05/01/2026
جتلى بنوته صغيره وبعد التشخيص المبدئي البنت سمات توحد تركنا البنت تحت الملاحظه وعملنا مقياس (DSm5) نشوف فى توحد ولا لأ وبعده مقياس (جيليام) نقيس بيه شدة التوحد عند البنت
كده نبقى عملنا كل جوانب التشخيص المقابله والملاحظه والاستبيان واتأكدنا ان البنت اضطراب توحد
طبعا بدأنا فى خطه علاجيه فردية وماشاء الله من فضل ربنا على البنت وعلينا البنت استحابتها كانت كويسه ووصلنا لجمله من ٣ كلمات
وفى المهارات وصلنا لنتيجة لا بأس بها والأمور ماشيه كويس
فجأة بعد سنه البنت انقطعت عن الجلسات فكلمنا الام نطمن عليها قالت إنها بتمر بظروف فى البيت وان شاء الله هتستأنف الجلسات تانى
بعدها بفتره لقينا البنت متصوره فى مركز تانى وصورها نازله
فالام قالت اصل المركز ده جلساته ارخص من جلساتكم
(مع العلم انه بيتم مراعاة الظروف الماديه للحالات اللى ظروفها مش سامحه كلها مش دى فقط) ومع العلم ان ظروف الاهل تسمح الله يزيدهم
فى الاول زعلنا على مجهودنا وأننا اخدنا البنت من نقطة الصفر ووصلت لمرحلة كويسه جدا وبعد كده استودعنا تعبنا عند ربنا وبصينا لنص الكوبايه المليان اننا ربنا قدرنا نكون سبب ان الام تسمع صوت البنت وكمان البنت تطلب من مامتها تاكل وتشرب وتنام
وده مكسبنا الحقيقي
