قصتى مع حب ال French بدأت من زمان اوى ..........
من و أنا عندى 5 سنين، أنا كنت فى مدرسة راهبات ، وأنا بحب مدرستى أوى ، وكنت بتعلم حاجات حلوة كتير لها علاقة بالحياة عامة وطبعا كان كله بال French . بس كان عندى مشكلة إنى كنت بتكسف أتكلم كتير قدام زملائى فى الفصل ، والمشكلة الأكبر انى كنت طفلة رغاية جدا. اه والله بس مكنش فى حاجه بتشجعنى علشان أنطلق وأرغى وأطلع مواهبى.
ليه ياترى؟ لأن الحصص كانت روتينية أوى أوى.
العلاقة بينى وبين المدرسين كانت عبارة عن شرح وتحضير لواجبات وحفظ وإمتحانات وبس . طيب هو مكنش فى حاجه لطيفة تخلينى أطلع مواهبى المدفونه اﻹحفلة عيد الأم اللى كنت بستناها من السنة للسنة. المهم خلصت المدرسة وكنت محتارة أدخل كلية أيه !!!!!
أنا بحب ال French جدا جدا بس مش عارفة أستمتع به. المهم إخترت آداب قسم French علشان أدرس أصول اللغة والحضارة وكل ما يخص اللغة حبيبتى وقولت هو ده اللى هيخلينى أعبر عن شغفى بطريقة ممتعه .
لكن للأسف لقيت ان حياتى فى الجامعه كلها كانت متختلفش كتير عن المدرسة ، عبارة عن مذاكرة وحفظ . طب إيه ياجماعه أنا امتى هلاقى نفسى وأعرف أعبر عن مواهبى وطاقاتى المدفونه.
مش مهم خلصت الجامعه بسلام وآمان و إحترت بقى اعمل ايه !!!!!
أشتغل ايه ، أنا زي مقولتلكوا بحب جدا ال French . طب أجرب كده إنى أكون مدرسة ، بس أنا مش حاسانى خالص ، إستخرت وقولت جربى يابنتى مش هتخسرى حاجه.
فعلا بدأت عالطول ودخلت أول مرة فصل وكنت خايفة من رد فعل الطلاب، هل هكون مملة ؟ ومش هعرف أحبب ولادى فى اللغة. طيب هل هعرف أخليهم يتكلموا ويعبروا عن نفسهم باللغة؟
أصل اللغة عبارة عن ممارسة وربطها بالحياة اليومية بطريقة عملية مش عبارة عن حل Sheets وحفظ تصريف أفعال وخلاص ياجماعة.
المهم ..... مكنتش لسه عارفة أستخدم الComputer ده من 17 سنة و فضلت أدور فى المجلات على صور تعبر عن إللى أنا عايزة أشرحه للولاد وإتهريت قص ولزق علشان اعمل بيهم Activity Sheets من تأليفى فيه كل الكلام اللى بنستخدمه فىحياتنا اليومية وهم من أصل فرنساوى زى Chocolat , Chemise , Cinéma , Pantalon , Casquette ، وقسمت الولاد لمجموعات وكانت تقريبا دى أول مرة الولاد يعملوا كده فى الفصل فكانوا مستغربين أوى. هو أيه اللى بيحصل بالظبط!!!!! وقضينا الحصة كلها ضحك ولعب والولاد فعلا استمتعوا .
ومن هنا أتاكدت ان اﻹبداع مهم وإن الولاد من أول مرة بس حسوا إنهم هيقدروا يتكلموا وينطقوا اللغة اللى معقداهم دى ، بالرغم إن دى كانت مدرسة بيدرسوا فيها ال French كاللغة الثانية.
ومن هنا أخدت على نفسى عهد إنى لازم أدرس وأطور من نفسى علشان ألاقى طرق كثيرة مختلفة ومبهرة للطلاب علشان أخليهم يحبوا الFrench ويحبوا يتكلموها.
روحت المركز الثقافى الفرنسى ومسبتش ولا كورس للمدرسين ولا دبلومة محضرتهاش وذاكرت كتير أوى مع الشغل و كنت أحضر فى المركز وأورح أطبق مع الطلاب وبعدين أخدت دبلومة لمدة سنتين معتمده من Paris Sorbonne علشان أعرف إزاى أعمل مشاريع طويلة المدى لمدة سنتين من خلالها طلابى بيتعلموا إزاى ينموا مهارتهم اللغوية .
وعلشان بقى كمان بحب المسرح جدا جدا بدأت أخلى طلابى يتفرجوا معايا على مسرحيات كتبوها طلاب فى دول كتير فى العالم وفضلنا نحلل فيها لغاية لما شجعتهم إنهم يكتبوا معايا مسرحياتهم الخاصة من وحى المناهج بتاعتنا وفعلا كل سنة كنا بنعمل أكتر من عرض مسرحى بنقدم من خلاله إما قصة درسناها فى الفصل وحولناها لمسرحية لطيفة او فكرة مشروع عملناه مع بعض وحولناه هو كمان لعرض مسرحى .
المهم الطلاب كانوا فى غاية السعاده لأن كل واحد كان بيلاقى نفسه بجد !!!!!
اللى بيرسم كان بيعمل الديكورات ، اللى نفسه يعمل Design للبس كان بيعمل كده ونبعت نفصل عند حد محترف. اللى طبعا بيحب اﻹستعراضات كان بيرقص المهم عندى انهم كلهم كانوا بيشاركوا فى كتابة النص وإعداده وتمثيله واخراجه وأهم حاجه الكتابة علشان من خلالها بيطبقوا كل القواعد والكلمات الجديده فى النص ده. وأنا على مدار حياتى أخرجت تقريبا 35 عرض مسرحى.
مش قادرة أوصف شعورى لما كنت بشوف أولياء الأمور فرحانين بأولادهم وقت العرض ، وهما شايفين إن ولادهم حبوا ال French واتقدموا فيه وبقت درجاتهم حلوة أوى كمان ده غير نطقهم وكانوا بيقولوا ولادنا بقوا فرنساويين.
وكان من تعليقاتهم كمان إن الولاد بيتعاملوا مع الFrench كالغة مش ماده بيذاكروها ويمتحنوها وبس!!!!
طيب يامروة هو كده خلاص ؟ لا أكيد لا!!! دورت ولاقيت إنى لازم على قد مقدر أنشر الفكرة علشان أساعد الطلاب اللى مش فى فصولى، فقدمت على دراسة تابعه للمركز الثقافى الفرنسى لمدة سنتين علشان أكون مدربة مدرسين معتمده من ال Sorbonne و إبتديت أشتغل مع مجموعة من المدرسين ودربتهم علشان يستخدموا المسرح والانشطة الدرامية كوسيلة لتعليم اللغة بشكل فعال .
والحمدلله بعد معاناه وشغل كتير ذاكرت وطبقت وسافرت فرنسا فى 2014 وشوفت المدربين بيعملوا إيه مع المدرسين علشان أتعلم من أهل الخبرة ومن أرض الواقع.
وبجد اتعلمت كتير أوى وناقشت الرسالة واعتمدت الحمدلله . وبعدين قولت لنفسى إن ده الوقت إنك تنشرى فكرتك أكتر وعلى نطاق واسع ومن هنا جت فكرة Franco Theatro Academy
وإبتدوا معايا مدرسات جميلات موهوبات ومهوسات باللغة الفرنسية علشان نعمل ال Team ونبدأ نعمل ال Activités الكتيرة اوى أوى مع كل ولادنا.
ومن خلالها هننقل حبنا لل French للولاد اللى بيدرسوه كاللغة ثانية او لغة أولى ونساعدهم علشان يعبروا باللغة صح.
