Psy/ Esraa Eldeeb

10/03/2022

10/03/2022

(٨)🥰🍬

"أنا من كتر ما باخد الأمور فى حياتى بمرح وفرفشة بقى يترزع الكلام قدامى من غير ما أحسه، لدرجة ان جوزى طلقنى وكملت فرجة على التليفزيون ولا فيه حاجة حصلت، وخدت كتير على ما خدت بالى وبدأت أتوجع، الغريبة ان لو احساسى لقط ان الكلام اللي بيتقال دلوقتي بيجرح فى نفس اللحظة بلاقى الطرف التانى زعلان منى انى زعلت من كلامه اللى لسه جارحنى بيه، أنا من كتر ما أنا بضحك وأنا حزينة من جوه بتريق على نفسى وأكمل وأضحك عليها"
🙃

🤓

24/02/2022

(٨)😎♥️

" انا عايش فى خناقة جوايا بتاكل فيا…الماضى سيئ والمستقبل مرعب"😟

-أيوة وبعدين؟!🤔
=مش قادر أعيش كده ، كل حاجة زمان مش عارف أرجع بالزمن عشان أصلحها، يارتنى أرجع وأصلحها، لانى مش عارف أعيش اللى جاى بسببها، علطول شايف اللى جاى هيكون كارثة زى اللى فات، مش قادر أطمن، مش عارف أتوقع ان اللى جاى حلو مش زى اللى فات…😣

-أيوة يعنى انت عايز تقول لى إن بما إن الماضى سئ إذن المستقبل أسوأ والعكس صحيح وعشان كده عايز ترجع للماضى عشان يكون أفضل وبالتالى المستقبل هيكون شبهه🤔
=ده صحيح، أنا فعلا محتاج ده ومش هكون كويس غير كده🥺

-طب ما انت كده حكايتك سهلة أهى 🙂
=إزاى وأنا مش عارف أرجع للماضى فعلًا ، محدش بيرجع للماضى😢

-بالعكس، المشكلة مش ان محدش بيعرف يرجع للماضى المشكلة هى هل فعلا هيصلح الماضى لما يرجع؟!🙄
=ها🙄! لو رجع وهو مش واخد باله قبلها انه هيرجع أكيد مش هيصلح حاجة إنما أنا واخد بالى ف أكيد هصلح 😔

-طب ازاى مخدتش بالك إن الدقيقتين اللى فاتوا وانت بتتكلم عن معاناتك من الماضى هما كمان بقوا فى الماضى زى الماضى اللى قبله اللى انت بتشتكى منه مع إنك لو كنت بتقول حاجة تانية فى الدقيقتين اللى فاتوا دول غير اللى قلتهم بصيغة المعاناة اللى بتوصفها واستبدلت المعاناة بإنك فى الدقيقتين دول كنت بتعمل حاجة تانية ترضيك كان زمان الدقيقتين بعد ما خلصوا عملوا ذكرى سعيدة جواك أفضل من الذكرى اللى فى ايدك دلوقتي عنهم لما أجى أفكرك بيهم وتفتكر انك كنت بتوصف فيهم معاناة بدل ما تكون بتعمل فيهم شيئ مرضى ليك، مكنتش واخد بالك بقى ليه من الدقيقتين اللى كانوا فى ايدك دول قبل ما يبقوا مع الماضى اللى كنت بتقول هرجع له وأنا واخد بالى انى برجع عشان أصلحه؟!🤔😅
=😳😳😳

-لخبطتك منى صح؟!، طب متقلقش هنرجع نرتبها تانى…😊

-الأول انت كنت ناقم ومعترض على لحظة الحاضر اللى انت عايشها دلوقتي قبل ما تتحول للحظة ماضى لإنها كانت مانعتك عن الرجوع للماضى اللى محتاج ترجع له وانت واخد بالك عشان تعرف تظبطه زى ما انت عايز…
= صحيح🧐

-وبعدين رجعت لاقيت ان لحظة الحاضر اللى كانت فى إيدك اتحولت وبقت ماضى زيها زى الماضى اللى قبله وفيها نفس الاستياء من جواك تجاها لانها فيها تفاصيل شبه الماضى اللى انت مش مرتاح منه…
=ده حقيقى🧐

-طب ازاى بقى هتعرف تكون واخد بالك من الماضى لما ترجع له عشان تغيره وانت معرفتش تاخد بالك من لحظة الحاضر اللى فى ايدك دلوقتي قبل ما تتحول لماضى وتحافظ عليها؟!🤔
=😳😳

-ماهو معنى كده ان بدل ما تاخد بالك عشان تقدر تحافظ على حاجة واحدة، ف انت ضيعت حاجة تانية مكانها لانك مش واخد بالك منها وبدل ما احافظ عليها خسرتها وكمان معرفتش تاخد فرصة تانية مع الماضى عشان تعرف تحافظ عليه ، ف بدل ما كان عندك خسارة واحدة بس اسمها الماضى ، كده بقى عندك اتنين خسارة (ماضى وحاضر)….
=😳😔

-طب تعالى للمستقبل….، انت الأول كنت خايف تقابله بسبب الماضى لانه هيكون أسوأ زى الماضى، ده وفقا للمبدأ اللى انت اشترطته من شوية وقلت فيه ان بما إن الماضى سيئ إن المستقبل أسوأ….
=فعلا..🧐

-طب مخدتش بالك بقى ليه إن لحظة الحاضر اللى اتحولت وبقت ماضى كانت قبل ما تكون حاضر كانت مستقبل أصلًا المفروض كنت تاخد بالك منه ده لو انت فعلا مش عايزه أسوأ شبه الماضى اللى انت تعبان منه….
=😳😳هو فيه إيه؟! انتى عايزة منى ايه؟

-عايزة أقولك إنك خسرت كده لنالت مرة لما قررت تكون واخد بالك من زمان عشان خاطر اللى جاى..، أول مرة خسرت اللى دلوقتى وكمان مقدرتش تكسب اللى فات ودى تانى خسارة، وتالت خسارة إنك خسرت اللى جاى لما جيت تاخد بالك منه…..
=😔 أنا توهت

-بالظبط هو ده اللى هيحصل فيك كل ما تحاول تاخد بالك من اللى فات أو من اللى جاى..، هتوه 😣

-بمنتهى البساطة كلمة أخد بالى دى ليها كذا معنى …، يعنى ليها معنى انى أكون فايق أو يقظ، ولكن مش بحطها فى أو مكان كده وخلاص أنا محتاج أحطها فى مكان أكسب منه لمًا أحطها فيه…

-دلوقتي احنا لما جربنا نحطها مع الماضى والمستقبل بالمثال البسيط اللى عايشناه مع بعض دلوقتي وصلنا لحاجه؟!….
=لاء ، توهنا 😔

-بالظبط..، توهنا يعنى مش كل اللى بنفكر نعمله بيجيب التوقع اللى نفسنا فيه بس احنا لازم نجرب..، لسه لنا نجرب اليقظة مع ايه بدل الماضى أو المستقبل؟!🤔
=دلوقتى، الحاضر….🙄

-بالظبط ..، ده اللى باقى معانا ، تخيل كده أنا واخد بالى دلوقتي مع الحاضر بتاعى ومحافظ عليه ويقظ معاه …ساعتها ايه اللى هيحصل وأنا واخد بالى من دلوقتي بتاعى بعدين؟!🤔
= ساعتها الحاضر بتاعى دلوقتي هيتحول يكون ماضى بس ماضى انا كنت يقظ معاه قبل ما يتحول لماضى يعنى هيوصل لانه يكون ماضى كويس لانى كنت واخد بالى منه من الأول وده اللى كنت نفسى فيه من البداية….🥸

-طب وبالنسبة لليقظة مع الحاضر بس لصالح المستقبل؟!🤨
= ماهو الحاضر كان مستقبل قبل ما يكون حاضر و وانا أخدت بالى منه قبل ما يجى ف بقى كويس زى ما كنت عايز فى البداية برضه….😅

-تمااااااااام…، أحسنت كده احنا وصلنا😀👏👏

-راح فين بقى القلق اللى كان جواك فى البداية خالص بسبب الماضى والمستقبل؟!🤔

-ده كمان برضه انت كنت محتاج توصل له ، ان اليقظة مع الماضى أو المستقبل بيسبب قلق قوى ومزعج، يفقدك التحكم والسيطرة والتمتع بالحاضر أو اللحظة الحالية ..، وبالتالى بتقع فى دايرة معاناة دايمة مفيش من وراها غير الإستنزاف…👌

🤌😉😉😉

🤓
🤓🌹

08/02/2022

(٧)🥰🍬
"اتعلمت أدخل جوه نفسى وأفتش أشوفها عايزة ايه منى، كنت بخاف منى وأنا لوحدى وأهرب منى بأى حاجة بديلة أروح أعملها المهم انى مركزش معايا، زى ما أكون انا مصدر قلقى وتعبى، وفهمت ان اللى مش موجود دلوقتي ليا مش لازم أجرى عليه دلوقتي واعمله، لان عدم وجوده مش معناه انه مش هيكون موجود، ممكن يكون لانه لسه هيجى، ولسه هيجى أحسن ما أجرى عليه ويخلص ويمشى"



🤓

08/02/2022

(6)🥰🍬

"أنا محتاجة أتحب دايما ، مش عارفة أكون لوحدي ، وكل مرة بحاول أدخل علاقة بلاقى نفسى بقدم ومش ياخد حاجة، بياكلونى من جوه وفى نفس الوقت مش عارفة أشد نفسى
منهم، بقول جايز يحبونى ، جايز ألاقي اللى علطول بدور عليه"



🤓

17/01/2022

(٧)😎♥️

التبلد 😑
"مشاعر وقف المشاعر"✋

التبلد مشاعر زيه زي أي شعور إيجابي أو سلبي بتحس بيه، ومعناه إنك توقف حركة أي مشاعر جواك سواء إيجابية أو سلبية، الملحوظ علي الناس إن أغلبهم بيميلوا لإستخدام التبلد أو توقيف حركة المشاعر جواهم في حالة المشاعر السلبية في الغالب، وده بيحصل بصورة تلقائية داخل الإنسان لما يحركه جزء لاشعوري جواه بالإنهيار أو الأذي اللي ممكن يحصل له من المشاعر السلبية اللي بيحسها جواه👌

المعروف وسط الناس إن التبلد معناه إنك مش بتحس أصلًا 😆، بس في الحقيقة هو جدار بيخبي المشاعر وراه واللي بيظهر للطرف الآخر منك هو الجدار وبيبقي مش شايف أي حاجة من وراه بسبب جدار التبلد بتاعك إلا إنك في الحقيقة بتحمي بيه نفسك من صراعات المشاعر المستخبية وراك🤦‍♀️

المشكلة مش هنا، المشكلة إن التبلد له فاتورة ولازم تدفع منك سواء كنت بتستخدمه مع مشاعرك السلبية زي أغلب البشر أو مع المشاعر الإيجابية وهي فاتورة التراكم👌، بمعني إن التبلد لما بيزيح المشاعر وراه مش بس بيرميها كنوع فقط ده نوع وشدة كمان✌️، يعني لما التبلد يزيح إحساس زي إحساس الضيق مثلًا بيزيحه كنوع وكشدة ودرجة للضيق نفسه🤞 والشدة هنا هتكون المشكلة 😳 لإن تراكم شدة المشاعر فوق بعضها بغض النظر عن نوعها ده بيخليها تنمو وتكبر في الحجم وهتبقي عاملة زي الوحش اللي بتستخبي منه ومش قادر تواجهه😰

ساعتها هتضطر تعيد وتزيد في التبلد وشدة عشان سمك الشدة كل ما يزيد كل ما يحميك من مشاعرك وهجومها عليك أكتر، يعني لا بتقدر تتعامل مع المشاعر اللي بتستقبلها ولا المشاعر اللي بتراكمها وراك🤦‍♀️

وهنا هيكون العجز☹️

بس منقدرش ننكر إن التبلد زي ما له جانب سلبي له أيضًا جانب إيجابي، خصوصًا لما تتحمي من الخسارة أو الأذي بفضل التبلد😎🌹، اللي هو نظرية إني لو مش عارف أفرح علي الأقل متوجعش😔

الفكرة هنا هو إنك بتختار التبلد في أي صورة من الإتنين دول، ولكن في الحقيقة سواء إختارت الطريقة الأولي أو التانية هتلاقي مكاسب وخساير مع كل طريقة فيهم👍👎، وإنا وشطارتك بقي في الخساير اللي هتقدر تقبلها وتتحملها مع كل طريقة فيهم✌️

🤓🌹

09/01/2022

(٦)😎♥️

أنا محدش قابلني….
كلهم بيضطهدوني…. محدش بيحبني…. انا سيئ في عنيهم….. محدش بيفهمني…. دايما مرفوض👌

أهلا وسهلا بيك في دائرة عدم التقبل 👍

-إيه الحدوتة دي بقي؟!🤔
=بص ياسيدي، صلي علي النبي 🙏
أوقات كتيرة بتوصل لنا رسائل سلبية عن نفسنا من الناس، شبه الجمل اللي فوق دي 🙄👆
حاجة كده في منتهي السخافة والانحطاط، الفظيع في الرسايل دي مش إنها موجودة وبس، لاء ده كمان فيه ناس كتير عايشين بيها وساكتين….والأبشع لما تكون منتهك بالجمل دي داخليًا من أقرب الناس ليك خصوصًا لو الأهل👌

-أيوة بس حتي لو ده بيحصل من الأهل مش بنعرف نعيش من غيرهم ولا نستبدلهم ولا كمان بنعرف نعيش معاهم بالجمل اللي بتاكل فينا من جوه دي 🤦‍♀️
=معاك حق بس مش دي بس المشكلة!😟
المشكلة الأكبر لما تكون متعرفش تستمد ثقتك بنفسك غير من الآخرين… يعني انا راضي عني لو اللي حواليا بيحبوني أ، قابلني أ، بيفضلوني…..إلخ

-إيه ده يعني الإنسان ثقته بنفسه مش مصدرها الآخرين أو الحاجات اللي بيحصل عليها في الدنيا زي النجاح أ، الشغل أ، المال أ، الدراسة …وكده ؟!!
= لاء بيستمد بس ده مش ثقة بالنفس ده إسمه تدعيم الثقة بالنفس، إنما الثقة بالنفس دي حدوتة تانية خالص😅

الثقة بالنفس من معناها الحرفي كده، أكون واثق فيا أنا…. يعني أنا مصدر ثقتي ليا…. بالمنطقي كده مين أكتر إنسان موجود معاك دايما؟! 🤔
هندور هتقول بابا، ماما، ابني، أخويا….إلخ، بس في الحقيقة الشخص الوحيد اللي موجود معاك علطول مهما حصل هو إنت…. إنت وبس، فلو هفترض إني أنا المفروض أتقبل من حد ،، إزاي أطلب ده من حد مش معايا أكتر مني أنا معايا… لو أنا مرفوض من المحيطين؟! ، أمال مين المفروض يقبلني وأولي بيا من نفسي؟!!…مش هتلاقي…حقيقي مش هتلاقي…هتفضل تايه من نفسك طول ما بتدور علي القبول من حد تاني غيرك، ومستحيل هتلاقي نفسك طول ما إنت بتدور عليها عند غيرك🤦‍♀️



🤓🌹

12/12/2021

(٥) 😎♥️

"أنا من خلال خبرتي القليلة دي اكتشفت ان كل المشاكل النفسية دي سببها حاجة واحدة بس، عارفين ايه؟!🤔
= قلتوا لي ايه …. الحب ♥️
كل المشاكل اللي قابلتها ليها علاقة بالحب، يا إما مش عارف يحب اللي بيحبه، يا إما مش عارف يخلي اللي بيحبه يحبه، يا إما مش عارف يحب اللي حواليه، يا إما مش عارف يحبب اللي حواليه فيه، يا اما بيحب نفسه بزيادة، يا إما مش عارف يحب نفسه خالص…دايما ليها علاقة بالحب"😔👌

-كااااااات…..هايل يافنان👏👏👏

أنا مش معترضة علي كلامك خاالص… بس فيه حاجة صغنونة كده، انت اتكلمت عن الحب اللي عارفينه كل الناس، اللي هو اللذيذ…الظريف…الممتع،☺️ اللي هو المشاعر الإيجابية يعني….طب تعرف المشاعر السلبية للحب؟!🤔
إوعي تقول الكره … أزعل منك🤫
فيه مشاعر سلبية خبيثة كده للحب إسمها الإمتلاك💔

-أيوه مش ده الحب المرضي🧐

أيوة ماهو حب برضه علي فكره😀، كل الحكاية إنه سلبي بس مش إنه مش مشاعر أصلًا هو بس مضر…مؤذي….مرهق😔
مش بتلاقيه بس في العلاقات العاطفية ده كمان في العلاقات الأسرية ويمكن معدل خطورته في النوع ده من العلاقات أقسي وأخطر من أنواع العلاقات الأخري☹️
هفهمك….حب الأم أو الأب لولادهم أوقات بيكون مش حب😳….ده إمتلاك،💔 حب زائد بيخلي الأب أو الأم يهتموا بزيادة، يحلوا مشاكل ولادهم علطول مهما كبروا، ينفذوا كل طلباتهم، بيخلي الأب والأم دايما في دور المنقذ أو الحامي الأوحد ومش بيقدروا يثقوا في قدرات أي شخص تاني غيرهم حتي لو ولادهم شخصيًا🙄

-طب وفين المشكلة؟!🤔….حد يلاقي الدلع وميتدلعش😉
الصراحة لاء😄….بس هي لو علي قد كده كان عادي، إنما المشكلة في إستمرار ده😒….الإمتلاك ده بيعمل إعتمادية، الشخص اللي قدامك خصوصًا لو ابنك بيتحول تلقائيًا لشخص إعتمادي بسببك وده إضطراب نفسي في حد ذاته😱

-لاء ده حب….وحب فطري كمان إزاي فطرة ربنا شيءٍ مضر، إزاي الحب بزيادة غلط ويعمل مشكلة نفسية😨
هقولك ازاي….إنت مرتاح وإنت بتحب قوي وساعتها مش بتحس إنك غلطان….بس اللي تحت منك والله تعبان وبسببك….بيعاني من تحكمك فيه وفي نفس الوقت مش عارف يتحكم في نفسه ويتعامل معاها لوحده أصلا لانه متعود إنك علطول اللي بتتعامل مكانه وعمرك ماحسسته ان المفروض ان ده يتغير أصلا😶

"أيوة الحب له وشين….الفكرة انت طلعته بأي وش فيهم"

🙂♥️
😎

🤓

08/12/2021

(٤)😎♥️

"يعني إيه إن كلنا مرضي نفسيين؟!🤔 وليه مش بنروح نتعالج وشايفين إننا أسوياء"؟!🤔

هفهمك😎، فيه حته كده صايعة في الأمراض النفسية هي مش مرض بالمعني الحرفي ولكن هي مش سواء🧐
إسمها إضطرابات الشخصية ، وبالمعني الحرفي ليها🧐…. يعني هزة أو خلل كده بيحصل في شخصياتنا كلنا… والطبيعي إن الخلل ده موجود بدرجات لكن مستحيل تكون خالي ١٠٠٪؜ من إضطرابات الشخصية… وبما إننا كلنا عندنا إضطرابات إذن طلعت الجملة الشهيرة اللي يتطهرنا ناس فلسفيين وعميقين 😎😁…(كلنا مرضي نفسيين).
ولكن الحبكة في الشدة نفسها للإضطرابات دي وفي الغالب كلنا بتبدأ معانا في مرحلة المراهقة وده بيكون لأسباب كتيرة وليس لسبب واحد فقط منها: التغيرات البيولوجية ، خلل في هرمونات المخ، التنشئة الإجتماعية، التربية ، عامل جيني أو وراثي ، ولكن أخطر سبب بالنسبة لي هو عدم حصول الفرد علي إشباعاته في المرحلة النمائية السابقة وهي مرحلة الطفولة (هنتكلم عن ده بعدين😉)

-طب وبعدين ، يعني أنا بتيجي لي الإضطرابات دي في المراهقة وأبقي خلاص كده بقي لبست مشكلة في نفسيتي؟!😳
=أيوة…..ولاء😅 ، بص هي اللعبة كلها في الشدة ولكن بشرط واحد وهي إنك متكملش ١٨ أو ١٩ سنة علي حسب الجنس بقي😉 ، يعني من الأخر مع نهاية سن المراهقة وبداية الشباب💪

-إشمعني بقي؟!🙄
= أصلك هتكون كبرت يا لولو 😍 … يعني سيبت المرحلة اللي بتكون فيها رجل طفل ورجل راجل أو ست 😎👏 ، وساعتها هتكون شخصيتك إكتملت والتغيرات كلها خلصت زي تغيرات الجسم والطول ونبرة الصوت والملامح والمناطق الأنثوية أو الذكورية ☺️، وبالتالي كمان شخصيتك بتكون خلصت وطلعت من الفرن علي خير واستوت كمان بس إنت وحظك بقي تكون استوت علي ايه في الآخر😉

-يعني ايه؟!🙄
=يعني لو وصلت للسن وشدة الاضطرابات عالية ومش منخفضة بتكمل عليها بقي كده قدام وبتفضل معاك إلا أن تحتاج تكسرها وده بيحصل بس لو السمة اللي موجودة في الاضطراب ده أذتك منها وعملت إنهيار داخلي😔 ، ساعتها بس هتلجأ لتغيرها أو تعديلها أو تطويرها أو علي الأقل ضبط شدتها👌

😔
#متسبش/يش_ 😢

🤓

06/12/2021

(٥) 🥰🍬

قالت: "أنا بحب ماما وبكرها في نفس الوقت ، ومتضايقة قوي ان فيا جزء بيحبها رغم كل عمايلها دي ، عارفة ؟ مبعرفش اني بحبها غير لما أتضايق وأتعصب عليها لما بتخلي الناس تحرجها من كتر رغيها وزنها وكلامها الكتير وتفاصيل حياتنا اللي علطول بتعرفها للقريب والغريب حتي لو اتأذت من ده برضه بتكمل ، بس لو مش بحبها أكيد مش هحس بغضب من اللي بيجي يحرجها"😔

🤦‍♀️

🤓

05/12/2021

(٤)🥰🍬

"اللي تاعبني إني معملتش حاجة وقت ما كان الطبيعي إني أعمل ، يعني كان من الطبيعي يكون رد فعلي إني أطلقها أو أضربها أو أشتمها أو أطردها أو حتي أسامحها … إنما أنا فضلت ساكت…مطلعتش حاجة بره عني…زي ما تكون رصاصة ودخلت صدري ، لا أنا عارف أطلعها ولا خلتها تعدي وتخرج من الناحية التانية…عاجز من يومها ولو حاولت أعمل أي حاجة من وقتها بلاقي وقت العمايل فات وأحس إني إتغفلت واتاخدت علي خوانة … أيوة فعلًا أنا مراتي خانتني …يعني خدتني علي خوانة".🤦‍♀️

🌷

🤓

05/12/2021

(٣)🥰🍬

"كنت فاكرة اني لما أتعلم في جلساتي النفسية معاكي إن الأفكار المؤذية بحتاج أشتتها عشان تتهز وتضعف جوايا إني هعرف أعمل ده مع كل أفكاري زي فكرة (أنا وحيدة) مبقتش مشكلتي معاها إنها بس فكرة بتأذيني … أنا مشكلتي الأكبر اني فعلًا لوحدي ودي حقيقة ، أضعفها إزاي وهي واقع أنا بعيشه وإحتياج بياكل فيا من جوه لانه جعان ومش لاقي حاجة ياكلها عشان يشبع ، ده مش بس مفيش أكل ده كمان مفيش حد يقدم لي أكل ويخلي وحدتي تتملي وترتاح … يعني حتي مش لاقية ونس يكسر وحدتي 😔 … مفيش حد قدام وحدتي غيري معني كده إن أنا اللي هملاها وهقدم لها احتياجاتها وطلباتها اللي عايزاها حتي لو اضطريت أكون أنا الناس اللي المفروض تكون معايا زي ماما ، بابا ، أخويا ، حبيبي ، جوزي…إلخ ، ممكن أمثل شخصياتهم ليا ، ممكن أسجل صوتي علي إنه كلامهم ليا ، ممكن أكتب لي جواب بالنيابة عنهم أقرأ فيه اللي محتاجة أسمعه منهم…إلخ ".




.
👏👏🤩🥰

🤓

05/12/2021

(٢)🥰🍬

"مش قادرة أجي عليا تاني وأعمل حساب لمشاعر اللي حواليا وأفضل أرضيهم وأنا بفضل تعبانة…مش عايزة أأذيني مني من خلالهم تاني…أنا زهقت إنتقام مني ، هو أنا مش ورايا غيري أحطه في دماغي ولا ايه ؟!!".😢🥺

💪😉

🤓

05/12/2021

(١)🥰🍬

"كنت فاكرة إني بتعاقب لما قعدتيني في البيت وممنوع عليا أقابل حد أو اأخرج… اكتشفت انك قعدتيني عشان أدخل جوايا أكتشفني وأفتش فيها وأعرف عني حاجات مكنتش أعرفيها ولا بحب أخد بالي منها … ولما ده حصل لاقتني برتب الكركبة اللي فوق بعضها عندي … واللي مكنتش بحس بيها وأنا بخرج وبتعامل مع ناس كتير وكل شوية بتنقل من حوار لحوار تاني وتالت ورابع …إلخ".

👏👏😉

🤓

05/12/2021

(٣)♥️😎

"إيه حكاية المرض العضوي والمريض النفسي دي؟!!"🤔
"وبينهم فرق أوعلاقة ببعض؟!!"🤔

تعالي نتكلم بالمنطق 🤓… الإنسان عبارة عن جسم وروح دي حاجة بديهية يعني 🤚 يعني انت مش أكتر من الحاجتين دول ولا حتي حاجة واحدة بس فيهم، ومن البديهي برضه ان كل روح وليها الجسم بتاعها وكل جسم وليه الروح بتاعته✋

يعني إيه؟!!🤔…. يعني مينفعش أجيب روح حد تاني وأحطها في جسمي … ولا ينفع أجيب جسم تاني وأحط فيه روحي 😱

وليه مينفعش ؟!!🤔…. لان ببساطة هما مش بتوع بعض يعني مش هيكونوا طابعين علي بعض…هتلاقي كل واحد فيهم وله القالب بتاعه ولو حاولت تخليهم مع بعض هيفضلوا مش راكبين علي بعض وهيسيبوا مسافة بينهم وهتلاقي كل واحد قرفان من التاني😤

هو ده المرض النفسي والمرض العضوي 👌

- المرض النفسي/ بيحصل لما الروح تسيب الجسم وتنشق عنه والإنشقاقية دي بتعمل فراغ داخلي بياكل جواك وتفضل حاسس بقلق وتوتر بس مش مجرد إحساس عادي ده بيكون إحساس حاد جدا لدرجة غير محتملة بتخليك طول الوقت عمال تدور علي أي حاجة تعملها عشان بس تسد الفراغ الداخلي ده والقلق والتوتر يقل جواك 😔
- المرض العضوي/ بيحصل بقي لما الجسم هو اللي يسيب الروح لإن أول ما جسمك ستصاب بأذي بتلاقي جسمك اتحول وبقي مش شبه روحك فينشق عنه وطول ما جسمك مصاب أو فيه خلل أو حاجة فيه باظت طول ما بتتأكد من ده ان روحك مش معاك وكل ما تحاول تقربها منك وتلمسها لإن برضه المسافة عاملة قلق وتوتر طول ما كل لمسة هتلاقي روحك فيها حاجات مش شبه جسمك😔

أظن كده إنت عرفت إنهم بيتصرفوا زي بعض ومفيش فرق بينهم وعشان كده محدش فيهم أحسن من التاني وإنهم بيكملوا بعض وكل واحد فيهم بينقص لو التاني جري له حاجة😌

والعلاقة بينهم طردية رايحة جاية🚶‍♂️ جاية رايحة🚶‍♂️… لما جسمك ستصاب بالأذي ويتغير بتلاقي روحك بترد عليك وتتألم منها..ولما روحك تتصاب بالأذي وتتغير بتلاقي جسمك بيرد عليك بأي علامة تطلع علي جسمك من بره ولو دورت عن سبب مش هتلاقي😏

😍👌

🤓

05/12/2021

(٢)♥️😎

"المرض = مشنقة العقل"🤯
أه والله زي ما بقولك كده 🙃 … إسمع ياسيدي 😉
كلمة أنا مريض… هي من الكلمات اللي بتهدد العقل بالموت … لإن أول ما عقلي بيسمعها بتوصل لمخي بمعاني تانية خالص زي( أنا ناقص ، أنا مش كامل ، أنا فيا حاجة غلط ، أنا مش طبيعي ، أنا فيا عيب ، أنا كده نهايتي…إلخ) ، ودي من أقسي الجمل اللي العقل بيعرفها عن نفسك ، وعشان العقل يقاوم انهياره منها بيلجأ لدرع الحماية بتاعه ،يعني إنه يستخدم جمل تانية تشتغل زي أجسام مضادة وهي جمل الرفض أو الإنكار أو تزييف الأمور زي (لاء ده مش حقيقي ، أكيد الكلام ده مش ليا أنا ، أنا كويس مفيش فيا حاجة …إلخ).

-طب ده بيحصل في المرض النفسي ولا العضوي ؟! 🤔
= في الاتنين يا فندم 😅✌️

-يعني رفض الناس للمرض النفسي علي نفسهم مش بس عشان المجتمع بيفسره بالجنون وإنه وصمة عار بيفضل عايش بيها وبتمس ولاده وأهل بيته ؟ 😳
= حصل 😅 … أصل بص أنا مدرستش تشخيص مرضي إسمه الجنون أصلا ولما دورت ملقتهوش كمان 🙂 ✋

بس تفتكر الإنسان ممكن يتحمل صراعين داخلي وخارجي في نفس النقطة ازاي؟! 🤔 ، يعني مش بس أحكام ومعتقدات المجتمع بتهاجمه لاء ده كمان بيهاجم نفسه من جوه بجمل بتشنقه من رقبته.

"وعشان كده النفس البشرية وعلاجها هيفضل محكوم عليها بالإعدام مهما تطور الزمن ، الحل الوحيد هو كسر الصراعات دي وإيقافها ، نتعامل مع الموضوع من مبدأ الخوف علي نفسنا ، وإنها متهونش علينا مننا 😔 ، مش حليتنا غيرها والله 😏

😇👌

🤓🌹

05/12/2021

(١)♥️😎

= "خناقات الشوارع والحواري اللي جواك "👇👇

ايه ده ؟!!😱 انت عايز الناس تقول عليك مجنون؟! 🤔 أيوة بس انا مش ماشي أضرب في الناس في الشارع ولا بشد في شعري ولا بضحك بصوت عالي مع نفسي انا بس قلت اني حاسس اني مش كويس … حاسس اني بقع في بير وبختفي جوايا 🥲 … هشششش 🤫 اوعي اسمعك بتقول الكلام ده تاني قوم اتوضي وصلي ركعتين وهتبقي كويس بلاش دلع عايز الناس تضحك عليك وتقول اجننت لاء اجمد كده لازم تكون قوي …. اوعي تكون ضعيف قاااااوم اتحمل عااااافر ممنوع تضعف لحظة …. متركزش للكلام اللي جواك دي وسوسة شيطان ولا تلاقي حد عامل لك عمل 😱
انت عايز تفضحنا والناس تقول فلان ابن فلان جري له حاجة وتجيب لنا العار وتخلي رقبتنا في الأرض 😱 عايز عمتك وعيالها يشمتوا فيك ويبقوا أحسن منك 😱
طب انا صليت وقرأت قرأن وروحت لشيوخ أشوف حد عامل لي عمل والشيخ قالي متخااااافش انا فكيته 💪، وكلت ضاني وفراخ عتقية وبيض ولبن وجبنة وسمنة بلدي 😋 واتفسحت وسافرت وغيرت جو واتعرفت علي ناس جديدة واشتغلت وذاكرت ونجحت …الخ ، ولسه قلبي بيتعصررر جوايا 🥲 حاسس روحي بتتمزق جوه صدري 🥺 كتافي تقيلة زي ما تكون شايلة صخور 😔 دماغي بتلف وتدور بيا في ألف حوار 🤯 حاسس اني لوحدي واللي حواليا مش عايزني وسطهم … منبوذ وبخاف يأذوني أو يطعنوني في ضهري ، بشوفهم بوش شيطان جوايا وأوقات بسمع صوتهم جوايا 😳 طب ليه الأكل ماسخ وطعمه غريب هو انا محطوط لي فيه حاجة 🤔
طب الناس اللي بتقول انها بتحبني او أقرب الناس ليا ليه مش بصدقهم … جاهز علطول بدماغي قدامهم انهم هيضحكوا عليا ويأذوني 🥺 طب ياتري بيقولوا ايه من ورايا 🤔 والبصة اللي فلان بصهالي أكيد يقصد بيها حاجة وحشة فيا 😱 طب شوفت ضحكته اللي اتريق عليا بيها 🤔 شكله بيتكلم عني من ورايا وبيشحن الناس ضدي وهما هيسمعوه ويمشوا وراه 😔
ياتري هعرف أذاكر وأنجح ولا هنسي الإجابة في الإمتحان … أنا كده كده فاشل وحتي لو نجحت فلان هيجيب أكتر مني وأبويا دايما شايفني فاشل ومليش لازمة ..أنا ذاكرت وبرضه مجبتش درجات كويسة نذاكر تاني ليه ، المدرس ده شكله حاطني في دماغه وعلطول بيديني درجات وحشة 😔 ، هو انا حتي لو نجحت هدخل كلية أصلا وحتي لو دخلت بدام مش طب او هندسة يبقي مليش لازمة وأكيد مش هلاقي شغل 😣
طب أنا عايز حد يحبني ويتجوزني زي صاحبتي وميسبنيش أبدا ويعشق كل تفصيلة فيا ويتذل في حبي 🥰 ويحقق لي كل أحلامي ويجيب لي كل اللي نفسي فيه 😍
انا لازم يكون معايا فلوس كتير ومتحرمش حاجة في الدنيا ، ياريت يكون ليا خال في أمريكا أو أشتغل مع المخابرات ويكون معايا فلوس كتير 🙃
انا أحسن حد في الدنيا وأهم شخص في العالم ، انا قوي ومفيش حد أحسن مني ومحدش يستاهل بصة مني حتي … انا أكيد مش إنسان عادي أنا خارق أو نبي 🤫 أنا رئيس الجمهورية أو أنا المهدي المنتظر 😎
ليه يبقي فيه حلال وحرام وصح وغلط ؟! 🤫 هو ايه الدليل علي وجود ربنا أصلا 🙄 مش يمكن بيتعمل علينا حوار عشان نفضل مقيدين ومناخدش حريتنا 🤔 أصل لو ربنا موجود ليه سايب الناس كده اللي بيزني واللي بيسرق واللي بيقتل واللي بيخون …. الخ ، طب هو لو موجود شكله ايه ؟؟!🤔 طب صوته ازاي ؟! 🤔 مش سبب كافي يعني انه عشان يكون ربنا انه يبقي مختفي كده 😏
طب هو فيه إسلام ومسيح بجد ؟! 🤔 طب ليه لازم أكون مسلم ما ممكن أكون مسيحي 😎 وممكن ميكنش فيه ديانات أصلا وانها مجرد قيود تخنقنا وتسلسل رجلينا وتفقدنا حريتنا واستمتاعنا بالحياة 💃💪
انا لازم أصلي كل يوم وأحفظ القرآن ولازم أكون قريب من ربنا واتبرع للفقرا وارضي بابا وماما … أنا إزاي كنت تعبان امبارح ونمت من غير ما أصلي 😱 … ربنا مش راضي عني مهما حصل وأكيد هدخل النار وأتعذب عذاب شديد وهموت كافر 😔
أنا لازم أنجح عن فلان … انا لازم أخد مكان فلان في الشغل … اشمعني هو عنده وانا لاء لازم أكون معايا زيه … أنا حظي وحش أنا نحس … ليه انا مش عندي وعندي زي كل الناس … انا دايما أقل واحد 😔
جوزي مش دي جوز فلانة … مراتي مش زي باقي الستات 😣 إكسر للبنت ضلع يطلع لها ٢٤… الواد لازم يتشد عليه عشان يطلع راجل … البت لازم تتدلع في بيت أبوها … ده الواد الحيلة انتوا عايزين تعقدوه 😳👊
كل حاجة ممتعة ممنوعة ليه ؟! 🙄 … السجاير ، المخدرات ، الكحول ، الجنس ، القمار ، العلاقات العاطفية ، المثلية الجنسية ، السرقة ، التاتو ، الانتحار ، اللبس الجريئ …الخ 😤 انا ليه عايش محروم من المتعة 😡
=" كل دي خناقات شوارع وحواري وصراعات نفسية بتدور جواك وحاجات تانية غيرها ، بتحصل كل فترة او كل يوم ، سواء واحدة أو اتنين أو أكتر انت وحظك خربش واكسب 😉 ، المهم ان كلنا عايشين فاكرين ان ده كله عادي لمجرد ان كلنا بنتعرض ليه وياعم زيك زي الناس انت هتتفلسف 😂، إلا إن الحقيقة هي انك عايش وكل الحاجات دي بتاكل من جوه روحك وسلامك الداخلي ، عايش مش مرتاح ، بتصارع علي البقاء زي ما طبيعتك البشرية بتطلب منك إلا انك ناسي ان من طبيعتك البشرية برضه انك تصارع علي الراحة والأمان والطمأنة"
👌
😔
😉
🥰💪

🤓🌹