د. محمود عصَر - Dr. Mahmoud Asar

30/07/2025

ممارسات بيقوم بيها العقل بتكون نتيجتها الوصول لقناعات غلط ومؤذية لصاحبها

القفز للاستنتاجات

فيه ناس عندها عادة إنها بسهولة تقفز للاستنتاجات بدون أي دليل حقيقي ... وعادة ما بتكون الاستنتاجات دي سلبية!

الاستنتاجات دي بتظهر في صور مختلفة:

يعني مثلا تبقى في مكان عام وتلاقي ناس متجمعين وبيضحكوا، فورا تستنتج إنهم بيضحكوا على شكلك! ده اسمه قراءة الأفكار!

أو تكون داخل امتحان السواقة وتلاقي الراجل اللي حايمتحنك مكشّر ومش لطيف نهائي، تقول لنفسك أنا حاسقط أكيد! ده اسمه تنبؤ بالمستقبل!

تقابل واحد زميلك في الشغل، تلاقيه بيسلّم عليك ببرود، فورا تقرر إنه أكيد زعلان منك وتبدأ تدوّر على سبب زعله، وهو في الحقيقة نازل متخانق مع مراته عادي!! ده اسمه شخصنة!

لتالت مرة، مخك بيريّح نفسه على حسابك، حرفيا بيرمي لك أي استنتاج ويسيبك تهري فيه مع نفسك ...

وحسب نقطة الضعف اللي عندك أصلا: إذا كنت مقتنع إن شكلك وحش، أو مقتنع إن الناس مش بتحبك، أو مقتنع إن الناس كلها لئيمة ومش دوغري! بيرمي لك الاستنتاج اللي عارف إنك مش حاتجادل فيه!

الحل؟ قبل ما تصدق أي حاجة دماغك ترميهالك، خد خطوة لورا واسأل نفسك: فيه دليل على الكلام ده؟؟ طب مفيش أي دليل تاني يعارض الفكرة دي؟؟ أكيد فيه ... بس انت اللي مابتدوّرش!

ماتطّمّنش قوي لعقلك ودايما دوّر وراه ...

29/07/2025

ممارسات بيقوم بيها العقل بتكون نتيجتها الوصول لقناعات غلط ومؤذية لصاحبها

التعميم

فيه ناس لما بيحصلها موقف وحش مرة، تفتكر إن الدنيا كلها كده وهتفضل كده طول عمرها!

يعني مثلًا:
لو حد اتعرّض للخيانة أو الأذية قبل كده، فورا يقرر يعتبر إن كل الناس خاينين أو مؤذيين!
لو حد اتعرّض ليوم صعب وحصلت له شوية مشاكل تبان مش طبيعية، تلاقيه يتفق مع نفسه بعد كده إنه كل يوم الصبح حايصحى يفكّر نفسه إن اليوم ده مش حايعدّي على خير!!!

حاول توقّف وتفكر شوية ... هل فعلًا مفيش حاجة بتمشي معاك كويس؟ مش ممكن! ... هل اللي بيحصل معاك فعلا مش طبيعي ومابيحصلش لحد تاني غيرك؟ مش ممكن!!

الفكرة إنه لتاني مرة مخك بيريّح نفسه على حساب أعصابك انت!

خد بالك كمان إنك لما تستجيب لطريقة التعميم دي وتبقى مضغوط ومتشائم طول الوقت ده بيرجع يأثر على طريقة تصرفك مع المواقف اللي بتقابلك والمشاكل بتتعقّد أكتر مش بتسهل! وده بيضغطك أكتر ويوتّرك أكتر وهكذا ...

يعني ببساطة، خد الأمور ببساطة! قاوم النزعة اللي عند كل واحد فينا أنه يعمّم أحكامه على الناس وعلى الدنيا ... الصورة مش كلها إسود في إسود زي ما دماغك ساعات بتصورلك!

29/07/2025

إذا كنت قد فشلت في القيام بإنجاز كبير، أبحث عن إنجاز صغير وقم به بإتقان!

28/07/2025

ممارسات بيقوم بيها العقل بتكون نتيجتها الوصول لقناعات غلط ومؤذية لصاحبها:

يا أبيض يا إسود!

لما تلاقي نفسك بتشوف الدنيا يا كده يا كده، يا أبيض يا إسود، مافيش نص نص!

يا إما أنا ناجح جدًا، يا إما أنا فاشل تمامًا، يا إما كل حاجة ماشية تمام، يا إما كله حاجة بايظة، يا إما الناس كلها محترمة يا إما الناس كلها مافيهمش ولا واحد كويس!!

ده معناه إن المخ بيريّح نفسه على حسابك!

المخ بيحب الاستسهال! مش حايفضل يصنف كل حاجة بتحصل حواليه بدرجات مختلفة، أسهل عليه يصنّف كل حاجة بتحصل تحت عنوانين اتنين بس، يا حلو يا وحش، يا أبيض يا إسود!

كمان المخ مابيحبش الغموض، مش بيرتاح لما مايكونش فاهم إيه اللي بيحصل بالظبط! فبيبدأ يبسّط كل حاجة لغاية ما يقدر يصنفها تحت نفس العنوانين ... يا أبيض يا إسود!

مشكلة طريقة التفكير دي إن تأثيرها دايما سلبي على الواحد ... يعني مثلًا:

قررت تبدأ دايت وتاكل صحي، وتاني يوم لقيت نفسك كلت حتة شوكولاتة ... تلاقي صوت في دماغك بيقولك: "خلاص كده خربت! كل بقى بقيت العلبة!"

الصح إننا نفهم إن مفيش موقف واحد يقدر بطوله يحدد هوية أو قيمة حد ... مفيش غلطة واحدة تقدر بطولها تحدد مصير حد ... مهما كانت المشكلة هي إيه، دايما فيه حل ... دايما!

الدنيا عمرها ما بتخلى من الحلول ... وكل نهار جديد فرصة لبداية جديدة ... بس لازم الواحد يخرج من دايرة "يا كله يا بلاش"!

28/07/2025

خرافة: أنا فشلت كثيرا وبالتالي أصبح الفشل جزءا من قَدَري

الحقيقة: الماضي لا يعبّر عن المستقبل ولا يحدّده

27/07/2025

تذكر، التعرض للألم أمر حتمي، لكن الشعور بالمعاناة أمر اختياري!

27/07/2025

ممارسات بيقوم بيها العقل بتكون نتيجتها الوصول لقناعات غلط ومؤذية لصاحبها:

الحذف

العقل البشري مش محايد إطلاقا! ولاؤه بالكامل لصاحبه وعِمياني!

"شوف انت عاوز تصدق إيه وأنا حاتصرف وأثبتلك الحاجة اللي انت عاوز تصدقها! أنا شغلتي أريّحك!"
"عاوز تقنع نفسك بأي حاجة وبتدور على دليل تثبت بيه الحاجة دي؟ سهلة!"
"حافكّرك بكل موقف يؤيد الفكرة اللي عندك وحامسح من ذاكرتك أي موقف يعارض الفكرة دي!"
"لو خطر في بالك إن الشخص ده وحش أو مش بتحبه، حافكّرك بكل حاجة وحشة عملها وكأنك عمرك ما شفت منه حاجة حلوة!"
"لو سيطر عليك شعور إنك فاشل، ولا يهمك، حاثبتلك من ذكريات فاتت إن انت فعلا فاشل!"

عقلك مش صاحب مبدأ، هو كل همّه إنه يريّحك ... القصد ماينفعش تثق في عقلك ولا في أفكارك مهما كانت تبان مقنعة ومنطقية ... ما أسهل إن الواحد يقدر يقنع نفسه بأي حاجة هو عاوزها!

مفيش حقيقة مطلقة، كل شيء بدليل!

27/07/2025

بتحس أوقات إن مزاجك اتقلب فجأة؟ ده غالبا بيكون بسبب خواطر ظهرت فجأة في دماغك قلبت مزاجك من غير ما تاخد بالك!

بسبب الشخصية اللي الواحد بيتولد بيها وبسبب تجارب حياتية كتيرة جدا الواحد بيعيشها تقريبا من أول ما يتولد، بيبدأ الواحد يعتنق مجموعة من القناعات اللي تخص تصوره عن نفسه وعن اللي حواليه وعن الدنيا عموما ...

للأسف الواحد بيتعامل مع القناعات دي على إنها حقيقة مطلقة ولازم يسلّم لها بدون تفكير، مع إن ما أسهل إن القناعات دي تكون غلط ومؤذية وسبب أساسي في فشل الواحد سواء في علاقاته أو في تحقيق أهدافه أو في نمط حياته بشكل عام!

طيب ده بيحصل إزاي؟ بيحصل عن طريق بعض الممارسات العقلية الضارة ... ممارسات بيقوم بيها العقل بتكون نتيجتها الوصول لقناعات غلط ومؤذية لصاحبها!

نحكي أكتر عن الممارسات العقلية دي في البوستات الجاية ...

26/07/2025

الإنسان بطبيعته عبارة عن مكنة صناعة معاني! أي حاجة بتحصل حواليه مهما كانت بسيطة لازم المخ يدور لها على معنى ... اللي حصل قدامي دلوقتي ده معناه إيه؟؟ ودي عملية من كتر ما هي سريعة جدا وبتتكرر كتير جدا الواحد مابياخدش باله وهي بتحصل!

المشكلة في المعاني دي إن الإنسان بيتعامل معاها كأنها حقيقة مطلقة مش محتاجة تتعرض للاختبار! طالما أن فهمت اللي حصل كده يبقى هي كده!! وبيبدأ يتصرف على أساسها بمنتهى الثقة ...

عشان الواحد يضمن إن عقله مش بيخونه، لازم يتعلم يشوف المواقف اللي بتحصل حواليه وبتهمّه من كذا زاوية ويعيد التفكير فيها بعقل متزن علشان يوصل لصورة أوضح وأقرب للحقيقة ...

26/07/2025

دكتور، أنا خائف من الظلام ... أطفأ الطبيب النور وقال الآن نحن في هذا معا! تصبح المخاوف أخف عندما نشاركها!

26/07/2025

25/07/2025

"ليه أنا؟! مش كفاية اللي عدّى عليا؟! أنا مش مستحمل حزن تاني"

أوقات كتير بنتمنى نعيش من غير تعب، من غير حزن، من غير ألم ...

بس الحقيقة؟ مفيش حد في الدنيا دي بيعدّي منها من غير ما حاجة توجعه، مهما كان الشخص ده إيجابي ومتفائل طول الوقت!

الحزن والتعب والخوف جزء من مادة الحياة، زيها زي الفرح والراحة والأمان!

السر إن الواحد يكون فاهم حقيقة نفسيته كويس، ده بيخليه قادر يستعد لأي مشاعر سلبية ممكن تظهر فجأة في طريقه!

وكل ما الواحد يفهم نفسه أكتر، كل ما يبقى أسهل عليه يسيطر على مشاعره وماتبقاش مشاعره هي اللي مسيطرة عليه!

إحساسنا إننا "مش المفروض نحس بكده" أو "المفروض مايحصلّيش حاجة صعبة كده تاني" ... كل ده مجرد وهم! مفيش حد "من حقه" يعيش حياة من غير ألم!

سنّة الحياة إن الواحد مايبقاش موعود بالراحة على طول، لكن بالتأكيد في إيدك تكون قوي كفاية إنك تعدّي من أي ظروف تقابلك بنفسية سليمة!