16/07/2022
كتير أوي من حضراتكم بيسألوا ايه الجبنة الآمنة الي اقدر أجيبها لأولادي ؟؟
وايه هي الانواع الي ممكن اثق فيها ؟؟
في البداية عندنا نوعين من الجبنة
★ نوع محضر من اللبن الطبيعي او مضاف له قشدة او زبدة طبيعية
★ نوع نباتي الدهن بيتم الاستعاضة بزيوت نباتية فيه وخاصة زيت النخيل الذي يدخل كمكون أساسي فيها ليحل محل دسم اللبن الذي يدخل في تصنيع الجبنة والذي يتم نزع دسمه واستبداله بزيوت نباتية لضغط وتقليل التكلفة والسعر
بعض الشركات تنتج الجبنة الطبيعية وتنتج ايضا الجبن نباتي الدهن ، طب ليييييه ؟؟؟
لان ده بيتباع بسعر والتاني بيتباع بسعر تااااني خاااالص ، نوع شعبي اقتصادي رخيص الثمن ، ونوع غالي لا يحتوي الا على المكونات الطبيعية
طب ايه الفرق بينهم وايه خطورة الجبن نباتي الدهن ؟؟؟
👈السببين الرئيسيين لأضرار الجبن نباتي الدهن :
1_ يتم إضافة بعض المستحلبات التي لها مخاطر صحية محتملة . مثل فوسفات الصوديوم وهو أحد العناصر التي يحذر منها الأطباء لأنه يمكن أن يؤدي إلي أضرار وتلف الكلى . كما توجد مستحلبات أخري مثل فوسفات البوتاسيوم والذي قد يسبب الحساسية والإسهال.
2_ الدهون المشبعة :
تحتوي الجبن النباتي علي الدهون المشبعة والتي يحذر منها الأطباء حيث تؤدي إلي أمراض القلب والأوعية الدموية أو مرض السكري .
طبعا الاخطار دي بتكون على المدى الطويل جدا مش في يوم وليلة
طيب انا دخلت السوبرماركت، او رحنا عند البقال ، اعرف ازاي الفرق بين النوعين 🤔🤔🤔
بنظرة واحدة على العلبة هتلاقي الآتي :
★ الجبن الطبيعي مدون عليه احدى العبارات التالية :
_ طبيعي 100 %
_ او خالي من الزيوت النباتية
_ او لا يحتوي على زيوت نباتية
طب لو ده كله مش مكتوب ؟؟
بسيطة هتقلب العلبة وتقرأ مكوناتها هتلاقي كلمة يحتوي على زبدة طبيعية او يحتوي على قشدة ومفيش اي سيرة خاااالص للزيوت وخاصة زيت النخيل
★ الجبن نباتي الدهن ، هتلاقي مكتوب عليه حاجة من دي :
_ جبن نباتي
_ او جبن نباتي الدهن
_ او جبن معدل بالزيت النباتي
_او جبن محضر بالزيت النباتي
طيب لو كل ده مش مكتوب على العبوة اعرف منين ؟ هتقلب العبوة وتقرأ المكونات هتلاقي كلمة زيت نباتي ، وكلمة زيت النخيل بتاخدك بالأحضااااااااان.
ملحوظة : كلمة لبن فرز المدونة على بعض العبوات معناها لبن خالي الدسم.
يا رب تكونوا استفدتوا ، وعرفتوا ازاي تفرقوا بين النوعين ، وهتلاقوا هنا انواع بالفعل موجودة في السوق المصري ، افتحوا الصور وشوفوا
