04/09/2018
تقريبا معظم الشعب عنده جرثومة المعدة وميعرفش
جرثومة المعدة وكيفية علاجها والوقاية منها 👇
معلومة في سؤال وجواب👌
س - إيه هي جرثومة المعدة ؟
ج - دي عبارة عن بكتريا تدخل الجسم عن طريق الأكل والشرب وتفضل عايشة جوة القناة الهضمية بتاعتك .
بيسموها الميكروب الحلزوني أو جرثومة المعدة
...... (H.Pylori)......
س - هل منتشرة بين الناس ولا محدودة في ناس معينة ؟
ج - منتشرة جدا بينا ..تخيل مثلا لو عددنا ٩٠مليون يوجد ٦٠ مليون معرضين للاصابه بها يعني (حوالي تلتين السكان ).
س - طيب هل تعمل قرحة مع كل الناس ؟
ج - لا غالبا مش بتعمل مشاكل مع كل الناس لكن الناس اللي عندهم مشكلة فالمعدة زي التهاب هتعملهم قرحة....
س - طيب بتدخل الجسم ازاي ؟
ج - بتدخل مع الأكل والشرب
-الأكل اللي مش نضيف أو اللي مش مطبوخ كويس يعني ني شوية لذلك بتيجي لمعظم الناس اللي بياكلو من المطاعم خصوصا لو مطعم مش نضيف أو أكل مش مطبوخ كويس
-الشرب طبعا اللي مش نضيف وطبعا مصر الميه بتاعتها مليانه بكتريا علشان نظام الصرف عندنا داخل مع الري ومع الشرب .....
س - طيب دخلت خلاص ها وبعدين بتعمل ايه في المعدة ؟
ج - ممكن تفضل سنين في جسمك بدون مشاكل وطول الفترة دي واحدة واحدة تبدأ تهاجم بطانة المعدة والأمعاء وتعمل تآكل فيها زي جرح كدا فلما المعدة بتاعتك تفرز حمض الHCL اللي بيهضم الأكل يقوم يروح علي المناطق المجروحة دي ويعمل قرحة المعدة ...
س - طب لو أناعندي قرحة نتيجةجرثومةالمعدةهحس بأيه؟ ج - هتلاقي عندك ألم في بطنك ومعدتك فاضية وانت جعان ولما تاكل الألم يخف شوية ويرجع يجي تاني بين الوجبات .
- دايما عندك انتفاخات وغازات ..
- دايما عندك تكريع ....
- هتحس بغثيان وممكن ارتجاع...
- وزنك هيقل فجأة بدون سبب...
س - ايه العلامات اللي اخاف منها الخطيرة ؟
ج - لو فيه دم فالموضوع ..
- سواء دم في البراز أحمر أو البراز لونه أسود .
- أو لو رجعت دم...
- أو الألم علطول مش بيروح أو حاسس بتعب شديدوتوهان.
س - طب ازاي أتأكد إني عندي جرثومة المعدة ؟
ج - بالتحاليل اعمل تحليل H.pylori سواء في الدم أو البراز.أو الطريقة التانية بالمنظار....
س - طلعت موجودة عندي ايه العلاج ؟
ج - غالبا العلاج بيكون ١٤ يوم ..بتبدأ...بالعلاج الثلاثي ....
أوميبرازول ٤٠ مجم حبة قبل الفطار وقبل العشاء
مترونيدازول ٥٠٠ مجم صباحا و مساءا بعد الأكل
كلارثرومايسين ٥٠٠ مجم صباحا ومساءا بعد الأكل
كمل ١٤ يوم بنفس الجرعات
بعد ١٤ يوم كمل علي الأوميبرازول بس....
وفيه حبوب هيليكيور بردو لعلاج الجرثومة وممتازة .
س - أمته اعمل تحليل أتأكد انها راحت ولا لأ ؟
ج - بعد شهر من العلاج ...
س - طيب هل في أدوية بتأثر علي نتيجة التحليل ؟
ج - ايوه المضاد الحيوي لو بتاخده وروحت عملت تحليل هيطلع سالب علشان كدا قبل ما تروح لازم توقف المضاد الحيوي اسبوعين ع الأقل قبل ما روح ....
س - ازاي أحمي نفسي و أولادي من جرثومة المعدة ؟
ج - النظافة ثم النظافة ثم النظافة ................
- لما تدخل الحمام اغسل ايدك كويس وانت خارج.
- قبل ما تاكل اغسل ايدك كويس.
- الأكل يستوي كويس بلاش أكل ني وبلاش أكل مطاعم.
- بلاش تشربو من ميه الحنفية أو اشتري فلتر في بيتك ينقي الميه..
- بلاش عصبية أو ضغط عصبي أو تدخين أو خمرة .
س - طب أيه الأكل اللي ياكله مريض جرثومة المعدة ؟
ج - الصبح حليب بالعسل او ميه بالعسل ع الريق ..
- وجبتك يكون فيها خضروات وفواكه وحبوب كاملة ...
- بالليل عشا خفيف فيه علبة زبادي ....
- بلاش تاكل كتير مرة واحدة وكل وجبات صغيرةاكتر من مرة ...
- بلاش فواكه حمضية ذي الليمون واليوسفي والبرتقال.
- بلاش مقليات بزيادة او أكل مسبق بزيادة مليان دهون .
- بلاش بهارات أو حراق بزيادة ...
- بلاش شاي أو قهوة خصوصا علي معدة فاضية ...
اعمل مشاركة للمنشور وخلي غيرك يستفيد👌
#أتمني اكون جاوبت علي كل التساؤلات اللي بتدور في ذهنكم
متنسوش الرجوع لمختص قبل البدء بالعلاج
دمتم بصحة وعافية 🌹
معمل التوحيد للتحاليل الطبية الكيميائية
د. مصطفى يوسف محمد
أخصائي التحاليل الطبية الكيميائيه
