د محمد على الزهيرى - جراحة العظام و المفاصل spine & joint care clinic

05/08/2025

“شهادات مرضانا هي مرآة لرحلة العلاج التي نفتخر بها…
نعتز بكل كلمة طيبة خرجت من قلب مريض شفي بإذن الله، وكانت سببًا في طمأنة غيره. الثقة تُبنى بالتجربة، والتجربة تحكيها النتائج.”

21/07/2025

جالي بكسر متفتت أسفل عظمة القصبة ومحتاج شريحة ومسامير
قالي أنا مش هينفع لي عملية عشان عندي السكر

قلت له دا انت عشان عندك السكر لازم تعمل عملية عشان السكر بيطول مدة التئام الكسور ودا كسر بطبيعته بيلحم بصعوبة
وعشان انت مريض سكر انا هاعملك العملية بتدخل محدود هنفتح فوق وتحت الكسر فتحات صغيرة ونعدي الشريحة من تحت الجلد ونثبتها بمسامير فوق وتحت من غير ما نقرب ناحية الكسر خالص

المهم سمع الكلام.. والنتيجة ؟؟
بيمشي على رجله بعد شهرين من غير مشاكل
العضمة في الأشعة رجعت كأنها ما اتكسرتش
جروح الرجل كأنها ما اتفتحتش قبل كدا
==========================
عيادة الدكتور محمد على الزهيرى دكتوراة واستشاري جراحة العظام و المفاصل والعمود الفقرى
المنصورة شارع السكة الجديدة برج الملكة الدور السادس
للتواصل : ‏‪015 54502136‬‏

16/07/2025

من أحدث الطرق في تثبيت كسور اليد والأصابع هو تثبيت الكسر بواسطة مسمار يتم تركيبه داخل نخاع العظمة من فتحة صغيرة جدا في بداية العظمة ( جرح بيتقفل بغرزة واحدة زي اللي في الصورة تحت)

عبقرية الطريقة دي في انها طريقة بسيطة بتتم بفتحة صغيرة جدا وفي وقت قليل جدا وبالتالي الألم معاها قليل جدا وبيتم فيها رد الكسر وتثبيته وضغط طرفي العضمة عشان نوصل لأعلى نسب الالتئام

المدهش كمان في الطريقة دي انها بتمكن المريض انه يحرك ايده بعد العملية مباشرة وبكدا بتتفادى عيوب الطرق الأخرى اللي بتحتاج جبس بعد العملية وبالتالي بيحصل تيبس في الأصابع ونحتاج جلسات علاج طبيعي لفترة طويلة.

في التعليقات فيديو للمريض صاحب الأشعات وهو بيحرك ايده بحرية تامة بمجرد ما فاق من التخدير
============================

عيادة الدكتور محمد على الزهيرى دكتوراة واستشاري جراحة العظام و المفاصل والعمود الفقرى
المنصورة شارع السكة الجديدة برج الملكة الدور السادس
للتواصل : ‏‪015 54502136‬‏

14/07/2025

عم سيد جالنا بثقل وتكتيفة في المشي نتيجة انزلاق غضروفي متعدد بالفقرات العنقية وضغط على النخاع الشوكي وقلنا له ان الحل الوحيد عشان يتحسن ونمنع تدهور الحالة هو الجراحة

سؤاله كان هو أنا هامشي على رجلي تاني يا دكتور والإجابة كانت إن شاء الله هتبقى زي الحصان

الفيديو لعم سيد بعد ٦ شهور من العملية ( زي الحصان ما شاء الله)

28/02/2025

03/02/2025

الحمد لله رب العالمين

13/08/2024

حالة اليوم لشاب ٢٠ سنة جالنا بعد سقوط من ارتفاع (سقالة أثناء الشغل) وكان عنده كسر صعب في عظمة الفخذ بجوار مفصل الورك وتم إجراء جراحة تثبيت للكسر بشريحة ومسامير من نوع خاص مناسب للكسر.

أشعة المريض بعد شهر ونص فيها التئام كامل للكسر والعضمة كأنها ما اتكسرتش وهو حاليا بيمارس حياته بشكل طبيعي

07/08/2024

قصتي مع الأستاذ حمدي أو الكابتن حمدي بدأت لما كشفت عليه اول مرة وهو مريض بانزلاق غضروفي حاد.

كان داخل عليا العيادة راجل ضهره محني ومسنود على عصاية ودا خلاني أقدره في سن أكبر من سنه الحقيقي.

عملت له عملية غضروف وتثبيت فقرات واتفقنا يجيلي متابعات

المفاجأة الأولى كانت في أول متابعة بعد العملية واللي كانت بعد أسبوع واحد لقيت واحد داخل عليا طول بعرض ما شاء الله ومشيته معدولة ووشه مبتسم لدرجة اني فضلت فترة مش مستوعب ان هو دا نفس الشخص اللي شفته من اسبوع

والمفاجأة التانية كانت بعد شهرين لما بعت لي فيديو ليه بعنوان عودة الكابتن حمدي وعرفت ان الراجل رياضي كبير وله فيديوهات ع اليوتيوب والفيسبوك بيحلل ماتشات الكورة وله متابعينه وانه كان توقف عن دا بسبب مشكلة العمود الفقري ورجع له تاني بعد ما أموره اتحسنت بعد العملية

الكابتن حمدي بعت له مقطع صغير من احد فيديوهاته وهو بيشكرني فيه وانا هاحط المقطع دا عشان أفضل فاكر نعمة ربنا عليا وعليه وعشان أقول لأي حد عنده مشكلة مشابهة ان مشكلتك مش نهاية الحياة وانك سهل أوي ترجع زي الأول وأحسن

22/06/2024

من الكسور الشائعة في كبار السن كسر عنق عظمة الفخذ المكون لمفصل الورك وهو كسر لايصلح معه التثبيت الداخلي بالشريحة والمسامير في أغلب الأحيان ويكون العلاج بالاستبدال الصناعي لرأس عظمة الفخذ.

هذا الاستبدال يكون إما بنصف مفصل صناعي أو بمفصل صناعي كامل حسب سن المريض وحالته العامة ودرجة نشاطه قبل الكسر

وفي حالة اختيار المفصل الكامل فإنه يفضل استخدام مفصل ثلاثي الأقطاب ثنائي الحركة في مثل هذه الحالات نظرا لتوفيره درجة عالية من الأمان ضد خلع المفصل ودرجة عالية من الحركة للمفصل.

الأشعات المرفقة لمريضة مصابة بكسر في مفصل الورك تم علاجها بمفصل صناعي كامل ثلاثي الأقطاب منذ ٦شهور وهي بحالة ممتازة وبتمشي (على حد تعبيرها) ٣ كم دون ألم.

11/10/2023

دخل العيادة اليوم شاب وقع على كتفه وعنده كسر بسيط في الترقوة طمنته وقلت له ان الموضوع مش مستاهل غير حامل ذراع وعلاج وهنبقي تمام بس أنا شفتك فين قبل كدا

بص لي باستغراب وقالي انت مش فاكرني يادكتور أنا ياسر اللي عملت له عملية في رجله من ٣ سنين

فكرني بنفسه كان عنده كسر في الفخذ معموله مسمار نخاعي ومش ملتئم وجالي عملنا له شريحة ومسامير ومع المسمار وترقيع عظمي ولحم وبقى كويس وشتغل عليها ٣ سنين لحد ما وقع تاني على كتفه وهي برضه كويسة وهو مشيته طبيعية جدا مش باين انه عمل عملية يوم من الايام

قلت له طالما عملت لك عملية كويسة يبقى حقي اشوف شغلي بعد المدة الطويلة دي قالي حاضر

عملنا أشعة والحمد لله العضمة كأنها ما اتكسرتش قبل كدا

30/09/2023

ضيق القناة العصبية
=============
من المشاكل المزعجة اللي بتحصل في العمود الفقري وبتسبب بالإضافة لألم الضهر ألم وتنميل في الساقين وصعوبة في المشي ( المريض بيحتاج يقعد كل مسافة معينة وما يقدرش يكمل مشي نتيجة تزايد الألم في الساقين مع المشي)

المشكلة دي للأسف مالهاش علاج دوائي والعلاج الوحيد الناجح هو جراحة توسيع القناة العصبية مع او بدون تثبيت الفقرات حسب الحالة

وعلى أد ما المشكلة بتكون مزعجة للمريض بسبب قلة المشي وان العلاج مش بيجيب نتيجة لكن نتيجة الجراحة بتكون هايلة لان المريض بعدها مباشرة بيقدر يمشي زي ما كان زمان

الأشعة اللي تحت مقاطع من رنين لحالة عندها ضيق في القناة العصبية بين الفقرتين الرابعة والخامسة القطنية واشعة بعد ٦ شهور من إجراء جراحة توسيع القناة العصبية وتثبيت الفقرات ( الحالة كانت بتمشي ٢٠٠ متر بالعافية قبل الجراحة ودلوقتي بتمشي ٢ كيلو حسب وصفها 👌👌👌)

13/05/2023

كثير من المرضى الأفاضل لما بيكون عندهم مشكلة بيبعتولنا أشعات عبر وسائل التواصل الإجتماعي ويسأل أنا عندي ايه، ايه العلاج المناسب، تكلفة العملية كام وبيكون الرد إن مسألة تشخيص مشكلة مرضية دا بيمر بمراحل منها سماع شكوى المريض ومعرفة بعض التفاصيل اللي ممكن ما تكونش مهمة عند المريض بس مهمة بالنسبة للطبيب وبعد كدا الفحص السريري للمريض وفي النهاية نشوف الأشعات والتحاليل.

الكلام دا ممكن يزعل ناس كتير بس هو في الحقيقة لمصلحة المريض وأمانه وسلامته وكذلك أمان للطبيب. 👌👌👌

المثال اللي معانا حالة لرجل بيشتكي من ألم في الساقين وتنميل بيزيد مع المشي وطبعا دي شكوى شائعة بسبب ضيق القناة العصبية في العمود الفقري وبتتعالج بجراحة توسيع للقناة العصبية فالمريض كان عامل رنين واتقال له انه محتاج عملية.

لقيت رسالة من المريض باعت لي الأشعات ويسألني عن العملية فطلبت منه أنه ييجي العيادة عشان نشوف إيه المناسب ليه وبعد كام سؤال عن طبيعة الشكوى وتفاصيلها وفحص المريض قلت له إن الفحص بتاعه بيقول إن مشكلته مش في العمود الفقري وان في الغالب عنده مشكلة في الأوعية الدموية المغذية للطرفين السفليين وطلبت منه يعمل أشعة موجات صوتيه على الشرايين.

وجاءت النتيجة (تقرير الأشعة تحت) انسداد كامل في شرايين الطرفين السفليين وبالتالي المريض دا محتاج جراحة عاجلة في الأوعية الدموية وليس جراحة عمود فقري بل بالعكس جراحة العمود الفقري كانت هتكون كارثة بالنسبة له ربما تنتهي بالبتر ( دا مش خيال دي حالات واقعية حصل فيها الخطأ دا للأسف)😭😭

المريض تم تحويله لطبيب جراحة أوعية وإن شاء الله ربنا يقومه بالسلامة لكن الخلاصة والدرس إن التشخيص السليم هو أهم ما في الطب.. أهم من قوة الدوا.. أهم من شطارة الجراح ✅✅