09/09/2024
أكتر مشكلة بتواجه الماميز مع ولادها هي
#العند و عدم سماع الكلام ، بس قبل ما اقدملك حلول للمشكلة دي تعالي نفهم ما وراء سلوكهم ده و اي حدود سلطتي كمربي أو أم على ابني
❎ روح لم لعبك ، اقعد اكتب واجبك ، يلا عشان تصلي
📍كتر الأوامر و صيغة الأمر المباشر بتدايقه و بتحسسه انه ملوش رأي و ده بيبقي نتيجه انه يقف ضدك و ميسمعش الكلام ، لان عايز يحس لمره انه له رأي و ف السن ده دي نقطة قوة لازم كأم استغلها ف بناء شخصيته ، لان من سن ٤ ل ١٠ سنين بتظهر عنده سمة ( التفكير النقدي ) فيبقي ماشي يقول رأيه ف كل حاجة و تبدأ شخصيته تتكون و هتظهر معاه أنماط سلوكية غلط زي حب السيطرة أو التملك ، فيبقي شاف أنه يستحق كل اللعب دي و أن أي حاجة يعوزها تتجاب
و دور هنا كمربي أني اصححه سلوكه ف كل موقف بيحصل ، من غير ما اوصفه بأي صفة سلبية
✋🏼 فمقولوش انت عنيد و مبتسمعش الكلام
و إنما أحدد السلوك اللي عمله و أصححه بطريقة تتناسب معاه و لأن مفيش فنية تعديل سلوك ينفع تتعمم على كل المواقف أو على كل الأطفال ، فابقي حريصة ان رده فعلي على قد اللى هو عمله 🤏🏼 .
فلو مش راضي يلبس التيشرت اللى اخترته له ، اتعصب عليه و اضربه و إلا يلبس ده و هنا رده فعلي مبالغ فيها ف حين ان كان ممكن اخيره بينه و بين اي لبس تاني انا برضو اختارته .
📍 هحكلوا موقف بيحصل ف كل بيت
:ـ ماما أنا عايز اروح العب كوره مع صحابي
:ـ لا مش هتروح
:ـ ليه ي ماما ، ما انا عملت الواجب .
:ـ قولت مش هتروح يعني مش هتروح
الرفض طول الوقت لأي حاجة عايزها ، هيعلمه التمرد فيبدأ يقف الند بالند معاكي على اي حاجة أو الخوف الظاهري من ماما بس من وراها بعمل اللى أنا عايزه و ف الحالاتين النتيجة وحشة ، فلازم نديهم مساحتهم كأطفال عندهم فضول يجربوا و يعرفوا كل حاجة حواليهم ف آمان ليهم طبعا .
و لو عندك أي استفسار أو سؤال ابعتيلي على رسايل البيدج ⁉️💬
#تخاطب
