24/11/2024
تنبيه هام
ينتشر حاليا بشكل ملحوظ مرض الجديرى المائي
ويوميا لازم اشوف حالتين عالاقل
البوست ده مهم علشان تعرفوا شكل المرض واعراضه
و تتوجهوا لاقرب دكتور اطفال ليكم لو ظهرت العلامات اللي ف البوست
الجديرى المائي
اشرس الفيروسات التى تصيب الجلد
المرض فيروسي
بيبدأ بحبوب بسيطة جدا فى الجلد بس بيبتدى الموضوع يتطور وتبتدى الحبوب تتملى زى المياة وبتشبه الفقاقيع
بعد كدة بيكون شكلها شبه الدمامل وبتعمل قشرة سوداء فى نهاية تكوينها
المرض معدى جدا جدا عن طريق العدوى المباشرة بلمس الجزء المصاب او عن طريق استخدام الادوات الشخصية الملوثة
يجب التوجه للطبيب فور ظهور الحبوب و الفقاقيع وارتفاع درجة الحرارة
غالبا بيكون الطفل مصاب وقتها باعراض رشح خفيفة
العلاج عبارة عن كالالمين لوشن ومضاد للهيستامين لان الطفل بيشعر بحكة جلدية مؤلمة
واحيانا بنحتاج مضاد حيوى لو يوجد مضاعفات تانية زى التهاب صديدى بالحلق مثلا
يجب تجنب استحمام الطفل بماء ساخن او باستخدام الليفة
ولكن يمكن استحمامه بماء فاتر فقط بدون ليفة مع تجنب فرك الجلد بشكل واضح تجنبا لانتشار المرض بالجسم اكتر
العدوى مستمرة لفترة تتراوح من اسبوعين الى 3 اسابيع
لذلك يجب ان الطفل يقعد من الحضانة او المدرسة لانه ممكن يعدى كل اللى هناك ودى امانة ربنا هيحاسب الام عليها لو سابته يروح وهوا تعبان ويعدى غيره
يجب ان الطفل ياخد اسبوعين اجازة مبدئيا ويكون معزول عن اخواته فى البيت
يلتزم بالعلاج المقرر
ليه ادواته الشخصية بتاعته وبس معلقة و كباية وطبق وفوطة
التطهير بالديتول لأيد الام او الاب او اى حد بيتعامل مع الطفل
بعد اسبوعين الدكتور يبص عالطفل تانى وميرجعش يمارس نشاطاته فى المدرسة او الحضانة او الاختلاط بغيره الا بعد نزول اخر قشرة سوداء من الحبوب اللى على جسمه
الجديرى يترك بعده اثار بسيطة فى الجلد بتروح مع الوقت
والطفل بياخد بعدها مناعة منه طول العمر
يا رب يكون الموضوع مفيد
اسألكم الدعاء بالنجاح والتوفيق
د – محمد الغريب
