواك: أول ما بنقرب من حد وبنفتح له قلبنا، بنبدأ نتخبط في طباعه الصعبة، عيوبه، أو جروحه القديمة، فبنتوجع ونبدأ ننسحب ونبني حواجز.
• قواعد المسافة: شوبنهاور بيشوف إن "قواعد الذوق والأدب" هي المسافة اللي البشر اخترعوها عشان يقدروا يتعاملوا مع بعض من غير ما يلمسوا جروح بعض المباشرة.. مسافة بتدينا "دفا قليل" بس "أمان كتير".
رؤية فرويد والجانب النفسي:
فرويد كان مهتم جداً بالسؤال ده: ليه بنخاف من القرب؟ وليه الناس اللي بتعاني من قلق أو اكتئاب بيبقى صعب عليهم يطلبوا مساعدة؟
الإجابة في "الخوف من الألم". إحنا بنبني جدران حوالين نفسنا مش لأننا مش محتاجين للناس، لكن لأننا بنخاف إن "كل ما زاد القرب.. زاد عمق الجرح".
طيب إيه الحل؟
المقال بيقول إننا النهاردة بنعيش في زمن العلاقات فيه بقت هشة وضعيفة، والقلق زاد جداً. شوبنهاور كان متشائم وشايف إننا لازم نرضى بالمسافة الباردة عشان نحمي نفسنا.
بس فيه وجهة نظر تانية أجمل:
الوعي بالمعضلة دي هو أول طريق الحل. إننا نفهم إن "الأشواك" جزء من الطبيعة البشرية، وإن القرب الحقيقي محتاج "شجاعة" لمواجهة الوجع المحتمل، ومحتاج برضه "ذكاء" في اختيار المسافة اللي تخلينا دفيانين من غير ما نأذي بعض.
نقدر تقول ان العلاقات الناجحة مش هي اللي مفيهاش أشواك، هي اللي بنتعلم فيها إزاي نقرب "بهدوء" وبحذر، ونحترم مساحة بعض، لحد ما نلاقي الدفا اللي يخلينا نتحمل وخزة الشوك البسيطة مقابل إننا ميفضلش البرد بيجمد قلوبنا.
By:R🕊
