Shrouk 𝗘𝗹𝗙𝗮𝘆𝗮𝗱

25/10/2025

النرجسي هو واحد شايف نفسه مركز الكون، محتاج ناس دايمًا تمجده وتخضع له. شكله واثق، لكن جوّه حساس وخايف من أي نقد. بيستخدم الناس علشان يكسب (اهتمام، سلطة، فوايد) ومش بيهمه مشاعرهم بجد

(أشهر الصفات)

عايز يكون دايمًا محور الكلام والاهتمام — لو مش هو الأضواء، بيتضايق أو يعمل دراما.

بيبالغ في تقدير نفسه (بيحكي عن إنجازات كبيرة، أو بيقلل من غيره).

قليل تعاطف — لو حد زعلان، ممكن يتجاهله أو يقول “هو ليه زعلان؟ ده مش مشكلة”.

بيستغل الناس — صداقات أو علاقات مش حب حقيقي، بس مصالح.

حاسس بأنه أحسن من غيره ويستخدم الإهانة أو التقليل أحيانًا.

حساسي جدًا من النقد — حتى نقد بسيط ممكن يخليه يهاجم أو يعمل إنكار كبير.

بيحاول يتحكم (في قرارات، فلوس، علاقات).

علاقاته سطحية ومصلحية — يبان كويس لحد ما تستفيد منه، وبعدين يبعد.

✍️ شروق الفايد

23/10/2025

العلاقات مش دايمًا بتفشل لأن الحب خلص…
أحيانًا بتفشل لما الاحتياج النفسي يتحوّل لعبء،
ولما الاتنين يدخلوا العلاقة عشان "يتعالجوا" مش "يتشاركوا".

في بداية أي علاقة، بيظهر "الطفل الجُوّاني" فينا —
اللي محتاج أمان، واهتمام، واحتواء.
بس لما الطرف التاني ما يعرفش يلبي الاحتياج ده،
بتبدأ المعارك الصامتة، والمقارنات، والخذلان.

العلاقات اللي بتفشل بتكشف جواك مساحات لسه محتاجة شفاء،
مش نقص حب… نقص وعي.
ومش كل فقد خسارة،
أحيانًا الفقد بداية "وعي جديد".

✍️ شروق الفايد

19/10/2025

مش كل الناس تستاهل الحلو اللي جواك،
في ناس بتقرب مش علشان تشوفك، لكن علشان تاخد من طاقتك.
ومش كل ابتسامة بتترد، ولا كل طيبة لازم تتوزع.
خلي عطاك دايمًا لمين يقدّر،

مش لمين ياخد ويستهلكك كأنك واجب عليه.

لأن العطاء من غير وعي بيستنزفك، حتى لو كنتِ بتعمل خير.
وجودهم اختبار لحدود طيبتك

✍️

شروق الفايد

15/10/2025

أوقات كتير بنحس إننا مش مفهومين...
مش لأن الناس مش بتحبنا، لكن لأن مشاعرنا أعمق من قدرتهم على الفهم.
مشكلتنا مش في التعبير، المشكلة إن اللى قدامنا مش جاهز يسمع اللى جوانا.
وده مش نقص فيك… دى روحك الحساسة اللى بتشوف الدنيا بطريقة مختلفة.
خليك دايمًا زى ما إنت، حتى لو محدش فهمك، اللى ليه نفس ترددك هيحس بيك من غير ما تتكلم

✍️
شروق الفايد.

13/10/2025

الأشخاص السامّين مش لازم يئذوك بصوت عالي،
أحيانًا بيستهلكوك بهدوء…
بنظرة، بكلمة، أو بإحساس دائم إنك المُلام دايمًا.
السامّ مش دايمًا بيزعق،
أحيانًا بيضحك في وشّك،
لكن يخليك تشك في نفسك،
تحس إنك قليل، أو دايمًا الغلطان.
الناس دي بتسحب منك طاقتك،
وتسيبك فاضي ومش فاهم ليه بقيت مرهق نفسيًا.
بس الحقيقة بسيطة جدًا:
وجودهم استنزاف صامت.
اختار تبعد من غير ما تبرر،
احمى طاقتك،
وافتكر إن السلام النفسي مش أنانية،
ده حقّك
✍️
شروق الفايد

04/10/2025

"لما تلاقى شخص فجأة اتغير من ناحيتك وبدأ يبعد، ويبقى مع ناس تانية.. أوعى تذكره بيك، أو تحاول تحسسه بوجودك، سيبه يختار اللي عايز يكون معاهم. متزعلش على حبك ولا على معاملتك الحلوة، لأن اللي بيبعد عمره ما كان يستحق وجودك.
افتكر دايمًا إن اللي يسيبك هو الخسران، مش إنت. وجودك في حياة أي حد نعمة، مش نقص.
وأجمل رد على اللي يبعد عنك، إنك تكمل حياتك بثقة، وتدي حبك وتقديرك للي فعلاً يستاهل.
متقفش عند اللي راح، لأن ربنا دايمًا بيعوض بخير وأجمل."

✍️
شروق الفايد

30/09/2025

❤️❤️

27/09/2025

طول عمرنا اتعلمنا في النحو حاجة اسمها "الماضي المستمر"
ولما كبرنا اكتشفنا إن في حياتنا برضه في ماضي مستمر..
مواقف وذكريات مش بتموت،
وأحداث بتحصل وتفضل جواك، كأنها لسه شغالة، ما خلصتش ولا انتهت.
هو إحساس أو لحظة اتزرعت جواك ومكمل معاك مهما فات الزمن.
ساعات بيكون وجع، وساعات بيكون حنين، وساعات بيكون حاجة حلوة بتتكرر كل ما تفتكرها.

لكن الحلو إنك تقدر تختار إزاي تعيش معاه..
إما يكون حمل يوجعك، أو درس يقوّيك ويخليك تكمل أقوى

✍️
شروق الفايد

23/09/2025

22/09/2025

متلازمة جوسكا؟
هي إن دماغك تفضل شغّالة طول الوقت في حوارات وسيناريوهات مش موجودة، بتتخيل مواقف وترد عليها في دماغك، تعترض أو تناقش كأنك عايشها بجد، وده ساعات بيكون مرهق جدا
إمتى الموضوع يبقى مزعج؟
لو الحوارات دي بتخليك قلقان أو متوتر طول الوقت.
لو بقيت مش عارف تركز عشان دماغك مشغولة بيها.

لو بتهرب من الناس وتفضل لوحدك.

لو بتحس دايمًا باكتئاب أو ذنب أو إحباط.

لو نومك اتلخبط من كتر التفكير.
🧠 طيب بتحصل ليه؟

ضغط نفسي أو مواقف صعبة مريت بيها.

إحساس بالوحدة أو إن مفيش حد بيسمعك.

شخصية انطوائية أو صعوبة في التعبير عن نفسك.

ساعات بتكون مرتبطة بالقلق أو الاكتئاب.
عدم تعزيز الثقه والتقدير وكثره الانتقادات من الأهل دايما

✍️
شروق الفايد

19/09/2025

💔✨ صدمات التعلّق (Attachment Trauma) ✨💔

الصدمات اللي بتحصل في علاقاتنا الأولى (مع الأهل أو الأشخاص الأقرب لينا) بتأثر بشكل عميق على شخصيتنا وطريقة تعاملنا مع الدنيا.

🔹 صدمات التعلّق ممكن تظهر في:

خوف مبالغ فيه من الهجر أو الفقد.
صعوبة في الثقة بالآخرين.
احتياج شديد للاهتمام والاحتواء.
علاقات غير مستقرة مليانة قلق وتوتر.

وأحيانًا نحس إننا مش "كفاية" أو إننا لازم نثبت نفسنا عشان نستحق الحب.
الجرح اللي اتعمل في الطفولة ممكن يتعالج.. بالعلاج النفسي والدعم الصح نقدر نعيد بناء ثقتنا بنفسنا ونعيش علاقات صحية أكتر.

🌿 التعلّق مش ضعف.. هو إنسانية، والصدمات مش نهاية.. هي بداية للتعافي.
✍️ شروق الفايد

13/09/2025

🌀 اضطراب ما بعد الصدمة (Post Traumatic Stress Disorder - PTSD)

في مواقف صعبة في حياتنا بتعدي وتسيب جرح عميق جوا الروح.. جرح مش باين للعين، بس صاحبه عايش بيه كل يوم.
ده اسمه "اضطراب ما بعد الصدمة".

👈 الناس اللي عندهم الاضطراب ده بيكونوا اتعرضوا لحاجة قوية فوق طاقتهم:
حوادث، فقدان شخص قريب، اعتداء، حرب، أو حتى أحداث عنف وصدمات في الطفولة.

الأعراض بتبان إزاي؟

ذكريات مؤلمة: الشخص ممكن يعيش الحدث من تاني كأنه لسه حاصل دلوقتي (فلاش باك/كوابيس).

تجنّب: يبعد عن أي مكان أو شخص يفتكره باللي حصله.

يقظة مفرطة: قلق مستمر، نوم متقطع، إحساس بالخطر حتى من غير سبب.

مشاعر سلبية: ذنب، خوف، خجل، أو إحساس إنه "مش نفسه".

تخيل إن عقلك وقلبك واقفين عند اللحظة دي، ومش قادرين يتخطّوها.

بس الأكيد إن فيه أمل
العلاج النفسي بيساعد جدًا:

العلاج المعرفي السلوكي (CBT).

العلاج بالتعرض التدريجي.

أحيانًا أدوية تخفف القلق والاكتئاب.

والأهم إنك تحس إنك مش لوحدك.

لو بتعاني من الأعراض دي، اطلب المساعدة من متخصص. الصدمة مش معناها إنك ضعيف، بالعكس.. معناها إنك إنسان اتعرضت لشيء صعب جدًا ولسه بتقاوم.

✍️ شروق الفايد