Tito 4 Wellness, Masr (2025)

12/12/2021

حالة الفابريكا (٣)
طريقة سهلة لضبط كميات الأكل

بعد ما ظبطنا مواعيد الأكل ونوعياته في البوستين اللي فاتو👇
https://m.facebook.com/story.php?story_fbid=10158461521859327&id=531954326

دلوقتي حنظبط الكميات، وطبعا أشهر طريقة لضبط الكميات هي حساب السعرات، بس أنا عارف ان اللي بيحسبو سعراتهم قليلين والناس مش بتحب تحسب وتوجع دماغها، عشان كده جبتلك الطريقة السهلة جدا لضبط كمية وجباتك..

الطريقة تعتمد على حاجتين:

١. الوجبة عبارة عن طبق.. ٢. الطبق نصه بروتين
طب والنص التاني؟ حسب هدفك، لو انت رياضي او نحيف تحط كارب نضيف زي الطبق الأول نصه ١٥٠ جرام صدور فراخ والنص التاني ١٥٠ جرام كينوا، أما لو نسبة دهونك عالية تبقى مش محتاج كارب ولا نضيف ولا حقير، زي الطبق التاني نصه ١٥٠ جرام كبدة والنص التاني أفوكادو وممكن تبدل الأفوكادو بالسلطة او خضروات سوتيه مشكل او مشروم او بروكلي وقرنبيط..

مسموح ليك خارج الطبق إضافة طبق شوربة وثمرة فاكهة وطبق سلطة ومشروب لو تحب..

النظام ده تجسيد لنظام الPE diet اللي اخترعه د. تيد نايمن وملقيتش حد فاهمه في مصر غير دكتور وعد أمين ونقلته بكل أمانة علمية، أنا شرحته بالتفصيل في بوست قديم، وهو يعتبر الدايت المفضل بالنسبة لي.. 👇
https://m.facebook.com/story.php?story_fbid=10158309554549327&id=531954326

اهتمامك ان البروتين يكون نص الوجبة (في الكتلة مش في السعرات) معناه إن:
١. مفيش وجبة خالية من البروتين، لازم مصدر بروتين حيواني او نباتي كل وجبة، عشان كده رفضنا البسكوتة والبقسماطة والموزة عشان دول مش وجبة، الفروت سالاد مش وجبة، الكيكة مش وجبة، كيس الشيبسي مش وجبة، كل دول سناكس فارغة مش حتديك غير سكر والتهابات، متفتحش بؤك إلا على وجبة كاملة نصها بروتين..
٢. البروتين أهم حاجة في أكلك، هو اللي حيحافظ على عضلاتك ويعالج التهاباتك وحيساعدك تحرق دهونك والدراسة دي بتثبت كل الكلام ده👇
https://doi.org/10.1093/ajcn.82.1.41
٣. البروتين بيستهلك منك سعرات في هضمه اكتر من أي أكل تاني وده اللي بيسموه التأثير الحراري للأكل thermic effect of food..

كده خلصنا ال٣ خطوات عشان ترجع جسمك لحالة الفابريكا، جرب تنفذهم زي ما حكينا، حدد مواعيد أكلك بالتايمر واختار نوعية الأكل النضيف واظبط الكمية بالشكل اللي حكيناه وشوف النتيجة..

09/12/2021

هل الكارب أساسي في حالة السمنة وزيادة الوزن؟

شرحنا البوست اللي فات ان الكارب أساسي للنحيف والرياضي لأنه مصدر الطاقة الأساسي والوحيد عشان مفيش عندهم دهون كمصدر طاقة بديل👇

https://m.facebook.com/story.php?story_fbid=10158457185484327&id=531954326

لكن بالنسبة للناس اللي عندهم نسبة دهون عالية واكتر من عشرين تلاتين كيلو دهون زائدة في الجسم وهي طاقة متخزنة، هل محتاجين طاقة إضافية من الكارب؟

رأيي ان فيه علاقة عكسية بين نسبة دهون الجسم وبين الاحتياج للكارب.. يعني كل ما تزيد دهونك كل ما يقل احتياجك للكارب، بمعنى آخر أي حد عنده نسبة دهون (٢٠٪ فأكثر للرجالة و٢٥٪ فأكثر للستات) مش محتاج كارب، وطبعا مش حتقدر تعرف نسبة دهون جسمك إلا لما تعمل انبودي في أي جيم قريب منك (راجع )..

طب أنا عملت انبودي ولقيت نسبة دهوني عالية و٢٠ كيلو دهون زيادة.. يبقى سيادتك مش محتاج كارب (بمعنى نشويات وسكريات) لغاية ما توصل لنسبة الدهون المعقولة (مش الوزن المثالي)..

قولي كده الكارب فيه ايه مش موجود في غيره؟ الطاقة؟ عندك دهون كتير حتديك طاقة.. الألياف؟ موجودة في الخصروات والفاكهة (ده لو كنت بتاكل الحباية الكاملة أصلا).. فيتامينات B موجودة في الخصروات واللحوم.. أي حاجة في الكارب النشوي ممكن تلاقيها بره عشان كده بقولك مش أساسي والحياة ممكنة جدا من غيره..

هل لازم نقطع مصادر الكارب كلها؟ مستحيل نقطع الكارب ١٠٠٪ عشان معظم الأكل فيه نسبة كارب، لكن المطلوب قطع النشويات المكررة اللي تعتبر أسوأ أنواع الكارب (سكر عيش رز مكرونة مخبوزات...)، وكذلك الحبوب حتى الكاملة، يعني حتقطع الاتنين: و والإبقاء على مصادر الكارب من الألياف زي الخصروات والفاكهة مع تحديد كمية الفاكهة لثمرة واحدة مع كل وجبة.. الخضروات والفاكهة فيهم كارب (نشا) قليل لكن محتوى ألياف عالي وده مطلوب جدا للإشباع ولدعم الجهاز الهضمي..

هنا حتظهر مشكلة أعراض الانسحاب اللي كله خايف منها وبيسموها "الحرمان".. وده طبيعي لما يكون واحد بقاله ٣٠ او ٤٠ سنة كل يوم بياكل سكر وحلويات وعيش ورز ومكرونة وفجأة نقطع كل ده مرة واحدة حيصدع ويتعصب ومزاجه حيبوظ، وقد يظن ان الأعراض دي دليل على إنه فيه حاجة غلط وان الجسم محتاج كارب بشكل أساسي عشان يعيش.. لكن الحقيقة انها أعراض انسحاب مؤقتة وبتروح، بعد كده بتخش في حالة صفاء ذهني وراحة بعد ما الجسم بيتعود على حرق الدهون كمصدر للطاقة بدل السكر..

المدخن لما بيبطل تدخين بيحس بنفس الأعراض.. هل معنى كده ان السجاير أساسية للحياة؟ لأ طبعا لكنها اعراض انسحاب من اي حاجة اتعودت عليها، راجع بوست الحرمان👇
https://m.facebook.com/story.php?story_fbid=10158451089264327&id=531954326

الغرض من قطع الكارب وتحمل أعراض الانسحاب هدفين أساسيين: الأول القضاء على مقاومة الانسولين، عشان نرجع الجسم لحالة الفابريكا، ولو حساسية الانسولين اتظبطت كل حاجة تانية حتتظبط: الكبد الدهني حيخف والدهون حتتحرق وهرمونات الجوع والشبع حترجع لوظيفتها الأصلية حتى هرمون النمو GH المسئول عن النضارة حيرجع لمستواه الطبيعي.. الهدف التاني من قطع الكارب هو وقف حالة الإدمان اللي بتزيد باستمرار كل يوم بشكل بطيء متراكم، كل يوم الكميات بتزيد والشراهة للسكر والحلويات بتزيد وده نذير خطر جدا لازم توقفه بقرار حاسم قبل المصيبة ما تحصل وتضطر توقفه بتعليمات الطبيب..

هل حنفضل قاطعين كارب طول الحياة؟ فيه ناس عملت كده وارتاحت وكملت، وفي رأيي ممكن نقطع فترة أقلها ٣ شهور وممكن تمتد ٦ شهور او سنة او اكتر حسب نسبة الدهون ومقاومة الانسولين، ومجرد ما بتوصل نسبة الدهون لدرجة معقولة ومقاسات الهدوم كلها تتظبط وحساسية الانسولين ترجع لحالة الفابريكا، هنا بس ممكن نرجع الكارب تاني..

يعني لما نسبة الدهون تتظبط حرجع اكل عيش ورز وحلويات تاني براحتي؟ 🙋 احب اقولك للأسف دول بالذات لأ عشان هما دول اللي بوظوك في الأساس، ترجعلهم تاني ليه؟ عشان تفضل زي اليويو؟ (تخنا ياللا نخس- خسينا ياللا نتخن تاني)، انت حتصحح اتجاهاتك القديمة اللي اثبتت فشلها، وحتدخل بكميات قليلة، وصدقني بعد ما تتعالج من إدمان الكارب الحقير مش حتحب ترجعله تاني أبدا، ولا بكميات صغيرة، مفيش مدمن اتعالج من الهيروين رجع ياخده بكميات صغيرة..

وكمان سؤال معلش.. ليه شايفين الكارب حبوب بس؟ يعني ليه القمح والرز هما أساس الكارب عندنا؟ على فكرة كل الخضروات والفواكه كارب بردو بس مليان ألياف أكتر من السكر والنشا زي ما حكينا.. أنا شايف الحبوب أنسب طعام للطيور وبعض الحيوانات، لكنها غير مريحة للإنسان خالص وكل اللي قطع كارب وبالذات الرز الابيض ومنتجات القمح زي العيش والمكرونة والمخبوزات حس براحة في الهضم مكانش بيحسها قبل كده.. القمح اللي موجود دلوقتي مليان جلوتين وده حاجة مرهقة جدا للجهاز الهضمي وبيصعب هضم وامتصاص عناصر كتير، والرز البني كذلك فيه زرنيخ بنسب صغيرة، وده يعتبر سام للبشر لو استهلك بكميات كبيرة..

حد حيفكر دلوقتي طب طالما مش حناكلها ربنا خلقها ليه؟ سؤال وجيه.. بس هل أي حاجة ربنا خلقها لازم ناكلها؟ طب ما ربنا خلق البرسيم بردو 🤭 وخلق نباتات وحيوانات كتير مينفعش ناكلهم.. كل كائن حي ليه دور في الحياة بعيد عن كروشنا😀..

01/12/2021

القصب ولا السكر؟

عايزك تفكر معايا اجدادنا زمان قبل اختراع السكر كانو يروحو الغيط بتاع القصب وكل واحد يقطع عود قصب ويقشره ويقطعه قطع صغيرة حجم البونبوني ويقعد يمصمص فيه..

بالنسبة لمعايير دلوقتي العملية دي مرهقة جدا
بتتحرك لمكان القصب وبترجع منه للبيت، عشان صعب القصب يتخزن عندك في البيت عشان بيبوظ بسرعة وبيلم حشرات، ولازم جهد بدني من تقشير قشرة عنيدة وتقطيع، حتى عملية المضغ والمص دي مش سهلة وممكن تعورك لو مش مركز، شوف انت حرقت طاقة اد ايه عشان شوية سكر في عملية صعب تكررها كل شوية، وتلاقي ايدك لزقت بعد ما تخلص يعني محتاج تاخد دوش بعد كل مرة تستمتع بطعم السكر اللي في القصب..

دلوقتي الإنسان اختزل فدان القصب ده في كيس سكر أبيض رخيص وموجود في كل بيت وصلاحيته ممتدة إلى أبد الآبدين.. وسهل الاستعمال جدا هي معلقة وانت نايم عالكنبة.. ويتحط على أي حاجة وكل حاجة.. وبقت الحياة كلها سكر سكر سكر..

السكر ده أحقر اختراع عمله الإنسان، ومتقوليش نعمة ربنا، ده كارثة صناعية بشرية، أحقر من الهيروين، المخدرات كلها كان مصدرها نباتات بردو، عالأقل الهيروين نادر وغالي، السكر بيسبب الإدمان اقوى من المخدرات، راجع بوست النملة👇
https://m.facebook.com/story.php?story_fbid=127173873081690&id=103984808733930

السكر بسبب رخصه وإتاحته دي بقت الناس بتسفه بدون حساب، حتى الفقراء اتعلمو الإسراف بسبب السكر.. هو سبب كل المشاكل الصحية في الزمن ده، معظم التهابات جسمك والأمراض الملازمة لأبوك وأمك من سنين سببها الأول السكر..

عايزك تكرهه وتكره الناس فيه وتتأكد ان اللذة اللي بيسببهالك دي شوية دوبامين.. نفس احساس النشوة عند المدمنين بعد تعاطي المخدر، لكن أثره بيتراكم جوه دمك ويسبب إدمان اكتر والتهابات اكتر.. والنتيجة النهائية "عضمي كله مكسر يا دكتور"..

29/11/2021

هل أنت نملة؟

كان فيه مرة شيف شغال في مطعم وبيعمل أكل جميل والناس بتحبه، وكان بيجيله تقريبا ١٠ زباين يوميا، مرة شيف تاني في مطعم تاني نصحه يجرب يضيف سكر بنسبة معينة على كل حاجة، على خلطة الكفتة وتتبيلة الفراخ وعلى الصوصات وحتى على الطحينة ويشوف النتيجة.. النتيجة كانت مذهلة.. العشر زباين في فترة قصيرة بقو ١٠٠ والمطعم فتح فرع واتنين والمطعم كسب وكبر واشتهر..

النتيجة واضحة ومعروفة، وهي ان البشر زي النمل حطلهم سكر في أي حاجة حيتلمو ويزيدو ويجيبو بعض.. وده بالظبط اللي عملته الشركات الكبيرة بس بعلم أوسع وتجارب اكتر وخبرة تسويقية أعمق..

أي منتج دلوقتي حتلاقي فيه سكر، عنصر الإدمان رقم واحد متفوقا على الهيروين، السكر بيحطوه بنسبة محسوبة جدا ومعمول عليها بحوث، عشان يوصلوك لل bliss point، اللي هي ذروة الانتشاء بالسكر بدون ما تحس انه محتاج يزيد او ينقص.. هي دي اللي بتخليك تشتري المنتج بتاعهم مرة واتنين وألف، عشان عرفو يحولوك لمدمن وانت بتاكل ومبسوط ومش دريان..

الشركات الأمينة بتعترف وبتقولها بصراحة وقحة.. ولو بصيت في المكونات حتلاقي السكر ما شاء الله مش اقل من نص كتلة المنتج (حتلاقي في كل ١٠٠ جرام من ٣٠ ل٥٠ جرام سكر تقريبا)..

الشركات الحقيرة فهمو ان فيه ترند صحي مضاد للسكر، عشان كده حيضحكو عليك بشعارات زائفة زي
بدون إضافة سكر no added sugar، ولو بصيت في المكونات مش حتلاقي كلمة سكر بس حتلاقي اخواته الصغيرين زي فركتوز وسكرالوز ولاكتوز وعفركوز وأي حاجة اخرها اوز ومحدش فاهم حاجة، والاسبرتام ده قصة لوحده..

طب ايه الحل؟ متبقاش نملة وخليك سيد قرارك واقطع السكر زي ما حكينا قبل كده 👇
https://www.facebook.com/103984808733930/posts/104489858683425/

ووفر فلوسك ومتشتريش أي حاجة متغلفة في كيس او علبة من الشارع، عشان انت بتشتري كيس التهابات زي ما حكينا في البوست الملتهب اللي فات👇
https://m.facebook.com/story.php?story_fbid=126843049781439&id=103984808733930

خليك زبون نفسك واتعب نفسك شوية وجهز أكلك في بيتك وخده معاك، ومتتحوجش أبدا لأي كشك أو أكل شارع رخيص..

لو اضطريت تجيب اي حاجة من بره خليك ناصح وسيبك من المكتوب على وش العلبة، ده كله كلام تسويقي بيضحكو بيه على الزباين، اقلب العلبة واقرا المكونات والمعلومات الغذائية، لو لقيت مكتوب فيها سكر او زيوت نباتية (وده بنسبة ٩٩٪) مترجعهاش عالرف، لأ ارميها في الزبالة😑..

28/11/2021

عايز يجيلك التهاب؟

فيه موقفين عايزين نركز عليهم: كريستيانو رونالدو لما رمى ازازة الكولا من أدامه في المؤتمر الصحفي.. وبيج رامي لما ظهر في فيديو بيقول ان الكوتش بتاعه مانعه ياكل العيش البلدي.. عايزين نفهم بس، يعني كريستيانو ده محتاج طاقة عالية جدا يوميا ولازم يستهلك كارب كتير.. ايه المشكلة لو شرب ازازة كولا؟ مش حتديله طاقة وهو محتاج طاقة؟ بيج رامي اللي محتاج يوميا ٦٠٠٠ كالوريز، حيحصل ايه لو أكل رغيف عيش ٣٠٠ كالوريز؟ هل ازازة الكولا او رغيف العيش حيتخنهم؟

اكيد كريستيانو ورامي مش خايفين يتخنو😑.. هما خايفين من حاجة احنا مش بنحطها في اعتبارنا خالص.. الالتهاب

الالتهاب هو أساس أي إصابة أو مرض.. واللي بيسبب الالتهاب عن طريق الأكل حاجة من اتنين او الاتنين مع بعض: النشويات المكررة والدهون المتحولة.. وما أكثرهم في الأكل بتاعنا.. النشويات المكررة أنا بسميها كارب حقير وحتلاقيها في البوست ده 👇
https://www.facebook.com/103984808733930/posts/104228618709549/

والدهون المتحولة أنا مسميها دهون حقيرة وحتلاقيها في البوست ده 👇
https://m.facebook.com/story.php?story_fbid=10158414631114327&id=531954326

لو لقيت لاعب محترف بيضرب سكر وحلويات عادي أثناء الموسم تأكد ان إصاباته كتير.. هي دي اللعيبة اللي بتقع وتمسك رجلها من غير ما حد يلمسها (عمرك شفت كريستيانو عمل كده؟) اكيد عمره ما عملها عشان محرم السكر على نفسه وهو عنصر الالتهاب الأول..

كذلك بيج رامي فاهم كويس ان العيش اللذيذ الملهلط ده نشويات مكررة لو أكله حتكون نتيجته التهاب في مفصل او وتر او رباط او عضلة، التهاب معناه راحة اجبارية وعلاج وتأهيل، يعني من الآخر البطولة راحت..

طبعا انت معندكش بطولة.. ويمكن تقول لنفسك ناكل ونتبسط ومش مهم شوية التهابات نستحملهم، والمهم ناكل أكل لذيذ ورخيص ونصرف على أي حاجة إلا صحتنا.. لو دي دماغك براحتك طبعا، بس خد بالك التهاب ورا التهاب جسمك مفاصله بتشخلل، وكل ما تيجي تقوم او تعمل حركة ما بتحس بوجع وإرهاق من أقل مجهود ودي أعتقد ميصحش تكون حياة حد في التلاتينات..

يا ريت تراجع بوست الأكسدة عشان الصورة توضح اكتر👇

https://m.facebook.com/story.php?story_fbid=10158416469409327&id=531954326

ده لينك دراسة من عشرميت دراسة بتربط بين استهلاك السكر والنشويات المكررة وزيادة التهابات الجسم👇
https://doi.org/10.3945/ajcn.111.013540

19/11/2021

الفرق بين الحباية الكاملة والمكررة

تخيل لو جبت بيضة نية وفتحتها وطلعت الصفار والبياض ورميتهم في الزبالة، وخدت القشرة طحنتها وأكلتها.. تقدر توصف ده بإيه؟ جنان وجهل وإهدار موارد..

ده بالظبط اللي بيحصل في الحبوب (القمح والرز)، بياخدو القمحاية والرزاية الكاملة ويشيلو القشرة (النخالة) Bran ويطلعو منها النواة Germ ويرمو الاتنين (اللي على شمال الصورة) او يحرقوهم وهما اللي فيهم كل المغذيات والألياف وفيتامينات B والبروتين والمغنيسيوم، وياخدو الجنين الأبيض اللي جوه endosperm اللي بيسموها السويداء (على يمين الصورة) وهي عبارة عن نشا يعني سكر خام..

السويداء بتاعت القمح بتطحن ويطلع منها الدقيق الأبيض اللي بيتصنع منه تنوع رهيب من منتجات لا حصر لها أشهرها العيش والبسكوت والمكرونة وكل منتجات المخابز والحلويات.. السويداء بتاعت الرز هي الرز الأبيض اللي بيشكل البديل التاني لمنتجات القمح في البيت المصري.. والاتنين بيشكلو اكتر من نص أكل المواطن العادي..

تخيل نص أكلك قشر بيض، صفر مغذيات، سكر صرف، طاقة رهيبة، إشباع ضعيف، سكر الدم في السما، والانسولين بيجري وراه طول اليوم..

بمجرد ما بتتم عملية التكرير دي الحباية بتفقد ٨٠٪ من المغذيات، وبتتحول من بذور كاملة يعني غذاء مفيد وصحي ومشبع وبيقلل الكوليسترول الضار ويقلل عوامل أمراض السمنة والسكر والقلب إلى العكس تماما: أكل مصنع processed بيرفع احتمالات الإصابة بالسكر وأمراض القلب، ومن أكبر العوامل المسببة للالتهابات..

للأسف الشديد لو سألت أي شخص عادي، ايه هي النشويات مش حتلاقي إجابة غير العيش والرز والمكرونة، بالظبط كأنك سألت واحد ايه معلوماتك عن البيض ويقولك قشر ابيض ناشف.. عمره ما شاف البياض والصفار، عشان من ساعة ما اتولد أهله مش بيأكلوه غير قشر البيض..

17/11/2021

الأكل مصلحة مش عاطفة

طول ما فيه عاطفة بينك وبين الأكل عمرك ما حتفلح، ومفيش دايت حينفع معاك، وحتى لو بدأت دايت شوية حيوحشك الأكل اللي بتحبه حتضعف وحترجعله بلهفة وشوق وحنين وحتبوظ كل حاجة وترجع اتخن من الأول.. عشان كده من ضمن أهدافي اني أكرهك في الأكل..

تخيل لو واحد قتل أبوك هل حتقدر تحبه؟ ده كمان شل عمك وأسر خالاتك وعماتك وأمك شخصيا، أي حد أبوه مات وهو صغير يعرف ان الأكل ونمط الحياة هو السبب الأول في وفاته، وحتى لو ابوك لسه عايش ووصل ٧٠ او ٨٠ الأكل هو السبب انه ماشي بشنطة ادوية من الأربعينات ومش عارف يستمتع بالنص التاني من حياته، الأكل هو السبب ان امك بتصلي عالكرسي بقالها عشرين تلاتين سنة، الأكل هو سبب تدهور الصحة العامة والخاصة، يا ترى ايه السبب الأول ورا أمراض القلب والكلى والضغط والسكر في العالم كله؟

الطب ما شاء الله تقدم اوي، وفي الغالب حيلحقك قبل الأكل ما يقضي عليك، وحيعملك دوا يوسع الشرايين، ودوا يظبط الضغط، ودوا ينزل السكر، ومليون دوا لكل كارثة حيعملها فيك الأكل، الطب مش حيسيبك تموت بسهولة.. بس حيخليك طول حياتك عايش أسير الحباية، هي العيشة دي ترضيك؟

تخيل لو كان عندك اختيار في اول حياتك ما بين تعيش متوازن وصحي ومبسوط طول حياتك ولا تعيش مسرف ٤٠ سنة والباقي مرض وألم وأدوية وعمليات؟ حتختار ايه؟

عايزك تبص للأكل نظرة المصلحة مش نظرة حب، مصلحة يعني حاخد منه اد ايه بروتين وكارب ودهون عشان استفيد واحقق هدفي، لكن الحب اللي انت دايب فيه ده تأكد انه من طرف واحد، هو مش بيحبك خالص على فكرة واحتمال يقضي عليك زي كل اللي قبلك..

احنا مش بنتكلم في القدر خالص، لكل أجل كتاب.. ممكن اي واحد رياضي يموت بدون اسباب، وممكن واحد خاربها يعيش اكتر من واحد ملتزم، الدنيا فيها كل حاجة، بس احنا بنفحص الأسباب طبعا، وفقا لمنطق الحياة والواقع اللي كلنا شايفينه.

16/11/2021

فيتامين D

عايزين نفكر ايه اللي بيخلي الأجانب ييجو في الغردقة وشرم ويمددو تحت الشمس بالساعات بالمايوه؟ هل عايزين يتحرقو؟ هل عايزين ياخدو لون وخلاص؟ ليه احنا مش بنعمل زيهم؟ مش بتكلم عالمايوه.. بتكلم على التعرض للشمس.. ليه احنا عكسهم بنستخبى من الشمس؟ هل هما عارفين حاجة احنا مش عارفينها؟

نقص فيتامين D من أكبر المشاكل الصحية اللي بتواجه اللي عايشين في دول شمال اوروبا وكندا، نتيجة غياب الشمس خلف الغيوم معظم اوقات السنة، أغلبهم عايشين على مكملات فيتامين D، عشان كده لما بيشوفو الشمس بتاعتنا بينبهرو وكأنهم دخلو جنة الأرض وبيعرضو اكبر مساحة من جسمهم للشمس عشان يشرب اكبر قدر ممكن من فيتامين D..

مصر من أغنى الدول بالطاقة الشمسية، وتقريبا الشمس عندنا لا تغيب صيف ولا شتا، ورغم كده عندي شبه يقين ان معظم اللي بيقرا البوست ده (بالذات السيدات) لو حللو حيلاقو عندهم نقص فيتامين D.. عشان احنا مش حاسين بالنعمة اللي عندنا، وبنستخبى من الشمس عشان خايفين من الفرهدة ومن اللون الأسمر (مع إنه أحلى لون في العالم)..

فيتامين D ممكن الجسم يصنعه بسهولة بمجرد التعرض للشمس من ربع لنص ساعة يوميا، دون الحاجة لمكملات، ممكن نلاقيه في صفار البيض والاسماك الدهنية وزيت كبد الحوت، بس صعب نجيب احتياجنا كله من الأكل، لازم نتعرض للشمس..

مش بقولك ولع في نفسك في جحيم شمس الظهيرة، ولكن احسن وقت من ٧ ل٩ صباحا الشمس بتكون هادية ورايقة.. ممكن تعدل نظام وقتك وتتمرن في الشمس الصبح او لو مقدرتش عالأقل اطلع البلكونة وافطر فيها، لو الشمس مش بتيجي عندك الصبح اطلع السطح واعملك قعدة حلوة واتمرن أو افطر أو اشرب شاي عالأقل في الشمس..

فيتامين D مهم جدا لكل البشر في كل الأعمار، بيشارك في عشرميت عملية حيوية في الجسم، تقريبا بيعمل كل حاجة، وتقريبا أي حاجة مضايقاك حتلاقيها بسبب نقص فيتامين د.. ونقصه مرتبط بمشاكل صحية كتيرة.. وده حنناقشه بالتفاصيل في البوست الجاي ان شاء الله..

Tito 4 Wellness

12/12/2021

09/12/2021

01/12/2021

29/11/2021

28/11/2021

19/11/2021

17/11/2021

16/11/2021

Address

Website

Alerts

Shortcuts

Share

Category