20/04/2024
- المفروض انزل كام كيلو لو مشيت على النظام ده ؟
• الإجابة : معرفش , فعلا معرفش , و اى حد يقول رقم كداب او دجال لانه امر متغير من شخص لـ اخر احنا مش شبه بعض وبالتالى لا يوجد إجابة ,ممكن تمشى عليه وتنزل 8 كيلو فى الشهر و ممكن تمشى عليه و وزنك يثبت او يزيد , لان الميزان مجرد حديدة لا مقياس لها على الإطلاق.
2- اومال ايه فايدة الدايت و الإلتزام لو وزنى مش هينزل ؟!
بغض النظر اننا افترضنا انه مش هينزل , مع انه ممكن ينزل عادى , بس ما علينا , الغرض بكل بساطة هو صحتك اللى اهم من الحديدة اللى بنقف عليها برجلينا و صحتك مش ببلاش .
3- يعنى المفروض المتوسط بردو انزل كام فى الشهر او الإسبوع ؟!
• والله العظيم فعلا ما اعرف .
4- طاب ليه متعرفش ؟
• لان ببساطة الميزان مرتبط بعوامل كثيرة داخل الجسم منها , معدل الماء داخل الجسم , حالة الجسم العامة , حالتك الصحية , عمرك , كتلة عضلاتك , وبالتالى تحديد رقم دا شبه مستحيل , الغرض من الحمية هى التخلص من الدهون و ليس التخلص من الميزان , كل ما تهتم بالميزان اكتر كل ما هترجع تتخن اكتر واكتر واكتر .
5- طاب مش الدهون هى الوزن ؟
لا طبـــــعا , الدهون عامله بالظبط كده زى كيلو قطن , كيلو القطن هتلاحظ ان حجمه و مساحته كبيرة لكنه مش تقيل لكنه واخد مساحة كبيرة , دى هى الدهون واخده مساحه كبيرة لكن حجمها مش كبير , بتأذيك صحيا و بدنيا لكنها مش كبيرة و احنا غرضنا نشيلها .
6- طاب انا وزنى ثابت مش كده يبقى الحرق عندى بطئ ؟
- لا علاقة بنزول الوزن او زيادته بمعدل الحرق , ثبات الوزن يحدد بناء على الأتي
لو استمر ثبات مقاسات اللبس + ثبات الوزن على الميزان + ثبات الحالة الصحية لا تتحسن لمدة 3 اسابيع متتالية يسمى ثبات . لكن لو اللبس بيوسع و الصحة تتحسن والميزان ثابت ده لا يسمى ثبات , لكن لو الوزن بينزل على الميزان و اللبس زى ماهو او يسوء ف ده يسمى عك و يجب التوقف عنه .
7- طاب الوزن المثالى اللى المفروض اوصله كام ؟
لا وجود لشئ اسمه وزن مثالى دى خرافه , انت مشكلتك مع تناقس الجسم الداخلى ما بين دهون الى عضلات و بالتالى لا يوجد شئ اسمه وزن مثالى , لاعبى كمال الأجسام اوزانهم مرتفعه لكن وزنهم صحى و مثالي , يوجد شئ اسمه قوام مثالى يعنى لما اقف امام المرايه اكون راضى عن نفسى بالإضافة الى صحة مثالية و مقاسات لبس مثالية , لكن لا وجود لرقم معين على الإطلاق لا من قريب ولا من بعيد .
- طاب مش انا طولى 170 سم , المفروض ان وزنى يبقى 70 كيلو ؟!
الكلام ده غير دقيق من قريب او من بعيد لان لو الـ 70 كيلو اللى انت فيهم دول اغلبهم دهون فى البطن مثلا فبالتالى دى سمنة و سمنة خطيرة كمان , لو الوزن بتاعك عبارة عن عضلات فبالتالى الصحة العامة هتكون ممتازة .
9- طاب بردو مرة تانية , ليه الوزن ثابت طالما انا ملتزم بالأكل بشكل كبير ؟
- مفيش سبب معين لكن يتوقف على الأتي .
• لو الوزن ثابت لكن مقاسات اللبس بتاعتك بتتحسن ف ده دليل مباشر ان جسمك بيفقد دهون و بشكل كويس جدا لكن ممكن يكون فى كتلة عضلية بتزيد فى الجسم عندك او فى ماء مخزن داخل الجسم لاسباب كتيرة .
• لو الوزن ثابت على الميزان مع عدم تغيير مقاسات اللبس لمدة 6 اسابيع من بداية الحمية الغذائية , يبقى غالبا فى شئ غلط انت بتعمله زى بتلغبط فى الأكل , بتاخد فري كتير , بتسهر فترات طويلة , بتنقنق و تاخد سناك كتير , او مشاكل مرضية زى الغده و الكبد الدهنى و السكر و ما شابه .
10- طاب لو انا عندى غده او كبد دهنى او سكر او مقاومة إنسولين هل فى امل انى اخس و اتعافي ؟!
- طبعا بالتأكيد , بس ايه معنى اخس بالنسبالك ؟!يعنى وزنك على الميزان ينزل ؟ لو ده معنى اخس ف غالبا هتمل و هتزهق لان الموضوع هياخد وقت طويلة للوصول للرقم اللى انت حاطه فى دماغك , لكن لو معنى انك بتخس ان لبسك يوسع و شكلك يتحسن و صحتك تتحسن فى اقل من 10 اسابيع هتلاحظ تحسن كامل و بالتالى الميزان مش هيفرق معاك .
11- طاب انا بيجيلى احباط لما بطلع على الميزان و الاقيه ثابت زى ماهو !؟
- انت تاعب نفسك بنفسك و بتجري ورا سراب و وهم , هل حد سألك عن وزنك ؟! لا , حد وقفك فى الشارع قالك انت كام كيلو ؟ لا
انت عندك مشكلة مباشرة مع صحتك و لبسك و شكلك , غير كده مفيش مشاكل ف بلاش تخلق مشاكل وهمية من مخيلتك غير موجودة على الإطلاق .
12 – طاب اخر حاجة المفروض اعمل ايه مع الميزان ؟!
المفروض بكل بساطة اننا نشيل الميزان من امام عنينا و نلغيه من كامل حساباتنا و نركز على مقاسات اللبس بتاعتها + صحتنا لان ده المهم و الاولولوية و بلاش نوزن , نتابع المقاسات كل إسبوعين + صحتك العامة يوميا و تحاليلك كل 3 شهور , غير كده هنفضل فى دايرة الدايت و الزيادة و النزول الخ .
13- طاب ايه اللى بيخلينا نرجع نزيد فى الوزن تانى بسرعه جدا بعد ما نزلناه ؟
اسباب كتير جدااا اهمها اننا كنا مهتمين بنزول الوزن ف اللى كان بينزل كان اغلبه كتله عضلية و نسبة ماء و بالتالى اول ما سبت الدايت الوزن رجع يزيد تانى , المشكلة المباشرة مع الدهوون وليس الوزن .
14- بس انا بمل و بزهق و نفسى اخلص بقى !
تخلص ايه ! هو انت بتخلص شغل خارج البيت ! كل يوم بتروح , هل حضرتك بتخلصى شغل داخل البيت ما كل يوم بتشتغلى , الدايت هو سيستم عام لحياتك بتاخد بالك من اكلك بس وبالتالى مش هتخلص طول عمرك لان الفطرة الطبيعيه هى النظام وليس العشوائية و بالتالى احنا بنعمل كده علشان منمرضش .
-------
ف نصيحة لوجه الله تعالي بقى , غيرك تفكيرك التقليدى بتاع كل مرة ده و امشى صح لمرة واحده فى حياتك كلها .
