Marina Atef - مارينا عاطف

31/03/2026

انتي عارفة اني ساعات بطلب من chatGPT يقولي كلام حلو! 🥹💔

دي أسوء حاجة سمعتها من زوجة ف الاستشارات💔

انتو متخيلين ان في حد ممكن يبقي مستني كلمة حلوة من Ai ؟!
أوقات كتير الأحتياج بيخليك تعمل حاجات انت مش مقتنع بيها ولا ممكن تفكر تعملها ف يوم
بس عشان مش عارف تسيطر ع أحتياجك دا!
للأسف بيوصلك لأفعال صعبه خالص

مش هلوم ع الزوجة دي لأنها حاولت تسدد احتياجها بأقل حاجة غلط
في غيرها بيخون و بيروح ف سكك مش حلوة
لكنها اختارت وسيلة سلمية ف وجهة نظرها

انا بلوم ع المجتمع الصغير اللي حواليها
الزوج الأهل الاولاد
لية اسيب مراتي عطشانة للدرجادي ؟!
لية اسيب مراتي محتاجة بس الكلمة ؟!
لية اسيب اختي او بنتي محتاجة الطبطبة دي ؟؟
لية اسيب أمي محتاجة كلمة حلوة ؟!!!

صدقوني الكلمة الحلوة مش بتاخد ثواني
لكن تأثيرها بيدوم كتير بالذات مع الستات

هقول تاني
الست قلبها ف ودانها
محتاجة تسمع
محتاجة تسمع
محتاجة تسمع عشان تقدر تعيش عشان يقدر القلب ينبض

الست بتعرف تشوف نفسها حلوة بس بتفرق كتير لما بتشوف نفسها حلوة بعين و لسان اللي بتحبهم 👌

ازاي ممكن نبخل ع أهم شخصيات حوالينا بالكلمة الحلوة!!!

ارجوكم مهما كان انشغالك بلاش تنشغل عن اللي بتحبهم بس بكلمة حلوة صدقوني هتفرق كتير و هتحل مشاكل كتير 🤍❤️

أخصائي إرشاد نفسي و أسري
أخصائي تخاطب و تنمية مهارات وتعديل سلوك

31/03/2026

مبدأ هعتمده المرحلة اللي جاية 😉👇

نعيم الجهل👌
عشان أنا لو وعيت ع اللي بيحصل!😡
هيبقي جحيم الوعي عليك ان شاء الله 😉😂

31/03/2026

كلاكيت تاني مرة 😂
أولادنا مشرفين معانا بكرة كمان ف البيت 🙆😂
الأربعاء ١ أبريل المدارس اجازة

الخبر ف أول كومنت 👇

31/03/2026

لا ثواني بس عشان نفهم!

هي الناس اللي ماشية تغني بضمير اوي اغنية 👇
" هو احنا لية ع قد نيتنا مخدنااااش ؟!!"

انتو بجد ؟!🤔
انتو عوزين تاخدو ع قد نيتكو فعلا ؟!! 😂

طب ربنا ينولهالكوا ياااااارب 🙌😂😂

30/03/2026

اللي هتصدقي ف نفسك! الناس هتشوفه و تصدقه فيكي 💪
جزء من ندوة

أخصائي إرشاد نفسي و أسري
أخصائي تخاطب و تنمية مهارات وتعديل سلوك

30/03/2026

فكرة إنك قابل نفسك بعيوب! مقبولة
لكن فكرة إنك مش قابل تتغير و بتأذي اللي حواليك بعيوبك!
أهي دي اللي مش مقبولة أبدا ✋⚠️

29/03/2026

علمو يتصرف مش تتصرف بداله 🤚⚠️

من اسوء الحاجات اللي ممكن نعملها مع ولادنا من صغرهم أننا نشيل عنهم حمل التفكير ف تصليح أخطائهم الصغيرة او حتي قراراتهم الصغيرة 😏

يعني لما ابنك يوقع طبق الأكل... بدل ما تصوتي و تلطمي... اطبي منه انه ينضف مكانه
حتي لو مكنش بينضف فعلا و بيعمل اي حاجة وخلاص... بس كفاية انه فهم ان طريقة طريقة اصلاح الغلط اللي انت عملته

لو ابنك الكبير وقع ف مشكلة ف المدرسة... اطلب منه يفكر ف حلول و يحاول يحل مشكلته
مش انتي تمسكي جروب الأمهات و تبعتي فويس ١٧ دقيقة بتحاولي تحلي عن ابنك

اة بالمناسبة الصورة دي لما ابني قرر انه يجيب الجوانتي بتاعه وهو بيسوق الاسكوتر وعشان انا عارفة انه مش هيعرف يسوق بي
قولتله بلاش عشان لو قلعته انا مش هشيله
و قد كان فعلا.... معرفش بيسوق بي و لما طلب مني اشيله و قولت لا
و اهو اتصرف 👇🤷

صدقوني الهدف مش أننا نحمل ولادنا فوق طاقتهم
ولا اننا نتخلي عنهم وقت مشكلتهم
لكن الهدف انه ميبقاش شخصية اعتمادية
اعتقد انك متحبيش ابدا ابنك يكون اعتمادي سواء كان ولد ولا بنت

للأسف ياماااااااا بنشوف رجالة و ستات مبتعرفش تتحمل المسئولية لأنها متعلميتش دا ف بيت أهاليها وكان دايماً متشال عنها

لو هنعلم ولادنا يتحملوا مسئولية الحاجات الصغيرة اللي بيعملوها!
لما يكبروا هيبقي عارف يتحمل مسئولية الحاجات و المشاكل الكبيرة وهو كبيرة 💪

جربوا تخلوا ولادكم قد المسئولية من صغرهم
صدقوني هيكونوا مختلفين عن اي حد لما يكبروا 💪😊


أخصائي إرشاد نفسي و أسري
أخصائي تخاطب و تنمية مهارات وتعديل سلوك

29/03/2026

دايماً عندي سؤال معرفش ازاي الحkومة مش بتفكر في ولو بتفكر في ازاي مش بتاخده بعين الأعتبار ؟!!! 🤷

لما بيدو الأولاد اجازة من المدرسة... بيروحوا فين و أهاليهم عنده شغل عادي؟!!!!
الأهالي بتودي عيالهم فين ؟!!!!
اللي معندوش إمكانية يودي حضانة ؟! هسيب عياله فين ؟!
اللي اهله بعيد عنه لو معندوش أهل متاحين ياخدوا العيال! هيسيبوا عيالهم الصغيرين فين ؟!!!!!

الأهالي اللي مش بتطمن ع أولادها مع حد ابدا! هسيبو ولادهم فين؟!!!!!!

#محتاجين حد من المسئولين يفكر ف مشروع قانون يريح بي الأهل و يعملهم مكان مدفوع التكلفة يقدروا يسيبوا أولادهم في وقت الاجازات اللي مش معمول حسابها و بتيجي فجأه دي

محتاجين نفكر ف إمكانيات الأسرة و نقدر قدرتهم المالية و التكاليف اللي بتيجي فجأة ف الشهر و اكيد مكنش معمول حسابها

ربنا يعين الكل و يقدركم ع الحياة بشكل أفضل 🙌🤍

مستنية أعرف انتو بتعملوا اية ف أولادكم ف الاجازات المفاجأة دي؟!

28/03/2026

هو انتي عشان تبقي أم شاطرة لازم تبقي واقفه ع دماغ ولادك طوووول اليوم ؟!!!!!
وتنسي نفسك ؟!!!!

27/03/2026

مين اللي ممكن يتعدا حدودة معايا ؟!
هو انا اصلا حاطة حدود ؟!
يعني اية اصلا حدود و ازاي احطها ؟!
مين اللي هطبق عليه حدودي ؟!
طب ما كدا هخسر كل الناس ؟!
طب هي الحدود ليها انواع ؟! و ازاي أحافظ ع كرامتي و حدودي مع أقرب الناس ليا؟!!!!

كل دا و أكتر و بصورة أعمق 😊
هتكلم و اتناقش في مع بنات ثانوي بكنيسة 🤍
ف ندوة بعنوان #متقربليش 🤚⚠️
" الحدود النفسية والجسدية"

يوم السبت ٢٨ مارس ٢٠٢٦ الساعة ١١ صباحاً


أخصائي إرشاد نفسي و أسري
أخصائي تخاطب و تنمية مهارات وتعديل سلوك

27/03/2026

لا يعني لا
هوووو كدا
مش قولتلك
طب ياريتك تبقي زيه
مش هتتغير
مفيش فايدة فيك
دنا لما كنت قدك
يا فاشل
غيرك معندوش اللي عندك
هنبقي نشووووف
انا بشقي عشااااااانك

دي كلمات بتعيظ ولادنا لأسباب كتير اوي
محتاجين نغير طريقة كلامنا عشان نفتح باب حوار مع ولادنا 💪🤍

جزء من محاضرة

أخصائي إرشاد نفسي و أسري
أخصائي تخاطب و تنمية مهارات وتعديل سلوك

26/03/2026