29/03/2026
🛑 الطفل اللي بيقاطعك فجأة…واللي يرد قبل ما يسمع…واللي يندفع في اللعب ويزق ويزعّل اللي حواليه…
وبعدين ييجي بعد دقيقة يقولك: أنا آسف 🥺
والله دة طفل مش متناقض…ولا بيستعبط…ولا بيستقصد يحرجك.
هو بس…*عنده زرار “استنى لسه مش شغال كويس**
أيوه 👌الطفل ده في علم النفس اسمه: *طفل اندفاعي*
يعني إيه؟يعني ببساطة:🧠 مخه أسرع من قدرته على التحكم
اول ما يفكر → يتصرف فورا
اول ما يحس → يرد فورا
ياسلام بقى لما يتحمس → يقاطع فورا
من غير ما يعدي على محطة: أفكر الأول وبعدين اتصرف 😅
⚠️ المشكلة مش في السلوك بس… المشكلة في الإحساس اللي جواه يعني الطفل ده بيكبر وهو سامع:
❌ إنت رخم
❌ مزعج
❌ مشاغب
❌ مفيش منك فايدة ابدااا
ومع الوقت… بيبدأ يصدق 💔
💔 أخطر جملة ممكن نقولها لولادنا وبالاخص الطفل اندفاعي: إنت كده على طول
✨ وأقوى جملة ممكن تنقذه: إنت بتتعلم… وأنا معاك
🧠 قبل أي تعديل سلوك…في قاعدة مهمة جدا دايما بفكر بيها نفسي : *الطفل هنا محتاج أمان… قبل ما يحتاج تدريب*
طول ما هو حاسس إنه مرفوض عمره ما هيتحسن بجد
طيب نعمل إيه بقى معاهم ياروح انا اعصابي تعبت بجد ؟ تعلى اقولك هنا لازم نشتغل بذكاء… مش بعصبية 👇
1. قبل أي خروجة = اتفاق واضح و مش هزار… ومش أوامر كتير
✔️ 3 قواعد بس ... (مش 10 عشان مش هيستحملهم)
يعني مثلاً:
– لما حد بيتكلم... نستنى
– لو عايز تقول حاجة ...اضغط على إيدي
– لو حسيت نفسك اتعصبت...قولى تعالى نقوم نتحرك سوا شوية
🎯 كل ما كانت القواعد القليلة = كل ما كان التنفيذ أعلى
2. اديله دور بدل ما تسيبه فوضى لان الطفل اللي ملوش دور… بيخترع دور 😅
يعني خليه:
✔️ مسؤول عن حاجة
✔️ يساعد
✔️ يشارك
ساعتها طاقته بتتحول من إزعاج… لمسؤولية
3. غيري طريقتك في الكلام معاه هو صحيح صغير …لكن بيفهم قوي 👌
❌ بلاش:إنت ليه كده؟!
❌هتفضل تحرجني؟!
✔️ جربي:
أنا شايفة إنك بتتحرك بسرعة قبل ما تفكر
إيه اللي حصل جواك ساعتها؟
نقدر نعملها بشكل أحسن إزاي؟
👈 هنا إنتي مش بتكسريه…إنتي بتبني وعيه وبتعلي ثقته بنفسة 🧠
4. العواقب… مش عقاب ايوة في فرق كبير بينهم يعني 👇
❌ العقاب = خوف + كره
✔️ العواقب هى نتيجة السلوك اللى انت عملته = تعلم + مسؤولية
تعالوا ندي مثال بسيط :
– قاطع الكلام → يقعد جنبك شوية
– استخدم إيده → اللعبة تتشال
بهدوء… بثبات… من غير عصبية
🎲 نيجي بقى الجزء اللي بيغير فعلاً وانا بحبه اووي وهو (الألعاب 😏🔥)
🎯 لعبة استنى وفكر... نسأل سؤال… بس ماينفعش يجاوب عليه غير بعد 5 ثواني
⏳ وبعدين نزود الوقت براحتنا
👈 كدة احنا بنساعدة يقوي عضلة التحكم في نفسه
🎭 لعبة التمثيل ... نمثل موقف حصل ... ونعمل 3 ردود:
❌ اندفاعي
🙂 عادي
😎 ذكي
ونسأله: أنهي واحد يخليك كسبان؟
👈 كده بنديله حلول جاهزة وقت الجد ينفذها
🧩 لعبة الحلول الثلاثة يعني أي موقف = لازم يطلع 3 حلول
👈 بنعلم مخه إن في اختيارات ... مش رد فعل واحد وخلاص
🧠 زرار الإيقاف (السحري 😏) يعني نتفق إن في زرار على كتفه لما احط ايدي على كتفك يعني = هو يقول في سره: استنى… فكر ... ,وبعدين نفذ
👈 من غيرما يسبب اي إحراج للطفل ولا ليكي انتى كمان … بس تأثيره جامد جدا 🔥
🏃♂️ وأهم نقطة ناس كتير بتغلط فيها وانا اول واحدة وقعت فيها :
❌ بنسيب الطفل يفرغ طاقته بعشوائية
✔️ الصح: رياضة فيها قواعد والتزام ودور
زي:
🥋 كاراتيه
🏊 سباحة
👈 دي بتبني فرامل من جواه وتخليه يستني ويفكر وستني دوره وبعدين ينفذ ودة بيجي بالتدريج والممارسة والتدريب
❤️ أهم رسالة لازم توصل للطفل : هو شايف نفسه بعينك إنتي... يعني لو سمع:
❌ إنت وحش منك → هيصدقها من غير ما يفكر مرتين
✔️ إنت بتتعلم → هيصدقها وهيثق فى نفسة من ثقتك فيه
👀 مرة في الأسبوع بس… اقعدي معاه قعدة هادية (دى اكتر حاجه فرقت معايا عشان خلتني اشوف ضعفه بطريقته واساعدة صح )واسأليه:
إيه أكتر حاجة بتضايقك في نفسك؟
إمتى بتحس إنك مش قادر تتحكم؟
👈 خليه شريك… مش متلقي أوامر
✨ الخلاصة: الطفل الاندفاعي مش محتاج نكسره… هو محتاج نعلمه إزاي يوقف لحظة… قبل ما يتصرف
🔥 ولو قريتي البوست ده وحسيتي: ده ابني فعلا
اكتبيلي في الكومنت: (عايزة الحل) 👇
وهقولك على تمرين بسيط تعمليه معاه 5 دقايق يوميا هيفرق معاكي فرق مش طبيعي 😏
