17/04/2026
فاكرين زمان
الجيل اللي كان يشوف عيل متشعبط ورا عربية الحنطور كان يزعق:
"كرباج ورا يا اسطى!"
وكان يقصد:
خلي بالك… في حد متشعبط وراك ومستخبي عن عينك.
وفي الطب…
دي واحدة من أهم الرسائل اللي لازم الناس تفهمها:
مش كل اللي ظاهر قدامك هو المشكلة الحقيقية.
أحيانًا العرض اللي قدامك مجرد الواجهة…
والمشكلة الحقيقية متشعبطة ورا.
دخل عليّ مريض مسن، ملامحه هادئة لكن عينه فيها قلق السنين، عمره فوق السبعين.
بدأ كلامه بشكوى تبدو بسيطة لأي حد:
"يا دكتور ياسر، بقالي 7 أيام ما عملتش حمّام."
المريض ده لفّ كتير، وأخذ أنواع ملينات لا حصر لها، وكان جاي يطلب أقوى دواء ملين للقولون.
ولقيت المريض معاه أشعة رنين على البطن وكانت سليمة،
وواحد تاني طلب له أشعة تليفزيونية على البطن وكانت سليمة.
وللوهلة الأولى، أي حد ممكن يفكر في:
انسداد… ورم… أو مشكلة في الأمعاء…
لكن الطب أمانة، مش مجرد وصفة دواء.
عشان كده سألته:
طيب فيه حاجة تانية تعباك؟
هنا بدأت نقطة التحول الحقيقية في القصة.
فرد وقال:
"رجليا ورمت يا دكتور، والورم بدأ من شهر وبيزيد يوم عن يوم، وأول ما آكل ببدأ أنهج، ونفسي بيضيق لو بذلت أقل مجهود، حتى لو هتحرك من الصالة للحمام… أنهج ونفسي يضيق."
فسألته:
"طيب بتاكل؟"
قال:
"أنا بقالي 20 يوم ما أكلتش حتى رغيف عيش واحد… إلا قليل من العصير أو بعض من الزبادي، لأني خايف من الأكل."
هنا بدأت الصورة تتغير تمامًا…
وهنا كانت نقطة التحول في القصة.
الحاج ما كانش مريض قولون…
الحاج كان في الحقيقة مريض هبوط في عضلة القلب.
وبالفحص، ظهرت الصورة أوضح:
تورم في الساقين من الناحيتين
تورم بكيس الصفن
علامات وجود ارتشاح على الغشاء البلوري بالجهة اليمنى
لغط بالقلب
اضطراب في النبض يوحي بوجود رجفان أذيني
وجود عجز في النبض
وصورة إكلينيكية عامة ترجّح وجود فشل في عضلة القلب، على الأرجح في سياق اعتلال بعضلة القلب، وربما اعتلال بعضلة القلب بسبب نقص التروية
والمريض في الأساس عنده سكر وضغط،
لكنه لم يكن يربط بين هذه الأمراض وبين شكواه الحالية.
وهنا ييجي السؤال المهم:
طب والنهجان بعد الأكل؟
دي علامة ذكية جدًا…
لأن المعدة لما تتملي، بتضغط على الحجاب الحاجز،
والقلب الضعيف ما بيكونش قادر يواكب مجهود الهضم،
فيبدأ المريض ينهج ويحس إنه مخنوق.
ومن هنا نفهم النقطة الأهم:
المريض اللي ما يقدرش ياكل بسبب النهجان،
من الطبيعي جدًا إن أكله يقل…
وبالتالي الفضلات تقل…
فيظهر قدامك في صورة إمساك،
بينما الحقيقة أن الإمساك هنا مش هو المرض الأساسي،
لكنه عرض تابع لمشكلة أكبر.
6 أنواع ملينات…
وكل واحد كشف عليه كان شايف المشكلة اللي قدامه:
إمساك.
لكن السؤال الحقيقي كان:
مين المتشعبط ورا الإمساك ده؟
وهنا تبدأ الحكاية.
الطب هو رؤية شاملة للإنسان.
مريض القلب ممكن ييجي لك في صورة مريض قولون،
ومريض الكبد ممكن ييجي لك في صورة مريض عظام.
وعشان كده، إحنا لازم نبني وعي صحي حقيقي يحمي المجتمع،
لأن الهدف الحقيقي هو خدمة الناس بالعلم والمنطق قبل أي شيء.
تابعوني علشان تعرفوا أسرار جسمكم،
وتبنوا صحة سليمة بوعي حقيقي.
واعمل تعليق وقلنا:
هل كنت تعرف إن النهجان بعد الأكل ممكن يكون إشارة من القلب، مش مجرد "تُخمة"؟
(أيوه / لأ)
ولو عندك حد في البيت كبير في السن وبيشتكي من إمساك مع نهجان أو تورم في الرجل،
ابعت له البوست ده فورًا… لعلها تكون سبب في إنقاذ حياته.
حفظ الله مصر وأهلها والأمة العربية.
د. ياسر عبد الغني
استشاري وأستاذ الكبد والجهاز الهضمي – دكتوراه جامعة أوساكا، اليابان
