13/05/2024
أنا عايزة ولادي يسيبوني في حالي
عايزة أعمل حاجة لنفسي
زي ماهم بيخرجوا ويروحوا في كل حتة
أنا كمان عايزة يبقى لي حياتي وميقعدوش يكلموني كتير
ولا يقعد جوزي يقولي دي حاجة ملهاش لازمة
طيب ماهم بيعملوا اللي هم عايزينه!!
ده اللي عميلتي قالتهولي لما سألتها هي عايزة ايه بالظبط؟
اتفقت معاها هنشتغل على مشاعر الغضب اللي جواها عشان تعرف تتكلم معاهم من غير عصبية وتفهمهم ان هي برضه فيه حاجات بتحب تعملها وان ده حقها
واتفقنا كمان اننا في فترة التفريغ هنكون منتبهين لنفسنا أوي
يعني أي تعامل مع اي حد منهم
هنحاول نفهم حسينا بايه وايه الفكرة اللي كانت جوانا ساعة الموقف
ساعتها قالت لي مش فاهمة
قلتلها يعني لو جالك مشوار وقررتي تنزلي وهم قعدوا يقولولك انه مشوار ملوش لازمة
هتحسي بايه ساعتها من كلامهم؟
قالت لي هتنرفز جدااا
سألتها وايه الفكرة اللي جاتلك؟
كل واحد فيهم بيعمل اللي هو عايزة…أنا كمان هعمل!
ومشينا في رحلتنا واحدة واحدة مرة كل أسبوع
بعد المرة الرابعة لقيتها بتقولي :حصل حاجة مختلفة جدا الأسبوع اللي فات
خير؟ هاتي ما عندك
قالت لي : نمت بعد العصر شوية ولما صحيت وطلعت برة في الصالة لقيت ولادي فيه اللي جي وقعد جمبي وفيه اللي كان بياكل وقال لي ان الأكل حلو أوي ولقيت جوزي بيقولي تشربي شاي معايا؟
طيب ايه الغريب؟
قالت لي: انتي متعرفيش انا كنت كل ما بنام محدش بيسيبني انام من كتر الطلبات والزن ولما اصحى جوزي يقعد يقولي ايه كل النوم ده؟؟مش تقومي تشوفي اللي وراكي؟
قالت لي :تعرفي ساعتها انا حاسة اني من كتر ما كنت بلوم نفسي على اي راحة برتاحها كانوا بيقوموا بالواجب ويكملوا لوم علي ولما أصحى ساعتها مبحسش بأي تقدير منهم لي
اده؟ هو انا اللي كنت مستخسرة الراحة في نفسي؟!!
طيب والخروج؟
لما بتيحي تخرجي بيعملوا إيه؟
قالت لي:بس انا اكتشفت اني مش عايزة أخرج عشان اخرج
انا كنت عايزاهم يشوفوني
عايزاهم يقدروني ويقدروا تعبي ومجهودي
عايزة أثبت لنفسي وليهم ان من حقي أتحب وأتقدر!
وفي الفترة الأخيرة بقيت مستشعرة قيمتي دي واني مش هطفش من البيت زي ما كنت بقولهم☺️
انا عايزة أحس بحبهم وقربهم وتقديرهم لي
انا فعلا فهمت انا كنت محتاجة ايه
مشاعرنا المتخزنة اللي مش بنعرف نتعامل معاها بتكون حاجز بينا وبين احتياجاتنا اللي من حقنا اننا نعرفها ونعرف نلبيها بشكل سليم
احجز معايا 'برنامج العلاج بالفن' اللي من خلاله هيحصلك استبصار بحالك أكتر وتكون فاهم انت محتاج إيه وازاي تقدر تلبيه.
#الصحةالنفسية
#احتياجات
