19/09/2023
واحد كان عامل جمعية، وفي نفس الأسبوع اللي قبض فيه الجمعية، متور الثلاجة اتحرق.
طبعا غيّر المتور بجزء من فلوس الجمعية.
لو سألته عن رأيه في التوافق الغريب بين وقت توفر الفلوس وعطل الثلاجة، ممكن يجاوبك بواحدة من الإجابتين دول:
- يا أخي الواحد مش بيتهنى بالفلوس، يادوب قبضنا، المتور اتحرق، حظ مهبب.
- يا أخي شوف ستر ربنا؟ المتور اشتغل طول الوقت دا، والحمد لله متحرقش إلا والفلوس متوفرة، الحمد لله على لطفه. مش عارف كنت هعمل ايه من غير الثلاجة لو كنت اتأخرت في تصليحها.
هنلاحظ إن في الحالتين، الفلوس اللي أنفقها واحدة، في الحالة الأولى أضاف لخسارة الفلوس غم وعدم رضا بقضاء الله، لكن في الحالة التانية قلب النقمة نعمة وعوض الخسارة لراحة نفسية وإحساس واعتراف بنعم ربنا عليه.
___
سعادتك في الدنيا والآخرة ملهاش أي علاقة بفلوسك. سعادتك نابعة من عقيدة سليمة راسخة في قلبك، وأقوال وأفعال مبنية عليها.
نسأل الله أن يوفقنا إلى الرضا بقضائه وقدره./منقول
