13/07/2024
= صباح الخير يا دكتوره
- صباح الفل 🌸
= انا معدل الحرق عندى ضعيف و بتخن بسرعه جدا رغم انى مش باكل كتير
- تمام , طاب واحده واحده كده .
1- بنام امتى و نصحى امتى ؟
- لا والله بسهر لبعد الفجر و بصحى على الضهر كده .
2- طاب فى حركة بنعملها و لا الحركة ضعيفة .
- لا مفيش حركة خالص اصلا .
3- طاب الأكل نظامه ايه ؟ ما اكيد مش بتاكلى كميات كبيرة بس ليل نهار تلقيط اكل و سكر !؟
- ايوة بالظبط مش باكل كتير لكن دايما عاوزه حاجات مسكرة و بلقط اكل كتير على مدار اليوم بس انا بقول عليه " سناكس او حصصى "
تمام , طاب واحده واحده مع بعض كده بقى .
* اول حاجة هنام بدري شوية بالتدريج لان السهر بيبوظ الهرمونات بتاعت الجسم كلها و بيرفع الكورتيزول و الإنسولين !؟
= لا والله يا دكتوره معلش مش هعرف انام بدري انا ظروفى كده و اتعودت على كده .
* ممم , طاب هنعرف نتحرك لو نص ساعه كل يوم مثلا ؟
= لا والله جسمى واجعنى و مفيش طاقة اتحرك او اعمل اى حاجة
* ماهو جسم حضرتك واجعك من السهر و قلة الحركة اصلا !؟
= لا والله معلش مش دلوقتي لما ابقى اخس .
* طاب الأكل , مفيش اكل من برا البيت خالص و هنقلل النشويات والسكر شوية لان مفيش حركة مبذولة علشان تحرق كم السكر ده .
= لا والله مش هعرف , بجوع و بهبط ومش هعرف .
* ماهو بالتدريج يا فندم مش مره واحده ! بس لازم من كده .
= لا والله معلش , لما ابقى اخس ابقى اعمل كده .
* ماهو حضرتك هتخسى ازاى اصلا ! دا لا اكل هيتنظم ولا نوم مظبوط ولا حركة ! ازاى يعنى !
= اومال انا جيالِك ليه ! ما حضرتك اتصرفى بقى !
* لا يا فندم والله انا مش ساحره , حضرتك اللى هتتعبى و تعملى وانا عليا التوجيه و النصيحة , اكيد مش انا اللى هعمل الدايت يعنى !
= لا , يبقى تشوفيلي حباية او اى علاج ينجزنى !
* لو فيه مكانش حد غلب كانت حلت مشكلة البشرية .
* يبقى تشوفيلى حل !
= اومال انا بقول ايه بقالى نص ساعه ! هنظم و هنظم و هنظم و هنعدل السلوك الغلط و الجسم هيرجع يستجيب معانا تانى مع الوقت .
= ما انا مش هعمل ده , عارفه نفسى !
انا هعمل تكميم بلاش وجع دماغ
* ما تعملى يا فندم هى معدتى انا ! بس بعد 4 سنين لما حضرتك تنورينى هنا تانى بعد فشل العملية هقول لحضرتك نامى بدري بردو و اتحركى وبلاش سكر كتير .
= تفشـل ليه انتى بتفولى عليا ! ان شاء الله هتنجح وهبقى زى الفل
* يارب والله بس اشك , لان السلوك طالما من الأساس غلط يبقى كده ما بنى على غلط فـ هو غلط
يعنى عاجلا اجلا طالما السلوك من البداية متغيرش ف اى شئ مبنى عليه هيكون فاشل .
وافتكر دايما
😉
لو عندك أى استفسار سيبه فى التعليقات أو تواصل معنا
على الأرقام التالية :
موبايل📞 : 01012544180
واتــــــس آب : 1012544180
