01/02/2025
بوست مجمع
لعدسات اللاصقة الطبية و التجميلية (بالشرح و الصور)
تتعامل معاها ازاي؟
1- التزم بصلاحية العدسة المحددة يعني العدسة ال3 شهور تقعد 3 شهور بس مش سنة او لغاية ما تتقطع ! و التزم بمدة الارتداء اليومية في عدسات بتتلبس 12 ساعة و فيه ممكن تتلبس 7 ايام متواصلين ! اعرف من دكتورك و اطلب منه اللي يناسبك
2- قبل ارتداء العدسة
اغسل ايديك كويس جدا بالصابون و نشف ايديك كويس جدا و اعرف ان البقايا علي ايدك يا هتدخل عينيك مع العدسة يا اما هتخلي العدسة تلزق في ايدك و تصعب الموضوع , لو بتسعملي اي مرطبات للجلد تتحط بعد ارتداء العدسات مش قبلها
3-ارتداء العدسة
دايما ابدا بنفس العدسة اليمين او الشمال عشان ميتلخبطوش , بالاصبع السبابة ( الصابع التاني ) طلع العدسة من الحافظ و حطها في راحة اليد و اغسلها بالمحلول الطبي ( اسال دكتورك عن النوع الافضل) و خليها علي الاصبع السبابة و بالوسطي بتاع نفس الايد هتشد الجفن اللي تحت لتحت و بالايد التانية ترفع الجفن العلوي و هوب تركب العدسة فوق القرنية و ترمش اكتر من مرة ( لو العدسة مخصصة للاستجماتيزم او عدسة توريك تاكد ان الجزء الاتخن هو اللي لتحت عشان الرؤية تبقي كويسة من البداية )
4- خلع العدسة
للعدسات العادية بص لفوق او الجنب و بالرحة المس العدسة و اسحبها ناحية بياض العين و بالابهام و السبابة امسكها و شيلها
للعدسات الالي بتسمح بمرور الغازات بشد الجفون و الجلد ناحية الاذن بالراحة و تحط راحة الايد قدام العين و ترمش و العدسة بتنط لوحدها في راحة الايد ( عدسات صلبة للقرنية المخروطية)
5- غسيل العدسات
خطوة مهمة جدا لازم تستخدم محلول متعدد الوظائف ( اسال دكتورك عليه) او اكتر من محلول كل واحد بيكون له وظيفة معينة
الشركات بتقول ان مجرد " شطف العدسة كفاية" لكن التجارب بتقول لازم " تتدعك"
لازم يوميا العدسات تتنضف و تتدعك و تتشطف بكشل مناسب
6- النفس الامارة بالسوء!
اوعي الشيطان يوزك انك تغسل العدسات بمية الحنفية و تلبسها تاني كل انواع المية حتي لو معدنية و مغلفة بيكون فيها ميكروبات و مش هتنضف البقايا بتاعت الزيوت اللي الدموع بترسبها علي العدسات طبعا ابدا متنزلش بحر او حمام سباحة او تستحمي بالعدسات
و بعيدا عن سعادتك الناس اللي بيمسحوا العدسات بتاعتهم بلسانهم او يرطبوها في بقهم و بعدين يلبسوها ( دول ليهم مكان مخصص في الجحيم باذن الله)
7- العلبة
العلبة اللي بتحفظ فيها العدسة لازم تتنضف علي الاقل كل ليلة و تتغير العلبة كل 3 شهور حتي لو بتتنضف و تتشطف بالمياه و الصابون و تتغسل كويس و تتنشف و بعدين يتحط فيها العدسات و المحلول
8- لو العدسة مخلياك مش مرتاح
غالبا ده بيكون بسبب اتربة او شوائب تحت العدسة او لما تتلبس بالعكس او لما تكون قدمت او المحلول بايظ
لو حصل اغسلي ايديكي اقلعي العدسة و اشطفيها و البسها تاني
لو استمر الموضوع لازم العدسة تتقلع و تتغير و لو استمر الالم بعد خلع العدسات ارجع للدكتور فورا!
9- الشباب و المراهقين ممكن يلبسوا العدسات بس بشرط انهم يلتزموا بالتعليمات و يكونوا بعدي عن الاتربة في اماكن الدراسة او الشغل
و الافضل ليهم العدسات اليومية اللي بتجي 30 عدسة مع بعض و كل واحدة بتتلبس يوم واحد و تترمي عشان هنا مش محتاجين نغسل العدسات او نلبسها فترة اطول من اللي تستحمله
10- للاخوات الفاضلات بتوع الماكياج و الاخوات الفاضلات المايكاب ارتيست
العدسات اللينة تتحط قبل ما يتحط الماكياج
العدسات المسربة للغاز ( بتاعت القرنية المخروطية) تتحط بعد المكااج
في اي حالة لازم العدسة تتشال الاول قبل ما يتشال الماكياج
الكحل و الاي لاينر و المسكرا تكون انواع نضيفة لا تسبب حساسية و لا تحتوي علي معادن لانه هتعمل مشاكل في العين و تصبغ العدسة
الماكياج يتغير كل 3 شهور بعد فتحه
المكياج يكون من برة و ميلمسش جذور الرموش او او حافة الجفن
11- الرياضات و العدسات
العدسات افضل من النضارات لكل محبي الرياضات و اسهل و بتدي رؤية افضل و امان اكتر
الا السباحة حتي مع نضارات السباحة العدسات لما بتتبل متبقاش كويسة و ممكن تلزق او تبقي صعبة الخلع و لو حصل يستحسن تنقط محلول ملح في العين عشان يسهل خروجها
12- العدسة و النضارة
العدسة و النضارة لا يفترقان
حتي مع لبس العدسات لازم يكون عندك نضارة جاهزة بمقياس جديد و تلبسها في اي وقت مش لابس فيه العدسة و افتكر ان قبل ما تعمل مقياس النضارة او تفكر تعمل ليزك لازم تقعد 3 ايام من غير لبس عدسات و البس نضارة شمس مع العدسات عشان تحمي نفسك من 99% من الاشعة فوق البنفسجية بالذات في وقت السواقة في الشمس
13- العدسات العجيبة اللي بشكل عين قطة او عين تعبان او سمايلي فيس او انا باحب رامبو مطبوع عليها مش وحشة لكن اتاكد ان طالما هتلبس عدسة عجيبة علي لااقل متضرش عينيك و هاتها علي مقاسك مهيش ناقصة اذية ان عينك تكون شبه التعبان و كمان حمرا و ملتهبة
14- العدسات و الكومبيوتر و الموبايل
نفس الكلام في البوستات التانية اللي قبل كده ( انزل شوفها تحت ) افتكر بس ترمش كل شوية و طبق قاعدة العشرين 20 بوصة مسافة بين العين و الشاشة و كل 20 دقيقة بص لمدة 20 ثانية علي حاجة علي بعد 20 قدم
15- النصيحة الاخيرة
اكشف قبل ما تلبس عدسة و خلي الدكتور يجيبهالك ( عايزين ندفع الايجار 🤣🤣💎💎💰💰 )
بلاش الشراء من محلات النضارات او الصيدليات او طبعا الاخوات الكوافيرات و لا محلات شارع الجلاء اللي بتبيع عدسات هايفة و نانسي ب 10 جنيه الجوز
العدسة السيئة او البايظة او المصنوعة تحت السلم ممكن تؤدي الي العمي
و ممكن تاخد رجلك لمستفي رمد المنصورة الدور الرابع تشوف بنفسك
حتي لو هتشتري العدسات اون لاين او من مكان ثقة اكشف الاول و اكشف بشكل دوري و متستخسرش في عينيك و جرب العدسات اليومية قبل ما تشتري السنوية لان ممكن عينيك متتقبلش العدسات اصلا
اعتقد ده كل ما يخص العدسات و يهمك
الصور تحت بترتيب ارقام البوست
الموضوع تم ترجمته من عدة صفحات اهمها
www.webmd.com
د.أحمد عبد الهادي عرمه
استشاري طب و جراحة العيون
عضو كلية الجراحين الملكية بادنبره
الاستعلام و للرد علي الاستفسارات
01094509480
0502254403
العيادة : المنصورة - ش الترعة امام البنك الاهلي - برج الحرمين الدور السادس
