19/04/2025
تربية واعية مش_دلع
امتى الطفل يفتكر انه 'أقوى' من أهله؟؟ اسف في التعبير 'يركبهم' او 'يخرج عن السيطرة'!!!
الطفل مش بيطلع 'مسيطر' بالفطرة؟ لا دة بيتعلم 'السيطرة' بشكل غير مباشر للآسف من خلال غلاطات تبان صغيررررررة اوي بس لما تتكرر تلاقي الطفل اتحول لشخص 'عصبي' و'عنيد' وللآسف مش بيحترم أهله…
في أوقات الأهل بيستسلموا لطلبات أطفالهم عشان الهدوء أو لأنهم بيحبوهم وعايزين يفرّحوهم. بس لما ده يتحوّل لأسلوب حياة، الطفل بيتعلم إنه يضغط وياخد اللي هو عايزه بأي طريقة.
** النتيجة؟
طفل بيكبر وهو فاكر إن الدنيا لازم تمشي على مزاجه، وده بيأثر على علاقاته، شغله، وحتى ثقته في نفسه.
** طيب ايه المواقف اليومية الي ممكن نغلط فيها بدون وعي وبتخلي الطفل يحس إنه أقوى:
- الطفل يعيط في السوبرماركت، فالأهل يشتروا له الحاجة عشان “نسكته”.
- الطفل يتعصب ويضرب وانا أعاديها عادي واقول معلش مش فاهم
- يرفض ياكل الأكل العادي، فيقوموا يطبخوا له حاجة خاصة بيه.
- يقاطع الكبار في الكلام، وماحدش يوقفه.
- اتفقنا نمشي في وقت معين ولما عيط غيرنا الخطة
- مفيش قواعد متبعة، خصوصاً النوم والاكل
- يهدد إنه مش هيحب مامته أو باباه لو ماعملوش اللي هو عايزه، والأهل يخضعوا.
- نهدده بعقاب وننسى نعمله او نرجع في كلامنا
** علامات بتقول إن الطفل بدأ “يركب”:
•كل حاجة بـ”الزن” و”العيط”
•بيرفض يسمع “لا”
•الأهل بيتنازلوا دايمًا عشان يرتاحوا
•هيزعق ويضرب ماما قدام الناس
•الطفل بيهدد أو يبتز عاطفيًا
**إزاي نعدل ده؟
•حط حدود واضحة وثابتة- مواعيد، اتفقات، حدود، عواقب
•خليك حازم لكن بحب، مترجعش في كلامك تحت اي ظرف علشان كدة برضه محتاج تفكر كويس قبل ما تهدد او توعد بحاجة انت مش قدها!!
•علّم الطفل يفهم كلمة “لا” وإنه مش دايمًا هياخد اللي هو عايزه - 'لا' ممكن تتقال وهو في حضنك
•كافئ السلوك الإيجابي بكلام تشجيعي طول الوقت
•تحت اي ظرف ماتسمحش لأبنك يتعدى حدوده مع أحد الأبوين لانها لو عدت مرة هتتكرر كتير..
الطفل محتاج حب واحتواء… بس كمان محتاج حدود عشان يعرف يتصرف صح.
التوازن هو السر!
