عيادة د. ريهام تعلب للتوليد وأمراض النساء - Dr. Ryham Taalab's OBGYN Clinic

  • Home
  • Egypt
  • Mansoura
  • عيادة د. ريهام تعلب للتوليد وأمراض النساء - Dr. Ryham Taalab's OBGYN Clinic

عيادة د. ريهام تعلب للتوليد وأمراض النساء - Dr. Ryham Taalab's OBGYN Clinic الصفحة الرسمية لعيادة د. ريهام تعلب أخصائية التوليد وأمراض وجراحات ومناظير النساء وعلاج العقم وتأخر الانجاب

عيوب الرحم الخلقية اللي مش مسببه أعراض ولا مأثرة على القدرة على الحمل والانجاب مش بتحتاج علاج، ولو شخصناها بننصح المريضة...
06/08/2020

عيوب الرحم الخلقية اللي مش مسببه أعراض ولا مأثرة على القدرة على الحمل والانجاب مش بتحتاج علاج، ولو شخصناها بننصح المريضة انها تتابع دورياً خصوصاً لو حصل حمل علشان لو حصلت أي مشاكل بسببها تتلحق بدري..

العيوب اللي بتحتاج علاج هي العيوب الشديدة اللي مسببة انسداد في القناة التناسلية أو بتمنع الحمل أو بتسبب إجهاض متكرر، وفي الحالات دي العلاج بيكون بالتدخل الجراحي بهدف فتح القناة التناسلية و/أو إعادة تشكيلها علشان نعالج سبب المشكلة..

المنظار الرحمي سهل اجراء اغلب العمليات دي خصوصاً اللي بنعالج بيها العيوب اللي مأثرة على تجويف الرحم الداخلي وأشهرهاً طبعاً الحاجز الرحمي..

مع الأسف بعض العيوب الخلقية المتقدمة زي الضمور الخلقي الشديد للرحم أو القناة التناسلية، مالهاش علاج لحد دلوقتي 😔، لكنها في المقابلة نادرة جداً، والأمل في علاجها بإذن الله هو اعتماد تقنية ناجحة لزرع الرحم واللي الابحاث مستمرة عليه حالياً واتعملت عليه تجارب كتيرة بالفعل، وان شاء الله في المستقبل القريب يعتمد كخيار علاجي للحالات دي..

..

أغلب عيوب الرحم الخلقية مش بتسبب أعراض للمريضة وفي معظم الحالات مش بتأثر على القدرة على الحمل والانجاب، وكتير ما بتتشخصش...
06/08/2020

أغلب عيوب الرحم الخلقية مش بتسبب أعراض للمريضة وفي معظم الحالات مش بتأثر على القدرة على الحمل والانجاب، وكتير ما بتتشخصش خالص أو بنكتشفها بالصدفة واحنا بنفحص المريضة لأي أسباب تانية، زي مشاكل الكلى خصوصاً إن الضمور الخلقي للكلى يعتبر من أشهر العيوب التكوينية اللي بتحصل مع عيوب الرحم الخلقية..

أحياناً بعض العيوب الخلقية بتسبب أعراض زي آلام شديدة غير طبيعية مع الدورة الشهرية أو صعوبة وألم أثناء العلاقة الزوجية، وإن كانت الأعراض دي مش مميزة وممكن تحصل لأسباب مختلفة..

نسبة قليلة من حالات عيوب الرحم الخلقية بتكون عندهم مشاكل في الخصوبة سواء بضعف القدرة على الحمل وتأخر في الانجاب أو بالتعرض لإجهاض متكرر بدون أسباب واضحة وده بيحصل مع العيوب الشديدة اللي مأثرة على تكوين الرحم ووظيفته أو مسببة انسداد كامل في القناة التناسلية، ولأن غالباً مبتكونش في أعراض محددة فضروري نستبعد وجود عيوب خلقية في الرحم واحنا بنفحص وبنشخص أي حالة عقم أو تأخر انجاب..

تشخيص العيوب الخلقية بيكون عن طريق فحص وتصوير الرحم والقناة التناسلية سواء بالمنظار الرحمي أو بالأشعات التشخيصية وأهمها:

🔍 الأشعة العادية بالصبغة Hystero-Salpingogram
🔍 الأشعة التلفزيونية المجسمة (السونار ثلاثي الأبعاد) 3D U/S خصوصاً عن طريق المهبل Trans-Vaginal، وده يعتبر أفضل وأدق فحص حالياً لتشخيص العيوب دي
🔍 الرنين المغناطيسي MRI العادي أو المجسم

..

أغلب عيوب وتشوهات الرحم الخلقية بتحصل لأسباب غير معروفة 🤨، وفي 90% من المريضات بيكون التركيب الجيني سليم وفحص الكروموزوم...
06/08/2020

أغلب عيوب وتشوهات الرحم الخلقية بتحصل لأسباب غير معروفة 🤨، وفي 90% من المريضات بيكون التركيب الجيني سليم وفحص الكروموزومات بيطلع طبيعي تماماً 🤔..

غياب أسباب الإصابة معناه مع الاسف ان ما فيش عوامل خطر واضحة او حتى مواصفات جينية أو أسرية ممكن ترفع احتمالية الإصابة واللي لو موجودة هتكون مفيدة جداً علشان نقدر ننصح بتجنبها وبالتالي نقلل احتمالية الإصابة 😟..

لكن في المقابل نسبة وجود عيوب خلقية في الرحم والقناة التناسلية نسبة قليلة جداً وأغلب البنات بيتولدوا بجهاز تناسلي سليم بفضل الله 😊..

على حسب نوع الخلل اللي بيحصل في عملية تكوين الرحم العيب الخلقي ممكن يكون:

⭕ الحاجز الرحمي Septate Uterus:

ده النوع الأكثر شيوعاً (حوالي 45% من الحالات)، وبيكون فيه الشكل والتكوين الخارجي للرحم طبيعي لكن جوا الرحم بيكون فيه حاجز بيقسم التجويف لجزئين منفصلين..

⭕ الرحم ثنائي القرنين Bicornuate Uterus:

في النوع ده بيحصل بسبب عدم اكتمال التحام النصفين الرحميين من قنوات مولر أثناء تكون الجنين، والنتيجة بتكون وجود خندق خارجي بيقسم الرحم لجزئين متصلين بس في الجزء السفلي (عند عنق الرحم)، والنوع ده بيتشخص في حوالي 25% من الحالات..

⭕ الرحم أحادي القرن Unicornuate Uterus:

في النوع ده واحدة من قنوات مولر مش بتنمو بشكل سليم، فواحد من نصفين الرحم مش بيتكون بشكل كامل وده بيخلي الرحم عبارة عن نصف واحد بس متصل بيه قناة فالوب واحدة والنصف التاني بيكون ضامر، وده بنشوفه في حوالي 15% من الحالات..

⭕ الرحم المزدوج Uterus Didelphys:

سبب النوع ده قريب من سبب الرحم ثنائي القرنين، لكن التئام النصفين الرحميين فيه بيفشل تماماً والنتيجة بتكون نصفين رحميين منفصلين، وده بيحصل في حوالي 7.5% من الحالات

⭕ الضمور الرحمي الخلقي Uterine Agenesis:

ده بيحصل لما عملية تكون الرحم بتفشل تماماً أثناء نمو الجنين والطفلة بتتولد بتركيب ضامر مش رحم حقيقي، وده بيحصل في حوالي 10% من الحالات..

⭕ القوس الرحمي Arcuate Uterus:

في النوع ده التركيب الخارجي والداخلي للرحم بيكون سليم باستثناء وجود خندق مقوس في بطانة تجويف الرحم عمقه اقل من 1 سم، وبرغم انه بيحصل في حوالي 7% من الحالات لكن مالوش أي تأثيرات على شكل أو وظيفة الرحم وتعريفات كتيرة بتعتبره حاجة طبيعية مش عيب خلقي..

..

الرحم وقنوات فالوب بيتكونوا من تركيبات جنينية اسمها ⬅️ قنوات مولر Müllerian Ducts ➡️، ودول عبارة عن قناتين أو أنبوبتين ب...
06/08/2020

الرحم وقنوات فالوب بيتكونوا من تركيبات جنينية اسمها ⬅️ قنوات مولر Müllerian Ducts ➡️، ودول عبارة عن قناتين أو أنبوبتين بيظهروا في الجزء السفلي من جذع الجنين في بداية الحمل..

كل قناة بتكون نص الرحم وقناة فالوب المتصلة بيه، وفي نهاية التطور الجنيني بيلتحموا ببعض علشان يتكون الرحم وقنوات فالوب بشكلهم المعروف..

أي اضطراب في العملية دي لأي سبب ممكن يأثر على اكتمالها بشكل سليم وتكون النتيجة تشوهات في شكل الرحم أو تكوينه، ودي اللي بنسميها ..

❓ إيه عيوب الرحم الخِلقِية الشائعة؟
❓ إيه أسبابها؟ وإيه العوامل اللي بتزود احتمالية حدوثها؟
❓ هل بتسبب أعراض ومشاكل للمريضة؟ وهل بتأُثر على القدرة على الانجاب؟
❓ ازاي بنشخصها؟ وإيه طرق العلاج؟

إجابات كل الأسئلة دي هتعرفوها في البوستات الجاية إن شاء الله..

ولو عندكم أي أسئلة أو استفسارات عن الموضوع ابعتولنا في تعليق أو رسالة للصفحة علشان د. ريهام تعلب (أخصائية التوليد وأمراض وجراحات ومناظير النساء التخصصية وعلاج العقم وتأخر الإنجاب) تجاوبكم بالإجابات العلمية السليمة وتوجهكم التوجيه الصحيح إن شاء الله..

تابعونا.. :)

التدخل الجراحي بيكون مطلوب لعلاج حويصلات المبايض لو الحويصلة كبيرة جداً او مسببة ألم شديد او حصلت منها مضاعفات أو كان مش...
06/08/2020

التدخل الجراحي بيكون مطلوب لعلاج حويصلات المبايض لو الحويصلة كبيرة جداً او مسببة ألم شديد او حصلت منها مضاعفات أو كان مشتبه في إنها ورم سرطاني، وطبيعة الجراحة بتتحدد حسب نوع وحالة الحويصلة من بين الخيارات دي:

◀️ الاستئصال المحدود للحويصلات بدون استئصال المبيض Ovarian Cystectomy وده بيكون مناسب أكتر للحويصلات المائية Serous Cysts والمخاطية Mucinous Cysts والشبه جلدية Dermoid Cysts اللي مش بتسبب تلف لكامل نسيج المبيض

◀️ استئصال المبيض المصاب بشكل كامل Unilateral Oophrectomy لو كان المبيض مصاب بحويصلات سرطانية لكن المريضة لسه ما خلفتش ومحتاجة تحافظ على خصوبتها، فبيتم استئصال المبيض المصاب مؤقتا لإزالة الورم وتبطيء تفاقمه، وبتاخد المريضة فرصة للإنجاب بعدها بيتم استكمال العلاج بعمل استئصال كامل للمبيض التاني والرحم علشان نمنع انتشار الورم السرطاني

◀️ الاستئصال الكلي للمبايض مع قنوات فالوب والرحم Total Hysterectomy with Bilateral Salpingo-Oophrectomy، وده الخيار الانسب لاستئصال الحويصلات السرطانية خصوصاً المستفحلة وفي الغالب بتحتاج المريضة تاخد علاج كيماوي و/أو إشعاعي بعد الاستئصال علشان نمنع ارتداد الورم السرطاني

أغلب العمليات الجراحية دي بتتعمل حالياً بالتدخل المحدود بالمنظار الجراحي عن طريق فتحات صغيرة في جدار البطن كبديل عن العمليات التقليدية اللي بتتم عن طريق شق البطن، واستخدام المناظير الجراحية خلى العمليات دي أأمن ونتايجها أفضل والمضاعفات اللي ممكن تحصل بسببها (واللي أهمها الالتصاقات بتجويف البطن والحوض ومضاعفات الجرح التقليدي) أقل بكتير..

..

علاج الأكياس والحويصلات المرضية على المبايض بيختلف حسب نوعها وحجمها وإذا كانت مسببة أعراض للمريضة أو جزء من متلازمة مرضي...
06/08/2020

علاج الأكياس والحويصلات المرضية على المبايض بيختلف حسب نوعها وحجمها وإذا كانت مسببة أعراض للمريضة أو جزء من متلازمة مرضية أو لأ..

أغلب الحويصلات والأكياس بتكون خاملة ومش بتسبب أعراض وبيكون كل المطلوب بعد التشخيص إن المريضة تتابع بشكل دوري مع دكتور أمراض النساء اللي بيفحص المبايض بالسونار على فترات علشان يتابع الحويصلة لو بتقل في الحجم لحد ما تختفي أو يسجل زيادة مضطردة في الحجم يقرر على أساسها احتياج المريضة لعلاج تداخلي قبل ما تتعرض لمضاعفات..

في بعض الحالات (خصوصاً مع المريضات اللي عندهم حويصلات وظيفية مرضية) بنوصف أدوية هرمونية، في الغالب بتكون أقراص منع الحمل، والهدف منها بيكون منع نمو حويصلات جديدة على المبايض، لكن الأدوية دي مالهاش تأثير على الحويصلات الموجودة بالفعل ومش بتصغر حجمها إنما هي بتختفي تلقائياً مع الوقت..

..

برغم إن أغلب حويصلات المبايض مش بتسبب أعراض ولا مشاكل، لكن بعض أنواع الحويصلات ممكن تحصل بسببها مضاعفات وأحياناً بتكون خ...
06/08/2020

برغم إن أغلب حويصلات المبايض مش بتسبب أعراض ولا مشاكل، لكن بعض أنواع الحويصلات ممكن تحصل بسببها مضاعفات وأحياناً بتكون خطيرة 😱..

أهم المضاعفات دي:

⚠️ التواء المبيض Ovarian Torsion:

الحويصلات اللي بتكبر لحجم كبير ممكن وزنها يخلي المبيض يتحرك من مكانه ويلف حوالين الرباط اللي فيه الأوعية الدموية اللي بتغذيه، وده بيسبب ألم واحتقان وممكن يسبب قصور في دموية المبيض تكون نتيجته تلف المبيض وتعرضه للغرغرينة..

الحالة دي تعتبر من الطوارئ الجراحية وأعراضها بتكون ألم حاد مفاجئ في أسفل البطن من ناحية المبيض مع قيء أو شعور بالغثيان ولو التشخيص اتأخر ممكن تبقى في حرارة واعراض تسمم في الدم بسبب الغرغرينة، علشان كدا التدخل الجراحي في وقت مبكر ضروري جداً وبيتم فيه استئصال المبيض وقناة فالوب بشكل عاجل..

⚠️ انفجار الحويصلة Rupture of Ovarian Cyst:

بعض الحويصلات ممكن مع زيادة الضغط جواها تنفجر وتسبب للمريضة ألم حاد ووأحياناً نزيف داخلي لو ثقب جدار الحويصلة كان في منطقة فيها اوعية دموية..

الاحتمالية بتزيد في وجود حويصلات حجمها كبير، وكمان بتزيد الخطورة لو المريضة اتعرضت لإصابة في أسفل البطن أو مارست رياضة عنيفة أو نشاط حركي مفرط..

انفجار حويصلة مبيضية ممكن يحتاج علاج تحفظي بسيط لو كانت نتيجة الانفجار تسرب السائل من جوا الحويصلة لتجويف البطن، وفي الحالات دي بيكون المطلوب متابعة المريضة وبعض الادوية البسيطة مش اكتر لغاية ما الجسم يمتص السائل بشكل تلقائي.. لكن ممكن كمان يكون انفجار الحويصلة من الطوارئ الجراحية لما بيكون في نزيف حاد والحالات دي بتحتاج علاج سريع وتدخل جراحي لإيقاف النزيف وتصريف الدم المتجمع في البطن..

⚠️ الحويصلات السرطانية Cancerous Cysts:

بعض حويصلات المبيض الخاملة ممكن تكون أورام سرطانية، ودي ليها انواع متعددة ممكن تصيب الإناث في أي سن حتى في عمر الطفولة، وبرغم انها في البداية مش بتسبب أعراض لكن لازم يتم استئصالها بشكل مبكر قبل استفحال وانتشار الورم للأنسجة المجاورة أو عن طريق الدم لأعضاء تانية في الجسم..

ومن هنا بتظهر أهمية الفحص الروتيني بالسونار مع دكتور أمراض النساء، وإجراء بعض تحاليل الكشف المبكر زي تحليل دلالة الأورام CA-125، واللي بيفيدوا في تشخيص مشاكل زي دي وعلاجها في مراحل مبكرة..

⚠️ ضعف الخصوبة والعقم Infertility:

بعض الحويصلات (وخصوصاً حويصلات الشيكولاتة اللي بتظهر بسبب البطانة الرحمية المهاجرة Endometriotic Cysts) ممكن تسبب تلف في نسيج المبيض وبالتالي تأثر على وظيفته..

كمان بعض المتلازمات المرتبطة بحويصلات المبايض المرضية زي التكيسات المتعددة للمبايض PCOS بيكون من ضمن مشاكلها قصور في وظيفة المبيض..

لو كانت المشكلة مأثرة على المبيضين ممكن تسبب قصور في الخصوبة بيوصل في بعض الحالات للعقم وفقدان القدرة على الانجاب، خصوصاً لو التشخيص والعلاج اتأخروا زيادة عن اللازم..

..

أغلب حويصلات وأكياس المبايض مش بتسبب أعراض، وفي حالات كتيرة بنكتشف وجودها على المبيض بالصدفة أثناء فحص البطن بالسونار لأ...
06/08/2020

أغلب حويصلات وأكياس المبايض مش بتسبب أعراض، وفي حالات كتيرة بنكتشف وجودها على المبيض بالصدفة أثناء فحص البطن بالسونار لأي سبب تاني..

بعض الحويصلات بتسبب ألم في أسفل البطن ناحية المبيض المصاب، والألم ده أما بيكون في صورة مغص مزمن أو ألم حاد بيظهر مع حركة معينة أو بيزيد في اوقات معين..

أحياناً بتكون الأعراض سببها المتلازمة المرضية اللي مسببة التكيس زي أعراض متلازمة التكيسات المتعددة للمبايض PCOS أو أعراض البطانة الرحمية المهاجرة Endometriosis واللي أهمها اضطرابات الدورة الشهرية..

أوقات كمان بتكون الأعراض سببها مضاعفات الحويصلة زي التواء المبيض اللي ممكن تسببه الحويصلات اللي بتكبر لحجم ضخم، أو النزيف اللي ممكن يحصل بسبب انفجار حويصلة مرضية..

علشان كدا تشخيص حويصلات وأكياس المبايض بيعتمد أكتر على بعض الفحوصات زي:

🔍 الفحص بالسونار (الأشعة التلفزيونية)، واللي بيقدر بيه طبيب أمراض النساء إنه يشخص وجود الحويصلات ويقدر عددها وأحجامها وكمان يشخص طبيعة محتواها إذا كان سائل أو صلب وبالتالي يستنتج نوعها وأسبابها
🔍 الفحص بالرنين المغناطيسي MRI واللي بيفيد جدا في تحديد نوع الحويصلة وطبيعة محتواها وكمان بيساعد على تشخيص كونها حميدة او خبيثة (سرطانية)، خصوصا في الحالات اللي مش بيكون السونار كافي فيها للتشخيص
🔍 تحليل الحمل، واللي بيساعد على تشخيص بعض أنواع الحويصلات الوظيفية (حويصلة الجسم الأصفر) لو كان التحليل إيجابي وأظهر الفحص بالسونار وجود حويصلة على المبيض مع عدم وجود جنين في الرحم
🔍 تحليل دلالة الأورام CA-125 واللي بيساعد على تشخيص بعض أنواع سرطانات المبيض اللي بتظهر في شكل حويصلات صلبة

..

حويصلات المبايض أنواع، وكل نوع ليه أسبابه، وأهم الأنواع دي:🔴 الحويصلات الوظيفية Functional Cysts:البويضات بتتكون في جسم ...
06/08/2020

حويصلات المبايض أنواع، وكل نوع ليه أسبابه، وأهم الأنواع دي:

🔴 الحويصلات الوظيفية Functional Cysts:

البويضات بتتكون في جسم الأنثى وهي جنين أثناء الحمل، وبتتولد بعدد بويضات محدد في كل مبيض وده اللي بنسميه مخزون المبيض، وكل بويضة بتكون موجودة في حويصلة ليها جدار خلوي وجواها سائل بتسبح فيه البويضة..

مع كل دورة شهرية الهرمونات المنشطة بتحفز الحويصلات وبتخليها تكبر في الحجم، وحويصلة واحدة بس عادةً بتفضل تكبر لحد حجم النضج ويوم التبويض بتنفجر وتخرج منها البويضة..

في بعض الأحيان حويصلات مبيضية بتفضل تنمو بشكل غير طبيعي وبدل ما تنفجر وتخرج البويضة بيفضل حجمها يزيد وتتحول لكيس بنسميه "كيس حويصلي أو جريبي Follicular Cyst"..

بعد التبويض الحويصلة المبيضية بتتحول لتركيب بنسميه "الجسم الأصفر Corpus Luteum" وده بيفرز الهرمونات اللي بتدعم الحمل في الأسابيع الأولى لحد اكتمال تكون المشيمة..

في بعض الأحيان بيتراكم سائل جوا الجسم الأصفر ده وحجمه بيزيد بشكل غير طبيعي وبيتحول لكيس مرضي اسمه "حويصلة الجسم الأصفر Corpus Luteum Cyst"..

الحويصلات الوظيفية فرقها عن باقي أكياس المبيض إن مصدرها هي الحويصلات المبيضية نفسها، وفي الغالب بتكون خاملة ومبتسببش أعراض وبتختفي تلقائياً في خلال شهور قليلة..

🔴 الحويصلات شبه الجلدية Dermoid Cysts:

دي في الحقيقة نوع من الأورام اسمه العلمي Teratoma، في الغالب بتكون حميدة ونادرأ ما بتكون سرطانية، بتنمو من خلايا جنينية علشان كدا بتتميز بمحتواها اللي ممكن نلاقي فيه أنسجة مختلفة زي الجلد والشعر وحتى أسنان أو عظام..

🔴 الحويصلات المائية Cystadenoma:

دي أكياس أو حويصلات بتظهر على سطح المبيض مش من الحويصلات المبيضية، وبتكون مليانة سائل مائي أو مخاطي، وممكن توصل لحجم كبير جداً..

🔴 حويصلات البطانة الرحمية Endometriomas:

الحويصلات دي بتتكون على المبيض بسبب هجرة خلايا من بطانة الرحم بشكل غير طبيعي ووصولها للمبيض..

لأن الحويصلات دي جدارها بيتكون من خلايا بطانة الرحم ففي الغالب بتتعرض لنفس التغيرات اللي بتحصل في بطانة الرحم مع الدورة الشهرية، بمعنى إنها بتكبر وتنمو مع بطانة الرحم وبعدين تضمر وتبدأ تنزف في نهاية الدورة الشهرية..

بعض الحويصلات بتنزف أكتر من مرة ويتراكم فيها الدم المتجلط، وبنسميها في الحالات دي "أكياس الشيكولاتة Chocolate Cysts"، وممكن مع الوقت يتقل وزنها ويزيد الضغط جواها وتسبب للمريضة أعراض ومضاعفات..

..

سيدات وبنات كتار أثناء الفحص بنلاقي عندهم حويصلات غير طبيعية على مبيض أو المبيضين، وبرغم إن أغلبها بتكون حويصلات خاملة م...
06/08/2020

سيدات وبنات كتار أثناء الفحص بنلاقي عندهم حويصلات غير طبيعية على مبيض أو المبيضين، وبرغم إن أغلبها بتكون حويصلات خاملة مالهاش أعراض ولا بتسبب مضاعفات وكمان بتختفي لوحدها بدون علاج، لكن في المقابل بعضها بتسبب أعراض وممكن كمان مضاعفات بتكون أحياناً خطيرة وحرجة.. 😱

حويصلات المبيض الغير طبيعية دي بتكون عبارة عن أكياس مليانة سائل أو فيها مواد صلبة أو شبه صلبة بتتكون على سطح المبيض أو جواه لأسباب مختلفة..

❓ إيه أنواع حويصلات المبيض الغير طبيعية؟ وإيه أسباب ظهورها؟
❓ هل ليها أعراض مميزة؟ وازاي بنشخصها؟
❓ إيه المضاعفات والمخاطر اللي ممكن تحصل بسببها؟
❓ امتى بتحتاج تتعالج؟ وإيه طرق العلاج الفعالة؟

كل الأسئلة دي هنجاوب عليها في السلسلة دي بإذن الله، ولو عندك أي أسئلة أو استفسارات عن الموضوع ابعتيلنا في تعليق أو رسالة للصفحة علشان د. ريهام تعلب تجاوبك عليها بالإجابات العلمية السليمة وتوجهك التوجيه الصحيح ان شاء الله..

تابعونا.. 😊

..

علاج آثار ومضاعفات متلازمة تكيسات المبايض في الغالب مش بيحتاج تدخل جراحي، ويعتبر ضعف التبويض اللي بيحصل بسبب التكيسات هو...
06/08/2020

علاج آثار ومضاعفات متلازمة تكيسات المبايض في الغالب مش بيحتاج تدخل جراحي، ويعتبر ضعف التبويض اللي بيحصل بسبب التكيسات هو المشكلة الرئيسية اللي التدخل الجراحي بيفيد أحياناً في علاجها..

نزول الوزن والعلاج الدوائي باستخدام الأدوية المنشطة للتبويض أحياناً مش بيحققوا نتايج فعالة مع بعض المريضات وبتفضل عندهم مشكلة في التبويض ممكن تسبب عدم قدرة على الإنجاب 😔..

التدخل الجراحي بيكون مفيد للحالات دي، والعملية المعتمدة هي عملية ⬅️ تثقيب المبيض Ovarian Drilling ➡️ اللي بتتعمل دلوقتي بالمنظار الجراحي عن طريق فتحات صغيرة في جدار البطن بدون فتح البطن جراحياً..

في العملية بنستخدم الكي الجراحي أو الليزر علشان نعمل ثقوب في سطح المبيض، والثقوب دي بتدمر الحويصلات الخاملة ونسيج المبيض اللي بينتج هرمونات الذكورة (الأندروجينات) وبعض الهرمونات المثبطة لوظيفة المبيض زي هرمون الانهيبين Inhibin، وده بيدي فرصة أكبر لهرمونات الخصوبة انها تحفز نمو الحويصلات المبيضية النشطة وبيحسن وظيفة المبيض والقدرة على التبويض..

العملية تعتبر آمنة تماماً ومضاعفاتها ومخاطرها محدودة جداً، والمريضة بتحتاج تتحجز في المستشفى للعملية يوم واحد بالكتير وبتقدر تستعيد نشاطها وتمارس حياتها بشكل طبيعي بعد العملية بفترة قصيرة..

برغم ان العلاج الجراحي مش إجراء روتيني بيتعمل لكل الحالات، لكن الدراسات أثبتت إنه فعال جداً في تنشيط التبويض والعملية بتحقق نتيجة إيجابية مع أكتر من 50% من السيدات اللي ماستجابوش للعلاج الدوائي والتحفظي..

..

بروتوكل علاج متلازمة تكيسات المبيض بيكون هدفه في الغالب علاج الآثار والأعراض والمضاعفات اللي بيسببها الخلل الوظيفي والاض...
06/08/2020

بروتوكل علاج متلازمة تكيسات المبيض بيكون هدفه في الغالب علاج الآثار والأعراض والمضاعفات اللي بيسببها الخلل الوظيفي والاضطرابات الهرمونية سواء على الخصوبة والقدرة على الانجاب أو على الجسم والصحة بشكل عام..

أهم مكونات وأهداف البروتوكول العلاجي بتكون:

◀️ إنقاص الوزن الزايد:

الخطوة الأولى في العلاج بتكون التخلص من السمنة والوزن الزايد، والدراسات أثبتت إن المريضة لو وزنها نزل 5% بس ممكن الأعراض تتحسن بشكل ملحوظ، ده غير إن نزول الوزن بيزود فاعلية العلاجات الدوائية وبيقلل تأثير المرض على الخصوبة..

◀️ تنظيم الطمث (الدورة الشهرية):

أقراص منع الحمل اللي فيها خليط هرموني (استروجين وبروجيستين) Combination Birth Control Pills أو وسائل منع الحمل الهرمونية (زي اللولب الهرمونية) بتقلل انتاج هرمونات الذكورة (الأندروجينات) وبتنظم مستوى هرمون الانوثة (الاستروجين) في الدم وده بيساعد على تنظيم الدورة الشهرية، وبيحسن كمان بعض الأعراض زي نمو الشعر الزايد وحب الشباب..

الأدوية دي طبعاً بتمنع الحمل، فلو المريضة عايزة تحمل ممكن نستبدلها بأدوية هرمونية فيها بروجستين بس Progestin-Only Therapy، ودي مش بتمنع الحمل لكن تأثيرها أضعف لأنها مش بتقلل إنتاج الأندروجينات..

◀️ تنشيط المبيض وتحفيز التبويض:

علشان نعالج ضعف التبويض والخلل الوظيفي للمبيض بنوصف للمريضة أدوية بتنشط وتحفز عملية التبويض زي مضادات هرمون الاستروجين Oral Anti-Estrogen Pills والأدوية الهرمونية الشبيهة بهرمونات الخصوبة Gonadotropins أو أدوية تانية بتنشط التبويض بشكل غير مباشر..

لو أدوية تنشيط التبويض ما كانتش فعالة كفاية بنوصف معاها أقراص ميتفورمين Metformin اللي من أشهر أصنافها التجارية السيدوفاج، وده من أدوية علاج السكر المعروفة..

الميتفورمين بيقلل مقاومة الخلايا للأنسولين فبتزيد كفائته وبيقل مستواه في الدم، وده بيحسن الكفاءة الوظيفية للمبيض، ده غير إنه بيفيد في علاج مرض السكر من النوع التاني اللي بتشتكي منه مريضات كتار عندهم المتلازمة خصوصاً لو وزنهم زايد..

◀️ علاج نمو الشعر الزايد:

في أكتر من خيار لعلاج النمو الزايد للشعر في جسم المريضة أهمها:

▪️ أقراص منع الحمل، اللي بتقلل إنتاج الهرمونات الذكورية (الأندروجينات) واللي تعتبر المسؤول الأساسي عن نمو الشعر الزايد عند مريضات تكيسات المبيض
▪️ أدوية بتقلل حساسية الجلد لهرمونات الذكورة، ومنها أدوية بتتاخد بالفم (أقراص) وكريمات موضعية
▪️ طرق الإزالة الدائمة للشعر، زي إزالة الشعر بالليزر والتكسير الكهربي لبصيلات الشعر، ودي طبعاً لازم تتم في مراكز طبية بيشرف عليها أطباء متخصصين

..

Address

شارع جيهان/برج النور/أمام المدينة الجامعية/أعلى حلواني الفيومي
Mansoura
35511

Website

Alerts

Be the first to know and let us send you an email when عيادة د. ريهام تعلب للتوليد وأمراض النساء - Dr. Ryham Taalab's OBGYN Clinic posts news and promotions. Your email address will not be used for any other purpose, and you can unsubscribe at any time.

Shortcuts

Share

Category